Ireferensia sa Okumi ni Orummwa Ahu Ekaderno Enirumeeliwa Omuthukumanoni
5-11 YA OUTUBRO
MIHAKHU SINIKHUMA MBIIBILIYANI | OKHUMA 31-32
“Muhaakokhoreleke Amuluku Eethiru” (Okhuma 32:1)
w09 15/5 epax. 11 etti. 11
Muroweke Vahoolo Mwa Omunepani—‘Okhala Wira Nihiku na Yehova Nri Vakhiviru’
11 Weettela miruku sa mBiibiliyani pooti okhalaka vooxankiha, otepexa wene okathi sinniphwanya aya mixankiho suulupale. Mwa ntakiheryo, nuumala Yehova owoopola aIsarayeli wExiitu, yaanimukhupanya Moise ni yaanimweehererya Yehova khula nihiku. Mwaha wa xeeni? Mwaha woothowa maasi oowurya. (Okhum. 17:1-4) Sihinatthi ovira miyeeri miili nuumala aIsarayeli opaka nivarihano ni Muluku ni weemererya wira yaarowa wiiwelelaka moolumo otheene Yehova aarumme awe, awo yaahihiya weettela nlamulo naakhoottiherya waakokhorela amuluku eethiru. (Okhum. 24:3, 12-18; 32:1, 2, 7-9) Niireke opisa wa Moise okathi aavahiwa awe malakiheryo oMwaako Horebi, waahiwiiriha aIsarayeli woova? Niireke yuupuwela wira Amaleeki yaamwaatuphela tho vasya, ni khiyaarowa owerya wiisaakiha ohikhanle Moise yoowo aatexerya matata awe osulu wira yaaxintte? (Okhum. 17:8-16) Masi moohicikha etthu yuupuwela aya, aIsarayeli ‘yahikhotta wiwelela’. (Miteko 7:39-41) Paulo aahaalopola maKristau wiimananiha wira ahimorele muraakho mmosaru woohiiwelela, aIsarayeli yoonihenrye aya okathi yoova aya okela elapo yooleiheriwa.—aHé. 4:3, 11.
Mmwiiweleleke Muluku Wira Mwaakhele Mareeliho Awe
12 Yehova aahipacerya waakhwaniherya mpantta mmosa wa Nlamulo na waataana, khutthokiha opuro wa okokhorela, wira alipa a mukuttho yaakhweiheryeke apinaatamu oottheka wataana ni Muluku. Masi, aIsarayeli mowaakuveya yaahiliyala wiivahererya waya wa Muluku, nave ‘yanimuripiha murima Muluku aya òwarya’. (Esal. 78:41) Mwa ntakiheryo, okathi Moise aapisa awe Omwaako Sinayi, aIsarayeli khiyaawenrye olipelela; nto yaahihiya omwaamini Muluku yoonaka wira Moise aahaanyanyala. Nto yaahikuxa eweero khupaka elatarato ya mwaanyompe khuhimya wira: Ola ‘va Muluku anyu, yowo okumihaleni elapo ya wEjitu’. (Okhum. 32: 1, 4) Awosa yaahiihana nihiku nlo okhala ‘nirá no watthapela Apwiya [Yehova]!’; nto khiyaakokhorela elatarato ni opaherya mukuttho. Mwaha waivaavo, Yehova aahimuleela Moise wira: ‘Awo khapinse ohiya ephiro yalakihenryaka’. (Okhum. 32:5, 6, 8) Nnaamwi aIsarayeli yaamulaphenle Muluku, moothananiha yaahimutthekela-tho.—Moth. 30:2.
“Tani Ari Mpantta wa Yehova?”
14 AIsarayeli yaanisuwela wira ti voohiloka waakokhorela amuluku eethiru. (Okhum. 20:3-5) Nto mowaakuveya yaahipacerya omukokhorela mwaanyompe a eweero! Hata yahiiwelenle malamulo a Yehova, awo yaaniiwoka yuupuwelaka wira yaari mpantta wa Yehova. Aroni aahiitthana okhala “nirá no watthapela Apwiya!”, okokhoreliwa wa mwaanyompe ole. Exeeni Yehova aapanke awe? Yehova aahimuleela Moise wira atthu ale “yàhihononeya murima” ni aahiya otthara ephiro “yalakihenryaka”. Vano Yehova aahinanariwa vanceene onuupuwela opwetexa nloko notheene.—Okhum. 32:5-10.
