Ireferensia sa Okumi ni Orummwa Ahu Ekaderno Enirumeeliwa Omuthukumanoni
7-13 ya Outubro
MIHAKHU SINIKHUMA MBIIBILIYANI | YAKOBO 3-5
“Nwooniheryeke Ankhili Ankhuma wa Muluku”
cl ipax. 221-222 itti. 9-10
Niireke Munniweettela “Ankhili Ankhuma wa Muluku”?
9 ‘Tooreera’. Okhala oohittheka ontaphulela okhalana mweettelo wooloka ohiya ota paahi, masi-tho vamurimani. Biibiliya onihimya wira ankhili aneetta ni murima, masi awo khankela vamurimani va mutthu orina miyuupuwelo sootakhala, ni soophavela soohiloka. (Miruku 2:10; Matheyo 15:19, 20) Masi vakhala wira murima ahu ti wooloka, eyo piiyo, naimananiha mpakha vaniwerya ahu sintoko atthu oohimalela, nnoowerya okhootta itthu “sotakhala” ni nnoopaka itthu “sorera”. (Esalimo 37:27; Miruku 3:7) Khamunikupali wira okhalana mweettelo wooloka etthu yooreera? Akhala wira khaninrowa okhala atthu oowaarya werutthuni ni mmweetteloni, niireke nnoowerya wooniherya moomalela mikhalelo sikina sa ankhili anikhuma wa Muluku?
10 “Annivaha murettele”. Ankhili ankhuma wa Muluku anniniiriha wiimananiha okhala a murettele, yoowo ori yoowiima ya munepa wa Muluku. (aGalasia 5:22) Ninniimananiha wira ‘murettele’ onniiriha okhala oowiiraana ni axinnihu, ohimale. (aÉfeso 4:3) Nave-tho ninniimananiha ottikiherya murettele vaavo onihononeya aya wala onikhumelela aya ohiiwanana. Xeeni vari aya vootthuneya? Biibiliya onihimya so: ‘mphaveleke . . . wetta ni murettele. Siso, ophenta ni murettele wa Muluku onokhala ni nyuwo’. (2 aKorinto 13:11) Nakhala atthu a murettele, Muluku a murettele onrowa okhala ni hiyo. Nave-tho enamuna nnaathokorerya ahu axinnihu pooti olipiha wala ohonona waataana wahu ni Yehova. Ninrowa wooniherya sai wira naatthu a murettele? Nwehe ntakiheryo ninttharelana.
cl ipax. 223-224 etti. 12
Niireke Munniwettela “Ankhili Ankhuma wa Muluku”?
12 “T’òmàla”. Ontaphulela exeeni okhala oomaala? Moovarihana ni asomi akina, nuulumo na eGriki noowi “òmàla” niri yoolepa ya Yakobo 3:17, oxankiha otaphulela. Anamataphulela akina arumenle moolumo oowi: “oreera murima”, “opixa murima” ni “omaaleleya”. Enoota ya Biibiliya a Tradução do Novo Mundo enihimya so: “waakuveya, waakuva oleva”. Ninrowa wooniherya sai wira ninnivarihela muteko miruku iya sinikhuma wa Muluku?
cl ipax. 224-225 itti. 14-15
Niireke Munniwettela “Ankhili Ankhuma wa Muluku”?
14 ‘Toolikaneene wira yiiwelele’. Nuulumo na eGriki nitaphuleliwe ‘okhala oolikaneene wira yiiwelele’, khanimphwanyaneya mwa Soolempwa sa eGriki sa eKristau. Moovarihana ni musomi mmosa, nuulumo nla “ninnirumeeliwa ikwaha sinceene ohimmwaka wiihiiha aniixuttihiwa aya anakhotto”. Ninruuha muupuwelo wa “okhweya orukunuxa murima” ni “wiixiiweleliha”. Mutthu oneettihiwa ni ankhili ankhuma wa Muluku, ori oolikaneene wira aiwelele itthu sotheene sinihimya aya Soolempwa. Owo khonitthara moonelo awe paahi okathi onipaka awe soothanla ni ohinaphavela miruku sikina sinvahiwa awe sinivaanyiha moonelo awe. Owo ori oolikaneene wira opake marukunuxo okathi onivahiwa awe miruku sinkhuma mBiibiliyani vakhala wira oopaka soothanla soohiloka. Niireke munnisuweliwa okhala ntoko mutthu oowaakuva wiiwelela?
