Mukhalane Yoolema ya Ophiya Okathi Wooreerela
1. Ntakiheryo xeeni Yehova onivanhe awe na ophiya okathi wooreerela?
1 Yehova okathi wotheene toowakuveya. Mwa ntakiheryo, owo ‘onnakhaliherya arumeyi awe okathi wophwanelela’. (aHéb. 4:16) Nave, onnaavaha “yolya okathi” wooreerela. (Math. 24:45) Nto, niroromeleke wira nihiku na oviruwa wawe, ‘khannipisa’. (Hab. 2:3) Tthiri, ninnittottela mureerelo waakuveya wa Yehova! (Esal. 70:6) Masi, ophiya okathi wooreerela pooti onixankiha mwaha wowaatteliwa miteko ni oohimalela wahu. Ninrowa okhalana sai yoolema ya ophiya okathi wooreerela?
2. Xeeni varyaya vooloka ophiya okathi wooreerela?
2 Mahiku ala ookiserya ti vooxankiha ophiya okathi wooreerela, maana atthu anci toowiiphenta mmansaya ni oohiisumaaliha. (2 Tim. 3:1-3) Nto atthu anniniweha vaavo nimphiya ahu okathi wooreerela omutekoni, omuthukumanoni, wala opuro mukina oleehanne ahu. Nave opaka eyo onninvuwiha Yehova. (2 Ped. 2:12) Nto niireke ninniphiya omutekoni okathi wooreerela, masi khiyapisa ophiya omuthukumanoni? Vaavo nimphiya ahu okathi wooreerela omuthukumanoni nihinatthi nsipo ni nivekelo noopacerya, ninnooniherya ophavela wahu omutakiha Tiithi ahu a wiirimu.—1 aKor. 14:33, 40.
3. Xeeni ophiya okathi wooreerela onooniherya aya waacalela atthu akina?
3 Ophiya okathi wooreerela onooniherya waacalela akina. (aFil. 2:3, 4) Mwa ntakiheryo, vaavo nimphiya ahu omuthukumanoni okathi wooreerela, ohela muhina mithukumano sa olaleerya, khinnaanyoonyiha axinna ahu. Masi, akhala wira nimmakela opisa ophiya, axinna akina pooti wuupuwelaka wira ninvaha efaita yinci okathi ahu ovikana okathi aya. Nto ophiya okathi wooreerela onooniherya wira naatthu ooluttuweliwa ni oororomeleya.
4. Exeeni ekhanle ahu oopaka, akhala wira nimmakela opisa ophiya?
4 Akhala wira munimakela opisa ophiya, musuwele mathowa aya. Mwiitthokihe saana. Mpake eprograma enookhaliheryani opaka itthu okathi wooreerela. (Mus. 3:1; aFil. 1:10) Nave, munvekele Yehova. (1 Yoh. 5:14) Tthiri, ophiya okathi wooreerela onooniherya ovaha wahu efaita sooruma piili suulupale, eyo piiyo, omphenta Muluku ni omphenta mukhwiihu.—Math. 22:37-39.