Otokosa Itthu sa Efaita Soomunepani
‘Wokhala Okathi’ Woovara Muteko ni Woomumula
4 Yehova khonakhulumuwe ni khonikhala-khala okhulumuwaka. Tivonto, owo khontthuneya omumula. Masi Biibiliya onihimya wira, nuumala opattuxa erimu ni elapo Yehova ‘ahimumula’. (Okhum. 31:17) Eyo enooniherya wira Yehova aahihiya opattuxa itthu wira owehe itthu sotheene sooloka aapanke awe.—Math. 14:13; Luka 7:34.
w87 1/9 epax. 29 etti. 4
Makoho Anikohiwa ni Ale Anisoma Irevista Sahu
Mutthu olempwa nsina nawe (“mulivuruni” mwa ekumi) kontaphulela wira mutthu owo oophwanya ekumi yoohimala, ntoko aarolepeliwa wala khenturukiwa-tho. Moise aahimukoha Yehova voohimya sa aIsarayeli oriki: “Masi vano, mwatthuna walevelela etampi ay’ela,. . . Mwahitthune, mukittipihe mulivuruni mukilempyanyu-mo”. Yehova aahimwaakhula iiraka: “Kinimwattipiha mulivuruni mwaka yale akitthekenle pahi”. (Okhuma 32:32, 33) Hata Yehova omulenpene mutthu owo “mulivuruni” mwawe, mutthu owo pooti oohiya okhala oowiiwelela wala ohiiya waamini wawe. Akhala wira eyo yaamwiiraneya, Muluku ‘amuttipiha nsina na mutthu owo mulivuruni mwa ekumi’.—Wisupulula 3:5.
Omusoma Biibiliya
12-18 YA OUTUBRO
MIHAKHU SINIKHUMA MBIIBILIYANI | OKHUMA 33-34
“Mikhalelo Sooreera sa Yehova” (Okhuma 34:5)
it-3 epax. 101 etti. 4
Nsina
Osuwela nsina na Muluku khontaphulela osuwela nsina paahi. (2 Wa 6:33) Masi onitaphulela osuwela omutthu awe, soolakela sawe, miteko sawe ni mikhalelo sawe sintoko sinooniheriwa aya mBiibiliyani. (Munwehe 1 Ma 8:41-43; 9:3, 7; Ne 9:10.) Eyo ennooniheriwa ni ntakiheryo na Moise, yoowo Yehova ‘amusuwela awe orattene’ eyo piiyo, aataanale awe vanceene. (Okh 33:12) Moise aahikhalana eparakha yooweha ovuwa wa Yehova nave aahiiwa ‘òromoliwa wa nsina n’Apwiya [Yehova]’. Nsina nlo khahiyo naamuromoliwa paahi, masi saahimmwa mikhalelo ni miteko sa Muluku. “Miyo k’Apwiya, Apwiya Muluku òmoriwa ikharari ni òvilela, òpisa onanariwa, òrera murima ni òroromeleya. Miyo kinnarerela murima atthu n’an’aya n’osùlu aya mpakha oholo onkelelahu; miyo kinnileva sottheka saya n’uhìwelela waya n’itampi saya. Masi nkinliyal’etthu: kinniwerya ohukhumu sotakhala s’atthu, kattaruxaka àn’aya n’osùlu aya mpakha muloko wa neraru walá wanexexe w’atthu”. (Okh 34:6, 7)
w09 1/5 epax. 18 itti. 3-5
Yehova Onnihimya Mikhalelo Sawe
Mukhalelo oopacerya Yehova onihimya awe voohimya sa yena tuula owo “Muluku òmoriwa ikharari ni òvilela”. (Eveersu 6) Nuulumo noowi “Muluku òmoriwa ikharari ni òvilela” ninthoonyerya “mutthu oniphavela onvaha etthu mukhwaawe othoiwale ni murima awe wotheene”. Eyo ennooniherya wira Yehova oniphavela wira nisuwele wira owo onnaakhapelela arumeyi awe sintoko siisaale axipaapa anaakhapelela aya anaaya, eyo piiyo, mwa niphento ni waavaha itthu sinaathowa.—Esalimo 103:8, 13.
