Ireferensia sa Okumi ni Orummwa Ahu Ekaderno Enirumeeliwa Omuthukumanoni
SETEMBRO 1-7
MIHAKHU SINIKHUMA MBIIBILIYANI
Mukhootteke Soolema Sihimmusivela Yehova
Owehaweha N.o 6 a 2016 epaax. 6, ekaaxa
Soowoonihiwa sa Omunepani
Wiixutta voohimya sa ele enimuhakalaliha Yehova ni weettela sooruma sawe, ti etthu ekhanle ooniiriha okhapeleliwa ni yena. Mwa ntakiheryo, okathi wa arummwa, makristau a epooma ya wEfeso, yaahithukumanya iliivuru saya sa maxintta ni yaahipaha. (Mit 19:19, 20) Mwa enamuna emosaru, naaphavelaka okhapeleliwa ni Yehova, nihaana oriha itthu sootheene sinivarihana ni onammunepani aahiiso maxintta. Itthu iyo sinihela muhina: ihirisi, iliivuru sinilavula myaha sa onammunepani, iliivuru siniwooniherya masantu aahiiso amuluku eethiru ni ikolaari seiyo sinikhala ntoko sinrowa onikhapelela itthu “sootakhala”.
Owehaweha 04/2019 epaax. 17 etti. 13
Mwaakiheryeke Ekeekhai Voohimya sa Okhwa
13 Mwaanyiheryaka yoolema emosa akhala wira ennimusivela Yehova aahiiso nnaari, muhaana onvekela wira oovaheeni ankhili ni waamini woolipa. (Mmusome Yakobo 1:5.) Nuumala-vo, muhaana otokosa muliivuruni mwahu yoolema eyo. Akhala wira vannireerela, mwaakoheke axitokweene a muloko anyu. Awo khanrowa wooleelani etthu yoopaka, masi animookhaliheryani ophwanya malakiheryo a mBiibiliyani oovareleya muteko, ntoko ala anilavuliwa mwaha ola. Vaavo munvarihela anyu muteko malakiheryo awo, munniwiixuttiha “ankhili” anyu, nto ankhili awo animookhaliheryani “osuwela n’uthanla sorera ni sotakhala”. — aHéb. 5:14.
Owehaweha 11/2018 epaax. 11 etti. 12
“Kinimweettela ekeekhai anyu”
12 Soolema sihinimusivela Muluku. Amusi ahu, atthu anivarana ahu muteko ni ale anisomana ahu oxikola, pooti ophavelaka wira nuupuweleleke hoothe mahiku a iferiado. Exeeni enrowa onikhaliherya okhootta yookhanyererya ya wiirela mpantta soolema ni iferiado sihinimusivela Yehova? Nihaana ovikaniha woona mathowa animwiiriha Yehova ohisiveliwa iferiado iyo. Nave pooti otokosa iliivuru sahu ni wuupuwelela moota iferiado sipacenrye aya. Vaavo nnuupuwelela ahu mathowa a mBiibiliyani anniiriha ohiirela mpantta iferiado iyo, ninrowa otepaka woona wira ninnivara “itthu sinasivela Apwiya”. (aEef. 5:10) Akhala wira ninnimuroromela Yehova ni Nuulumo nawe, khaninrowa owoovaka atthu. — Mir. 29:25.
Itthu sa Efaita sa Mbiibiliyani
Owehaweha 10/2017 epaax. 6 etti. 11
“Ophentana W’ekekhai, Woneyeke ni Miteko”
11 Mwaattottopeleke akina ni murima wotheene. Mwaattottopeleke akina. Ninnisuwela wira ottottopela onnaalipiha atthu. (aÉfeso 4:29) Masi hiyo nihaana wiimananiha wira moolumo ahu ekhumeke vamurimani, ohiya olavula itthu moonyoholela. Nihaanyoheleleke atthu, masi nihisyakeke waavaha miruku akina vaatthuneyaka. (Miruku 29:5) Naarowa okhala anawoothe, vakhala wira ninnaattottopela atthu aryeene vaavo, masi yaahikhale khiyaalavula moohiloka. Niphento na murummwa Paulo naari nekeekhai. Okathi aalepenle awe epaphelo maKristau a oKorinto, aahaattottopela mwaha wa itthu sooreera yaapaka aya. (1 aKorinto 11:2) Masi okathi vaatthuneya aya waavaha miruku, owo aanaavaha ni aanaatthokiherya saana mathowa ene. — 1 aKorinto 11:20-22.
8-14 ya Setembro
MIHAKHU SINIKHUMA MBIIBILIYANI
“Muhikiirihe Okhala Oohaawa Nnakhala Oothaaciri”
Owehaweha 01/2018 ipaax. 24-25 itti. 10-12
Muthinto wa Ophenta Oniphwanyiha Ohakalala Wekeekhai
10 Ekeekhai wira otheene ahu ninniphavela musurukhu, maana owo onninikhaliherya. (Musuweli 7:12) Masi niireke nnoowerya ohakalala nrina ene itthu vakhaani sinnithowa? Aayo! (Mmusome Musuweli 5:11.) Aguri, mwana a Yaké aalempe so: “Muhikivahé othajiri nnákhala omasikhini: mukivahe siniphiyerya ekumi aka”. Ti vookhweya osuwela nthowa naya mulopwana ole ahaaphavela awe okhala ootepa ohaawa. Owo aahimmye wira khaaphavela okhala nawiiye, okhala wira opaka eyo yamuramusa nsina na Muluku. Masi xeeni ahaaphavela awe othaaciri? Owo aahimmye so: “Kavonne, kanwerya wokhottani, kihimyaka wira: ‘Apwiya ankitekela-ni?’” (Miruku 30:8, 9) Woonasa wene munnaasuwela atthu aniroromela mihakhu omuhiya Muluku.
11 Mutthu oniphenta musurukhu khivaniweryaneya omuhakalaliha Muluku. Yesu ahimmye so: “Khavo onwerya warumela mamwene manli: mana onomunyokha mmosá, amphenteke mukina pahi; walá onomurumela mmosá, mukina amuthanyeke. Khamuniwerya omurumela Muluku vamosá ni muhakhu”. Nave aahihimya wira: “Muhìthukumanyeryé mihakhu vathí-va: vava owexe ni mukwitha vanihononaya, vava anawiye vanipwexaya mukhora, khukuxa muhakh’uwo. Mwìthukumanyeryeke mihakhu wirimu: weiwo nnákhala owexe walá mukwitha, walá owexe ohinlyaya, weiwo ohikhanle-wo anawiye ankuxa muhakh’uwo”. — Matheyo 6:19, 20, 24.
