Yehova Onniwiriyana Mavekelo Aanaxariya. (1 Ped. 3:12)—Mwaha ola onikhuma Anuário das Testemunhas de Jeová 2013
Europa
Epaaxina 66, ittima 1-3
Owo Aahivekela Wira Omukhaliherye Mutthu
Irene, yoowo onikhala oSuécia, olempe so: “Kirina iyaakha 80, nto mwaha wa owereiwa nkiniwerya orowa olaleerya. Nto kaahinvekela Yehova wira okikhaliherye omphwanya mutthu kaamuxukunrye aka khalai yoowo aarowa osiveliwa ekeekhai.
“Nihiku nimosa, telefoni ahu aahiruma, nto iyaka aahimwaakhula. Aari muthiyana aahimyale so: ‘Mukiswaamihe, nyuwosa ti atthu kiwenrye aka owuupuwela, ti maana aya kiliganri aka. Niireke mwaarinyu onoowerya okixukurya wira nivaanele Masu a Muluku? Soovira iyaakha 15 wala 20 kimusomme aka Biibiliya. Masi kaahihiya, maana aiyaka yaawo akhwiiye yaanikilupattha’.
“Nto kaahuupuwela wira miyo ni murokora mukina yoowo aasomana awe Biibiliya, nootoko omuxukurya muthiyana owo. Kaahitikinihiwa okhala wira owo aahikuupuwela nnaamwi saavinre iyaakha sinci. Moohakalaliha, naahivarihana moota wookumana. Okhuma vaavo, ninnisoma khula esumana. Owo aahirwa Wuupuwelela okhwa wa Yesu, ni oowiriyana mwaha wa vameekhaaya. Nave-tho, oopacerya orwa mmithukumanoni. Tthiri, khula nihiku kinnimuxukhuru Yehova mwaha woowi ohaakhula nivekelo naka”.
[Mpantta woohikhala etthu 3]