Otthuneya Waya Ovilela Mwaha ola onikhuma—Anuário das Testemunhas de Jeová de 2013
África
Epaaxina 45, ettima 1 mpakha epaaxina 46, ettima 1
“Niireke Munnineemererya Okela Mpaani Mmo Wira Nilavulane?”
Wethiyopia, mutokweene mmosa ooweetteetta aahirowa olaleerya ni munna mukina. Nuumala okela enupa emosa, yaahimphwanya muthiyana aari namuteko a etthoko eyo. Nto, yaahinvekela olavula ni mwaneene etthoko. Vaavo aalenle awe wira khivaaweryaneya, anna awo yaahimukoha akhala wira anwerya okuxa irevista wira anvahererye yena. Owo aahirowa olavula ni patarau. Vaavo aatthinke awe, aahihimya wira patarau awe aaphavela oweha irevista sene toko.
Awosa yaahinvaha erevista emosa. Nuuvira minutu vakhaani, owo aahitthika ni aahihimya wira patarau awe aamuhalana erevista eyo. Munna mosa aahimukoha so: “Okhala wira patarau anyu khanwerya okhumela vate, niireke munnineemererya okela mpaani mmo wira nilavulane?” Nto owo aahirowa-tho omuleela patarau awe. Owo aahipisa vanci ni anna yaahipacerya wuupuwela wira muthiyana owo khaatthika-tho. Nuumala-vo, aahitthika nto ahaalattula okela mpaani. Nuumala okela, anna awo yaahisuwela wira mwaneene etthoko ele, aitthaniwa Yirgu, aari mutthu oowuuluvala ni aahiviriha iyaakha 10 owereiwaka, ni ahiweryaka okilaathi. Muthiyana owo aahipisa mwaha woowi aalokiherya ekwarto ni aamukhaliherya owara ikuwo sooreerela.
Anna yaahimulaleerya ihapari sooreera. Yurgu aahisiveliwa ele aiwale awe ni aaheemya omusoma Biibiliya. Vaavo yoosoma awe yaarowa aya vahoolo, okumi awe waaniloka. Nuuvira okathi, owo aahipacerya okhuma vakhaamani ni aneetta ni ekarinyu. Moohipisa aanirowa omuthukumanoni, ni khubatiziwa okongresuni a edistritu opakiwe niinano.