Awo Yaahittittimihiwa Mwaha wa Mweettelo Aya Wooloka ni Ohiirela—Mpantta Olumwenku Mwaha ola onikhuma Anuário das Testemunhas de Jeová de 2014
Epaaxina 120—Serra Leoa ni Guiné
Ekaraxa Ahu ya Kongresu Yaari Ntoko Passaporte
“EYAAKHA ya 1987, atthu yaavikana 1.000 yaahirowa okongresuni yoowo waarina muru waahimya so: ‘Omuroromela Yehova, oGuékédou Guiné’. Okhala wira opuro wa kongresu waahaattamela mukano wa oSerra Leoa ni oLibéria, atthu anceene a ilapo iyo yaamurwenle kongresu, yaahithanla orupa owannyeya nuumala khula nihiku na kongresu. Masi, awo khiyaarina idukumento saarowa waakhaliherya weetta mukwaha. Nto, anna yaamuhoolela kongresu yaahivaanela ni makhulupale yaaweherya mukano wa ilapo iyo nto khupaka nivarihano na ohiweemexa anna awo. Masi, anna yaahaana okhalana edukumento emosa paahi, eyo piiyo, ekaraxa ya kongresu. Okathi mapoliisia a efronteera yaaweha aya ikaraxa sa kongresu ekoore ya ncano, nto yaanivaha ethoonyeryo ni ntata wira anna ale avireke”.—Yowiiraneya elavuliwe ni Everet Berry, yoowo aari misionaario.
Epaaxina 149
Naahoopowa Eriyari ya Anakhotto Oomwareya
Muhoolo mwaya, mukhulupale a egrupu ya anakhotto oomwareya vamosa ni atoropa awe axexe, yaahikuxa enupa ahu ni anileela wira nihikhume owannyihu iwe. Nto naahivikaniha opaka mithukumano moohihiyererya, ni othokorerya yoolepa ya nihiku. Anakhotto akina yaahihimya so: “Nyuwosa munithokorerya yoolepa ya nihiku. Kinoona wira nyuwosa mwa Anamoona a Yehova”. Ekeekhai wira anakhotto ale khahiyo yaaphavela omusoma Biibiliya, masi yaaninttittimiha.
Nihiku nimosa, komandante oottittimihiwa aahirwa waaweha atoropa yaakunxe enupa aka. Komandante owo aahinvaha ekontinensia munna Amara, nuumala-vo khinvaha ntata amukhomasaka. Olavulaka mowiituperya, komandante ole aahaahimeerya atoropa ale wira: “Mulopwana ola xeefi aka, nave xeefi anyusa. Nto akhala mutthu onrowa omwiiriha etthu yootakhala yena wala atthu anikhalana awe vapuwani-va, mutthu owo onoophwanya maxakha. Muhiiwasa?” Awo yaahaakhula wira: “Nihiiwa aayo!” Nuumala-vo, komandante ole aahinivaha epaphelo yaahimya wira egrupu ya Frente Revolucionária Unida ehiniirihe yootakhala, okhala wira naari atthu a murettele.
Nuuvira myeeri sinceene, igrupu iye sa atoropa oomwareya saahipacerya owana-wana. Nto naahitthyawela elapo ya oLibéria naattamenle ahu. Masi, naahipacerya woopopihiwa ni egrupu ekina ya anammwareya. Tivonto, naahaaleela wira: “Hiyo na Anamoona a Yehova”. Toropa mmosa aahinikoha wira: “Weeso, Yohani 3:16 onihimya exeeni?” Okathi naaromonle ahu saana masu a yoolepa ele, toropa ole aahinihiya.
Muhoolo mwaya, naahikumana ni komandante mukina a anammwareya yoowo aamuhimenrye munna Amara ni miyo wira nimuhoole. Naanoova wiiviwa. Komandante ole aahinileela wira ootoko omusoma Biibiliya ni Anamoona ehinatthi opacerya ekhotto. Nto owo aahinivaha musurukhu ni aahikuxa epaphelo ahu aavahererya anna a muloko wowaattamela. Moohipisa, anna anli yaahiruuha yoolya ni yaahiniroiha opuro wooloka.
[Ipaaxina soohikhala etthu 4,6]