12 Arumeyi anceene a Yehova annimananiha okhalana okumi woohiisaattiherya itthu. Awo anniweha wira opaka eyo onnaaphwanyiha okathi woomurumeela Yehova ni waahakalaliha. Jack, yoowo onikhala wEstados Unidos ootumiha empa awe yuulupale wira okele opioneero ni mwaarawe. Owo onihimya so: “Khivaakhweyale ohiya enupa ahu ni opuro muulupale naarina ahu”. Masi mwa iyaakha sinceene owo aamakela otthika omutekoni oriipiwe ene murima mwaha wa muteko awe. Owo onihimya so: “Mwaaraka aari pioneera ookilaatheya nto aanihakalala vanceene. Owo aamakela ohimya so: ‘Kininvarela muteko patarau muulupale!’ Vano kiri aka pioneero, nto oowanli ahu nninvarela muteko Mutthu mmosaru, Yehova”.
Owehaweha 05/2017 ipaax. 25-26 itti. 15-17
Munnimphenta Yesu Ovikana Itthu?
15 Anamunceene olelo-va, aniphavela okhalana ikuwo, aselulari, akomputador ni itthu sikina sa musurukhu munceene. Atthu awo waasivela itthu sa werutthuni, niire so, etthu yootepa otthuneya mookumini mwaya musurukhu ni mireerelo paahi ovikana itthu sikina. Ntoko muKristau, etthu xeeni munoona anyu okhala yootepa otthuneya? Mwiikoheke so: ‘Kinniviriha okathi munceene kuupuwelaka ikaaro sikumiheriwe niinano ni ikuwo, ohiya olokiherya mithukumano sa mmulokoni? Kiireke kinniviriha okathi munceene kivaraka miteko saka, nto kihinakhalana okathi wa ovekela ni omusoma Biibiliya?’ Naahiivahe ephoole, ophenta itthu sa werutthuni pooti okhala etthu yootepa otthuneya ovikana omphenta wahu Kristu. Nto nihaana wuupuwelela masu a Yesu ani: “Mwipasope: muhikhalé atthu òwùnlela muhakhu”. (Luka 12:15) Exeeni yaamwiirinhe Yesu ohimya masu ala?
16 Yesu aahimmye wira: “Khavo onwerya warumela mamwene manli”. Nave aahincererya oriki: “Khamunwerya omurumela Muluku vamosá ni muhakhu”. Khivaniweryaneya omurumeela Yehova ni murima wotheene okathi omosaru nnaphavela itthu sa werutthuni. Yesu aahitthokiherya wira ‘nnomunyokha mmosá, nimphenteke mukina pahi’ aahiiso ‘nnomurumela mmosá, mukina nimuthanyeke’. (Matheyo 6:24) Okhala wira naalipa-oottheka, nihaana ovikaniha wiimananiha owanana “makhalelo ahu òtakhala”, yaawo anihela muhina wunlela muhakhu. — aÉfeso 2:3.
17 Okhala wira anamunceene aniphavela paahi itthu sinaahakalaliha, nto vannaavila okhalana moonelo wooloka ni itthu sa werutthuni. (Mmusome 1 aKorinto 2:14.) Tivonto, vannaavila osuwela ele eri yooloka ni yoohiloka. (aHéberi 5:11-14) Ophavela itthu sa werutthuni pooti otepa wunnuwa vamurimani vaya. Nto vaavo anitepa aya ophwanya, anootepa ophavelasa. (Musuweli 5:10) Masi etthu xeeni enrowa onikhaliherya osyaka muupuwelo owo? Omusoma Biibiliya khula nihiku, onoonikhaliherya osyaka wunlela muhakhu. (1 Pedru 2:2) Okhala wira Yesu aahikhalana osuwela wa Yehova, eyo yaahimukhaliherya okhootta sooweha sa Diabo. (Matheyo 4:8-10) Olelo-va, akhala wira nimphavela osyaka wunlela muhakhu, nihaana ovarihela muteko miruku sa Yehova mookumini mwahu. Nto opaka eyo nnimooniherya wira ninnimphenta vanceene Yesu ovikana itthu sa werutthuni.
Owehaweha 1/06/2011 epaax. 10 etti. 4
Niireke Vanniweryaneya Ohakalala ni Itthu Nrina Ahu
Mumpakeke Palano Muhinatthi Othuma. Nnaamwi ekhalaka ntoko etthu ya khalai, ompaka palano muhinatthi othuma, onnikhaliherya osyaka omaleliwa ni okopha-kopha. Mwaha wa ompaka palano, atthu akina annisyaka okopha ni oliva ixuuru. Biibiliya onihimya wiira eneneele ti ya ‘ankhili’ mwaha woowi, ‘ennittottela yoolya aya okathi woohepha’ para olya muhoolo. — Mir 6:6-8; 30:24, 25.
Owehaweha 06/2024 epaax. 13 etti. 18
Muhihiye Okhala Muletto a Yehova!
18 Vaarowa okhala va miruku khula mmosa a hiyo wuupuwelela moota onoonela awe musurukhu. Mwiikoheke so: ‘Kiireke kinnuupuwela vanceene musurukhu ni itthu khaakhanle aka oothuma kaarina munceene? Koolihiwa musurukhu, kiireke kinnipisa oliva kuupuwelaka wiira mutthu owo khonrowa orumeela niinaano vaava? Kiireke mwaha wookhalana musurukhu munceene, kinniixoona okhala a faita waavikana atthu akina? Kiireke kinnoona ovila waaxukhurela atthu akina? Kiireke kinnimoona mukina okhala mutthu oniithukumanyerya muhakhu, mwaha wookhalana musurukhu munceene paahi? Kiireke apatthani aka taale arina musurukhu paahi ni nkinaathokorerya saana ale ahirina musurukhu?’ Ootheene ahu nookhalana eparakha yuulupale ya olattuliwa ni Yehova wiira nikhale aletto a muheemani mwawe. Nto wiira nihihiye eparakha eyo nirina ahu, nihiphenteke musurukhu mootepana. Namphentaka vanceene Yehova ovikana musurukhu, owo khonikhala-khala onihiyaka! — Mmusome aHeeberi 13:5.