Moottharelana, Yehova onnihimya wira owo ‘tòpisa onanariwa’. (Eveersu 6) Nto eyo enooniherya wira owo onnipisa waaviruwela arumeyi awe ari valaponi. Moovirikana nivo, owo onnaapixerya murima, onnivilela soottheka saya ni onnaavaha okathi wira attharuwe soottheka saya.—2 Pedru 3:9.
Nuumala-vo, Muluku onihimya wira ‘tòrera murima ni tòroromeleya’. (Eveersu 6) Oreera murima wala ororomeleya, mukhalelo wooreera onimwiiriha Yehova waataana ni arumeyi awe. (Otumererya 7:9)
w09 1/5 epax. 18 etti. 6
Yehova Onnihimya Mikhalelo Sawe
Ekeekhai emosa Yehova oniphavela awe wira nisuwele tiila: owo ‘onninlevelela sottheka sahu, ohiwelela wahu ni itampi sahu’. (Eveersu 7) Nave ‘onnalevelela’ atthu anittharuwa. (Esalimo 86:5) Okathi omosaru, Yehova khoneemererya itthu sootakhala. Owo onihimya wira “nkinliyal’etthu: kinniwerya ohukhumu sotakhala s’atthu”. (Eveersu 7) Okhala wira Muluku toowaarya ni taxariya, owo onimwaahukhumu atthu otheene anipaka itampi moolakelela. Hata vapisaka, awo anoophukeliwa mwaha wa miteko saya sootakhala.
Otokosa Itthu sa Efaita Soomunepani
w04 15/3 epax. 27 etti. 5
Iponto Suulupale sa Eliivuru ya Okhuma
33:11, 20—Mwa enamuna xeeni Muluku aalavula awe ni Moise “ekhove n’ikhove”? Moise aalavula ni namitthaka a Muluku nave aahileeliwa muhupi wa Yehova orweela wa yena. Masi Moise khanwenhe Yehova okhala wira ‘khuvo onwerya onweha Muluku: onakhala mukumi’. Mwekeekhai, Moise khaalavunle ni Yehova, sintoko enooniherya aya yoolepa ya aGalasia 3:19 eriki: “Ikano siruhiwe ni malaikha, khunvahererya namitthaka, wira àsuwelihe atthu”.
w98 1/9 epax. 20 etti. 5
Muheleke Nipuro Noopacerya Itthu Soophwanelela
Ikwaha tthaaru vamwaakhani, aIsarayeli ni atthu otheene yataanale ni aIsarayeli yaahaana wiiwelela nlamulo naahimya wira yaahaana orowa omukokhorela Yehova. Masi tani yaarowa okhapelelaka ipa saya, imatta saya wira awanani aya ahihale akuxaka okathi yaarowa aya weetta mukwaha? Yehova aahaaleiherya iiraka: “khavo onrowa otuphela elapo anyu, okathi onrowanyu wakokhorela Apwiya, Muluku anyu, ikwaha ttharu vayakhani”. (Okh 34:24) AIsarayeli yaahaana okhalana waamini wuulupale okhala wira khiyaarowa opweteiwa mireerelo saya mwaha woohela nipuro noopacerya itthu sa omunepani. Niireke Yehova ahaakhwaniherya moolumo awe? Moohaaniherya ahaakhwaniherya tthiri.
