Ireferensia sa Okumi ni Orummwa Ahu Ekaderno Enirumeeliwa Omuthukumanoni
© 2025 Watch Tower Bible and Tract Society of Pennsylvania
3-9 YA NOVEMBRO
MIHAKHU SINIKHUMA MBIIBILIYANI
Yoowiiraneya ya Ophenta Ohinimala
Owehaweha 15/01/2015 epaax. 30 itti. 9-10
Niireke Vanniweryaneya Ophwanya Niphento Neekeekhai?
9 Ekasamento khahiyo weemyana wala otthunana paahi wa atthu anli ahimphentana wala ottittimihana. Tthiri niphento teri etthu yuulupale vatthokoni va maKristau. Nto mukhalelo xeeni wa niphento onihimmwa? Niireke niphento nlo nneettihiwa ni malamulo a mBiibiliyani? (1 Yoh. 4:8) Niireke niphento nlo nnoolikana ni nle mutthu orina awe ni amusi awe? Niireke ninhimmwa niphento nenle mutthu onikhalana awe ni mpatthani awe a vamurimani? (Yoh. 11:3) Niireke vanihimmwa otthunana wa mulopwana ni muthiyana paahi? (Mir. 5:15-20) Tthiri niphento ninkhala eriyari ya atthu anithelana ninhela muhina inamuna iya sotheene simanle oromoliwa. Sowiira sa mutthu ti sinooniherya ophenta wawe. Tivonto ale athelanne vanitthuneya aya oheemya wira miteko sa khula nihiku siwiiyerye okathi waarowa aya wooniheryana ophentana waya! Opaka eyo onimwiiriha ekasamento okhala yoolipa ni ohakalala wa ale athelanne. Hata ilapo seiye mutthu onaamuhaayeriwa awe mutthu oothelana, khiyarowa omusuwela saana paahi nuumala ekasamento, wooniherya niphento naya mwa enamuna ya ilavulelo saya, ti etthu enaakhaliherya wunnuuherya niphento naya ni okhumela saana ekasamento aya.
10 Wooniheryana ophenta onnikhaliherya ekasamento mwa enamuna ekina. Mwene Salomoni aahinvaha mwali ole oXulami, “axiveve àwero ahotthiwe ni eparatha”. Owo aahimananiha omweepesa ohimyaka wira mwali ole aari “òrera ntoko mweri, òtutha ntoko nsuwa”. (Nsipo 1:9-11; 6:10) Masi, mwali ole aahivikaniha okhala oororomeleya wa makampusi awe. Exeeni yaamulipinhe ni ommaaliha mwali ole okathi waarowaniwe awe ottaiwene wa makampusi? Owo onnihimya etthu ene. (Musome Nsipo n’Ophentana 1:2, 3.) Owo uupuwelela itthu saahimmwale ni saapakiwe ni makampusi ole wira “woniherye omphenta wawe”. Mwali ole aanoonela itthu iyo okhala sooloka “ovikana evinyu” yeeyo eniitteeliha murima, nave nsina nawe naari nooreera ntoko “makhura” owunkhela aniitheliwa mmuru. (Esal. 23:5; 104:15) Tthiri wuupuwelela moota waaphentiwa awe ni makampusi ole waahinnuherya ni olipiha omphenta wawe makampusi. Tivonto vanireerela aya ale athelanne wooniherya ophentana waya khula nihiku!
Itthu sa Efaita sa Mbiibiliyani
Owehaweha 05/2024 epaax. 29 itti. 10-11
Enamuna ya Onamorari Eninvuwiha Yehova
10 Munrowa onamorari sai mwa enamuna eninvuwiha Yehova? Nuuvira okathi, osivelana wanyu pooti otepaka wuncerereya. Masi muhaana osyaka opaka itthu sikhanle oomuriipiha murima Yehova. (1 aKor. 6:18) Musyakeke ovaanela itthu sinivarihana ni orupihana, okhala opuro atthu akina ahiniwerya aya woowehasani ni musyakeke ohapaliwa. (aEef. 5:3) Akhala wiira khamunisyaka itthu iya, muupuwelo wa ophavela orupihana woohiloka onrowa otepaka wuncerereya vamurimani vanyu, nto eyo ewiirihekeni opaka itthu sikhanle oomuriipiha murima Yehova. Munoonela sai ovaanelaka ikwaha sinceene itthu sikhanle ookhaliherya onamorari wanyu okhala woottittimiheya ni oninvuwiha Yehova? (Musome Miruku 22:3.) Nrowe nithokorerye etthu yaamukhalihenrye Dawit ni Almaz yaawo anikhala wEthiyopia. Awosa anihimyasa so: “Hiyo naaniviriha okathi niri ene hoothe opuro woowaatta atthu aahiiso ni apatthani ahu. Khinaatonko okhala mekhihu mukaaroni aahiiso opuro mukina woowiipitheya. Hiyo naanisyaka okhala mapuro yaarowa oniiriha opaka etthu yoohiloka”.
11 Munrowa opaka sai itthu sinooniherya osivelana? Vaavo ophentana wanyu onincerereya aya, munoophavelaka opaka itthu mookhalela sinooniherya wiira munnimphenta tthiri. Masi akhala wiira ophavela orupihana onnincerereya vamurimani vanyu, vanookhala woovila opaka soothanla sooloka. (Nsip. 1:2; 2:6) Nto ophavela omooniherya wanyu osiveliwa, pooti owiirihani ohiwerya wiikasoopa ni opaka itthu sikhanle oomuriipiha murima Yehova. (Mir. 6:27) Okathi munipacerya anyu onamorari, muhaana ovaanela itthu mukhanle anyu oopaka moovarihana ni malakiheryo a mbiibiliyani. (1 aTes. 4:3-7) Ntoko atthu aninamorari, nyuwosa pooti wiikohasa so: “Muttetthe kinikhala aka, itthu xeeni sinipakiwa sinooniherya wiira atthu annisivelana? Itthu nimpaka ahu, niireke pooti omwiiriha khula mmosa a hiyo ophavela orupihana woohiloka?”.
10-16 YA NOVEMBRO
MIHAKHU SINIKHUMA MBIIBILIYANI
Efaita Erina Aya Oreera wa Muhina
Owehaweha 15/01/2015 epaax. 30 etti. 8
Niireke Vanniweryaneya Ophwanya Niphento Neekeekhai?
