Hiyo Khanikhanle Mekhihu—Mwaha ola onikhuma Anuário das Testemunhas de Jeová de 2013
Afrika
Epaaxina 47 ettima 3 mpakha epaaxina 48 ettima 2
Namalaleerya Mmosa a Epooma Yootteivela
David aakhala epooma yootteivela owannya awe oQuenia, vaavo aapacenrya awe omusoma Biibiliya ni Anamoona a Yehova. Masi owo, aahaana otthikela muttetthe awe oLokichar, mpantta woorakamela onikela epheyo wa oQuenia. Muloko wowaattamela waaphwanyaneya ikiloomo sowiiraka 160 epooma ya oLodwar. Mwa iyaakha 4, David aalavulanne vakhaani paahi ni Anamoona. Hata vari siiso, owo anaalaleerya anamwaattamanani ni amusi awe, aahimeeryaka itthu siixuttale awe mwa okathi yoole vakhaani aamusomme awe Biibiliya. Atthu akina yaaheemererya ekeekhai, nto moohipisa aahipacerya wiiriha soosoma sa Biibiliya. Mwaakha wa 2007, owo aahitthikela okumana ni anna epooma ya oLodwar nto khutthikela omusoma Biibiliya, orowaka epooma ele ikwaha piili khuta mweeri omurumeelaka motorizada, taxi, ni mini-bus.
Vaavo David aavikaniha awe omusoma Biibiliya, aaniluttuweliwa muteko woolaleerya. Nnaamwi nlelo ahaabatiziwe, aahiteka “Esalau ya Omwene” ya miri yoomariwa yootthunyeliwa ni malaxi waattamela owannya awe, yeeyo yaarumeela awe wira opake mithukumano ni ale yaasiveliwa ekeekhai. Masi, atthu akina a muttetthe ole khiyaasiveliwe ni muteko woolaleerya wa David. Tivonto, mwa iyaakha piili, owo aaniruwaniwa ni omaniwa. Mwa ntakiheryo, atthu akina yaahimootherya wira owo aahiruuha muttetthe ole “etiini aakokhoreliwa Satana”, tivonto yaahimmana mpakha owo osirikha wala odesmayari. Nto David aahivekela okhaliheriwa ni guvernu a edistritu. Tivonto, atthu ale yaahihiya omuhaaxa ni onavikaniha olaleerya. David onihimya so: “Ekeekhai okumi aka. Khuuvo mutthu onirowa okihiiha olaleerya hata kilupatthiwaka”.
Mwaakha wa 2009, David aahibatiziwa. Nto vano, owo murummwa oorumeela a mmulokoni ni pioneero ookilaatheya. Owo ni mwanawe mwaamulopwana orina iyaakha 15, takhanle anamalaleerya muttetthe owo. Masi mweeri wa abril 2012, atthu oowiiraka 60 yaahirwa Wuupuwelela okhwa wa Kristu, waapakiwe osalau ya Omwene yeele ya miri eri waattamela owannya awe.