Omusoma Biibiliya
19-25 YA OUTUBRO
MIHAKHU SINIKHUMA MBIIBILIYANI | OKHUMA 35-36
“Yehova Onninivaha Ikuru Wira Nivareke Miteko Sawe”
Yehova Onnaareeliha Atthu Arina Murima Woovaha
Etthu yaatempe omusivela Yehova khahiyo mwaattelo wa mireerelo saavahiwe, masi waari murima woovaha yaarina aya atthu ale ni okhaliherya miteko sa okokhorela wekeekhai. Awo yaaheemererya ovaha okathi aya ni ikuru saya wira akhaliherye muteko ole. Biibiliya onihimya so: “Athiyana othene òratta yahitthava ni matat’aya ikuwo sorika”. Onnihimya-tho wira: “akina yahitthava ikuwo ni manri a èpuri”. Ohiya-vo, Yehova aahinvaha Besaleli “ankhili ni miruku n’usuwela n’uratta w’ovara miteko sa mikhalelo sothene”. Tthiri Yehova aahinvaha Besaleli ni Oholiyabi osuwela wotheene waareerela wira avare miteko sotheene saavahiwe aya.—Okhum. 35:25, 26, 30-35.
w11 15/12 epax. 18 etti. 6
Arumeyi a Khalai—Yaheettihiwa ni Ikuru sa Muluku
6 Yehova ‘ahimusariha eroho awe Besaleli ni Oholiyabi, khunvaha ankhili ni miruku ni osuwela ni oratta w’ovara miteko sa mikhalelo sothene ni wupuwelela enamuna yopaka itthu sene . . . ni oxora miri ni miteko sikina sothene’. Khula muteko woovila Besaleli aawenrye awe opaka aakhaliheriwa ni owerya wa Muluku. Nave etthu emosaru yaahiiraneya ni Oholiyabi. Mwekeekhai awo yaahilimalela ovara miteko iye okhala wira khiyaaphavela waakhwaniherya yoothanleliwa aya paahi, masi yaaniwiixuttiha atthu akina moota woovara miteko iyo. Okhala wira Muluku aahihela mmurimani mwaya muupuwelo woophavela owiixuttiha atthu akina.
w11 15/12 epax. 19 etti. 7
Arumeyi a Khalai—Yaheettihiwa ni Ikuru sa Muluku
7 Etthu ekina enooniherya wira Besaleli ni Oholiyabi yaakhaliheriwa ni owerya wa Muluku, mwaha wa okathi waavinre sirumeeliwaka itthu iye saapanke aya, maana saahivira iyaakha soowiiraka 500 sirumeeliwaka. (2 Wah. 1:2-6) Moovirikana ni atthu a mahiku ala, Besaleli ni Oholiyabi khiyaaphavenle wiivuwiha alepaka masina aya itthu saapanke aya. Masi, awo yaahinvaha ovuwa wotheene Yehova.—Okhum. 36:1, 2.
Otokosa Itthu sa Efaita Soomunepani
w05 15/5 epax. 23 etti. 14
Musuwele Iphiro sa Yehova
14 Nlamulo na eSaabadu ninniixuttiha oreera waya wuupuwelela miteko sootikiniha sa Yehova, wuupuwelela omutthu awe ni omuxukhurela mwaha wa oreera wawe murima. Okathi atthu yaarowa aya omukokhorelaka Yehova eSaabadu, yaarowa omuttittimihaka ni omphenta ohiya wiixutta ni weettela iphiro sawe paahi. (Otumererya 10:12, 13) Miruku iye sookhalela yaavahiwe aya aIsarayeli wira athukumaneke sinnaakhaliherya nave arumeyi otheene a Yehova a mahiku ala.—aHéberi 10:24, 25.
w00 1/11 epax. 29 etti. 1
Ovaha Onnikumiherya Ohakalala
Okathi aIsarayeli yaavekeliwa aya ovaha mireerelo saya wira akhaliherye okokhorela wa ekeekhai, awo yaahipaka eyo ni murima aya wotheene—voohiikhupanyerya! Khiyaaliyanle wira aari Yehova aakhalihenrye ophwanya mireerelo sotheene yaarina aya. Tivo yaahivaha eparatha aya, eweero aya, ni inama saya. Khula mutthu aavaha ‘sintoko aatthuna awe’. Khupacerya ‘waavaha Apwiya’ ni “murim’aya woleva”. Tthiri atthu otheene “yaharuhela Apwiya sovaha saya ni murima wattenlene”.—Okhuma 25:1-9; 35:4-9, 20-29; 36:3-7.