8 Khahiyo wira masu otheene oophenta anilavuliwa eliivuru ela anittittimiherya oreera wa erutthu ya muthiyana ole paahi. Nkahaya muupuwelele masu a makampusi voohimya sa ilavulelo sa mwali ole. (Musome Nsipo n’Ophentana 4:7, 11.) Vanihimmwa wira iyano sawe “sinnimwarexa oravo wopajerya”. Mwaha wa xeeni? Okhala wira oravo onikhuma munihepepeni mwaya ti woottapitta ni woosivexa ovikana oravo okumihiwe khalairu. “Nlumi nanyu nokhalana oravo n’ileti”, eyo enitaphulela wira masu yaalavula awe yaari ooreera ni ootteeliha murima ntoko oravo ni eleeti. Nto vannooneya saana etthu yaamwiirinhe makampusi ole omuleela mwali ole wira “Nyuwo mòrerexa, . . . mwa nyuwo khivo etthu yonanara”, tthiri owo khaahimya oreera wa erutthu awe paahi.
Owehaweha 01/11/2000 epaax. 7 etti. 17
Yehova Onoonela Sai Oreera wa Muhina?
17 Mwali a oXulami, mmosa a atthu yoonihenrye okhala oororomeleya. Oreera wawe mwali ola, waahinvara murima makampusi ni mwene Salomooni a wIsarayeli. Yoowiiraneya yootheene enilavula sa mwali ola, eri eliivuru ya Nsipo na Salomooni, enihimya wiira owo khotonko orupihana voohiloka. Mwaha wa yeeyo aanittittimihiwa ni atthu a muttetthe awe. Nnaamwi Salomooni aakhoottiwe ni mwali ole, aahuupuxeriwa olepa yoowiiraneya awe. Nave makampusi ole amphenta awe, aanittittimiha mukhalelo awe. Waahikhala okathi makampusi ole uupuwenle awe wiira mwali ole aari ntoko “ematta yotekeleliwa”. (Nsipo na Salomooni 4:12) WIsarayeli wa khalai, ixarti sooreera, saanikhalana makukhu ooripelela, ifilori, miri suulupale ni sooreera. Ixarti iyo, saanitekeleliwa ikintaali, nto vaaniweryaneya ovolowa orumeeliwaka mukhora mmosa woowaliwa. (Yes 5:5) Makampusi ole, aamuthokorerya mwali ole ntoko exarti eyo. Owo khaatonko orupihana ni mulopwana. Owo aarowa opacerya orupihana paahi ni mulopwana aamusivela nuumala othelana.
Nvenye! 22/12/2004 epaax. 8 itti. 2-5
Oreera Orina Efaita
Niireke oreera wa muhina onnaavara murima atthu akina? Georgina, yoowo ovirinhe iyaakha 10 otheliwe ene onihimya so: “Kooviriha iyaakha iya sootheene iyaka okisivelaka, okhala wiira owo mutthu oororomeleya ni onnikilela khula etthu. Etthu yootepexa okhalana efaita mookumini mwawe, omuhakalaliha Muluku. Nto eyo ennimukhaliherya okhala mutthu onaathokorerya atthu akina. Okathi onipaka awe soothanla, onniphavela osuwela moonelo aka, nto eyo ennikiiriha wiixoonaka wiira owo onnikithokorerya. Mweekeekhai owo onnikiphenta”.
Nuulumo na Muluku ninninikhaliherya onvaha efaita mutthu orina “murima woomaala ni woowiiyeviha. Nto oreera iwo torina efaita yuulupale vamaithoni va Muluku”. (1Pe 3:4) Tthiri oreera wa muhina wookhalana efaita yinceene ovikana oreera wa ota. Nave ti etthu atthu anceene aniphavela aya.
Itthu sa Efaita sa Mbiibiliyani
Owehaweha 15/01/2015 epaax. 31 etti. 11
Otthokiheriwa wa Eliivuru ya Nsipo na Salomooni
11 Eliivuru ya Nsipo enniwiixuttiha itthu sinceene maKristau, vanceenexa ale nlelo animphavela mutthu oothelana. Mwali ole khamphenta Salomooni hata vakhaani. Tivonto aalaphinha awe imwali sa oYerusalemu oriki: ‘Muhikikhanyererye omphenta mutthu ohinatthi ophiya okathi aya’ (Nsipo 2:7; 3:5) Nthowa xeeni? Okhala wira khahiyo vooloka opacerya omphenta khula mutthu onimphwanya ahu. Tivonto mukristau oniphavela othela wala otheliwa ohaana okhala oopixa murima ni owehererya mpakha omphwanya mutthu onimoona awe oreerela omphenta mwa ekeekhai.
17-23 YA NOVEMBRO
MIHAKHU SINIKHUMA MBIIBILIYANI
Mukhaleke Ntoko Ixiri, Ohiya Ntoko Mukhora
Owehaweha 15/01/2015 epaax. 32 itti. 15-16
15 Musome Nsipo n’Ophentana 4:12. Xeeni makampusi ole aamuhimya awe mwali ole okhala “ematta yotekeleliwa”? Okhala wene ematta yootekeleliwa kheneemereriwa okela khula mutthu onivira. Onikela ti yoole paahi orina ixaavi sa mukhora aya. Mwali a oXulami aanilikana ni ematta yotekeleliwa okhala wira owo aahimusukerya niphento nawe makampusi, nire so, iyawe paahi. Mwaha wa oheemererya owokiwa ni mwene, mwali ole aari ntoko “nikokoro” ohiya “mukhora wohuliwa”. (Nsipo 8:8-10) Vamosaru, atthu oohithela wala oohitheliwa animurumeela Muluku ahaana omusukerya niphento naya ole onirowa aya othelana muhoolo.
16 Okathi makampusi aamulattunle awe mwali ole wira arowe yapasiyari okathi wa ephovo, axirokorawe yaahimukhoottiherya. Awo yaahinvaha muteko wa orowa olipelela ematta. Nthowa xeeni? Niireke khiyaamuroromela? Niireke awo yuupuwela wira owo khaarina mweettelo wowisuumaaliha? Woonasa wene, awo yaaphavela omukhapelela murokora aya wira ehimphwanye yooweeha. (Nsipo 2:10-15) Nto ehaavo etthu ekhanle aya ooxutta atthu ale aniphavela othelana: Okathi anuuryana aya ahaana okhalana ephoole wira wuuryana waya okhale wooloka. Ahaana osyaka okhala mapuro owiipitheya. Ekeekhai wira vannireerela ohimya wala opaka itthu sinooniherya ophentana, masi musyakeke opaka itthu sa etampi.
