“Vano Kinnisiveliwa Olaleerya!”

OHAKALALA WAKA WAAHIMALA

Mooriipiha murima, kirina ene iyaakha 13 omphenta waka Yehova waahivukuwa vanceene. Kuupuwela wira anaxikola akhwaaka yaari ootaphuwa, nto kinoona wira yookhala etthu kaapweteiwa aka. Miyo koona wira malakiheryo a anamuyari aka ni mweettelo wa eKristau waanikikhoottiherya otaphuwa, nto kuupuwela wira waari woovila omukokhorela Yehova. Nnaamwi kahaatonko waanyiherya wira Yehova ookhala, masi kaahipacerya woona wira nkaarina waataana wooloka ni yena.

Hata vaari siiso, nkaahiyale olaleerya, masi kaalaleerya okathi vakhaani paahi wira kihithokoreriweke ntoko mutthu ohiyale olaleerya. Okhala wira nkailokiherya okathi kaarowa aka olaleerya, waanikivila opaceriha ovaanela ni ovikaniha ovaanela iwo ni axineene etthoko. Nto eyo yaahiiriha muteko aka woolaleerya ohikhumela saana ni nkahaakalala, eyo yaanincererya ohisiveliwa waka olaleerya. Miyo kaaniikoha wira: ‘Vaniweryaneya sai mutthu ohihiya olaleerya khula esumana ni khula mweeri?’

Kirina ene iyaakha 17, kaaphavela otaphuwa moomalela. Nto kaahikuxa ikuwo saka sotheene ni mireerelo saka, kinarowa okhala wAustrália. Yoothanla aka ya othaamela wAustrália yaahaawereya vanceene anamuyari aka. Nnaamwi yaaxankale vanceene, awo yaanisuwela wira nkaarowa ohiya omukokhorela Yehova.

Kikhalaka wAustrália, mukhalelo aka wa omunepani waahitepa otthikela ottuli. Kaahipacerya ocompa mithukumano ni kaarowa katthuna vale. Etthu yaatepa okisivela waari weetta ni aximwali ntoko miyo, awo yaanirowela mithukumano ohiyu nuumala-vo anarowa ohapaliwa ni wiina mukulupi. Kuupuwelaka itthu saakikhumelenle khalai, kinoona wira mwetto mmosa kaari mwekeekhaini, mwetto mukina kaari moolumwenkuni. Etthu yooriipiha murima, okhala wira khuuvo mpantta waakihakalaliha.

KAAHIIXUTTA ETTHU YA FAITA NI KIHAALIPELELA AKA

Nuuvira iyaakha piili muhoolo mwaya, kaahimusuwela mowaakuveya murokora aakikhalihenrye wuupuwela makhalelo a okumi aka. Miyo kaakhala ni arokora 5 oohitheliwa, nto naahimulattula mutokweene a esirkwiitu ni mwaarawe iihaniwa Tamara wira akhale ni hiyo esumana ele yotheene. Okathi munna ole aavara awe miteko sa mmulokoni, Tamara aaniviriha okathi ori ene ni hiyo nithweelaka ni otheya. Eyo yaanikisivela vanceene. Murokora Tamara aari mutthu ooreera murima vanceene ni oovaanelaneya. Waahikisivela vanceene omusuwela mutthu aari oolipa momunepani ni ootheiha.

Tamara aari mutthu aalavula moohakalala. Ophenta wawe ekeekhai ni muteko woolaleerya wookikhaliherya vanceene. Tthiri Tamara aanihakalala vanceene wiimananiha ovara muteko wa Yehova. Masi miyo kaaniriipiwa murima mwaha woowi nkiimananiha ovara muteko wa Yehova. Moonelo awe wooloka ni ohakalala wawe wekeekhai wookikhaliherya vanceene mookumini mwaka. Mwa ntakiheryo, owo ookikhaliherya wuupuwelela ekeekhai ela yuulupale: Yehova oniphavela wira nimukokhoreleke “n’utteliwa murima” ni ‘nimwipeleke isipo’ moohakalala.—Esal. 100:2.

KAAHITTHIKELA OSIVELIWA OLALEERYA

Miyo kaaphavela okhala mutthu oohakalala ntoko Tamara. Masi wira kiphwanye ohakalala iwo kaahaana opaka marukunuxo manceene mookumini mwaka. Waahivira okathi, masi kaahipacerya opaka mavalo vakhaani-vakhaani. Kaahipacerya wiilokiherya kaarowaka olaleerya, nave okathi mukina kaanirumeela ntoko pioneera ookhaliherya. Nto eyo yaahikhaliherya ohitepa oxanka okathi kaalaleerya aka ni ohoova kaalaleeryaka. Okhala wira kaanimurumeela vanceene Biibiliya okathi woolaleerya, eyo yaahikikhaliherya osiveliwa olaleerya. Moohipisa kaahipacerya orumeela ntoko pioneera ookhaliherya myeeri sotheene.

Kaahipacerya waapaka opatthani atthu yaarina iyaakha soovirikana, yaawo yaasiveliwa ekeekhai ni omukokhorela Yehova. Ntakiheryo naya nooloka, nookikhaliherya oweha itthu kaahela aka nipuro noopacerya mookumini mwaka ni otthikela eprokrama aka ya omusoma Biibiliya khula nihiku. Waanikisivela vanceene muteko woolaleerya, nuuvira okathi kaahikhala pioneera ookilaatheya. Ele yaari ekwaha aka yoopacerya nuuvira okathi munceene kaahakalala aka ni okhala ootaphuwa mmulokoni.