Itthu sa Efaita sa Mbiibiliyani
Owehaweha 15/04/2009 epaax. 17 itti. 11-13
Soopatuxiwa Sinooniherya Osuwela wa Yehova
12 Exeeni nniixutta ahu ni ipila? Kahiyo vookhweya enama ela otupheliwa ni inama sikina. Owo onniwerya oweha inama sinimurweela hata siri ene ottaiwene ni onnaattamela mwiithe ni makhukhu wiira oweryeke wiikhapelela. Nave hiyo nihaana okhala atthu oowehaweha wiira niwerye oweha miraakho sa Satana. Murummwa Pedru aaloponle so makristau: “Mukhaleke a miruku ni nwehaweheke. Nwanani inyu, Diabo, onneetteetta ntoko kharamu onoopa murukulu, ophavelaka omukhuura mutthu”. (1 Ped. 5:8) Okathi aari awe valaponi, Yesu aari oowehaweha okathi wootheene ni aanisuwela miraakho Satana aarumeela awe wiira omwiirihe ohiya okhala oororomeleya. (Mat. 4:1-11) Owo ohaavaha ntakiheryo nooloka awiixutti awe.
13 Enamuna emosa nikhanle ahu oowooniherya wiira na atthu oowehaweha, ori ottottela muraarelo inamuna Yehova onnikhapelela awe. Osoma nuulumo na Muluku ni orowela mithukumano, itthu sihikhanle ahu oolosowela. (Luk. 4:4; aHe. 10:24, 25) Ntoko siisaale ipila sinikhala aya saana muttetthe woowiiraana, nave-tho hiyo nihaana okhala oowiiraana ni anna ni arokora “wira otheene ahu nlipihane”. (aRo. 1:12) Okathi ninttottela ahu mureerelo inamuna Yehova onnikhapelela awe, ninnooniherya wiira ninnikupali moolumo aalempe awe nasaalimo Davidi, yaawo ani: “Yehova ti mwala aka, ti empa aka yoolipihiwa ni ti yoowo onikoopola. Muluku aka ti mwala aka, ti yoowo kinimutthyawelela aka”. — Esa. 18:2.
15-21 ya Setembro
MIHAKHU SINIKHUMA MBIIBILIYANI
Miruku Sooloka Anamuyari Akhanle Aya Oowaavaha Anaaya
Owehaweha 1/02/2011 epaax. 19 itti. 7-8
Mmwiixuttiheke Mwaninyu Itthu Onireerela Awe Osuwela
Nwiixuttiheke aniinyu ekeekhai voohimya sa orupihana. Ti vooloka waalopola aniinyu. (1 aKo 6:18; Yak 1:14, 15) Biibiliya onihimya wiira orupihana yoovaha enikhuma wa Muluku, ohiya muraakho wa Satana. (Mir 5:18, 19; Nsi 1:2) Olavula khula okathi voohimya sa mixankiho sinikhumelela mwaha wa orupihana, pooti owiiriha aniinyu okhalana moonelo woohiloka ohinivarihana ni ele biibiliya onihimya awe.
Musuweleke akhala wiira mwaninyu onnisuwela itthu sootheene voohimya sa orupihana. Namuyari mmosa onikhala oMéxico, onihimya so: “Kinniimananiha waaleela anaaka wiira orupihana etthu yooreera ni wiira Yehova oonivaha, wiira niihakalaliheke. Masi atthu aneemereriwa orupihana, nuumala othela ekasamento paahi. Eyo pooti oniphwanyiha ohakalala aahiiso mixankiho moovarihana ni moota ninrumeela ahu”.
Ajuda para a familia mwaha 4 itti. 11-13
Moota Woolavula ni Mwaninyu Voohimya sa Eviinyu
Mukhaleke Ntakiheryo Nooloka. Ntoko siisaale exiponxa eninuula aya maasi, nave anamwane annitakiha khula etthu aniweha aya. Sootokosa sinooniherya wiira anamwane annaakuva otakiha mweettelo wa anamuyari aya. Akhala wiira okathi muniriipiwa anyu murima muniwurya eviinyu, aniinyu anoorowa wiixutta wiira para omaliha mixankiho saya ahaana owurya eviinyu. Tivonto, mukhaleke ntakiheryo nooloka para aniinyu. Okathi muniwurya anyu eviinyu, muhaana okhalana ephoole.
Nvenye! N.° 6/2017 epaax. 9 etti. 5
Nwiixuttihe Aniinyu Okhala Oowiiyeviha
Mmutumereryeke okhala oovaha. Mmooniheryeke mwaninyu wira “mulipa-òvaha onoreriwa onvikana mulipa-òvahiwa”. (Miteko 20:35) Munrowa omukhaliherya sai? Mpakeke hoothe elista ya atthu anitthuneya okhaliheriwa, ntoko: othuma etthu, opakhiriwa aahiiso olokiha etthu yoohononeya. Mwaakuxeke aniinyu okathi munrowa anyu waakhaliherya atthu awo. Okathi anoowehaayani muhakalalaka mwaha wa waakhaliherya akina, awo anaamoonaka otthuneya waya ophavela mureerelo wa atthu akina. Tthiri, ntakiheryo nanyu nnoomwiixuttiha mwaninyu okhala oowiiyeviha mwa enamuna yoolokexa. — Malakiheryo a Biibiliya: Luka 6:38.
Itthu sa Efaita sa Mbiibiliyani
Owehaweha 05/2023 epaax. 22 etti. 6
Muhittipihe “Malumi a Moro w’Apwiya”
6 Maria aahikhalana waataana wooloka ni Yehova. Okhala wiira yena mmansawe aniimananiha olipiha waamini wawe. Owo aanisuwela saana soolepa. (Luka 1:46) Nave owo aaniivaha okathi wiira uupuwelele itthu aasoma awe. (Luka 2:19, 51) Maria aari muthiyana ootheliwa ooloka, okhala wiira aahikhalana waataana woolipa ni Yehova. Nave olelo-va, athiyana anceene ootheliwa anniimananiha omutakiha Maria. Mwa ntakiheryo murokora mmosa oniitthaniwa Emiko, onihimya so: “Kihinatthi otheliwa, kaanikhalela nthiti itthu saalipiha waamini waka. Nuumala otheliwa iyaka taavekela ni taamuhoolela omulompa Muluku vatthokoni. Nuumala-vo kaahoona wiira miteko iye kaavara aka kihinatthi otheliwa kaamuhiyerya iyaka paahi. Masi nuuvira okathi kaahona wiira ti miyo kirina muritti wookhapelela waataana waka ni Yehova. Masi kinnaavya okathi wiira kivekele, kimusome Biibiliya ni wuupuwelela ele kinsoma aka”. (aGal. 6:5) Xontte nyuwo athiyana ootheliwa muhihiye olipiha ompatthani anyu ni Yehova, mwiira siiso axiiyanyu khanrowa ohiyaka woottottopelani ni woophentani. — Mir. 31:30.