Amiravo Annikoha muru 23 epaax. 188 etti. 2
Orupihana Muhinatthi Othelana Ekasamento
Akhala wiira amiravo anoovikaniha okhala oororomeleya ni oheemererya orupihana ahinatthi othelana, onimwaakhaliherya osyaka mixankiho saakhanle oowaariipiha murima. Biibiliya onnilavula sa mwali oororomeleya yoowo ahaatonko orupa ni mulopwana, nnaamwi amphenta vanceene namorato awe. Nto owo ohakalanle ene anwerya ohimmya so: “Miyo ka nikokoro tthiri: mapele aka t’anamukatth’aya!” Okathi aakhanyereriwa awe orupihana woohiloka, owo kahiyo aari ntoko mukhora woowaakuva ohuleya. Owo aari ntoko ekintaali yuulupale yeeyo ahinikhweya owela nave ntoko nikokoro nipakiwe ni materiyali oolipa. Owo aaniphwanela wiitthaniwa “òwarya”, ni anwerya omwiirela iyawe wiira: ‘[Miyo] ohoolo wanyu, ka muthiyana a murettele’. Murettele aarina awe, waanimukhaliherya yena ni mulopwana amphenta awe okhala oohakalala. — Nsipo na Salomooni 6:9, 10; 8:9, 10.
Amiravo Annikoha vol. 2 epaax. 33
Ntakiheryo Ninreerela Otthara — Mwali a oXulami
Mwali a oXulami aanisuwela wiira aahaana wuupuwela oratteene myaha sinivarihana ni orupihana. Owo ahaalela apatthani awe wiira: “Kihovarani metto, muhinvenxe onimphentaka, nnakhala muhimututuxe. Mmuhiye arupeke ntoko simphavelawe”. Mwali a oXulami, aanisuwela wiira ikwaha sikina, soophavela sa murima sinnoototha. Mwa ntakiheryo, owo aanisuwela wiira atthu akina yammukhanyererya osiveliwa ni mutthu ahamphavela awe. Nave soophavela sa murima awe sammwiiriha ohonona mweettelo awe wooloka. Tthiri mwali a oXulami aari ntoko “nikokoro”. — Nsipo na Salomooni 8:4, 10
Niireke miyoonelo sanyu voohimya sa myaha sa amor ti soolipa ntoko mwali a oXulami? Niireke munniwerya owiriyana muupuwelo anyu ohiya paahi murima anyu? (Miruku 2:10, 11) Atthu akina pooti wookhanyereryani onamorari ni atthu akina nnaamwi nyuwo muhiilokihenrye. Nave-tho murima anyu pooti owootothani. Mwa ntakiheryo, niireke okathi muninweha anyu muthiyana ni mulopwana avarelane ene matata, munniwaamwelela ni munaphavela okhalana awinyu? Niireke mwamwaaseitari mutthu ohikhanle a etiini anyu? Nilavulaka sa soophavela sa murima, mwali a oXulami aari oolipa. Nave-tho nyuwo munoowerya okhala oolipa.
Itthu sa Efaita sa Mbiibiliyani
Owehaweha 05/2023 epaax. 20 etti. 1 ni enoota
Muhittipihe “Malumi a Moro w’Apwiya”
1 Biibiliya onnitthokiherya ophenta weekeekhai mwa enamuna yooreera, oriki: ophenta “onlikana ni moro: ti moro wowopiha onkhuma w’Apwiya [Yehova]. Màsi malupale khanwerya ottipiha ophenta: màsi a mutáseke khanwerya opwetexa ophentana”. (Nsip. 8:6, 7) Moolumo ala anniwooniherya anamathelana wiira: Anoowerya ophentana weekeekhai mukina ni mukhwaawe.
Ophenta weekeekhai khonimala nave onikhala mahiku ootheene. Nave oniitthaniwa okhala: “Moro wowopiha onkhuma w’Apwiya [Yehova]” maana Yehova tori mwaaneene ophenta iwo.
24-30 YA NOVEMBRO
MIHAKHU SINIKHUMA MBIIBILIYANl
Nlipelelo Para Atthu Anipaka Itthu Sootakhala
Profecia de Isaiás vol. 1 muru 2 epaax. 14 etti. 8
Paapa ni Anaawe Oohiiwelela
8 Yesaya aahitthikela olavula muhupi awe, orumeelaka moolumo oowerya ohimeeryaka nloko na Yuda, oriki: “Motakhaliwa nyuwo, nloko nottheka, nloko n’atthu òsareya sotakhala, muxovo w’alavilavi, ana òtakhala murima. Awo ahakhotta Apwiya, àmuthanya Muluku a Isarayeli, àmurerya ettuli”. (Yes 1:4) Miteko soohiloka mutthu onipaka awe, vakhaani-vakhaani pooti waacerereya mpakha okhala soolemela. Okathi wa Abrahamu, Yehova aahilikanyiha itampi sa oSodoma ni oGomora okhala “sotepa watta”. (Maphattuwelo 18:20) Etthu emosa-ru yaahiiraneya oYuda, Yesaya onihimya wiira atthu awo yaari ‘nloko noosareya sootakhala’. Nave owo onniitthana nloko nlo okhala “muxovo w’alavilavi, ana òtakhala murima”. Mweekeekhai, aYuda yaari ntoko anamwane oohiiwelela. Awo ‘yaahimurerya ettuli’ ntoko onihimya awe New Revised Standard Version, “awo yaahiivalaanya moomalela” ni Tiithi aya.
Owehaweha 08/2024 epaax. 9 etti. 6
Yehova Oniphavela Wiira Atthu Ootheene Arukunuxe Murima Aya
6 Ikwaha sinceene Yehova aahaarumeela maprofeta awe wiira aalopole ni aattaruxe atthu awe. Mwa ntakiheryo, Muluku aahimuruma Yeremiya ohimya wiira: “Nyuwo atthu a wIsarayeli, alipa-òhìwelela, mutthikele wa miyo. . . . Nkinrowa-tho woviruwelani. Ayo: miyo k’òmoriwa ikharari: nkinoviruwelani mahiku othene. Miyo k’Apwiya: nkinotha. Vano mwisuwelihe okhala alipa-òttheka: wona muharukunuwela Apwiya Muluku anyu”. (Yer. 3:12, 13) Yehova aahimuruma Yoweli waaleela atthu wiira: “Muttharuweke ni murim’anyu wothene, . . . muhokolowele wa miyo”. (Yow. 2:12, 13) Yehova aahimuleela Yesaya ohimya wiira: “Mwireriheke, murukunuxe mirima sanyu. Mukumihe oholo waka sonanara simpakanyu: muttharuweke wira sotakhala”. (Yes. 1:16-19) Omurumeelaka Ezekiyeli, Yehova aahihimya wiira: “Tthiri miyo nkinsiveliwa n’ukhwa wa mulipa-òttheka: masi kinnitteliwa murima n’urukunuxa wawe murima: kinnitthuna wira akhaleke. . . . Miyo nkinsiveliwa n’ukhwa wa mutthu. . . . Tivó, murukunuxe murima, wira mukhalane ekumi”. (Ezek. 18:23, 32) Yehova onnihakalala okathi onaaweha awe atthu attharuwaka itampi saya, mwaha woowi oniphavela wiira akhaleke mahiku ootheene. Tivo, owo khonilipelela wiira mutthu opacerye toko orukunuxa murima wiira omukhaliherye. Nrowe noone matakiheryo makina anooniherya eyo.