KOMPHWANYA MPATTHANI AKA OOVARANA MUTEKO OKUMI AKA WOTHEENE

Nuuvira eyaakha emosa kaahimusuwela Alex, mulopwana ooreera murima ni onimphenta Yehova ni muteko woolaleerya. Owo aari murumeyi ookhaliherya ni aahiviriha iyaakha 6 ori ene pioneero. Nave Alex aahirumeela muttetthe woothowa anamalaleerya oMalawi. Ori ene oMalawi, Alex aahaasuwela mamisionaario, yaawo yaamukhalihenrye ohihiya ohela nipuro noopacerya Omwene.

Mwaakha wa 2003, miyo ni Alex naahithelana ni khinaahiyale ovara muteko wa Muluku wa okathi wotheene. Naahiixutta itthu sinceene sa faita ni Yehova khaahiyale oniireeliha mwa inamuna soovirikana.

YEHOVA AAHINIREELIHA VANCEENE

Mwaakha wa 2009, naahilattuliwa orumeela ntoko mamisionaario elapo ya oTimor-Leste, elapo yaamukhaani ya wIndonésia. Okathi omosaru, naahihakalala, otthapa ni oxanka. Nuuvira myeeri 5 muhoolo mwaya, naahipiya oDili ekapitaali ya oTimor-Leste.

Wira naarumeeleke elapo ele, naahaana opaka marukunuxo manceene mookumini mwahu. Maana itthu sotheene saahivirikana ntoko soolema, nttaava, yoolya ni makhalelo. Nto naahaana wiimananiha olimalela makhalelo makina. Nave naahaana waalaleerya atthu oohaawa yahaasomme ni yaahaasuliwa vanceene. Atthu anceene yaanixanka ni oriipiwa murima mwaha wa ekhottoa yaawaniwe elapo ele.

Olaleerya waari woohakalaliha! Mwa ntakiheryo, ekwaha emosa kaahimusuwela mwali mmosa aarina iyaakha 13 iihaniwa Maria.b Makhalelo awe yaari ooriipiha murima. Saahivira iyaakha maama awe okhwiiye ene ni vaaninvila onweha paapa awe. Ntoko aximwali ni amiravo akina a iyaakha sawe, Maria khoona yoopaka. Kinnuupuwela nihiku nimosa vaavo anla awe ohimyaka moonelo awe, mooriipiha murima nkaasuwela etthu aahimya awe, maana nkaasuwela olavula oratteene nttaava nawe. Kaahinvekela Yehova wira okikhaliherye ommaaliha, nto kaahipacerya omusomela soolepa soolipiha. Iyaakha vakhaani saattharelana, kaanoona moota ekeekhai yaaturunke aya muupuwelo ni makhalelo a Maria. Olelo-va, Maria oniirela mpantta emusi ya Yehova ni onnoona wira onniphentiwa vanceene.

Yehova onnireeliha vanceene muteko woolaleerya oTimor-Leste. Anamalaleerya anceene, yiixuntte ekeekhai iyaakha 10 sivinre. Anamunceene a yaawo, olelo-va anirumeela ntoko mapioneero, arumeyi ookhaliherya ni axitokweene. Akina anirumeela mapuro anitaphuleliwa iliivuru oorakamela oBetheli akhaliheryaka otaphulela iliivuru sahu mattaava a elapo ele. Kinnihakalala vanceene owiiwa yiipaka mmithukumanoni ahakalanle ene ni woona moota ankela aya vahoolo momunepani.

OKUMI WOOHAKALALIHA

Yoothanleliwa ahu oTimor-Leste yaahivirikana ni makhalelo naarina ahu wAustrália. Masi nkinkhala-khala kiliyalaka okumi woohakalaliha nrina ahu. Ikwaha sikina, vaavo nneetta ahu mukwaha ninniphunyana mukaaroni maana annisareya atthu, nave sinniheliwa ihopa soowuuma ni soolya sikina sinitumihiwa omerkaatu. Mahiku makina naaniiriha yoosoma ya Biibiliya empa yaamukhaani muhina mwaaviha vanceene ni yaapatthiwe wala osirikiwa vathi. Nave ilyakhu saaneetteetta vate. Hata naarina mixankiho iyo sotheene, miyo kaamakela wuupuwela so: ‘Tthiri ela ti yoohakalaiha vanceene!’

Kuupuwelaka itthu sikikhumelenle khalai, kinnaaxukhurela vanceene anamuyari aka yaawo yiimananinhe vanceene okiixuttiha malamulo a Yehova ni okikhaliherya okathi kaarina aka mixankiho kiri ene mwali. Eliivuru ya Miruku 22:6 ehiiraneya mookumini mwaka. Amaama ni apaapa annihakalala vanceene mwaha wa miyo ni Alex. Etthu enaahakalaliha woona wira ninnirumeeliwa ni Yehova. Okhuma mwaakha wa 2016 noopacerya orumeela osirkwiitu muttetthe wa efiliyaali ya wAustralásia.

Niireke khivanoovilani okupali wira khiwaakisivela olaleerya? Olelo-va, onnikisivela vanceene olaleerya! Kihoona wira hata nikhalanaka mixankiho mookumini mwahu, otheene ahu nnoowerya ophwanya ohakalala vaavo nimmurumeela ahu Yehova ni murima wotheene. Moohaanyiherya, iyaakha 18 sivinre kimurumeelaka Yehova ni Alex kinnihakalala vanceene mookumini mwaka. Vano kinnoona wira moolumo a nasaalimo Davidi teekeekhai, yoowo aamulenle awe Yehova wira: “Etteliweke murima othene ale anitthyawela wa nyuwo: awo anopuha mahiku othene. . . . Otteliwa waya murima ti w’ekekhai”.—Esal. 5:12.