Ophenta Onninsuwanyeiha Mwaha ola onikhuma Anuário das Testemunhas de Jeová de 2014
África
Epaaxina 48, ettima 1, mpakha epaaxina 49, ettima 3
“Yehova ni Malaikha Anrowa Okhala Apatthani Aka”
Muthiyana mmosa oniitthaniwa Mary onikhala oQuênia, yoowo orina iyaakha 70, eetta ekerexa Presbiteriana okhuma enamwane awe. Owo aanivaha musurukhu awe ni aahikhaliherya otekiwa ekerexa emosa muttetthe awe. Okathi mwanawe aakhanle awe Namoona a Yehova, owo khaahakalanle. Nto mwanawe aanimulattula orowa omuthukumanoni, masi Mary aanikhootta, ahimyaka wira aaphavela wiiwa ihapari sa Biibiliya ni nttaava nawe, eKikiyu, ohiya ni eSwahili. Muhoolo mwaya, Mary aaheemya orowa okongresuni yoowo aarowa opakiwa ni nttaava na eKikiyu. Okongresuni owo aahikilaathi opuro wa atthu oowuuluvala. Nto aaahitteeliwa murima mwaha woowi aahithokoreriwa mooreera murima ni moophenta. Mary aahimmye wira khaatonko waaweha atthu okerexa wawe ephentanaka mwa enamuna ele. Owo aahiwiriyana saana myaha sotheene saalavuliwe ni aahisiveliwa. Okathi aavahiwe awe yoosoma ya Biibiliya ni ebroxura Munwiriyaneke Muluku, owo aaheemya.
Nuuvira myeeri vakhaani osomaka, Mary aahilakela okhala Namoona a Yehova. Nto, aahihiya moomalela ekerexa awe. Ahooleli a ekerexa eyo yaahinanariwa. Awosa yaahimwiitthana pastore mmosa aakhala ekapitaali ya oNairóbi wira alavule ni yena. Pastore owo aahimukhanyererya otthikela ekerexa awe, masi owo aahikhootta. Nto pastore aahimukoha so: “Tani anrowa okhala apatthani anyu akhala wira munookhuma ekerexa ela? Nyuwo mookhalana apatthani ni anamwaattamanani anceene aneetta ekerexa ela”.
Mary aakhunle so: “Yehova ni malaikha anrowa okhala apatthani aka; vamosa ni Anamoona Yehova”.
Nuumala pastore woona wira khaawerya orukunuxa muupuwelo wa Mary, aahikhuma opuro ole. Owo onnirowa vahoolo ni yoosoma awe ya Biibiliya, ni onnirowela mithukumano sotheene sa eKristau, nnaamwi orakamenle ene opuro wa mithukumano. Mwa okathi vakhaani ovinre nuumala ohiphwanya ekaaro, owo aaheetta iwoora piili erupaka epula wira arowe omuthukumanoni. Hata olupatthiwaka ni anamwaattamanani awe, owo oniphavela obatiziwa.
Epaaxina 69, ettima 1, mpakha epaaxina 70, ettima 2
“Niireke Khamurwaale Opuro Woohikhalela?”
Muthiyana mmosa a oSomalia yoowo onikhala oSuécia, aahilattuliwa orowa muthukumano Empa ya Omwene nto khweemya. Masi itthu khisaakhumenle saana. Khaavo aamwakhenle, atthu otheene yaamunweha paahi. Owo aahixanka vanceene. Woonasa wene okhala mutthu aasuwenle wira owo aahiriipiwa murima nto amukoha so: “Niireke khamurwaale opuro woohikhalela?”
Owo aakhunle so: “Aayo!” Nto aahikhuma onyoonyiwe ene. Nuumala okumana ni Anamoona a Yehova yaamulattunle, owo aahaahimeerya wira khaarowa otthikela-tho orowa Empa ya Omwene. Okathi owo, anna yaahimananiha wuupuwelela ele yaamukhumelenle, maana khiyaamoonale muthiyana ole Empa ya Omwene. Nuumala ovaanela vakhaani, otheene aya yaahoona wira muthiyana ole aahikela mukerexa moohisuwela!
Anna ale yaahimutumererya orowa-tho Empa ya Omwene. Owo aaheemya, masi aahihimya wira khaarowa oviriha nnakhala minutu 10 akhala wira khiwaarowa osiveliwa. Nto, vaavo aakenle awe Empa ya Omwene, atthu otheene mmulokoni yaahimwakhela moophenta! Muthukumano ole waahimusivela vanceene , nto owo taakisenrye okhuma. Okhuma nihiku nle, owo onirowela mithukumano sotheene, nto vano owo namalaleerya oobatiziwa.
[Ediagrama epaaxina 4]
Europa
[Ediagrama epaaxina 4]
Ilapo
47
MWAATTELO WA ATTHU
741.892.871
ANAMALALEERYA
1.601.915
SOOSOMA SA BIIBILIYA
862.555