Itthu sa Efaita sa Mbiibiliyani
Profecia de Isaiás vol. 1 muru 4 epaax. 39 etti. 9
Empa ya Yehova Enninnuwihiwa
9 Olelo-va, atthu a Muluku khanithukumana vamwaako aahiiso mutemplo. Etemplo aakokhoreliwa awe Yehova oYerusalemu, yaaphwetexiwe ni anakhotto a oRoma mwaakha wa 70 Nuumala Kristu Orwa. Murummwa Paulo aahooniherya wiira etemplo ya oYerusalemu ni etapernaakulu saari sa nthoonyeryo. Eyo yaathoonyerya “eheema yeekeekhai, yeeyo yeemexiwe ni Yehova, ohiya ni mutthu”. (aHeeperi 8:2) Eheema ya ekeekhai, mareheryo apakiwe wiira anikhaliheryeke omukokhorela Yehova orwela wa mukuttho wa Yesu Kristu. (aHeeperi 9:2-10, 23) Moovarihana ni eheema eyo nilavunle ahu, “mwako watekeliwe-vo empa y’Apwiya” onilavuliwa ni Yesaya 2:2, onithoonyerya okokhorela weekeekhai mahiku ahu ala. Atthu anivarexexa okokhorela iwo wa ekeekhai, khanithukumana opuro omosa paahi, masi animukhokhorela Muluku aya moowiiraana olumweenku wootheene.
1-7 YA DEZEMBRO
MIHAKHU SINIKHUMA MBIIBILIYANI
Yehova Aalipelela Wiira Atthu Awe Yaarowa Omwiiwelelaka
Profecia de Isaías vol. 1 muru 7 ipaax. 73-74 itti. 3-5
Ematta ya Ewuuva
4 Okhala wene ovaha muteko muulupale waala miri sa ewuuva mpakha wiima. Yesaya ohimmye wiira mwaneene ematta eyo “ahipwattha, ahikumihasa maluku”, muteko yoowo wookhulumula. Nave woonasa wene, aahirumeela maluku maalupale wiira ‘oteke empa y’orupelela’. Okathi ole empa eyo yoorupelela, yaakhala yoorakama vaaweryaneya aya mutthu aawehaweha aakhala osulu, waaweha alatarawu ni axinama. Owo aahitekela ekintaali ya maluku ematta awe eyo. (Yesaya 5:5) Yaanipakiwa eyo wiira vaweryaneye okhapeleliwa etthaya eyo yaaruwerya.
5 Mwaha wa muteko munceene aavanre awe ematta awe ele ya ewuuva, owo aanilipelela wiima mihokorokho. Olipelelaka eyo, owo aahipaka nipuro ninnyakattiwa ewuuva. Nto niireke aahiwerya ohepha? Nnaari, okhala wiira mihokorokho saakhumme saari soohiloka.
Profecia de Isaías vol. 1 muru 7 epaax. 76 itti. 8-9
Ematta ya Ewuuva
8 Yesaya onnimwiitthana Yehova mwaneene ematta ya ewuuva, okhala “omphentanawe”. (Yesaya 5:1) Yesaya aanimwiitthana siiso, okhala wiira aahikhalana waataana woolipa ni Yena. (Munwehe Yoobi 29:4; Esaalimu 25:14.) Ophenta profeta Yesaya aarina awe ni Muluku, khahiyo waari etthu nalikanyiha ni ophenta Muluku ooniherya awe mwiri awe wa ewuuva, eyo piiyo, nloko aalale awe. — Munwehe Okhuma 15:17; Esaalimu 80:8, 9.
9 Yehova ‘aahaala’ nloko nawe elapo ya oKanaani ni aahaavaha malamulo ni malakiheryo yaawo yaalikana ni exiri yoolipa yeeyo yaakhapelela ni mixankiho saakumiheriwa ni maloko makina. (Okhuma 19:5, 6; Esaalimu 147:19, 20; aEefeso 2:14) Nave-tho Yehova aanaakhapelela aavahaka makhulupale, anamukuttho ni maprofeeta wiira awiixuttiheke. (2 Mamwene 17:13; Malakiya 2:7; Miteko 13:20) Okathi aisarayeli yaatupheliwa aya ni awanani aya, Yehova aaniwoopola. (aHeeperi 11:32, 33) Yehova aahikhalana erasawu ya okoha wiira: “Ehavo yatthunaka wiriha ematt’ak’ela, kihìrihalyaka?”
Owehaweha 15/06/2006 epaax. 18 etti. 1
“Mukhapelele Ematta Ela ya Ewuuva”
Yesaya aahaalikanyiha “atthú a Isarayeli” ni ‘ematta ya ewuuva’ eniima mihokhorokho soonanara aahiiso, mihokhorokho soowuntta. (Yesaya 5:2, 7) Ewuuva yoonanara, enikhala yaamukhaani, nnakhala kasinireerela opakela eviinyu aahiiso olya. Ewuuva eyo, enithoonyerya nloko noomwareya nenlo mihokhorokho saya ori ohonona nlamulo, ohiya opaka itthu sa xariya. Mulipa oowaala mwiri ole wa ewuuva, khaarina nthowa. Yehova aahipaka itthu sinceene wiira nloko nle niime mihokhorokho sooreera. Owo aakonhe so: “Ehavo yatthunaka wiriha ematt’ak’ela, kihìrihalyaka?”. — Yesaya 5:4.
Owehaweha 15/06/2006 epaax. 18 etti. 2
“Mukhapelele Ematta Ela ya Ewuuva”!
Okhala wiira ematta ya ewuuva ya Isarayeli khiyaakhuma etthu, Yehova aahaatumererya atthu a nloko nawe wiira amala-malihe ekintaali yaatekeleliwe ematta eyo. Owo khaarowa ophatteya-tho mwiri awe wa ewuuva wa nthoonyeryo ni khaaroowa otthikela olima ematta eyo. Nave khiyaarowa-tho orupa epula, nto ematta ele ya ewuuva yaamusareya miiwa ni malaxi. — Yesaya 5:5, 6.
