Mweettelo Wooloka Onnikhaliherya Waala Ipyo sa Ekeekhai — Mwaha ola okumihiwe Anuário das Testemunhas de Jeová de 2015

Europa

Otthuneya Waya Ottittimiha

Epaaxina 73

Nihiku 30 na Março, 2014, Vasilii, yoowo ovirinhe iyaakha sinceene okhalaka eBetheli ya oRússia, okathi aalaleerya awe orumeelaka ekarinyu waattamela ofiliyaali ya elapo ele, mootutuxerya yaahiphiya ekaaro ya mapoliisia. Poliisia mmosa aahikhuruwa mukaaroni nto mooreerela aahinvekela Vasilii ohiiya ovara muteko ole okhala wira atthu akina a muttetthe ole khiwaasivela. Poliisia mukina iira ogravariki mwaha ole. Vasilii aahimwiiwelela poliisia ole ni khaaphavenle wiisaakiha vohimya sa ehaakhi awe. Okathi ole, atthu anceene yaavira yaheemela wira yoone ele yiiraneya nipuro nle. Vasilli aahikhuma opuro ole, masi nuuvira mahiku manli aahivekela olavula ni mukhulupale a mapoliisia. Yoovekela awe yaaheemereriwa. Okathi aalavula awe ni mukhulupale ole, Vasilii aahixukhurela muteko wootthuneya waaphwanyiha mureerelo anammawaani, waavariwa ni mapoliisia ale, ni mwaha woothokoreriwa saana okathi aaphwanyiwe awe ni mapoliisia mahiku manli yaavinre olaleeryaka. Mukhulupale a mapoliisia aahirukunuwa khumuhimeerya namakhaliherya awe iiraka: “Mwa iyaakha 32 kivaraka muteko ola, nkinamwiiwe mutthu oxukhurelaka muteko ahu!” Vaavo yaavanela aya, mukhulupale ole aahiiwexexa wira muteko ahu woolaleerya khula opuro tiwooweemereriwa. Mukhulupale ole aahimukoha Vasilii wira, nthowa xeeni vahakhoottale awe ohikhuma nipuro nle nnamwi aasuwela wira aahikhalana ehaakhi? Owo aakhunle so: “Miyo kinnaattittimiha vanceene mapoliisia. Nto khivaarowa oreerela waavanyiha ohoolo wa atthu anceene wira khanisuwela malamulo”. Mukhulupale ole ni namakhaliherya awe yaahitikinihiwa vanceene, ni yaahimuroromeliha Vasilii wira khaarowa okhoottiheriwa-tho orumeela ekarinyu ya iliivuru okathi woolaleerya.

República Dominicana

Ipaaxina 110-116

‘Yesu ti Muru wa atthu otheene’

Donald Nowills, orineene iyaakha 20 aahithanliwa oweherya miteko saavariwa ofiliyaali vaavo mamisionaario yoomoliwe aya, okathi owo iira ovirinhe ene iyaakha 4 nuumala obatiziwa. Nnamwi aarumeelale ntoko mutokweene a esirkwitu myeeri vakhaani paahi, ovara muteko ofiliyaali waari muteko ahaalimalenle awe. Munna Donald aahikhalana eskritoorio awe yaamukhaani vapuwani vawe, yaatekiwe sirumeeliwaka ithaapwa, iyuuma, ni vathi vaya yaaheliwe etthaya paahi. Empa eyo yaatekiwe oGualey, muttetthe wootepexa woopiha elapo ya Ciudad Trujillo. Okhaliheriwaka ni Félix Marte, owo aanipaka ikoopiya sa erevista Owehaweha yaarumeeliwa elapo ele yotheene.

Nave-tho Mary Glass aanimukhaliherya Munna Donald, okathi aiyawe yaawo yiireliwa Enrique, atthukiwene. Owo onihimya so: “omutekoni waka kaakhuma ewoora ya 17, nto khiyarowa oskritoorio wa Mun­na Donald wira nalepeke erevista Owehaweha. Nuumala olepa Munna Donald aanimpirimiri ikoopiya sinceene. Nto murokora moosa aakhala oSantiago, aasuweliwa ni nsina na nthoonyero ‘nlaikha’, aanihela irevista iye soowimpirimiriwa elaata yaari ya makhura ya iliitru 20. Owo aapacerya othataanyerya maleeso manli, nto vasulu vaya khiyakhuneela ni macokhwa, batata, wala makutthi. Nuumala-vo aanikhunela ni esaakho. Nto khiyawela ekaaro yaarowa onikhuma nsuwa wa elapo ele wira akawe erevista emosa wa khuma muloko aaphiya awe. Khula emusi yanoolihiwa erevista eyo, nto nuumala osoma khiyattikiha”.