22-28 YA SETEMBRO
MIHAKHU SINIKHUMA MBIIBILIYANI
Muhihiye Owiixuttiha Atthu Akina
Owehaweha 01/2017 epaax. 27 itti. 3-4
Itthu Iya “Mwalèle Atthu Òroromeleya”
3 Hiyo ninnisiveliwa omurumeela Yehova ni ninnivaha efaita muteko ahu. Anamunceene a hiyo ninnisiveliwa vanceene muteko onivara ahu ni ninrowa ovikanihaka mpakha vaniwerya ahu. Masi, mooriipiha murima vaavo atthu anuuluvala aya awo khaniwerya ovara muteko aya ntoko yaaryaaya amiravo. (Musuweli 1:4) Nto eyo ennaakumiherya mixankiho atthu a Yehova. Olelo-va muteko woolaleerya onninnuwa, nto mutthenkeso wa Yehova onnirumeela etekonologia ya naanano wira ihapari sooreera saaphwanye atthu anci. Masi okathi mukina, vannaavila atthu oowuuluvala wiixutta inamuna isya sa ovara muteko. (Luka 5:39) Nave-tho, okathi mutthu onuuluvala awe ikuru sawe sinnivukuwa. (Miruku 20:29) Tivonto, ti vooloka atthu oowuuluvala owiixuttiha amiravo wira akhalaneke miritti mmutthenkesoni mwa Yehova. — Musome Esalimo 71:18.
4 Tthiri khivankhweya ale arina miritti waavaha miteko sikina amiravo. Anna akina pooti oriipiwa murima mwaha woopweteiwa muritti waasivela vanceene. Nave pooti waawereya okathi anuupuwela aya ohiya muritti wa vameekhaaya waasivela. Aahiiso pooti oxanka yuupuwelaka wira yaahikhale vaavo, muteko owo khonrowa ovariwa saana. Woonasa wene anoona wira kharina okathi wa owiixuttiha atthu akina. Nave-tho, amiravo ahaana opixa murima okathi ahinivahiwa aya miritti sinceene.
Itthu sa Efaita sa Mbiibiliyani
Owehaweha 12/2018 epaax. 18 etti. 14
Nyuwo Amiravo, Mpattuxa Anyu Oniphavela Wira Muhakalaleke
Khuuvo mutthu oothaaciri ni oowerya onvikana Salomoni. Owo aahiihimeerya mmensawe wira: “Haya, kèrerye: kone opuha wothene!” (Musuweli 2:1-10) Tthiri, Salomoni aahiteka ipa soolokexa, ijardim ni iparkhi sootepa oreera ni aanipaka khula etthu aaphavela awe. Niireke aahiphwanya ohakalala wekeekhai? Nnaari. Maana nuumala oweha itthu aapanke awe, owo aahimmye so: “Kihòna wira sothene ti sohiroromeleya, sothene sinlikana ni womola epheyo. Miteko iyo sothene khasimphwanyiha etthu”. (Musuweli 2:11) Niireke ele yaamwiiranenle Salomoni yoowiixuttihani etthu?
29 A SETEMBRO 5–A OUTUBRO
MIHAKHU SINIKHUMA MBIIBILIYANI
Mulipiheke Mikhoyi sa Ekasamento Anyu
Ajuda para a Família mwaha 10 itti. 2-8
Moota woorumeela Saana Etekonoloxia Mukasamentoni Mwanyu
● Akhala wiira nnoorumeela saana etekonoloxia, pooti olipiha ekasamento ahu. Mwa ntakiheryo, anamathelana akina anninviyarelana mensaxe ikwaha sinceene vanihikuni. Nto eyo enniwiiriha okhala hoothe hata arakamelanne ene.
“Winviyari mensaxe muhimyaka wiira ‘kinnoophentani’ aahiiso ‘kihinkheliwa’ pooti owiiriha anamathelana okhala oowiiraana”. — Jonathan.
● Orumeela mwa enamuna yoohiloka etekonoloxia, pooti okumiherya mixankiho mukasamentoni. Mwa ntakiheryo, atthu anceene anniviriha okathi munceene ammexeriki telefooni. Mwaha waivaavo, anamathelana pooti ohiwerya othokoreryana ntoko vanireerela aya.
Wuuluula: Moota munirumeela anyu etekonoloxia, pooti olipiha aahiiso ohonona ekasamento anyu.
Owehaweha 05/2023 ipaax. 23 itti. 12-14
Muhittipihe “Malumi a Moro w’Apwiya”
12 Anamathelana anrowa omutakiha sai Akila ni Prisila? Woonasa wene nyuwosa munnivarasa miteko sinceene. Munoonela sai ovara miteko sikina nuule muthelanne anyu? Munoonela sai okhumaka hoothe ikwaha sikina muteko woolaleerya nuule muthelanne anyu? Eyo ti etthu Akila ni Prisila yaapaka aya. Woonasa wene, nyuwo khamunvara muteko mmosaru nuule muthelanne anyu. Masi munoonela sai ovara miteko sikina nuule muthelanne anyu ntoko orattela empa? (Mus. 4:9) Vaavo anamathelana anivara aya miteko sa vate hoothe, eyo ennaakhaliherya ovara ntoko ekiipa ni annikhalana okathi munceene wiira avaanele. Robert ni Linda aaviriha iyaakha sinivikana 50 athelanne ene. Robert onihimya so: “Hiyo khaninkhalana okathi munceene wiira nitthekule, masi kinnihakalala vanceene okathi kinimukhaliherya aka mwaaraka orapiha iparatho nave okathi owo onkikhaliherya awe vaavo kinlokiheryaka exardim ahu. Tthiri ovara miteko hoothe onninikhaliherya okhala oowiiraana ni wuncererya ophentana wahu”.
13 Masi muhiliyale wiira okhala hoothe khentaphulela wiira mwa atthu oowiiraana. Murokora mmosa ootheliwa onikhala oBrasil, ohimmye so: “Mahiku ala, khasireere itthu sikhanle oniiyerya okathi ahu, nto anamathelana pooti wuupuwelaka wiira ari oowiiraana mwaha wookhalaka empa emosaru. Kihiixutta wiira khivanphiyerya paahi okhala hoothe ni iyaka masi kihaana onwiriyanaka okathi onlavula awe ni miyo”. Nrowe niwehe etthu Bruno onipaka awe vaavo mwaarawe Tays onilavula awe. Bruno onihimya so: “Vaavo ninviriha ahu okathi niri ene hoothe a telefoni ahu khinnaarumeela. Opaka eyo ennikikhaliherya olavulana ni onwiriyana mwaaraka ni ephoole”.
