Munoowerya Waala Ipyo sa Ekeekhai ya mBiibiliyani Vamurimani va Amusi Anyu? — Mwaha ola okumihiwe Anuário das Testemunhas de Jeová de 2015

República Dominicana

Atthu Yaapacenrye Ophwanya Ekeekhai

Epaaxina 87, ittima 1-2

Yaari Ettiminku 1 a Abril 1945, vaavo Lennart ni Virginia Johnson yaamalinhe aya osoma exikola ya oGileadi nto anaarowa muttetthe wa Ciudad Trujillo (yowo vano oniireliwa Santo Domingo), epooma yuulupale ya oRepública Dominicana. Awo ti yaari Anamoona oopacerya elapo ele, awo yaaronwe elapo yoosareya mixankiho ni owana-waniwa. Anuário a 1946 (Englexi) aahimmye so: “Tthiri ole waari muttetthe wooreerela olaleerya, okhala wira atthu anikhuma oGileadi ahaana opaceriha muteko woolaleerya nipuro nihinatoko olaleeriwa”. Nkahaya muupuwele: Khiyaakhanle efiiliyali, Ipa sa Omwene nnakhala muloko mmosa. Mamisionaario ale khuvo mutthu yaamusuwela aya, nttava na Espanhola khiyaasuwela olavula, khiyaarina empa nnakhala mireerelo sa mpaani. Nto yaarowa opaka exeeni?

Lennart uupuwelaka okathi ole onihimya so: “Hiyo naahirowa oWateelo Victoria weiwo naaphwannye ahu opuro wookhala khula nihiku naaliva idoolari 5 ohela muhina eyoolya. Emakaaripi yeele naahiphwanya yoosoma ya Biibiliya yoopacerya muttetthe ole. Eyo yiiranen’ye so: Aakhala axithiyana anli a elapo ya oDominicana yaawo naasomiha ahu Biibiliya oBrooklyn yaanivanhe masina amusi aya ni atthu akina yaasuwela aya, mmosa a yaawo aari Dotoro Green. Okathi naamuxukunrye ahu naahimphwanya-tho namwattamanani awe oniitthaniwa Moses Rollins. Nuumala awo osuwela moota naphwanye ahu masina aya ni opuro waakhala aya, awo moowiiyeviha yaahiwiriyana ihapari sa Omwene nto okhuma vaavale naahipacerya yoosoma ya Biibiliya. Nto voohipisa Moses aahikhala namalaleerya oopacerya muttetthe ole”.

República Dominicana

“Nnimwaaphwanya Nihiku Nikina”

Epaaxina 90, ittima 1-3

Waari mwaakha wa 1935, muttetthe mmosa oniireliwa Vale do Cibao, Pablo Gonzalez aahipacerya omusoma Biibiliya awe. Owo aneetta ekerexa emosa ya maProtestante, masi moohipisa aahihiya okhala wira anoona mweettelo wahaavarihana ni ele yaasoma awe mBiibiliyani. Masi owo aahivikaniha osoma Nuulumo na Muluku mekhawe, nave aahipacerya waalaleerya atthu akina ele yaaxutta awe, aapacenrye amusi awe, nto khiyaalaleerya atthu akina yaakhala mittetthe sowaattamela. Owo aahitumiha ematta awe ni enyompe awe khorumeela musurukhu owo wira eette mikwaha sa orowa olaleerya.

Mwaakha wa 1942, Pablo aanixukurya imusi 20 sa mittetthe sowaattamela ni aanipaka mithukumano moohicompela, nnaamwi ahaatonko olavula ni Anamoona a Yehova. Owo anaatumererya atthu omusoma Biibiliya ni ottharihela ele yiixutta aya. Anamunceene yaaniiwelela ela yaalavula awe mpakha ohiya omulya soona ni waatteya.

Mmosa a atthu ale yaawiriyana muhupi wa mBiibiliyani waalavuliwa ni Pablo aari Celeste Rosario. Owo onihimya so: “Okathi waarina aka iyaakha 17, murokoraya amaama a erukulu ekina, Negro Jimenez aneetta vamosa ni ekrupu yaahooleliwa ni Pablo Gonzalez. Owo aahixukurya emusi ahu ni aahisoma soolepa sa mBiibiliyani, nto eyo yaahikiiriha miyo ohiya Ekerexa Katoolika. Khula etthu yaasommwa okerexa yaari ya nttaava na eLatim, hiyo khinaawerya wiiwa etthu. Voohipisa, Pablo Gonzalez aahinixukurya ni onilipiha. Owo aalavunle so: ‘Hiyo khanniirela mpantta itiini sinisuweliwa olelo-va, masi nookhalana annihu ari olumwenku wotheene. Ekeekhai wira hiyo khinnaasuwela, khinnisuwela nsina naya, masi hiyo nnimwaaphwanya nihiku nikina.’”

[Ipaaxina soohikhala etthu 5,6