Mukhale Anamwane a Tiithi Anyu a Wiirimu—Mwaha ola onikhuma Anuário das Testemunhas de Jeová, 2013
Mianmar
Epaaxina 89 ettima 3, mpakha epaaxina 90 ettima 1
Mapioneero oolipa murima
Fred Paton onihimya so: “Mwa iyaakha 4 kimalinhe aka kiryeene oBirmãnia koolaleerya mittetthe sinceene sa elapo ele. Okathi owo, kaaniwereiwa malaaria, febre tifoide, mmirimani, ni mixankiho sikina. Nuumala oviriha nihiku ntero kilaleeryaka, ikwaha sikina nkaakhalana opuro woorupa. Masi, okathi wotheene Yehova aanikikhapela ni okikhaliherya ni munepa awe wootteela”. Frank Dewar, a elapo ya oNova Zelândia yoowo aari oovilela, onihimya so: “Okathi mukina kaanikumana ni alavilavi, ni makhulupale a elapo oowiixinnuuha. Masi, kaahiixutta wira waakhaliherya akina, oreera murima, wiiyeviha, ni omaala onnikhaliherya oxintta mixankiho hata iye sootepexa ovila. Atthu anceene yaahipacerya okupali wira Anamoona a Yehova atthu ooreera murima”.
Mapioneero khiyaalikana ni anamurwa akina, maana anamurwa awo yaaniweettiha atthu a muttetthe ole ni nthalu. Mapioneero yaanaathokorerya atthu ni nttittimiho vamosa ni ophenta. Oreera waya murima waanaasivela atthu owiiyeviha ooBirmãnia, yaawo yaasiveliwa olaleeriwa ni nttittimiho ni moohiluluwanya. Orweela mwa moolumo ni mweettelo aya, mapioneero awo yahooniherya wira Anamoona a Yehova ti maKristau a ekeekhai.—Yohani 13:35.
Epaaxina 164 ettima 1
Munamukhaya oniitthaniwa Nargis
Tobias Lund, yoowo aivaherenrye waakhaliherya atthu yaaphanyiwe ehasara, onihimya so: “Miyo ni mwaaraka Sofia, naahimphwanya mwali mmosa aitthaniwa May Sin Oo, yoowo aarina iyaakha 16, ni ahaarina mmusi mweekeekhaini. Nto owo, iira omuumihaka Biibiliya awe vansuwani nuumala ovira munamukhaya waahononale enupa awe. Nuumala oniweha, owo aahihakalala, masi aahimoroxa maithori. Moohipisa, naahiphiya nikhuuru nimosa nowaakhaliherya atthu nto awosa yaahiruuha ikapasete, ikaruma sinivara muteko sirumeelaka energia ni iferemento sikina saari sootthuneya wira etekiwe empa esya ya emusi awe May Sin Oo. Nto eyo yaahaatikiniha anamwaattamanani awe! Atthu a muttette ole yaahimaliha mahiku manceene ewehaka muteko ele wooteka empa, yoowo wahaareere waatikiniha vanceene. Awosa yaahimyale so: ‘Khanitonko oweha etthu ntoko ela! Nikhuuru nanyu ti nowuuraana ni noophentana. Hiyo-tho nimphavela okhala Anamoona a Yehova’. Nto anamuyari awe May Sin Oo ni axinnawe, vano annirowa omuthukumanoni ni emusi awe yotheene enninnuwela momunepani”.