‘Toosareya othunku ni miteko sooreera’
15 ‘Toosareya othunku ni miteko sooreera’. Othunku mukhalelo mmosa wootepa otthuneya wa ankhili ankhuma wa Muluku yaawo anihimmwa okhala ‘oosareya othunku’. Eyo etthu yookhalela, maana mBiibiliyani nuulumo noowi “woonela othunku nintaphuleliwa ntoko omoriwa ikharari onimwiiriha mutthu opaka itthu sinceene sooreera”. Eliivuru emosa ennitaphulela othunku sintoko “muupuwelo wa oriipiwa murima mwaha wa etthu yooriipiha murima emukhumelenle mutthu mukina ni yoophavela ya omukhaliherya”. Tivonto, ankhili ankhuma wa Muluku khahiyo tootakhala, ooriiryela ni khanilikana ni ankhili aasomi. Ohiya-vo, awo toomaala, toororomeleya, ni toothunku. Ninrowa wooniherya sai wira naatthu oosareya othunku?
cl ipax. 226-227 itti. 18-19
Niireke Munniwettela “Ankhili Ankhuma wa Muluku”?
18 ‘Khanaathanla atthu’. Ankhili ankhuma wa Muluku annivaha ikuru wira vaweryaneyeke oxintta nthalu mwaha wa ekoore ya erutthu wala wiittottopa mwaha wa elapo ahu. Vakhala wira nnimweemya weettihiwa ni ankhili awo, nnoowerya omala-maliha vamurimani vahu yoophavela ya waavaha miritti suulupale, itthu wala miteko sooreera amusi ahu wala atthu nnaaphavela ahu. (Yakobo 2:9) Hiyo khanimphavela waapakela itthu sooloka atthu akina mwaha wa osoma waya vanceene, wala othaaciri waya, aahiiso mwaha wookhalana miritti mmulokoni. Nave nihaana osyaka ohiwoonela vatthu axinnihu a mmulokoni, mwaha wookhala amasikhini. Vakhala wira Yehova onniwooniherya niphento nawe, nave hiyo nihaana owooniherya niphento nahu.
19 ‘Kharina mirima miili’. Nuulumo na eGriki noowi “namirima miili”, pooti otaphulelaka “mutthu onipaka eteatru wala efilme”. Khalai, aGriki ni aRoma yaapaka iteatru yaanaawara amaaskara aalupale. Nto nuulumo na eGriki noowi “namirima miili” naahipacerya orumeeliwa ohimmwaka mutthu oohikhala eekeekhai wala oowoothererya. Osuwela wira ankhili ankhuma wa Muluku “kharina mirima mili”, khahiyo paahi ohaana oniiriha waathokoreryaka axinnihu mwa enamuna yookhalela, masi-tho ohaana oniiriha othokorerya moonelo aya.
Otokosa Itthu sa Efaita Soomunepani
w06 15/1 epax. 30 etti. 20
Mmukhotteke Satana, Satan’owo Onimotthyawani!
20 Hiyo ‘ninnimukhootta Satana, vaavo nintthara ahu malakiheryo ni ikeekhai sa mBiibiliyani, ni okhootta ohapuxiwa ni yena. Olumwenku ola oneettela soophavela sa Satana okhala wira Satana muluku aya. (2 aKorinto 4:4) Tivonto, nihaana okthootta mweettelo wa olumwenku, sintoko wiixinnuuha, nrima wala milili, orupihana woohiloka wiiphenta mootepana, otakhala ni ophavela mihakhu mootepana. Noosuwela wira Yesu okathi eehereriwa awe ni Diabo moothakoni, aahirumeela Soolempwa wira okhootte olavi-lavi wa Diabo, nuumala-vo, Diabo aahimutthyawa Yesu. (Matheyo 4:4, 7, 10, 11) Moolikanasa, Satana onoonitthyawa akhala wira nnoomwiiwelela Yehova moomalela ni olompa nimuroromelaka wira onoonikhaliherya oxintta. (aÉfeso 6:18) Nikhaliheriwaka ni Yehova ni Mwanawe onimphentexa awe, khuuvo onrowa owerya onikumiherya mixankiho sihinrowa omala, hata Diabo khoniwerya!—Esalimo 91:9-11.