Mary onihimya-tho so: “Hiyo nahaana okhalana ephoole yuulupale, okhala wira mittetthe iye khiyaathowa atthu a guverno yaamananiha osuwela opuro yimpirimiriwa aya erevista Owehaweha. Masi khiyaawenrye osuwela. Okhala wira Yehova aaninikhapelela khula okathi”.

“Òwipasopaka Ntoko Enowa, Òmàla Ntoko Ipomba”

Vaari vootthuneya wira Anamoona a Yehova oororomeleya ovikaniha waakhela eyoolya ya omunepani okathi waakhoottihiwa aya muteko woolaleerya, masi vaanoopiha wa ale yaakokhorela etiini ya ekeekhai elapo ele. Iyaakha iye saavinre, anna anceene yaahitthukiwa ni olamuliwa otthukweliwa ikwaha sinceene.

Juanita Borges onihimya so: “Okathi kaixuttale aka ekeekhai mwaakha wa 1953, kaahisuwela wira, kaamutthukiwa mwaha wookhala Namoona a Yehova. Nto eyo yaahiiraneya tthiri. Mweeri wa Novembro 1958, vaavo kaamuxukuryaka murokora Eneida Suárez, yaahiphiya mapoliisia yaanootherya opaka muthukumano opuro ole. Naahilamuliwa otthukweliwa iyaakha tthaaru, ni khula mmosa a hiyo nahaana oliva 100 pesos, eyo piiyo, musurukhu waaphiyerya idoolare 100”.

Guverno a elapo ele aanipaka sotheene saawerya awe wira aakhoottiherye anna opaka mithukumano saya, masi awo khiyoova hata etthu. Hata vari siiso, awo yahaana okhala “òwipasopaka ntoko enowa, òmàla ntoko ipomba”. (Math. 10:​16) Andrea Almánzar onihimya so: “Okathi woorowa omuthukumanoni nahaana ophiya okathi woovirikana. Owaani naahokolowela vailale ene, okhala wira nahaana okhuma mmosa-mmosa wira nihooneliwe”.

Jeremías Glass, yoowo aayariwe okathi apapa awe, León, aryeene mukhatteya, mwaakha wa 1957 aahemereriwa okhala namalaleerya orineene iyaakha 7. Owo onnuupuwela mithukumano saapakiwa mwa mwiitiho owannyawe ni inamuna sa wiipasopa wira anna ale ahooneliwe. Jeremías onitthokiherya so: “Khula mmosa a anamawiriyana yahaana waakhela ekartau yaatthokiherya nummuru na okhuma opuro ole. Okathi saamala aya mithukumano, paapa aka aanikiirela weemela vamukhora wira kisuwele mammeru a atthu yaakhuma ni waalakiherya okhuma anli-anli masi moovalana”.

Enamuna ekina ya wiipasopa, anna ale yaanithanla ewoora ya mithukumano okathi wahaatepa aya woopiha otthukweliwa. Mwa ntakiheryo, Mercedes Garcia aahixuttihiwa ekeekhai ni taata awe Pablo González. Maama awe Mercedes aakhwiiye orineene iyaakha 7, paapa awe oryeene mukhatteya, nto eyo yaahiiriha wira owo ni axihima awe 9 ohala meekhaya. Mercedes aabatiziwe mwaakha wa 1959, orineene iyaakha 9. Wira asyake otthukiwa, mwaha wa obatizo waapakiwe ewoora ya 3:​30 okelaka nooxa. Mwaha owo waalavuliwe vatthokoni va munna mmosa, nto obatiziwa wene mmaasini wiiranen’ye muro wa Ozama, yoowo waavira eriyaari ya epooma ele yuulupale. Mercedes onihimya so: “Vaasiisu 5:​30 atthu avenyaka hiyo niira nihokolowelaka owaani”.

[Ipaaxina soohikhala etthu 5]