14 Masi ankhi vakhala wiira khivanoosivela-ni oviriha okathi muri ene hoothe nuule muthelanne anyu? Woonasa wene, vannoosivela-ni opaka itthu soovirikana muri ene aahiiso okathi munkhalasanyu hoothe munnaakuva onyoonyihana. Nto exeeni mukhanle anyu oopaka? Nrowe ntthikele wuupuwelela ntakiheryo nahu na mooro. Mooro khonaakuva opatta. Nto wiira mooro owo opatte vanceene, nihaana otetheeryaka ikhuni suulupale. Nuupuwelaka ntakiheryo nno, munoonela sai opacerya oviriha okathi muri ene hoothe khula nihiku? Nto okathi owo musyakeke opaka itthu, saarowa omunyoonyiha ole muthelanne anyu mpakeke itthu sinrowa woosivelani oowanli anyu. (Yak. 3:18) Vakhaani-vakhaani munoowerya wuncererya ophentana wanyu.
Owehaweha 05/2023 epaax. 21 etti. 3
Muhittipihe “Malumi a Moro w’Apwiya”
3 Wiira “moro wowopiha onikhuma w’Apwiya [Yehova]” ohittiphe, anamathelana ahaana wiimananiha olipiha ompatthani aya ni Yehova. Wiimananiha opaka eyo, enrowa okumiherya mireerelo xeeni? Vaavo anamathelana anihela aya nipuro noopacerya ompatthani aya ni Yehova, aneettela malakiheryo awe eyo enimwaakhaliherya osyaka ni oxintta mixankiho saarowa omaliha aahiiso ovukula ophentana waya iwo. (Mmusome Musuweli 4:12.) Mutthu orina waataana woolipa ni Yehova onniimananiha otakiha mikhalelo sawe, ntoko oreera murima, opixa murima ni olevelela. (aEef. 4:32–5:1) Okathi anamathelana anooniherya aya mikhalelo iyo, ophentana waya onnincerereya. Murokora mmosa oniitthaniwa Lena, yoowo ovirinhe iyaakha 25 otheliwe ene, onihimya so: “Khivanvila omphenta ni omuttittimiha mutthu orina waataana woolipa ni Yehova”.
Itthu sa Efaita sa Mbiibiliyani
Perspicaz vol. 1 epaax. 119 etti. 39
Ophenta
“Okathi para ophenta”. Yehova khoniwooniherya ophenta wawe atthu yaale anipaka itthu sootakhala ni ahinimwiiwelela. Owo onniwooniherya ophenta wawe atthu ootheene, masi onnihiya wooniherya ophenta iwo okathi atthu awo anihiya aya omurumeela. Vaavo eyo eniiraneya aya, ophenta Muluku aarina awe ni mutthu owo onnimala. Yehova vamosa ni Yesu Kristu, anniphenta exariya ni anninyokha itthu sootakhala. (Esa 45:7; aHe 1:9) Ale ahinimphenta Muluku a ekeekhai, khaniphwanela wooniheriwa niphento. Khivaarowa okhala va miruku owoniherya ophenta atthu awo animunyokha Muluku, maana ophenta wawe (Muluku) khonaaphwanela atthu awo. (Esa 139:21, 22; Yes 26:10) Muluku onnaanyokha atthu siiso ni oolakela waapwetexa okathi wooreerela. — Esa 21:8, 9; Mus 3:1, 8.
6-12 ya Outubro
MIHAKHU SINIKHUMA MBIIBILIYANI
Moota Nnooniherya Ahu Wiira Ninnimuttittimiha Muluku
Owehaweha 15/08/2008 epaax. 15 itti. 17-18
Mooniheryeke Wiira Munnimuttittimiha Yehova
17 Nihaana wooniherya nttittimiho otepexa wene okathi nimmukokhorela ahu Yehova. Musuweli 4:17 onihimya so: “Mwiipasope okathi onrowanyu mpani mwa Muluku”. Moise ni Yooxuwa yaahileeliwa wiira yaahaana orula ixapattho saya okathi yaarowa aya nipuro noowaarya. (Okh. 3:5; Yoox. 5:15) Opaka eyo yooniherya nttittimiho. Anamukuttho a wIsarayeli yaanitumereriwa waawara akapittula ‘wira yawareleke othaaleliwa waya’. (Okh. 28:42, 43) Eyo yaamwaakhaliherya osyaka wooniherya ipantte sa erutthu sahaareerela. Amusi ootheene a Namukuttho, yaahaana wiiwelelaka malakiheryo awo ni ottittimiha.
Owehaweha 15/11/2009 epaax. 11 etti. 21
Yoosoma Anyu ya Biibiliya Enimookhaliheryani Olokiherya Mavekelo Anyu
21 Yesu aanivekela ni nttittimiho ni waamini woolipa. Ohinatthi omuhihimuxa Lazaro, “aahiweha wiirimu, onahimya so: Tiithi, kinnooxukhuruni mwaha woowi mookiiwa, koosuwela tthiri wira okathi wotheene munnikiiwa”. (Yoh 11:41, 42) Ankhi mavekelo anyu? Niireke annooniherya wiira munivekela ni nttittimiho vamosa ni waamini? Nwehe wiira nivekelo na ntakiheryo Yesu aapanke awe, owo aahilavula sa ottelihiwa wa nsina na Yehova, orwa wa Omwene wa Muluku ni wiiraneya wa yootthuna ya Muluku. (Mat. 6:9, 10) Mmananihe wuupuwelela mavekelo munipaka anyu. Nireke munnivaha efaita Omwene wa Muluku ni munnivekela wiira yootthuna awe yiireye ni nsina nawe nivuwihiwe? Mavekelo anyu yaahaana wooniherya itthu iyo tthaaru.
Owehaweha 04/2017 epaax. 6 etti. 12
“Mmutthukuleke Natiri” Ommanne Anyu
12 Nihiku mwaabatiziwa anyu, mwaahimuleiherya Yehova wira mwaarowa omurumeelaka ni wiimananiha weettela malamulo awe. Masi obatizo, wanipacerya paahi. Nuuvira okathi, otheene ahu nihaana ovikaniha wiivarerya. Hiyo pooti wiikoha so: ‘Nuumala obatiziwa, kiireke wataana waka ni Yehova onninnuwa? Kinnivikaniha omurumeela ni murima wotheene? (aKolosi 3:23) Kinnivekela ikwaha sinceene? Kinnimusoma Biibiliya khula nihiku? Kiireke nkinicompela mithukumano? Kinnirowa olaleerya khula okathi oniwerya aka? Aahiiso nkinikhalela nthiti miteko iya?’ Murummwa Pedru oonilopola wira naahiivahe ephoole, hiyo pooti woolowela miteko sa Yehova. Wira eyo ehiniiraneele, nihaana ophavela ni ikuru sahu sotheene wuncererya waamini wahu, osuwela wahu, mweettelo ahu wooloka ni ovilela wahu. — Mmusome 2 Pedru 1:5-8.