w97 15/11 ipax. 20-21 etti. 8
Waamini Onniniiriha Oopixa Murima ni Ovekela
8 Ti vootthekeya omulavula moohiloka wala omwaapa muKristau mukhwiihu. (Yakobo 4:11, 12) Hata vari siiso, maKristau makina annaalavula moohiloka wala waavaanyiha akhwaaya. Woonasa wene awo annipaka eyo mwaha wa mweettelo aya woohiloka wa efarisi aahiiso ophavela wooniwa okhala ootepexa oloka yaayevihaka akhwaaya. (Esalimo 50:20; Miruku 3:29) Nuulumo na eGriki nitaphuleliwe ‘omulavula moomunyokha’ nintaphulela onyokha ni omootherya mutthu mukina mootakhala. Eyo entaphulela omphukela moomunyokha munna. Nto mwa enamuna xeeni mutthu “onimwapa mukh’wawe” onitthekela awe ikano? Alipa-oolepa ni aFarisi ‘yaanihiya mwayini sooruma sa Muluku’ ni yaanaaphukela atthu moovarihana ni malamulo aya. (Marko 7:1-13) Moolikanasa, akhala wira nnoomphukela munnihu yoowo Yehova ahaarowa awe omphukela, niireke khinaarowa ophukelaka nlamulo na Muluku ni ohimya wira nlamulo nlo khahiyo nooloka? Nave vakhala wira nnoonvaanyiha munnihu moohixariya, khinaarowa weettelaka yooruma ya ophenta.—aRoma 13:8-10.
Omusoma Biibiliya
14-20 ya Outubro
MIHAKHU SINIKHUMA MBIIBILIYANI | 1 PEDRU 1-2
“Mukhaleke Atthu Òwarya”
Yowoopola ti ‘Yovahiwa Yorera’ Enikhuma wa Tiithi
5 Ninrowa wooniherya sai wira ninniphenta nsina na Yehova? Ni mweettelo ahu. Yehova onivekela wira nikhaleke atthu oowaarya. (Mmusome 1 Pedru 1:15, 16.) Eyo enitaphulela wira nimmukokhorela paahi yena ni ninnimwiiwelela ni murima ahu wotheene. Hata okathi ninlupatthiwa ahu, ninnipaka khula etthu eniwerya ahu wira neetteleke malamulo a Yehova. Weettela malamulo a Yehova, onnivuwiha nsina nawe. (Math. 5:14-16) Nave ninnooniherya wira malamulo awe tooloka ni Satana nawoothe. Hiyo naatthu oohimalela nto ninnivonya. Masi akhala wira ninnittheka, nihaana ottharuwa ni opaka khuta etthu wira nihiye itthu siniveehiha nsina na Yehova.—Esal. 79:9.
Iv ipax. 64-65 etti. 6
Moota Woothanla Otthekula Wooloka
6 Paulo aahaalopola maKristau oRoma oriki: ‘Tivó . . . muhihiyé hata etthu y’erutthu anyu erumelaka etampi, evaraka miteko s’etampi’. Nave-tho, Paulo aahihimya wira ‘muxintte makhalelo anyu awo òtakhala’. (aRoma 6:12-14; 8:13) Mwa epaphelo awe yoopacerya, aahihimya matakiheryo a ‘makhalelo awo òtakhala a erutthu’. Voohimya sa apinaatamu oottheka, hiyo ninsoma so: “Mwano mwaya mosareya okhwiri”. Metto saya siri ‘solikanene omwarexa ephome y’atthu’. “Awo anetta ehimovaka Muluku” mmaithoni mwaya. (aRoma 3:13-18) MuKristau pooti ohonona erutthu awe akhala wira onirumeela ipantta sa ‘erutthu’ awe wira opakeke itthu sa etampi. Mwa ntakiheryo, akhala wira moolakelela muKristau olelo-va onniweha itthu soohiloka ntoko epornografia aahiiso ifilme sa ikhotto, mutthu owo ‘onirumela maitho awe wira ovareke miteko s’etampi’; vano eyo ennimwiiriha ohonona erutthu awe yotheene. Okokhorela wa mutthu owo onrowa okhala mukuttho woohiloka ni ohineemereriwa ni Muluku. (Otumererya 15: 21; 1 Pedru 1:14-16; 2 Pedru 3:11) Tthiri mutthu owo onoophwanya maxakha manceene mwaha wa otthekula iwo woohiloka!
