Ovilela Olupatthiwa Onnivaha Onaamona Wooloka​—Mwaha ola onikhuma Anuário das Testemunhas, 2013

Mianmar (Burma)

Epaaxina 124, ettima 1

Muttitthi wa atthu oowali a ekerexa Baptista waahipaha Empa ahu ya Omwene, oMongpaw muttetthe wowaattamela mukano wa oChina. Nuumala woona wira awo khiyaawoopopinhe axinna, muttitthi owo wa atthu waahipaha-tho empa ya pioneero a vameekhaaya ni khupacerya owoopopiha anna ni arokora mmawannyeya. Axinna yaahivekela nikhaliheryo na mukhulupale a muttetthe ole, masi yena aakhaliherya atthu a ekerexa Baptista. Masi wanikisa waya, guvernu aahicalela mwaha ole ni khuweemererya anna opaka Empa ya Omwene esya: ohiya opuro ole yaapahiwe aya masi variyari va epooma!

Epaaxina 128, ittima 1-2

Vaavo anamwane oowiiraka 23 a Anamoona a Yehova a muttetthe wa oKhampat, epooma enipaka mukano ni Mianmar-India yaakhoottale aya okokhorela ebandera, diretora ooxikola aahiwoomola. Owo aahaalattula axitokweene anli a mmulokoni wira yalavule ni egrupu yuulupale ya makhulupale, omuhela muhina mphuki a vapooma ni mukhulupale aanakhotto. Mutokweene mmosa ari opuro ole Paul Khai Khan Thang, onihimya so: “Vaavo naatthokihenrye ahu mathowa a mBiibiliyani voohimya sa mukhalelo ahu, makhulupale akina yaahiviruwa vanceene. Nto naahiwooniherya edukumento ya nlamulo na guvernu naahimya wira Anamoona yaneemereriwa weemela ‘moohilavula etthu ni mwa nttittimiho okathi wa niira naahela muhina ebandera’. Makhulupale ale yaahitikinihiwa. Nuumala wuupuwelela, mukhulupale aanakhotto aahimuruma diretora ole oweemererya anaxikola ale yoomoliwe otthikela osoma mootaphuwa. Nave-tho, diretora ole aahikawa ikoopiya sa nlamulo nle khula edepartamento ya oxikola wawe”.

Olelo-va makhulupale a vasuluxa a eguvernu ya oMianmar annisuwela saana mukhalelo ahu wa ohiirela mpantta elapo. Mwaha woovarexexa malakiheryo a Biibiliya, arumeyi a Yehova annivaha onamoona wooloka ntoko Yesu Kristu aahimmye awe.​—Luka 21:13.

[Ipaaxina soohikhala etthu 4,6]