Itthu sa Efaita sa Mbiibiliyani
Owehaweha 04/2024 epaax. 20 etti. 2
Nihikhume Mparayiisu ya Nthoonyeryo
2 Olumwenku ola wootheene, Satana osariha itthu soohiloka ntoko onyokhana, otakhala ni itthu soowoopiha. Masi Yehova owenrye sai opaka eparayiisu eyo ya nthoonyeryo, arumeyi awe anikhala aya ni murettele ni moowiirana? (1 Yoh. 5:19; Wiis. 12:12) Muluku ahu oophenta, onnisuwela wiira ninkhala olumwenku ola wootakhala. Tivonto, onnivaha awe itthu nimprisari ahu wiira nilipihe omwaamini wahu ni wiira nihihiye omurumeela ni murettele. Biibiliya onnilavula sa eparayiisu ya nthoonyeryo ntoko ‘ntthyawelo’ ni “ematta ehinimala maasi”. (Yes. 4:6; 58:11) Akhaliheriwaka ni Yehova, ale anikhala mparayiisu mmo annikhalana murettele ni ovareleleya, nnaamwi ari ene mahiku ookiserya ni ooxankiha. — Yes. 54:14; 2 Tim. 3:1.
8-14 YA DEZEMBRO
MIHAKHU SINIKHUMA MBIIBILIYANI
“Miyo Kiri va: Kirumekeni”
Profecia de Isaías vol. 1 muru 8 ipaax. 93-94 itti. 13-14
Yehova Muluku Ori Etemplo Awe Yoowaarya
13 Yesaya aahimye so: “Nananoru, kahìwa nsu n’Apwiya, nahimya wira: ‘Kinrowa omuruma pani?’ Vano miyo kahakhula wira: Miyo kiri va: Kirumekeni”’. (Yesaya 6:8, NWT) Ni yoowoonihiwa ele, nikoho na Yehova naanooniherya wiira Yesaya paahi taarowa waakhula, okhala wiira khaakhanle profeta mukina pinaatamu. Moohaanyiherya, nlattulo nle aavahiwe awe Yesaya waari para okhale namitthaka a Yehova. Masi xeeni Yehova ohalaka okoha so: ‘Ninrowa omuruma pani?’ Mwaha wa ohihimya wiira ‘kinrowa’, masi oturuka ni nuulumo noowi ‘ninrowa’, enooniherya wiira Yehova aahimuhela muhina mutthu mukina. Mutthu xeeni? Niireke kahiyo mwanawe mmosa ene, yoowo muhoolo mwaya aarowa okhala Yesu Kristu? Mweekeekhai aari mwanawe yoowo aamuhimeenrye awe wiira: “Nimùpe mutthu onlattanahu, onlikana ni hiyo”. (Maphattuwelo 1:26; Miruku 8:30, 31) Tthiri mwanawe mmosa ene aari ni Yena wiirimu. — Yohani 1:14.
14 Ohuupuwenle vanceene, Yesaya aahaakhula. Moohicikha sa muhupi aarowa awe olaleya, owo aakhunle so: “Miyo kiri va: Kirumekeni”. Owo khaakonhe etthu aarowa awe ophwanya akhala wiira aamweemererya yoothanleliwa ele. Wiivahererya wawe, ntakiheryo nooloka para arumeyi a Muluku olelo-va, yaawo ‘anilaleya ihapari sooreera elapo yootheene’. (Matheyo 24:14) Ntoko Yesaya, awo anniluttuweliwa ni muteko aya wa ‘waalaleerya atthu ootheene’, hata ikwaha sikina ahaakheliwaka saana. Ntoko Yesaya, arumeyi awo anniroromela ni annisuwela wiira Yehova tonaakhaliherya.
Profecia de Isaías vol. 1 muru 8 epaax. 95 itti. 15-16
Yehova Muluku Ori Etemplo Awe Yoowaarya
16 Yesaya aahilavula ni atthu ale, ‘ikwaha ikwaha sene’, masi awo khiyeemerenrye muhupi aalaleya awe nnakhala khiyiiwexenxe. Anamunceene a yaawo khiyaarowa waakhelelaka muhupi owo, nave yaarowa okhalaka ntoko khanoona ni khaniiwa. Mwaha wa Yesaya olavula ni atthu ale ikwaha sinceene, aahooniherya wiira awo khiyaaphavela wiiwexexa ihapari aalaleya awe. Yaahooniherya wiira yaahiwala muupuwelo aya ni murima aya wiira ahiwiriyane muhupi aalaleya awe Yesaya, eyo piiyo, Nuulumo na Muluku. Atthu olelo-va, anipaka etthu emosa-ru. Awo annikhootta owiriyana ihapari sooreera seiyo sinilaleiwa ni Anamoona a Yehova sinivarihana ni Omwene wa Muluku.
Owehaweha 15/12/2014 epaax. 6 etti. 2
‘Nwiriyane ni Musuwelexeke Ele Enitaphulela Aya’
2 Exeeni yaawiirinhe atthu anceene ohiiwexexa masu ale yaalavuliwe ni Yesu? Okhala wira awo yaarina muupuwelo ni soolakela soohiloka. Tivonto Yesu aahimeeryale awe atthu awo wira: “Nyuwo munnihiya mwayini soruma sa Muluku, wira mwetteleke ikano sanyu”. (Mar. 7:9) Tthiri atthu ale khiyaimananiha wira yiiwexexe ele yaataphulela aya masu ale a Yesu. Awo khiyaaphavela orukunuxa moonelo ni muupuwelelo aya. Woonasa wene maaru aya yaari ootthukuwa, masi mirima saya saari sootthukiwa! (Mmusome Matheyo 13:13-15.) Vano ninrowa owerya sai wiiriha mirima sahu okhala sootthukuwa wira niweryeke wiiwa ni osuwelexa ele yaixuttinhe awe Yesu?
Itthu sa Efaita sa Mbiibiliyani
Owehaweha 11/2021 epaax. 16 itti. 9, 10
Anamathelana a Niinaano, Muheleke Nipuro Noopacerya Omurumeela Yehova Mookumini Mwanyu
9 Profeta Yesaya ni mwaarawe yaanihela nipuro noopacerya mookumini mwaya omurumeela Yehova. Yesaya aari profeta, nto vanikhala ntoko wira mwaarawe aahikhalana yoothanleliwa awe. Maana Biibiliya onnimuhimya mwaarawe Yesaya okhala “profeta”. (Yes. 8:1-4) Vannooneya wira Yesaya ni mwaarawe yaanihela nipuro noopacerya mookumini mwaya omukokhorela Yehova. Tthiri awo ahaavaha ntakiheryo nooloka anamathelana a mahiku ahu ala!
