Muhixanke—Mwaha ola okumihiwe Anuário das Testemunhas de Jeová de 2013
Mianmar
Epaaxina 138, ettima 3 mpakha epaaxina 139, ettima 2
Nihicompeleke Mithukumano sa eKristau
Nkahaya noone ntakiheryo na Cin Khan Dal, yoowo aakhala ni emusi awe muttetthe wa Sagaing. Owo onihimya so: “Hiyo naaniphavela orowa okongresuni a edistritu oTahan; nto vaatthuneya weetta mahiku manli ni ikalawa vamosa ni ekaaro. Masi khinaarina mutthu oomuhiyerya ilyakhu sahu wira akhapelele. Nto naahimuroromela Yehova khurowa okongresuni. Nuumala otthikela owaani naahiweha wira yahirimeela alyakhu 19, tthiri eyo yaari yooriipiha murima. Masi, nuuvira mwaakha mmosa, alyakhu ahu yaahincerereya mpakha ovikana 60. Nnaamwi alyakhu anceene a muttetthe ole yaakhwiiye mwaha wa ecittopa (wala eretta ya alyakhu), khaavo mulyakhu ahu aakhwiiye hata mmosa”.
Munna mukina aavikaninhe olipa momunepani aari Aung Tin Nyunt ni mwaarawe Nyein Mya, yaawo yaakhala ni anaaya 9, muttetthe mwaamukhaani wowiiraka ikiloomo 64 ya epantte enikela nsuwa ya Yangon. Aung Tin Nyunt onihimya so: “Emusi aka yaarina musoro vakhaani paahi ni makukhu. Hiyo khinaarina musurukhu ni khinaarina etthu yootumiha. Masi hata vari siiso murima khiwaaniriipale. Miyo kaahivaanela ni emusi aka wira: ‘Yesu khaarina opuro woorupa. Nto hata miyo kirowaka okhala vamwirini wala okhwa etala, kinoovikaniha omurumeela Muluku moororomeleya’.
“Masi, nihiku nimosa, yaahinimalela eyoolya yaarina ahu. Amwaraaka ni anaaka yaanikiwehexexa mooxankiheya. Nto miyo kaahaaleela wira: ‘Muhixanke, Muluku onoonikhaliherya’. Nuumala otthika mmutekoni woolaleerya, kahaakuxa anaaka nnarowa omiserya. Masi naavanre ihopa vakhaani paahi saaphiyerya eyoolya ya nihiku nimosa. Nto mittanka naarumeela ahu okathi woomiserya, kaahihiya mmaasini waattamela saari aya ifilori. Nto kaahaahimeerya anaaka wira: ‘Nnimoorwaka nuumala mithukumano’. Okathi naatthikale ahu naahiweha wira ihopa sinceene saipinthe mukerekhere wa ifilori iye sa mmaasini mwaha wa epheyo. Nto naahirihela mitthanka mmaasini khuvara ihopa sinci. Nto naahitumiha, ni khuthuma eyoolya yaaphiyerya esumana ntero”.
Nihiku ti nihuku, arumeyi a Yehova oMianmar anniweha wiiraneya wa natiri oohakalaliha a Muluku owi: “Miyo nkinonyanyalani-tho: kinimojalani mahiku othene”. Nto awosa annilavula moolipiherya ariki: ‘Yehova ‘tonnikhaliherya, tivó vahinòva ahu etthu. Atthu anwerya onìriha exeni?’—aHéb. 13:5, 6.