Munimwaasuwela Mwaha wa Sowiira Saya—Mwaha ola onikhuma Anuário das Testemunhas de Jeová, 2013
Afrika
Epaaxina 47, ittima 1-2
“Muluku Onimurumeela Anyu Toowerya”
Muthiyana mmosa oniitthaniwa Caro, onikhala elapo ya Uganda, aahipacerya omusoma Biibiliya. Nuuvira mweeri mmosa, iyawe Martin, yoowo aarumeela onamminepani aahipacerya omulupattha. Owo aahimyale so: “Mwaha wa iliivuru sanyu, minepa sa amuhavinre ahu sookhuma vatthokoni-va”. Vano iyawe aahipacerya omuhaaxa ni omoopopiha wira aarowa omwiiva Caro, akhala wira khaamuhiya omusoma Biibiliya. Nave, Martin aahihiya okhaliherya emusi awe. Caro aahivikaniha ovilela ni omaaleleya. Nto, aanitumiha itthu saalima awe wira okhaliherye etthoko; ni aahivikaniha omusoma Biibiliya. Masi, vaavo oonale awe wira iyawe aaniphavela omwiiva, Caro aahikhuma vapuwani vale. Owo aanixanka vanceene wira ophwanye yoolya. Masi, okathi aiwale awe wira anaawe yaaniwereiwa, aahikuxa musurukhu aarina awe ni aahithuma mirette khwaaroihela.
Nuuvira okathi vakhaani, iyawe Caro aahimuligarela ni khuhimya wira: “Kinimoovekelani wira mutthikele owaani nno. Tthiri, Muluku onimurumeela anyu toowerya ni ori ni nyuwo. Xontte, mwaahimeerye atthu a etiini anyu wira arwe akiixuttihe Biibiliya. Kiniphavela orukunuxa okumi aka”. Martin aalavula ekeekhai. Vano, etthoko ya Martin ti yowiiraana ni yoohakalala. Martin ni Caro aabatiziwa okongresuni Agosto, 2012.
Epaaxina 52 ittima 1-6
‘Owo Aahikivaha Yoolya Awe ni Exapeu Awe’
Elapo ya oChile, okathi wa kongresu a 2010, Marcelo yoowo aarina iyaakha 10, aahoona wira mulopwana mmosa aattamanne awe khaarina Biibiliya.
Marcelo aahimuleela maama awe wira: “Maama, mulopwana ola khorina Biibiliya”.
Maama awe aahimwaakhula wira: “Mmooniheryeke soolepa mBiibiliyani mwanyu”. Nto Marcelo aahimwiiwelela maama awe. Okathi woophumurya, Marcelo aahaaleela-tho amamawe wira: “Maama, mulopwana ola khorina etthu yoolya”. Maama awe, aahimuhimeerya wira okawaneke eyoolya awe ni mulopwana ole aitthaniwa Victor. Marcelo aahinvaha ephau ni exa. Okathi Victor aawurya awe exa ele, Marcelo aahimooniherya soolepa sotheene uupuwela awe.
Othana, nsuwa naaviha aya vanceene, Marcelo aahimuleela-tho maama awe wira: “Maama, mulopwana ola khorina exapeu”.
Maama awe aahimwaakhula so: “Munvaheke exapeu anyu”. Marcelo aahipaka eyo. Nuumala eprograma, Marcelo ni Victor yaahilaxeryana.
Kongresu a mwaakha mukina, Marcelo aahimwaavya Victor. Owo aahihakalala omoona Victor. Nto Victor aahiwara egravata! Okathi aamoonale awe Marcelo, aahihimya so: “Miyo kihoorwa-va mwaha wa mwammiravo ola. Mwaisana, kaahivahiwa epaphelo yaamulattula Kongresu ni kirwa. Mwammiravo ola, aahikeemererya oweha soolepa mBiibiliyani mwawe, aahikivaha yoolya, ni exapeu awe. Vano kinimusoma Biibiliya!” Olelo-va, Victor namalaleerya oohibatiziwa.