10 Anamathelana olelo-va, anoowerya omutakiha profeta Yesaya ni mwaarawe apakaka sotheene aniwerya aya wira avare muteko wa Yehova. Awo anoowerya olipiha omuroromela waya Yehova asomaka iprofesia sa mBiibiliyani hoothe ni oweha moota siiraneyale aya. (Tito 1:2) Nave awo pooti wuupuwela etthu akhanle aya oopaka wira akhaliherye wiiraneya wa iprofesia sikina sa mBiibiliyani. Mwa ntakiheryo, awo pooti okhaliherya wiiraneya wa eprofesia ya Yesu yoowi ihapari sooreera sinoolaleiwa elapo yotheene ohinatthi olumwenku omala. (Math. 24:14) Okathi anamathelana anoona aya iprofesia sikina sa mBiibiliyani siiraneyaka, awo anoolipiha yoolakela aya ya wiimananiha ovara muteko wa Yehova.
15-21 YA DEZEMBRO
MIHAKHU SINIKHUMA MBIIBILIYANI
Waahileiheriwa “Waarya Wuulupale”
Profecia de Isaías vol. 1 muru 10 ipaax. 125-126 itti. 16-17
Yooleiherya ya Mukhulupale a Murettele
16 ‘Okathi waaleiheriwe’ ni Yesaya, waahiiraneya okathi Yesu aavara awe muteko awe valaponi. Okathi wootheene Yesu aari awe valaponi, aavirinhe oGalileya. Yaari etistrito ya oGalileya Yesu aapacenrye awe muteko awe ni okathi yoowo aalalenye awe wiira: “Omwene wa wiirimu ori vakhiviru.” (Matheyo 4:17) Waari oGalileya aalavunle awe mwaha awe vamwaako, aathanlale awe arummwa awe, aapanke awe mwiiriirya awe woopacerya ni nuumala ohihimuxiwa, aakhumelenle awe atthareli awe 500. (Matheyo 5:1–7:27; 28:16-20; Marko 3:13, 14; Yohani 2:8-11; 1 aKorinto 15:6) Mulaponi mwa ‘Zabuloni ni Nefetali’, Yesu aahaakwaniherya eprofesia ya Yesaya. Yesu aahaalaleerya atthu a oGalilieya. Mwaha wa olaleerya ihapari sooreera elapo yootheene, Yesu aahiiriha nloko nootheene na Isarayeli okhala noottittimihiwa ohela muhina oYuda.
Profecia de Isaías vol. 1 muru 10 ipaax. 126-128 itti. 18-19
Yooleiherya ya Mukhulupale a Murettele
18 Mwaha wa muteko woolaleerya wa Yesu ni awiixutti awe, atthu a murima wooloka, yaahipacerya omukokhorela Yehova yeettihiwaka ni munepa ni ekeekhai. (Yohani 4:24) Sihinatthi ovira iyaakha 4, atthu anceene yaahikhala makristau. Atthu oowiiraka 3.000 yaahipatisiwa pentekoositi a 33 Nuumala Kristu Orwa. Ovinre ene okathi vakhaani paahi, “nummuru na atthu yaaminni naari etthu yoowiiraka alopwana 5.000”. (Miteko 2:41; 4:4) Okathi awiixutti yaatepa aya olaleerya, “nummuru na awiixutti naamutepa wuncerereya oYerusalemu. Nave-tho, anamukuttho anceene yaahipacerya waamini”. — Miteko 6:7.
19 Ntoko siisaale mulimi onihakalala awe mwaha wa oruwerya vanceene, nave ntoko siisaale anakhotto anihakalala aya nuumala waaxintta awanani aya, awiixutti ale yaahihakalala vanceene nuumala waaweha atthu anceene yaawo yaakela ekristau. (Miteko 2:46, 47) Nuuvira okathi, Yehova aahiiriha wiira waarya iwo, waamwaleeleke atthu akina. (Miteko 14:27) Mwaha wa yeeyo, atthu a maloko ootheene, anniwerya okhala oohakalala okhala wiira ephiro ennikhaliherya omwaattamela Yehova eri yoohuleya ene. — Miteko 13:48.
Profecia de Isaías vol. 1 muru 10 ipaax. 128- 129 itti. 20-21
Yooleiherya ya Mukhulupale a Murettele
21 Yesu Kristu tori Mukhulupale a Murettele. Mwaha wa waamala-maliha awanani awe, onookumiherya murettele ohinimala. Olavulaka sa ikaruma sa ekhotto seiyo sinrowa opwetexiwa ni mooro, Yesaya onihimya so: “Itthu sothene siniwananiwa ekhotto sinoriheliwa vaikho: Sowara s’atthu khasinottihiwa-tho ephome”. (Yesaya 9:5) Atthu khanirowa-tho woova aahiiso ohaawa mwaha wa ikhotto. Khasinirowa-tho owehiwa ifartamento sa anakhotto sisareyale ene ephome mwaha wa ekhotto. Ikhotto sinoomala-mala. — Esaalimu 46:9.
Itthu sa Efaita sa Mbiibiliyani
Ekaderno Enirumeeliwa Omuthukumanoni 12/2019 epaax. 5 ekaaxa
Ekhotto ya Muluku Enoomaliha Ikhotto Sotheene
Yehova ni Yesu anniphenta exariya ni anninyokha itthu sootakhala. Moolumwenkuni, murettele wekeekhai ni exariya sinrowa okhala paahi nuumala atthu ootakhala murima omala-malihiwa. Anakhotto a Muluku a wiirimu ‘anniwana ekhotto n’ixariya’ ewenle ene ikhavalo sootteela ni ewanre ene ikuwo sootteela sootteettheya sa eliinyu. Nipakeke exeeni wira noopowe nihiku na ekhotto yuulupale? — So 2:3
22-28 YA DEZEMBRO
MIHAKHU SINIKHUMA MBIIBILIYANI
Biibiliya Aahimmye Exeeni sa Mesiya?
Profecia de Isaías vol. 1 muru 13 epaax. 159 itti. 4-5
Woopoliwa ni Ohakalala Moomweneni wa Mesiya
5 Yesu ti Mesiya aaleiheriwe. Matheyo, yoowo olempe eliivuru enikuxa nsina nawe, aahitthikela-tho olavula moolumo yaawo aalavunle awe Yesaya, ari Yesaya 11:1, yaawo anooniherya wiira mwaha wa Yesu wiitthaniwa “Munazarethi” aahimaliherya moolumo yaalavuliwe ni maprofeeta. Mwaha wa Yesu wunnuwa epooma ya oNazarethi, owo aitthaniwa Munazarethi, nsina nenlo naavarihana ni moolumo a eheeperi arumeeliwe Yesaya 11:1, eyo piiyo, “Ophuwa”. — Matheyo 2:23 nwehe enota; Luka 2:39, 40.
