Muteko Ahu Khahiyo wa Mahala—Mwaha ola okumihiwe Anuário das Testemunhas de Jeová de 2013
Mianmar
Epaaxina 113—115
‘Owela Myaako’
Myaako sa epooma ya oChin, ti soorakama vanceene. Iyo sinniphiya imeeturu 900 mpakha 1.800 orakamela waya musulu; masi myaako sikina sinniphiya imeetru 3.000. Myaako sinceene sikhuneeliwe ni itakhwa suulupale seiyo sirina miri soorakama ni makukhu a ikoore sooreera ni sookuxa murima. Nto mwaha wa makhalelo a etthaya a elapo ela, ti voovila weetta mukwaha. Ipooma saya sirina iphiro soohiheliwa alcatrão sookottoopasa, seiyo sihinivireya okathi wa epula ni sinkhala soothipakaseya mwaha wa itetere. Mittetthe sinceene soorakamela, vaniweryaneya ophiya ni mwentto paahi. Masi mixankiho iyo khasinaakhoottiherya arumeyi a Yehova olaleerya ihapari sooreera wa atthu anikhala mapuro ale.
Murokora mmosa oniitthaniwa Aye Aye Thit, yoowo aarumela ni iyawe esirkwitu epooma ya oChin, onihimya so: Miyo kinnunwe muttetthe wowaataleya oDelta ya Ayeyarwady ni kaahitikiniheya mwaha wooweha myaako sooreera sa muttetthe wa oChin. Nto kaahiwela mwaako woopacerya moohakalala masi nuumala ophiya osulu waya kaahikhulumuwa vanceene ni nkaawerya omumula saana. Nuumala owela ni okhuruwa myaako saamukhaani sinceene, miyo kaahitemwa vanci nto kinuupuwela wira kaamookhwa. Nuuvira okathi, kaahiixutta owela myaako mwa enamuna ela yookhalela: weetta vakhaani-vakhaani ni moohirumeela ikuru sinceene. Moohipisa, kaaniwerya weetta mpakha ikiloomo 32 nihiku nimosa, mmikwaha seiyo saamaliha mahiku 6 wala ovikana.
Okhuma khalai, anna a epooma ya oChin annirumeela mikukutta soovirikana ohela muhina abuuru, ekhavalo, bisikeleeta, ni mahiku ala annirumeela ikamiyawu sinaakuxa atthu, amoota ni ikaaro sihiniphara iphiro soohiloka. Masi, ikwaha sinci anna aneetta mwentto. Mwa ntakiheryo, wira aphiye mittetthe sowaattamela oMatupi, mapioneero a vameekhaaya aniitthaniwa Kyaw Win ni David Zama, anneetta ikiloomo sinceene eviraka mmiyaakoni. Wira erowe okongresuni oHakha, anna a muloko wa oMatupi yaaneetta ikiloomo sinivikana 270 amalihaka mahiku 6 wala 8 orowa paahi. Nto mphironi yaaniipa isipo sa Omwene seiyo saiwanyeya mmyaakoni.
Mikwaha iye sookhulumula khahiyo paahi saawiiriha anna ovira mmyaakoni sooxankiha, masi-tho yaanilummwa ni apwilimwithi anceene ni axiitthu akina ootakhala, vanceenexa eyiita. Myint Lwin yoowo ori mutokweene a esirkwitu onihimya so: “Okathi kaavira aka mutakhwani, kaahiweha mituthu sikiwelaka mmettoni. Nto vaavo kaakumihale aka, saahikiwela-tho mituthu miili sikina. Kaahituphela mwiri waamonre, masi kaahoona mithuthu sinceene siwelaka-tho mwiri yoowo. Kaahoova ni kinatthyawa mutakhwani mme. Okathi kaaphiyale aka mustaraatani, kaaphwanye erutthu aka yotheene esareyale ene mituthu”.
Masi ohiya mituthu, saahikhala-tho mixankiho sikina. Elapo ya oMianmar sookhala inama sowoopiha, ntoko aphako, ursos, ahavara, Tigre ni moovarihana ni iliivuru sikina, sookhala-tho inowa sowoopiha. Okathi mutokweene a edistritu Gumja Naw ni amwaarawe Nan Lu yaarowa aya mwentto oxukurya miloko, awo yaniiseela mooro ohiyu waarukurerya opuro waari aya wira awoomole axinama a mutakhwani.
Anamalalerya awo ooluttuweliwa yaahihiya etthu yootepexa otthuneya. Maurice Raj onihimya so: “Awosa yaahirumeela ikuru saya sotheene mmutekoni mwa Yehova. Nnakhala okathi yaathaamenle aya mittetthe sikina, awo yaaniphavela-tho otthika. Moohaaniherya, wiimananiha wa anna ale wonvuwiha Yehova”. Olelo-va nnaamwi muttetthe wa oChin ohaattiwe atthu, sihaavo miloko 7 ni igrupu sinceene soorakamelana.