Otokosa Itthu sa Efaita Soomunepani
w08 15/11 epax. 21 etti. 9
Iponto Suulupale sa Ipaphelo sa Yakobo ni Pedru
1 Pe 1:10-12. Malaikha yaaniphavela oweha ni wiiwexexa ikeekhai sowiixerya sa omunepani saalempwale ni maprofeta a Muluku a khalai voohimya sa muloko woothanliwa wa eKristau. Ikeekhai iyo sisuweliwe paahi nuumala Yehova opacerya weettiha muloko. (aÉf. 3:10) Niireke khivaarowa okhala vamiruku otthara ntakiheryo na malaikha ni wiimananiha otokosa ikeekhai “sotikiniha sa Muluku”?—1 aKor. 2:10.
‘Kinimwettela Ekekhai Anyu’
11 Muupuwelo ni miteko soohiloka. Wira neetteleke ekeekhai, nihaana okhala oowaarya aahiiso ooratta vamaithoni va Yehova. (Yesaya 35:8; mmusome 1 Pedru 1:14-16.) Nuumala wiixutta ekeekhai, noopaka marukunuxo wira nitthareke malamulo a Biibiliya. Akina a hiyo noopaka marukunuxo maalupale. Masi nihaana ovaha ephoole wira itthu soohiloka sihihonone mweettelo ahu wooloka. Exeeni enrowa onikhaliherya wira nikhootte opaka itthu soohiloka? Nihaana wuupuwela ele Yehova onivanhe awe wira nikhale atthu oowaarya. Yehova oonivaha Yesu Kristu, Mwanawe a vameekhaawe! (1 Pedru 1:18, 19) Wira nikhale oowaarya vamaithoni va Yehova, okathi wotheene nihaana wuupuwela mukuttho Yesu ovanhe awe.
Omusoma Biibiliya
21-27 ya Outubro
MIHAKHU SINIKHUMA MBIIBILIYANI | 1 PEDRU 3-5
“Omala wa Itthu Sothene Ori Vakhiviru”
‘Mukhale Oowehaweha Mulompeke Orattene’
“VAKELAKA oxa, ti okathi woovila ovikaniha okhala owehaweha ni ohirupa”, masu ala ahimmwale ni mulopwana mmosa aatonko ovara muteko ohiyu. Anamunceene avanre muteko ohiyu, annaakhulela masu ala. Makristau a vano anniwana ni muxankiho onilikana ni ikhove, okhala wira woophiya okathi woovila ovikana khalai, wa ohiyu woopisa oxa wa mukhalelo wootakhala wa Satana. (aRom. 13:12) Tthiri okathi ola wookiserya ti vootepa woopiha orupa! Tivonto varya aya vootthuneyexa ‘okhalana ankhili’ ni wiiwelela yootumererya ya Biibiliya yoowi ‘nikhaleke owehaweha ni nilompeke orattene’.—1 Ped. 4:7.
w99 15/4 epax. 22 etti. 3
Moota Woosuwela ni Oxintta Sootteettheya sa Omunepani
Muupuweleke yoolopola ya murummwa Pedru yeeyo enihimya so: “Omala wa itthu sothene ori vakhiviru. Tivó, mukhalaneke ankhili, mwisumàlihe wira mulompeke orattene. Ehinatthi khul’etthu, mukhaleleke nthiti ophentana, okhala wira ophentana onnikhunela itampi”. (1 Pedru 4:7, 8) Ti vookhweya ohiya soovonya, sa akina ni soovonya sahu sihononaka muupuwelo ahu ni vamurimani vahu sipakeyaka etthu ennitthekiha. Satana onnisuwela saana yootteettheya eyo ya opinaatamu. Wira Satana owerye oxintta, enamuna emosa ya olavilavi onirumeela awe, ti waakawanya atthu. Tivonto nihaana waakuvela okhuneela itampi iyo moophenta ni murima wotheene wira ‘nihinvahe opuro Satana’.—aÉfeso 4:25-27.
Nihaana Owaakhela Aletto!
2 Pedru aahaatumererya maKristau ale oriki: “Mwakhelaneke vaté vanyu”. (1 Ped. 4:9) Nuulumo na eGriki noowi “owakhela aletto”, nintaphulela “waareerela murima amalapo”. Masi Pedru aahaatumererya anna ni arokora wira yaakhelaneke ‘vaté vaya’, hata yaasuwelana aahiiso yaavara miteko hoothe. Waakhelana waarowa waakhaliherya sai?