Profecia de Isaías vol. 1 muru 13 epaax. 159 etti. 6
Woopoliwa ni Ohakalala Moomweneni wa Mesiya
6 Mesiya aarowa okhala mwene a mukhalelo xeeni? Niireke aarowa okhala ntoko mwene a waSiria yoowo aamala-malinhe omwene wa maloko 10 a wIsarayeli? Nnaari. Olavulaka sa Mesiya, Yesaya aahimmye so: “Mwa yeyo enokhala Eroho y’Apwiya: Eroho y’osuwela ni y’ankhili, Eroho ya miruku ni yo wilipiha, Eroho y’osuwela ni y’omuttittimiha Muluku; Yeyo enolipihiwa mwaha w’omova Muluku”. (Yesaya 11:2, 3a) Mesiya aarowa othanliwa ni munepa woowaarya wa Muluku, eyo yiiranenye okathi Yesu aapatisiwa awe, vaavo Yohani aawehale awe munepa wa Muluku omukhuruwelaka Yesu ntoko epompa. (Luka 3:22) Munepa wa Yehova waari ni Yesu, nave owo aahooniherya wiira aahikhalana munepa owo, okhala wiira aari mutthu ankhili, a miruku, oowiiwelela, oowerya ni oosuwela. Tthiri iya mikhalelo sooloka namalamulela onireerela awe okhalana.
Owehaweha 06/2023 epaax. 15 etti. 5
Xeeni Ninreerela Ahu Omuttittimihaka Vanceene Yehova?
5 Omuttittimiha Yehova ontaphulela omphenta vanceene ni wiimananiha ohipaka etthu yaarowa ohonona ompatthani ahu ni yena. Mwa ntakiheryo, Yesu aahooniherya enamuna eyo ya omuttittimiha ni ‘omoova Muluku’. (aHeeb. 5:7) Yesu khaamoova Yehova mootepana. (Yes. 11:2, 3) Tthiri owo aanimphenta vanceene Yehova ni aniphavela omwiiwelela. (Yoh. 14:21, 31) Nimutakihaka Yesu, hiyo ninnimuttittimiha vanceene Yehova okhala wiira ninnisuwela wiira owo toophenta, toosuwela, ta xariya ni toowerya. Nave ninnisuwela wiira Yehova onniniphenta vanceene. Nto itthu nimpaka ahu pooti omuriipiha murima aahiiso omuhakalaliha. — Esal. 78:41; Mir. 27:11.
Profecia de Isaías vol. 1 muru 13 epaax. 160 etti. 9
Woopoliwa ni Ohakalala Moomweneni wa Mesiya
9 Yesaya onnilavula mikhalelo sikina sa Mesiya oriki: ‘Khonalamula atthu ntoko sinòneyaya: Khimphuka milattu mwaha wo wiwa pahi”. (Yesaya 11:3b) Vaakhanle wiira muri otiripunaali, niireke khimwaarowa ophavela wiira mulattu anyu ophukiwe ni xuwiixi siisa? Ntoko xuwiixi a olumwenku wootheene, Mesiya khonaaphukela atthu ottharaka itthu soowoothiwa, waathanla atthu nnakhala okunyariwa. Ohiya paahi oweha mukhalelo wa ota, owo onniweha itthu siri vamurimani va mutthu ni sihinooneya. (1 Pedru 3:4) Yesu ntakiheryo nooloka para axitokwene a mmulokoni. — 1 aKorinto 6:1-4.
Profecia de Isaías vol. 1 muru 13 epaax. 161 etti. 11
Woopoliwa ni Ohakalala Moomweneni wa Mesiya
11 Okathi atthareli awe yaapirisari aya ottharuxiwa, Yesu aanirumeela okathi owo wiira aakhaliherye. Nla ntakiheryo nooloka anireerela aya otthara axitokwene olelo-va. Ale anipaka itthu sootakhala, anrowa ophukeliwa mwa enamuna yoowereya. Waphiya okathi aya, Muluku onoomuruma Mesiya wiira “opwetexe maloko” ni nsu nawe noowerya, vaavo onrowa awe waapwetexa atakhali ootheene valaponi. (Esaalimu 2:9; Wiisuupulula 19:15.) Nuumala-vo, khanirowa-tho okhala atthu ootakhala valaponi yaawo anrowa ohononaka murettele. (Esaalimu 37:10, 11) Yesu yoowo ori mukhulupale, ookhalana owerya woopaka eyo. — Esaalimu 45:3-7.
Itthu sa Efaita sa Mbiibiliyani
Owehaweha 09/2022 epaax. 20 etti. 2
‘Ale Aniixuttiha Muttitthi wa Atthu Iphiro sa Xariya’
Ootheene ale anrowa ohihimuxiwa anooreerelaka wiixuttihiwa. (Yes. 26:9; 61:11) Ti maana aya vanireerela aya okhala muteko wowiixuttiha atthu ootheene valaponi. (Mmusome Yesaya 11:9, 10.) Mwaha wa xeeni? Okhala wira ale ahikhanle anaxariya anrowa ohihimuxiwa, anooreerelaka wiixuttihiwa voohimya sa Yesu Kristu, Omwene wa Muluku, mukuttho wowoopola, ni efaita nirina aya nsina na Muluku ni okokhoreliwaka yena paahi. Hata anaxariya anooreerelaka wiixuttihiwa voohimya sa yoolakela ya Yehova orina awe ni elapo ela. Eyo enimwiiraneya okhala wira akina arumeyi awo a Yehova aakhwiiye nlelo Biibiliya ohinatthi omalihiwa olempwa. Ootheene aya, anaxariya ni ale ahikhanle a xariya anooreerelaka wiixutta itthu sinceene.
