Awo Yaaniphavelasa Opaceriha Yoosoma ya Biibiliya — Mwaha ola okumihiwe Anuário das Testemunhas de Jeová de 2015

wAmérica

Gabriel Aahimukhaliherya Taata Awe

Epaaxina 55, ettima 1, mpakha epaaxina 56

Okhumaka okongresuni orowaka owaani oParaguai, Gabriel yoowo orina iyaakha 6 paahi, aahipacerya wuupuwelela khoona oreerela waya olaleerya muhupi wa Omwene. Nto ahoona wira aahikhala mutthu ootthuneyexa aaphavela awe orowa okhalanaka oParayiisu, eyo piiyo, taata awe. Masi taata awe ole khaasiveliwa ekeekhai ni aanaahasula amwaarawe ni anaawe, mwaha wa okhala Anamoona.

Nihiku nenno, Gabriel ahaavekela anamuyari awe wira amulikarele taata awe aakhala wArgentina arumeelaka Interneti. Gabriel ahaatthokiherya ataata awe otthuneya waya omusoma Biibiliya nto khaakohaka mooluluwanya oriki, “Taata, munniphavela omusoma Biibiliya ni miyo?” Taata awe ole ahaakhulela. Gabriel aahimuhimeerya wira yaarowa osomaka ebroxura Munwiriyaneke Muluku Wira Mphwanye Ekumi Ehinimala. Myeeri soottharelana awo yaahisoma ebroxura ele hoothe. Okhala wira oowanli aya khiyaawerya osoma saana, nto awo yaapacerya olokiherya ahinatthi osoma. Khula nihiku, ahinatthi osoma Gabriel aanilokiherya yoosoma awe ni aaniwara ekamisa awe ni egravata.

Muhoolo mwaya taata awe ole aahirwa oxekurya emusi ya Gabriel ni oviriha isumana vakhaani hoothe. Okathi owo, taata awe aahirowa omuthukumanoni ni emusi ele. Nuumala otthikela wArgentina, taata awe Gabriel aahivikaniha omusoma Biibiliya ni munna a muttetthe yoole, nto aahirowa vahoolo mpakha okhala namalaleerya oohibatiziwa. Vano taata awe Gabriel onnipaka mavekelo khula nihiku. Nave Gabriel onninnuwela omunepani. Nuuwo nave namalaleerya oohibatiziwa. Taata awe ole oohimya wira onniphavela ovahererya ekumi awe wa Yehova ni obatiziwa mmaasini.

wEuropa

Yoosoma ya Biibiliya Eniiriwa “Mutakhwani”

Epaaxina 69, ittima 2-5

Khula nihiku vaasiisu Margret onnikhuma owannyawe wira apasiyari ni mwalapwa awe mutakhwani wAlemanha. Owo onihimya wira “Kinneererya olavulana khula mutthu onikumana aka. Nto kamphwanya mutthu oniphavela, kinnivaanela myaha sa Biibiliya”.

Nihiku nimosa owo aahimphwanya muthiyana aarweela ompasiyariha mwalapwa awe nave. Margret aahipacerya ovaanela ni muthiyana owo. Muthiyana owo aahisiveliwa mwaha ole ni aahimuleela Margret wira khula nihiku onnipaka nivekelo wa Muluku ni onnimusoma Biibiliya awe. Okhuma vaavale awo yaanikumana khula nihiku nto anavaanela itthu sa Muluku. Nihiku nimosa, muthiyana ole aahimukoha Margret wira: “Muniwerya sai osuwela itthu sinceene sa mBiibiliyani?” Margret khumwaakhula wira miyo ka Namoona a Yehova.

Ikwaha sinceene Margret aaheererya opaceriha yoosoma ya Biibiliya ya vatthokoni ni muthiyana ole, masi owo aanikhootta khula ekwaha. Nlelo awo yaanivikaniha ovaanela waya. Nuuvira myeeri vakhaani, Margret aahitthikela weererya opaceriha yoosoma ya Biibiliya. Mukwaha ola muthiyana ole aahitthukula murima awe khuhimya wira aawoova aiyawe okhala wira awo yaanaanyokha Anamoona a Yehova.

Mukwaha mukina Margret aaronwe awe opasiyari ni mwalapwa awe mutakhwani, owo aahimukuxa Biibiliya awe ni eliivuru Biibiliya Oniixuttiha Exeeni. Okathi waakumaanale awe muthiyana ole, Margret moolipa murima aahimuhimeerya so: “Mukwaha ola nkiniphavela wira nipacerihe yoosoma ya Biibiliya eniiriwa vatthokoni, masi kiniphavela wira nipakeke yoosoma ya Biibiliya eniiriwa ‘mutakhwani’”. Muthiyana ole aheemererya omoroxaka maithori. Owo onnoorwa ikwaha 6 khula esumana wira yoosoma ya Biibiliya eniiriwa “mutakhwani”. Moovarihana ni oxa wa khula nihiku, Margret okathi mukina onniiriha yoosoma eyo okunxe ene esumburaro ni lampata.

[Epaaxina yoohikhala etthu 7]