3 Waamulipiha vanceene wataana waya. Ankhi nyuwo? Niireke munnuupuwela moota mwaahakalanle anyu okathi munna aahiiso murokora oolattunlyaweni owannyawe? Nave omulattula mutthu owannyinyu, eyo ennilipiha wataana wanyu, kiira? Owaakhela anna ni arokora onninikhaliherya waasuwela saana. MaKristau yaakhala okathi wa Pedru, yahaana wataana, vanceenexa okathi mixankiho saatepa aya. Nto “okathi [ola] wokiserya”, nihaana opaka etthu emosaru.—2 Tim. 3:1.
Otokosa Itthu sa Efaita Soomunepani
Makoho Anikohiwa ni Ale Anisoma Irevista Sahu
Biibiliya onihimya wira Yesu “ahilalerya minepa satthukeliwe”. (1 Ped. 3:19) Masu ala antaphulelani?
▪ Murummwa Pedru aahilavula wira, minepa iyo ti seiye ‘sahamwiwelenle Muluku okathi wawehererya awe n’uvilela, Nowe atekaka ekalawa’. (1 Ped. 3:20) Pedru aahimya malaikha yaale yaathanlale otthara ohiiwelela wa Satana. Yuda onilavula sa malaikha yaale ‘yahakhapelenle eyulupale aya, khuhiya nipuro naya: Muluku àsuka yawo mwepiphini mowixa, etthukiwene ni mikhoyi sihintaphuliwa-tho, àsukeryaka nihiku nulupale ninrowaya olamuliwa’.—Yuda 6.
Moota xeeni minepa iyo wala malaikha awo yahaiwelenle aya okathi wa Nowe? Ahinatthi mutaaseke, malaikha awo, yaahiwara erutthu yoopinaatamu, etthu yeeyo yahiirela mpantta yoolakela ya Muluku. (Maph. 6:2, 4) Ohiya-vo, mwaha wa malaikha awo waarupiha athiyana, yaapaka etampi yuulupale. Muluku khaapanke malaikha wira yaarupiheke athiyana. (Maph. 5:2) Nto malaikha awo ootakhala muhoolo Muluku onrowa opwetexa. Masi mahiku ala, ntoko Yuda olavunle awe, malaikha awo ‘ari mwepiphini mulupale’, yeeyo eri ntoko, ekhatteya yomunepani.
Nto silini Yesu aalalenrye awe ‘minepa iya satthukeliwe’? Pedru aahilepa wira eyo yiiraneyale nuumala Yesu ‘okhalihiwa-tho mukumi [mwa munepa]’. (1 Ped. 3:18, 19) Moone-tho wira Pedru oolavula wira Yesu ‘aahilalerya’. Mwaha wa Pedru orumeela masu anooniherya etthu evinre, eyo entaphulela wira olaleerya iwo wiiriwe vahinatthi Pedru olepa epaphelo awe yoopacerya. Vanikhala wira ovinre ene okathi nuumala Yesu ohihimuxiwa, aahilaleerya minepa iye sootakhala voohimya sa ehukhumu yuulupale ni yaxariya saarowa aya waakhela. Olaleeriwa iwo khahiyo waari wa ovahiwa nlipelelo. Waari olaleeriwa wa ophukeliwa. (Yona 1:1, 2) Nave-tho nuumala Yesu wooniherya waamini wawe ni ororomeleya mpakha okhwa ni nuumala-vo ohihimuxiwa; aahooniherya wira Diabo khaarina owerya ohoolo wa Yesu. Tivonto, Yesu aahikhalana mathowa oolaleya ehukhumu eyo yoophukela.—Yohani 14:30; 16:8-11.
Muhoolo, Yesu onrowa omutthukwa ni omurihela mulittini moowiixa Satana ni malaikha awe. (Luka 8:30, 31; Wis. 20:1-3) Mpakha okathi owo, soopattuxiwa iyo soohiiwelela, sinoovikaniha okhala mweepiphini yomunepani, nto siniwehererya opwetexiwa.—Wis. 20:7-10.
w08 15/11 epax. 21 etti. 7
Iponto Suulupale sa Ipaphelo sa Yakobo ni Pedru
1 Pe 4:6—Atthu xeeni ‘òkhwa alalèriwe ehapari yorera’?
Anihimmwa atthu yaari ‘òkhwene murohoni mwaya mwaha wa sottheka saya ni mwaha wa itampi saya’ aahiiso atthu yaakhwiiye mwa omunepani, ahinatthi wiiwa ihapari sooreera. (aÉf. 2:1) Nto nuumala waamini ihapari sooreera yaalaleeriwe aya, awo yaahikhala akumi mwa mukhalelo wa omunepani.
