Mianmar

Ipaaxina 136-137

Oreera Murima wa Anamoona Wookiiriha Weemererya Ekeekhai

ZAW BAWM

MWAAKHA OYARIWA AWE 1954

MWAAKHA OBATIZIWA AWE 1998

MWAHA ENE Mulipa aatumiha mirette soohapala ni namalupattha a ekeekhai. Oheemererya ekeekhai mwaha wa oreera murima wa Anamoona.

VAAVO mwaaraka Lu Mai, aapacenrye awe osomihiwa Biibiliya ni Anamoona a Yehova, miyo kaanimulupattha vanceene. Nto kaahirihela mulatrina iliivuru sawe sa Biibiliya, ni kaahiwoomola Anamoona vate vaka.

Muhoolo, kaahipacerya otumiha mirette soohapala seiyo saakiirinhe otthukweliwa. Nuuviriha ohiyu omosa kitthukiwe ene, amwaaraka yaahikiruuhela Biibiliya ni epaphelo yaarina soolepa sa Biibiliya. Nto, amwaaraka yaamakela okiruuhela ipaphelo sikina-tho soolipiha. Moohipisa, kaahoona wira ohitthara miruku sa Biibiliya wahikiiriha otthukiwa.

Kiryeene mukhatteya siisaale, yaahirwa atthu anli kahaasuwela aka. Alopwana awo yaari Anamoona a Yehova. Yaahimyale wira yaarummwale ni amwaaraka wira arwe ekixukurye ni okilipiha. Awosa yaheetta mahiku manli wira aphiye opuro waatthukiwe aka. Kaahitikinihiwa vanci mwaha wa wiimananiha waya. Khuuvo mmusi aka aarwiiye; masi atthu yaale kaalupattha aka ti yaarwiiye okikhaliherya.

Moohipisa, kahaabaxari hospitaali mwaha wa oretta oniitthaniwa febre tifoide, ni nkaarina musurukhu wooliva murette. Okathi yoowo, kaahixukuriwa ni Namoona mukina aarummwale ni amwaaraka. Munna ole aahikoonela othunku ni oliverya murette wa oretta aka. Miyo kaahuuliwa muru mwaha wa itthu kaawiirinhe aka Anamoona. Nto kaahimmana natiri wira nuumala okhuma mukhatteya, kaamukhala Namoona a Yehova. Nuuvira iyaakha 5 kaahitaphuliwa mukhatteya, ni khukhala Namoona.

[Ediagrama epaaxina 4]

Olelo-va kinnimurumeela Yehova moororomeleya ntoko kammanne aka natiri