Itthu sa Efaita sa Mbiibiliyani
Owehaweha 09/2020 epaax. 31 itti. 3-5
Makoho Anikohiwa Ni Ale Anisoma Irevista Sahu
Musuweli 5:7, onaahimya anamalamulela anaahasula alipa-oohaawa, nave ahinaathokorerya mwa xariya. Anamalamulela awo anniliyala wira ookhala mutthu mukina onaaweha orina okhulupale wuulupale ovikana okhulupale aya. Tthiri aakhala akina okhulupale aya ori wuulupalexa. Mooriipiha murima, ikuvernu sotheene sa apinaatamu anamalamulela aya ta makhwankwa ni annaahasula atthu ale anaalamulela aya.
Hata itthu sixankihaka vanceene, yookhala etthu ennimaaliha, maana Yehova onnaaweha makhulupale otheene a apinaatamu. Nto nihaana olipana Yehova nimuleelaka itthu sotheene sinnixankiha. (Esal. 55:23; aFil. 4:6, 7) Nave musuweleke wira “Apwiya anniweha ilapo sothene wira yakhaliherye ale anaroromela ni murim’aya wothene”. — 2 Wah. 16:9.
Tthiri Musuweli 5:7, onninuupuxerya mukhalelo wa anamalamulela a apinaatamu, eyo piiyo, okathi wotheene onnikhala namalamulela muulupalexa. Nave eveersu ela enninuupuxerya wira Yehova torina okhulupale waavikana makhulupale otheene. Maana owo tori Mukhulupale a olumwenku wotheene. Olelo-va, owo onnilamulela omurumeelaka Mwanawe Yesu Kristu, yoowo ori Mwene a Omwene wa Muluku. Okhala wira owo Muluku Oowerya Sotheene, onniweha sotheene, nave Owo ni Mwanawe ta xariya.
13-19 ya Outubro
MIHAKHU SINIKHUMA MBIIBILIYANI
“Oxekurya Etthoko Eripiwe Murima”
Perspicaz vol. 2 epaax. 690 etti. 9
Oriipiwa Murima
Okathi Wooriipiwa Murima. Musuweli 3:1, 4 onihimya wiira “wokhala okathi w’oripiwa murima, n’ukathi w’otteliwa murima, okathi wo wikhupanyerya n’ukathi wo wina”. Mwaha wookhala apinaatamu anlipelela okhwa, onihimmwa wiira, musuweli onnirowa “nipuro n’oripiha murima” ohiya orowa nipuro ninlyiwa efesta. (Mus 7:2, 4; mulikanyihe ni Mir 14:13.) Mutthu ankhili, onnirumeela okathi owo wooriipiha murima, wiira omulipihe ni ommaaliha ole okhweliwe ohiya ophavela wiihakalaliha mmansawe paahi. Eyo ennimukhaliherya wuupuwelela mukhalelo awe woowi nihiku nlo onimookhwa ni onnikhalana moonelo wooloka ni mpattuxa awe.
Owehaweha 06/2019 epaax. 23 etti. 15
Mwaakhaliheryeke Atthu Akina Ovilela Oxanka
15 William yoowo okhweliwe mwaarawe iyaakha vakhaani sivinre onihimya so: “Vannikisivela vaavo atthu akina anilavula aya itthu sooloka voohimya sa mwaaraka. Eyo ennikooniherya wira aaniphentiwa ni ottittimihiwa. Nikhaliheryo nno, ninnikimaaliha vanceene. Kinnihakalala okathi ankikhaliherya aya, mwaha woowi kaanimphenta vanceene mwaaraka ni aari mutthu ootepa otthuneya mookumini mwaka”. Naamukhweli oniihaniwa Bianca onihimya so: “Kinniphwanya nimaaliho vaavo atthu akina anivekela aya ni osoma soolepa sa mBiibiliyani ni miyo. Nave kinnilipa vaavo anilavula aya voohimya sa iyaka ni vaavo anikiwiriyana aya kaalavulaka itthu iyaka aapaka awe”.
Owehaweha 07/2017 epaax. 12 etti. 16
Munleke Vamosa Naale Aninla
16 Mavekelo ahu annaamaaliha anna ni arokora. Nto nihaana waavekelela aahiiso ovekela nri ene vamosa. Nnaamwi vavilaka opaka eyo mwaha woowi munoona wira pooti wunla, ovekela ni murima wotheene onnaamaaliha vanceene. Dalene onihimya wira: “Vaavo arokora anrwa aya okimaaliha, kinnaavekela akhala wira anniphavela okivekelela. Nto wanipacerya wa nivekelo naya vannaavila ohimya etthu, masi vakhaani-vakhaani annilavula oratteene, ahimyaka moolumo oolipiha vanceene. Ophenta ni waamini waya woolipa ni okoonela waya othunku, onnilipiha waamini waka”.
Owehaweha 07/2017 epaax. 12 itti. 17-19
Munleke Vamosa Naale Aninla
17 Vaavo mutthu onikhweliwa awe, khivanikhweya osuwela oratteene okathi onivira nlelo mutthu owo oriipiwe ene murima. Okathi onikhwa awe mutthu onimphenta ahu, ikwaha sinceene apatthani ni amusi annoorwa onimaaliha. Masi hata atthu awo atthikelaka owannyeya, nlelo ale akhweliwe anitthuneya omaalihiwa. Tivonto, nvikaniheke waakhaliherya. Biibiliya onihimya wira: “Mpatthani onnimphenta mpatthani awe okathi t’ukathi: onnisuwanyeya okhala munn’awe okathi w’oxanka”. (Miruku 17:17) Nihaana waamaaliha atthu akhweliwe. — Mmusome 1 aTesalonika 3:7.
18 Muupuweleke wira mutthu okhweliwe pooti mootutuxerya oriipiwa murima vaavo onimuupuwela awe ole okhwiiye. Eyo pooti wiiraneya akhala wira onuupuwela nihiku na ekasamento aahiiso okhwiiya awe mutthu owo, esipo yaamusivela, efootu, miteko aavara awe, muhiriri awe, esooti awe. Ale akhweliwe ole athelanne aya, annitepa oxanka vaavo anrowa aya wasembeleyani aahiiso Wuupuwelela Okhwa wa Yesu. Munna mmosa okhweliwe mwaarawe onihimya so: “Kaanisuwela wira nihiku noopacerya wuupuwelela othelana wahu nuumala mwaaraka okhwa, naarowa okhala nootepa oxankiha. Masi anna ni arokora akina yaahipaka efesta nto khukilattula wira katthekule ni apatthani aka. Awo khiyaaphavela wira nihiku nle kivirihe mekhaka”.
