Mweettelo Wooloka Onnikumiherya Eparakha Wira Naale Ipyo sa Ekeekhai — Mwaha ola okumihiwe Anuário das Testemunhas de Jeová de 2015
wÁfrica
Vano Pastore Onneemererya Ekeekhai
Epaaxina 49, ettima 3 mpakha epaaxina 51 ettima 3
Elapo ya wÁfrica do Sul, Pastore mmosa oosuwelexiwa a ekerexa ya maProtestante aahimmye so: “Miyo nkinrowa oyeleelaka Wuupuwelela Okhwa wa Yesu khula mwaakha”. Exeeni yaamwiirinhe mukhulupale ole a ekerexa orowa owiriyana muthukumano wa Wuupuwelela Okhwa wa Yesu, Abril 2014? Sotheene iya sikhumelenle mwaha wa anna anli a nikhuli noovirikana yaalaleerya hoothe yaaphiyale aya vatthokoni vawe. Anna ale yaanisuwela wira okhuma khalai pastore ole kheemererya olavula ni Anamoona. Adaine, munna mmosa wa ale anli yaalaleerya hoothe onihimya so: “Voohakalaliha owo aahihula mukhora, khinilattula wira nivolowe mpaani. Naahiviriha okathi munceene nivaanelaka. Owo aahitikinihiwa onweha mukunya olaleeryaka muttetthe onikhala anooriipe, nave olavulaka nttaava na atthu anikhala muttetthe ole. Pastore ole aheemererya omusoma Biibiliya khula esumana”.
Adaine onnivikaniha ohimya oriki: “Mulopwana ole aahitoko okhala misionaario ni pastore mwa iyaakha sinivikana 40, masi khawenrye ophwanya waakhuliwa wa makoho awe mpakha okathi aarina awe iyaakha 80. Owo aahitepa osiveliwa eliivuru Mutakiheke Waamini Waya. Okathi waasoma ahu, owo aanihela mmuru mipantta sa eliivuru eyo wira arumeele okathi aixuttiha awe okerexa wawe. Owo aahiwooniherya atthu a okerexa wawe eliivuru Biibiliya Oniixuttiha Exeeni Tthiri? Mulopwana ole anaahimeerya so: ‘Anamoona a Yehova yaphiya vatthokoni vanyu akunxeene eliivuru ela, nwaakhele saana ni mwaawiriyane oratteene okhala wira eliivuru ela yookhalana mihakhu sinceene sa omunepani’”.
Pastore ole aahimuleela Adaine wira makhulupale a ekerexa awe yaahimulopola ikwaha sinceene wira ohikhala-khale olavulaka sa Anamoona a Yehova okathi oniixuttiha awe okerexa. Nto owo khaasuwela yoopaka. Adaine ahuupuwela yowiiraneya yaalempwale emuhimyaka pastore mukina a oMianmar, yeeyo yaakumiheriwe Anuário a Anamoona a Yehova a 2013. Nuumala Adaine omuhimeerya yowiiraneya ele, pastore owo aahimmye so: “Ela enikihimya yoomi! Kihaana opaka yoothanla yuulupale voohipisa”.
Pastore ole aahirowa owiriyana mwaha wa Wuupuwelela Okhwa wa Yesu aapakiwe 14 a Abril 2014, nto khilavulaka masu ale anihimya wira owo khaarowa oyeleela-tho muthukumano ole. Owo aahihimya wira aamuhiya moomalela etiini ele yeettela awe yoowoka.
República Dominicana
Onnincerereya Muteko Wooteka Ipa sa Omwene
Epaaxina 140, ettima 3, mpakha epaaxina 141 ettima 3
Okhala wira atthu anceene annikela mootthokeyani, sinnitthuneya otekiwa ipa isya sinceene sa Omwene. Mweeri wa Novembro 2000, anna a oRepública Dominicana yaahipacerya oteka Ipa sa Omwene akhaliheriwaka ni eprograma eniteka Ipa sa Omwene ilapo soothowa musurukhu. Muteko owo onnikhaliherya muloko oteka Empa ya Omwene yooreera ni yookhalela mwa isumana 8 paahi. Mpakha mweeri wa Setembro 2011, igrupu piili sa alipa-ooteka, saahiteka wala olokiherya Ipa sa Omwene siniphiyerya 145.
Ipa iye saatekiwe, ni atthu yaivaherenrye okhaliherya muteko owo wooteka saahivaha onamoona muulupale elapo ele. Mwa ntakiheryo, muttetthe mmosa mwaamukhaani mpantta onikhuma nsuwa wa elapo ele, anna yahoona nipuro nimosa nooreerela oteka Empa ya Omwene esya. Pioneero mmosa a vameekhaaya aahirowa ovaanela ni mwaneene nipuro nle wira othume opuro ole. Mulopwana ole aakhunle so: “Muhihononeke okathi anyu mahala, miyo nkinootumiheryani opuro ola, vanceenexa vakhala wira munrowa oteka ekerexa”.
Nuuvira okathi vakhaani anna ale alavulanne ene mulopwana ole, aahivenya orowaka muttetthe wa Puerto Plata, wira amuxukurye muulupale awe yoowo aari Namoona a Yehova. Okathi aaphiyale awe, amphwannye muulupale awe othaamiheriwe ene etthoko ya Anamoona wira okhapeleliweke okhala wira anwereiwa. Emusi ele yaanimuhoola oxipitali, omuthukumanoni ni muteko woolaleerya. Mulopwana ole aahimukoha muulupale awe wira mulinve kavi wira atthu ala yookhapelelekeni moota yoola? Owo aakhunle so: “Miyo nkiniliva hata etthu. Atthu ala axinnaka”.
Oreera murima wa Anamoona waahinvara murima mulopwana ole, nto aahimuligarela pioneero ole aamulavulinhe, khwiira aahituruka muupuwelo awe nto aaphavela omutumiherya opuro ole. Munna ole aahithuma opuro ole onapacerya otekiwa Empa ya Omwene. Mwaarawe mulopwana ole khaaphavela Anamoona a Yehova. Masi nuumala owoona anna avaraka muteko mowiiraana nipuro nle naatekiwa Empa ya Omwene owo aahimmye so: “Nla nikhuuru na atthu ootepa wiiraana ni oreera murima kitonko aka woona”.
[Ipaaxina soohikhala etthu 5,6]