Omusoma Biibiliya
26 A OUTUBRO–1 A NOVEMBRO
MIHAKHU SINIKHUMA MBIIBILIYANI | OKHUMA 37-38
“Altari a Mutabernaakulu ni Yootaphulela Aya” (Okhuma 37:25)
it-1 epax. 95 etti. 6
Altari
Altari aapahiwa erupani. Muhasa wa erupani onniromoliwa mapuro makina ohimmwaka opuro waapahiwa aya erupani, woonasa wene, waahikhala opuro siisa waarumeeliwa, moovarihana ni altari a soovaha. (Ona 16:12, 13; aHé 9:4; Re 8:5; mulikanyihe ni 2 Wa 26:16, 19.) Altari aapahiwa erupani aari muhina mwa etabernaakulu ohinatthi ophwanya ekortina yaari nipuro nowaaryexa, yeeyo yaahimmwa wira yaari “oholo wa nivuku no watàna”.—Okh 30:1, 6; 40:5, 26, 27.
it-2 epax. 390 etti. 10
Erupani
Erupani yowaarya yaarumeeliwa mutabernaakulu, yaapakiwa ni ikaruma soorika seiyo saavahiwa ni atthu a nloko nle moohikhanyereriwa. (Okh 25:1, 2, 6; 35:4, 5, 8, 27-29) Ohimyaka sa malakiheryo a moota woopaka erupani iyo, Yehova aahimuleela Moise iiraka: “Mwiphavelele ixero sowunkhela: bálsamo ni ambre ni gálbano, n’irupani yorera, miphimo solikana. Mutakanyiherye, mpake exero, ntoko sinlimalelaya alipa-èxero. Munokhalana erupani yorerihiwa, yosukeriwa miteko s’onamukuttho. Muhavule otthu ene vakhani, mwixathi oholo wa nivuku no watàna, muhemani m’okumana, weiwo onrowaka okumana ni nyuwo. Otth’ùwo muttittimihe, mana worerihiwa”. Tivo, ophavelaka owiixuttiha efaita yaarina aya ni mwaha wooreerihiwa wa erupani eyo, Yehova aahincererya oriki: “Akhala onrowa opaka erupani ntoko ela, wira asiveliwe ni wunkhela waya, ohana okumihiwa mmulokoni mwawe”.—Okh 30:34-38; 37:29.
it-1 epax. 95 etti. 4
Altari
Altari a Mutabernaakulu. Altari a ekoobre aapakiwe mutemplo, wunnuwa wawe waahiphiya ikwaha 16 onvikana altari aapakiwe mutabernaakulu, nave aarina imeetru 8,9 ipantte sotheene ni orekama wawe waari wa imeetru 4,5. (Okh 39:39) Mwaha woorekama vanceene, ahaana okhala opuro wooreerela ntoko vate va etabernaakulu.—Okh 27:1-8; 38:1-7, 30; Mot 4:14.
Otokosa Itthu sa Efaita Soomunepani
it-1 epax. 36 etti. 7
Khampiri
Okhala wira mwiri owo ti woolipa vanceene, wooreera, woolemela, ni ohinkhuuriwa moowaakuveya ni oweexe. Mwaha wa mikhalelo iya sotheene ni mwaattelo awe mutakhwani waahiiriha mwiri owo ophwanelela otekaniwa etabernaakulu ni itthu sikina saari muhina. Nave aahirumeeliwa wira otekaniwe nivuku na waataana Okh 25:10; 37:1.
wp15 1/4 epax. 15 etti. 4
Nyuwo Mwaanisuwela?
Moovirikana ni iloola sa mahiku ala, iloola sa khalai saapakiwa ni eyuuma yowaarya. Ikwaha sinceene saapakiwa ni eboronze, ekoobre eparatha, eweero, ni electro. Ekwaha yoopacerya Biibiliya oniromola awe eloola onivarihana ni otekiwa wa etabernaakulu, nipuro nenlo aIsarayeli yaapacenrye aya omukokhorela Muluku. Athiyana yaahivaha iloola saya wira sipakeliwe ekamela ya ekoobre ni mweemexero aya. (Okhuma 38:8) Waaniheryasa, iloola iyo wira sirumeeliwe siira oomuhaniwa.
Omusoma Biibiliya