Omusoma Biibiliya
28 a Outubro–3 a Novembro
MIHAKHU SINIKHUMA MBIIBILIYANI | 2 PEDRU 1-3
“Muupuweleleke Orwa wa Nihiku na Apwiya Yehova”
w06 15/12 epax. 27 etti. 11
Yehova Onowiirela “Exariya Ale Athanlalyawe”
11 Niiwexexeke sai moolumo oolipiherya a Yesu aahimmye awe wira Yehova onookumiherya exariya “nananoru”? Nuulumo na Muluku nnooniherya wira hata ‘vapisaka’, Yehova onookumiherya exariya okathi wooreerela. (Luka 18:7, 8; 2 Pedru 3:9, 10) Mahiku a Nowe, nuumala orwa Mutaaseke, atakhali otheene yaahiiviwa moohipisa. Nave-tho mahiku a Lothi, nuumala omora mooro wiirimu, atthu ootakhala yaahookhwa. Yesu aahimmye so: “Siso, vanimwiraneya nihiku Mwana a Mutthu ontthunawe wisoniherya”. (Luka 17:27-30) Moohipisa atakhali anrowa ‘opwetexiwa nananoru’. (1 aTesalonika 5:2, 3) Moohaanyiherya, hiyo pooti ororomela wira Yehova khonirowa weemererya wira olumwenku wa Satana ovikanihe okhala mpakha ovikana ele exariya awe eneemererya aya.
w06 15/12 epax. 19 etti. 18
“Nihiku Nulupale N’Apwiya [Yehova] Nri Vakhiviru”
18 Murummwa Pedru onninlopola wira nihaana owehererya orwa wa “nihiku n’Apwiya [Yehova]”! Ninrowa opaka sai eyo? Enamuna emosa, okhalana mweettelo “wowarya ni womwìwelela Muluku”. (2 Pedru 3:11, 12) Oluttuweliwa ni miteko iyo, onoonikhaliherya olipelela “nihiku n’Apwiya [Yehova]”. Nuulumo na eGriki noowi “wuupuwelela” nintaphulela “waakuviha”. Ekeekhai wira khaninwerya waakuviha orwa wa nihiku na Yehova. Masi vaavo ninluttuweliwa ahu ovara miteko sa Muluku nlipelelaka nihiku nlo, okathi onrowa oviraka moowakuveya.—1 aKorinto 15:58.
Otokosa Itthu sa Efaita Soomunepani
w08 15/11 epax. 22 etti. 2
Iponto Suulupale sa Ipaphelo sa Yakobo ni Pedru
2 Pe 1:19—Tani ori “nivoroxa”, ni okathi xeeni okhumelenle awe? Ninsuwela sai wira eyo ehiiraneya? “Nivoroxa”, Yesu Kristu sintoko Mwene a Omwene wa Muluku. (Wis. 22:16) Eyaakha ya 1914, aahiphattuwa ohoolo wa soopattuxiwa sotheene ntoko Mwene a Omesiya, olaleyaka oxa wa nihiku nsya. Yowiiraneya ya othatuwa wa Yesu, ehooniherya ovuwa ni owerya wa Omwene awe, ni enninlipiherya ororomeleya wa iprofesia sa Muluku. Ovaha ephoole nuulumo nlo onnimwaleela murima ahu, ni onninikhaliherya osuwela wira Nivoroxa nlo noophattuwa.
w08 15/11 epax. 22 etti. 4
Iponto Suulupale sa Ipaphelo sa Yakobo ni Pedru
2 Pe 3:17—Exeeni Pedru aaphavela awe ohimya ni masu oowi “molopoliwa”? Owo aahimya osuwelihiwa vahinatthi itthu saarowa okhumelela muhoolo, aasuwelihiwe awe yena ni atthu akina yuupuxeriwe omulepa Biibiliya. Okhala wira osuwela iwo khorina mikano, khiwaakhalihenrye maKristau a eseekulu yoopacerya osuwela itthu sotheene saarowa wiiraneya muhoolo. Awo yaasuwela itthu suulupale paahi saalipeleliwa.
Omusoma Biibiliya