19 Muupuweleke wira ale akhweliwe ahaana olipihiwa okathi wotheene. Junia onihimya so: “Ikwaha sinceene waakhaliherya ale akhweliwe okathi wotheene ohiya mahiku a vameekhaaya, etthu enaamaaliha vanceene. Maana okathi owo onnaalipiha vanceene”. Ekeekhai wira khaninrowa omaliha omeekha aahiiso oriipiwa waya murima, masi nnoowerya waalipiha ale aninla nipakaka itthu hoothe. (1 Yohani 3:18) Gaby onihimya wira: “Kinnimuxukhuru Yehova mwaha wa axitokweene oophenta yaawo anikikhaliherya okathi kinixanka aka. Kinnoona ntata na Yehova nikikhupaarelaka”.
Itthu sa Efaita sa Mbiibiliyani
Owehaweha 03/2023 epaax. 31 etti. 18
“Atthu Otheene Anoosuwela Wira Mwa Awiixutti Aka”
18 Ikwaha sikina vannireerela ovaanela ni munna aahiiso murokora oniveehale, wiira niphuke muxankiho. Masi nihinatthi orowa olavulana vaamureerela wiikoha so: ‘Kiireke kinnnisuwela itthu sootheene siiraneyale mwaha ola?’ (Mir. 18:13) ‘Kiireke oroolakelela okinyoonyiha?’ (Mus. 7:20) ‘Kiireke miyo kootoko omunyoonyiha munna mukina?’ (Mus. 7:21, 22) ‘Vakhala wiira kinoolavulana mwaha ola, kiireke wiira khonrowa otepa?’ (Musome Miruku 26:20.) Vakhala wiira nnooviriha okathi wiira nuupuwelele makoho ala, nnimoona wiira etthu yooreerela opaka waaphentaka annihu ni ohiya wuupuwelela etthu aniiriha aya.
20-26 YA OUTUBRO
MIHAKHU SINIKHUMA MBIIBILIYANI
Mukhalaneke Moonelo Wooloka Voohimya sa Mixankiho Sanyu
Owehaweha 15/08/2013 epaax. 14 itti. 20-21
Muhikhalakhale ‘Munviruwelaka’ Yehova
20 Muhaana ovahaka nthowa opuro oniphwanelela aya. Xeeni vaniloka aya wira siiso? Hiyo ninnikhalana nthowa, mwaha wa mixankiho sahu sikina. Nto nakhalana nthowa, nihaana weemererya. (aGal. 6:7) Muhikhalakhale munvahaka nthowa Yehova mixankiho sanyu. Xeeni mweettelo owo ohinloka aya? Muthokorerye ntakiheryo nla: Ekaaro pooti owerya weetta yaakuvaka vanceene. Nkahaya muupuwele akhala wira mulipa oneettiha onnivikaniha mutita wa wuupiha ekaaro eyo aviraka vakurvani, nto khukhumelela ehasara. Niireke mulipa opanke ekaaro owo torina nthowa? Tthiri nnaari! Vamosaru, Yehova oonipaka wira nithanleke opaka etthu ennisivela. Masi owo oopaka malakiheryo wira nipakeke soothanla mwa miruku. Nto niireke vanniphwanelela onvaha nthowa Mpattuxa ahu mwaha wa soothanla sahu soohiloka?
21 Ekeekhai wira khahiyo mixankiho sahu sotheene mwaha wa soovonya sahu ni miteko soohiloka. Itthu sikina sinikhumelela mwaha woowi ‘oreriwa ni otakhaliwa khunimuthanla mutthu’. (Mus. 9:11) Nto nihiliyale wira Satana Diabo, tori mwaneene nthowa na sootakhala sinikhumelela. (1 Yoh. 5:19; Wis. 12:9) Owo tori nwanani; khahiyo Yehova! — 1 Ped. 5:8.
Owehaweha 09/2019 epaax. 5 etti. 10
Yehova Onnaavaha Efaita Arumeyi Awe Oowiiyeviha
10 Nave, wiiyeviha onnikhweiherya okumi ahu. Ekeekhai wira okathi mukina sinookhumelelaka itthu nnoona ahu wira ti soohiloka ni soohixariya. Mwene Salomoni yoowo aarina ankhili anceene aahimmye so: “Kihona ipottha sipakhiriwaka mukaroni, ni makhulupale yettaka vathí ntoko yari ipottha”. (Mus. 10:7) Okathi mukina, atthu yaale arina mikhalelo sa vameekhaaya khanttottopeliwa ntoko amphwanela aya. Nave okathi mukina, atthu yaale ahirina mikhalelo sa vameekhaaya, annittottopeliwa vanceene. Hata vaari siiso, Mwene Salomoni aahoona wira etthu yootepa otthuneya nikhanle ahu oopaka ori weemererya mukhalelo ahu ni ohiwehexexa itthu soohiloka. (Mus. 6:9) Akhala wira naatthu oowiiyeviha, nnimweemereryaka itthu sinikhumelela mookumini mwahu seiyo sihinnisivela.
Owehaweha 15/10/2011 epaax. 8 itti. 1-2
Niireke Matthekulelo Anyu Tooloka?
MBIIBILIYANI, kasireere soohimmwa sinooniherya wiira Yehova oniphavela wiira nikhaleke nave-tho nitthekuleke ni itthu sinnihakalaliha. Mwa ntakiheryo, Esaalimo 104:14, 15 enihimya wiira Yehova onnikumiherya ‘eyoolya mulaponi, eviinyu enimutteeliha murima mutthu, makhura aniiriha owiitho waarya ni ephaawu enimulipiha mutthu’. Mweekeekhai Yehova onninivaha eyoolya, eviinyu para mureerelo ahu. “Eviinyu enimutteeliha murima mutthu”. Owo onninivaha itthu sinceene ohiya paahi itthu nimpirisari ahu wiira nikhale akumi, nave-tho iye sinnihakalaliha. (Mus. 9:7; 10:19) Moohaanyiherya, Yehova oniphavela wiira ‘nitteliweke murima’. — Mit 14:16, 17.
Itthu sa Efaita sa Mbiibiliyani
Perspicaz vol. 2 epaax. 1079 itti. 4, 8
Olavula Vanceene Aahiiso Ohankawaani
Olavula vanceene pooti omwiiriha mutthu okhala noohankawaani, nave-tho owo pooti wiikumiherya mixankiho. Yoolepa ya Musuweli 10:12-14 elavulaka sa mwaha owo enihimya so: “Molumo awe mulol’owo onnipajerya alavulaka itthu s’ololo, onnimalela ohimya itthu sotakhala. Mulolo onninjererya olavulasa wawe”.