29 A DEZEMBRO-4 A JANEIRO
MIHAKHU SINIKHUMA MBIIBILIYANI
Awanani a Nloko na Muluku Anoophukeliwa
Profecia de Isaías vol. 1 muru 14 epaax. 180 etti. 16
Yehova Aahimala-maliha Epooma ya OBabiloonia
16 Eyo khiyiiraneyale waanipacerya wa mwaakha wa 539 Ohinatthi Kristu Orwa. Mweekeekhai, itthu sootheene Yesaya aahimmye awe sa Babiloonia, saahiraneya. Mulopwana mmosa olavulaka sa Babiloonia, aahimmye so: “Vano sinnivira iseekulu sinceene opwetexiwe ene ni okhalihiwe ene milepe”. Owo aahincererya oriki: “Khivaniweryaneya osoma yoowiiraneya ela ni ohuupuwela moota yiiranenye aya moomalela eprofesia ya Yesaya ni Yeremiya”. Khuuvo mutthu a okathi wa Yesaya uupuwela wiira Babiloonia ampwetexiwa ni okhalihiwa milepe. Okathi aMedo-persia yampwetenxe aya Babiloonia, siira sivinre ene iyaakha 200 nuumala Yesaya olepa eliivuru awe. Nuuvira iseekulu vakhaani, oBabiloonia waahikhala milepe. Niireke eyo khenilipiha waamini wanyu wiira Biibiliya eliivuru yuupuxeriwe ni Muluku? (2 Timootheyo 3:16) Okhala wiira iprofesia Yehova aaleihenrya awe khalai sihiiraneya, nikupaliki wiira itthu oleihenrya awe sa muhoolo sinimwiiraneya.
Profecia de Isaías vol. 1 muru 14 epaax. 184 etti. 24
Yehova Aahimala-maliha Epooma ya OBabiloonia
24 Mbiibiliyani, mamwene yaalamulenle nuumala Davidi, yaalikanyihiwa ni itheneeri. (Mammeru 24:17) Mwene Davidi taapacenrye olamulela oMwaako Sinaayi ntoko ‘etheneeri yoopacerya’. Nuumala Salomooni oteka etemplo oYerusalemu, epooma yootheene yiitthaniwa Sinaayi. Ntoko naahimmya aya nivarihano na nlamulo, alopwana ootheene, yaanitumereriwa weetta mukwaha arowaka oSinaayi ikwaha tthaaru vamwaakhani. Mwaha waivaavo, owo waahikhala ‘mwaako waathukumaniwa’. Mwaha wa waakhaliha ipottha ni waamala-maliha vamwaako vale mamwene a aYuda, mwene Nabukudonosori, aahooniherya wiira aaniikhaliha vasuluxa ovikana “itheneeri” iye. Nabukudonosori khanvaha ovuwa Yehova. Owo aanuupuwela vootakhala, iihelaka opuro wa Yehova.
Profecia de Isaías vol. 1 muru 15 epaax. 189 etti. 1
Miruku Yehova Aavahale Awe Maloko
YEHOVA anwerya oruma maloko makina wiira aattharuxe atthu awe. Hata vari siiso, Yehova khaarowa olevelela maloko awo mwaha wa otakhala waya ni ohittittimiha waya okokhorela weekeekhai. Yehova aahimuruma vahinatthi Yesaya olepa “Mutthaka onàsa muttetthe w’oBabilonia”. (Yesaya 13:1) Muhoolo Babiloonia aarowa opwetexiwa. Okathi wa Yesaya, aSiiria yaanaahaaxa arumeyi a Muluku. Owo aahipwetexa omwene wa onorti wa wIsarayeli ni aahimala-maliha mpantta muulupale wa oYuda. Masi owerya wa aSiiria waahikhalana mukano. Yesaya aalempe so: “Apwiya òwerya sothene àlipela ehimyaka wira: ‘Tthiri sitthokelenlyaka sinimwiraneya: sintthunaka sinokhumelela. Kinimwanyakelasa n’inawu saka vamiyakoni vaka. Atthu aka yahaxiwa n’awo, animopoliwa: miritti salemela mmakhatani mwaya, anoruliwa’”. (Yesaya 14:24, 25) Ohivinre okathi munceene Yesaya olavunle ene eprofesia ela, aSiiria yaahihiya owoopopiha aYuda.
Profecia de Isaías vol. 1 muru 15 epaax. 194 etti. 12
Miruku Yehova Aavahale Awe Maloko
12 Eprofesiya ela enrowa wiiraneya silini? Moohipisa. “Ala ti masu Apwiya awulumelannyaya atthu òMowabi okhuma khalai. Vano Apwiya anihimya wira: ‘Savirá iyakha ttharu, okathi ene yola, makhulupale òMowabi anorimela vamosá n’atthu aya anjene. Anohala atthu vakhanixa, ahinwerya’”. (Yesaya 16:13, 14) Moovarihana ni moolumo ala, sookhala itthu anamatokosa aphwanye aya sinooniherya wiira eseekulu 8 Ohinathi Kristu Orwa, atthu oMowabi yaahihaawa ni mittetthe saya saahithaamiwa. Tiglate-Pileser III (aneeraru) onnilavula sa Salamanu, a oMowabi, mmosa a anamalamulela aamulinve mpoosito. Mwene Senakeribi ahiliviwa mpoosito ni mwene oMowabi Kammusunadbi. Mwene Esar-Hadom ni Assurbanipal annilavula sa mwene Musuri ni Kamashaltu, mamwene a oMowabi yaawo yaawiiwelela. Nuuvira iseekulu sinceene, atthu a oMowabi yaahimala-mala. Tivonto, Saahiphwanyiwa milepe sa ipooma, saari sa oMowabi, nave itthu iyo siphwanyiwe opuro owo sinooniherya itthu vakhaani sa nwanani ole oowerya a wIsarayeli.
Itthu sa Efaita sa Mbiibiliyani
Owehaweha 05/2025 epaax. 10 etti. 8
Yehova Tonnimaaliha
8 Mwa moonelo wa apinaatamu, vaakhala wiira ayuda yaakhalihiwe ipottha oBabiloonia khiyaarowa otthikela elapo aya. Maana oBabiloonia, yaanisuweliwa okhala elapo yahaataphula ipottha saya. (Yes 14:17) Masi Yehova aahaavaha nlipelelo arumeyi awe. Owo aahaaleiherya wiira aamwaakhaliherya otaphuliwa ni khiivo etthu yaarowa omukhoottiherya opaka eyo. (Yes 44:26; 55:12) Mwa moonelo wa Yehova, Babiloonia aari ntoko ntthupi. (Yes 40:15) Nuumala woopa epheyo vakhaani paahi, ntthupi nlo nanvavihiwa nroihiwaka ottaiwene. Nlipelelo nlo naalipihale sai ayuda ale yaari oBabiloonia? Awo yaahilipa vanceene. Ohiya-vo, nlipelelo nlo nahaalipiha mwa enamuna ekina. Yesaya aahimmye so: “Ale anlipa ni Apwiya ikuru saya sinninjerereya”. (Mmusome Yesaya 40:29-31.) Awo yaarowa olikanaka ni murumaasi onivava wiirimu, maana nlipelelo naya naamwaavahaka ikuru.