Malakiheryo wa Ale Anilavula Myaha sa Muthukumano wa Orummwa

Okhuma Orummwa Ahu ola wa Omwene, moolumo a eprograma ya Muthukumano wa Orummwa anrowa okhweeheriwa. Malakiheryo ni soowuupuxerya iya sinittharelana ti sa niinano, nto sinitthokiherya mwaha wa Orummwa Ahu wa Omwene wa Maio 2009 ekunya, waarina muru oni: “Como se preparar para a Reunião de Serviço”.

◼ Mwaha: Onilavuliwa ni mutthu mmosa paahi ottharihelaka opuro othoonyiwe, nto alipa-oowiriyana khanilavula etthu. Mulipa-oolavula mwaha ola onittittimiherya iponto seiyo sinrowa waakhaliherya anna a muloko owo.

◼ Makoho ni Waakhuliwa: Mwaha ola onithokoreriwa ntoko siniiriwa aya Yoosoma ya eSentinela. Ole oniiriha mwaha ola ohinatthi othokorerya olavule masu vakhaani oopacerya, nto wanikisa wa mwaha olavule masu ookiserya. Okathi woothokorerya ohaana osyaka ohimya itthu sinceene. Okathi wakhala, soolepa sinittittimiherya iponto suulupale sohaana osommwa. Ittima sihisommwe akhala wira khavahiwe malakiheryo wira sisommwe.

◼ Mwaha ni Makoho Vakhaani: Mwaha ola alipa-oowiriyana vakhaani annivaha ikomentaario. Khonilavuliwa mekhawe paahi ni khonilavuliwa ntoko mwaha wa makoho ni waakhuliwa okathi wotheene.

◼ Sowooniherya ni Okohiwa ni Waakhula: Moolumo oowi yowooniherya anitaphulela wira munna onilavula mwaha ola ohaana opaka marehereryo wira ekhale yowooniherya; khahiyo wira ohaana opaka owo mwaneene. Ale anaavekela awe wira apake yowooniherya eyo, ahaana okhalana ntakiheryo nooloka ni owerya wooniherya saana, nto vaweryaneya owo ohaana olavulana atthu awo wira yiireherye saana vahinatthi. Munna aahiiso murokora onimuthanla awe wira opake yowooniherya eyo, ohikhale namalaleerya a niinano mwaha woophavela orowa opalkuni paahi, masi pooti omurumeela namalaleerya a niinano wira okhale mwaneene etthoko. Okathi anamalaleerya anrowa aya opaka yowooniherya eyo ahaana owehaka ori alipa-oowiriyana. Ale anrowa okohiwa sookumanana saya ahaana okohiwa yeemenle ene opalkuni ohiya akilanthi ene mapuro ari alipa-oowiriyana. Sowooniherya ni okohiwa ni waakhula sohaana oreheriwa vahinatthi. Akhala wira okathi woovira ni munna onilavula mwaha ola ohaana ovukula mpantta ola, nto owo ohaana opaka sowooniherya ni okohiwa ni waakhula iwo voohinteela. Akhala wira murummwa oorumeela oniphavela omuthanla munna wala murokora wira iirele mpantta mwaha awe, ohaana omukoha mutokweene onihoolela nikhuuru na axitokweene a mmulokoni ohinatthi omurumeela namalaleerya owo.

Akhala wira mwaha mmosa ookhalana malakiheryo a moota woopaka, malakiheryo awo ahaana otthariwa saana. Akhala wira anna anoopaka Muthukumano wa Orummwa attharihelaka malakiheryo amanle ahu othokorerya, vanookhaliherya wira Mithukumano sa Orummwa “sìriwe ni nttittimiho ni wiwanana”.​—1 aKor. 14:40.