Ikwaha sikina, olavula vanceene kahiyo vootthekeya, masi naahivahe ephoole pooti okhala noohankawaani. Ohankawani khula okathi onnikumiherya mixankiho ni ohiiwanana. Mutthu pooti opaka eyo ni mathowa ooloka aahiiso nnaari. Moohicikha mathowa ene, mutthu oniwaapa atthu akina Yehova khonimweemererya, okhala wiira onnikumiherya ‘ohiiwanana ni axinna’ nave eyo etthu Muluku oninyokha awe. (Mir 6:16-19) Nuulumo na ekereku noowi di·aʹbo·los nintaphulela “nawoothe”. Nuulumo nla ninnirumeeliwa mbiibiliyani ohimmwaka Satana “Diabo”, nawoothe muulupale. (Yoh 8:44; Wiis 12:9, 10; Map 3:25) Eyo enooniherya wiira owo tori maphattuwelo a wootha ni ohankawaani.
27 A OUTUBRO–2 A NOVEMBRO
MIHAKHU SINIKHUMA MBIIBILIYANI
Mpuheke Okumi Wooloka ni Woohakalaliha
Nvenye! N.° 3/2015 epaax. 13 itti. 6-7
Nsuwa ni Epheyo Niireke Sinnikhaliherya?
Nsuwa ninniwerya owiiva axikokho. Jornal of Hospital Infection onitthokiherya wiira “imicróbio sinceene seiyo sikhanle oomwiiriha mutthu ohiwerya omumula saana, sinnookhwa okathi wa nsuwa”.
Munrowa ottottela sai mureerelo nsuwa ni epheyo? Munoonela sai opasiyari vakhaani vansuwani ni okhala opuro onoopa aya epheyo? Moohaanyiherya, eyo enimookhalihani saana.
Owehaweha 02/2023 epaax. 21 itti. 6-7
Nivaheke Efaita Okumi Nivahiwe Ahu ni Muluku
6 Biibiliya khonihimya itthu ninreerela ahu opaka wiira nikhalane okumi wooloka aahiiso itthu ninreerela ahu olyaaka. Masi hata vari siiso, owo onnooniherya moonelo wa Yehova voohimya sa itthu iyo. Mwa ntakiheryo, Yehova onninlopola ohimyaka so: “Muheteteyaxeké n’itthu [soonanara]” seiyo sikhanle oohonona okumi ahu. (Mus. 11:10) Biibiliya onihimya wiira nihaana osyaka opaka itthu sikhanle oohonona okumi ahu, itthu ntoko olya vanceene ni ohapaliwa. (Mir. 23:20) Nto Yehova omphavela wiira nikhaleke atthu oowiihiiha okathi ninwurya ahu aahiiso olya. — 1 aKor. 6:12; 9:25.
7 Ninrowa opaka sai soothanla sinooniherya wiira ninnivaha efaita okumi? Nnoowerya opaka eyo akhala wiira nnimwaarumeela ankhili. (Esal. 119:99, 100; musome Miruku 2:11.) Mwa ntakiheryo, hiyo nihaana waarumeela ankhili okathi ninthanla ahu etthu nimphavela ahu olya. Nto akhala wiira yookhala eyoolya ennisivela vanceene masi nnoona wiira naalya vale enniniwereya, vaamureerela ottharuwa yoolya eyo. Nave nnimooniherya wiira nookhalana ankhili vakhala wiira ninnirupa okathi wooreerela, ninnipaka esersiisiyo khula nihiku, ninniirattela ni orattela mapuro ninkhala ahu.
Owehaweha 09/2024 epaax. 2 itti. 2-3
‘Mukhaleke Atthu Aneettela Masu a Muluku’
2 Ntoko arumeyi a Yehova, hiyo na atthu oohakalala. Mwaha wa xeeni? Mwaha woowi khanreerane mathowa manceene anniiriha ohakalala, nimosa a yaawo okhala wiira hiyo ninniwerya osoma Nuulumo na Muluku ni weettela ele nniixutta ahu. — Mmusome Yakobo 1:22-25.
3 Tthiri ninniphwanya mireerelo sinceene mwaha wa okhala atthu “aneettela masu awo”. Mureerelo woopacerya, okhala wiira hiyo ninnisuwela wiira nihaana opaka eyo wiira nimuhakalalihe Yehova. Wuupuwela eyo enninihakalaliha. (Mus. 12:13) Okathi ninkhala ahu moovarihana ni ele eniixutta ahu mbiibiliyani, emusi ahu ni ompatthani ahu ni atthu akina onnitepa olipa. Woonasa wene, muhoona eyo yiiraneyaka mweekumini mwanyu. Ohiya-vo, ninnisyaka mixankiho sinaaphwanya atthu ahinimurumeela Yehova. Moohaanyiherya, hiyo ninnikupali ele mwene Davidi aahimmye awe. Nuumala wiipa nsipo naalavula sa malamulo, sooruma ni ophukela wa Yehova, owo aahimmye so: “Ale aneettela malamulo anyu, annitthuveliwa vanceene”. — Esa. 19:7-11.
Itthu sa Efaita sa Mbiibiliyani
Perspicaz vol. 1 epaax. 1226 etti. 10
Soowoonihiwa
Vanooneya wiira alopwana Muluku aarumenle awe wiira amulepe Biibiliya, kahiyo yaamulepa khula etthu yaaleeliwa aya. Eliivuru ya Wiisuupulula, ennilavula sa murummwa Yohani yoowo ooniheriwe ni nlaikha ‘itthu saarowa wiiraneya’, nave Yohani “aahikhalela onamoona nuulumo na Muluku, ni aahimukhalela onamoona Yesu Kristu. Tthiri, owo aahikhalela onamoona itthu sotheene aawenhe awe”. (Wiis 1:1, 2) Orweela wa “yoowoonihiwa [“Munepa woowaarya”]”, Yohani aahikhala ‘nihiku na Apwiya’ ni aaleelinwe so: “Mulepe murooluni itthu muniweha anyu”. (Wiis 1:10, 11) Vanikhala wiira Muluku aahoona okhala vooloka oweemererya alipa oomulepa Biibiliya orumeela muupuwelo aya ni wiira athanlele moolumo ni soowoonihiwa yaawehale aya. (Hab 2:2) Khula okathi awo yaanivarerya ni ephoole etthu yaalepa aya wiira soohimmwa sootheene sikhaleke sa ekeekhai ni sooniheryeke yoolakela ya Yehova. (Mir 30:5, 6) Vannooneya wiira khula mutthu aarina eparakha yoolepa Nuulumo na Muluku, aahaana wiimananiha opaka etthu enihimmwa Musuweli 12:9, 10, owo aahaana okumiherya ‘soolepa soororomeleya ni moolumo a ekeekhai’. — Mulikanyihe ni Luk 1:1-4.