Yehova Onaakhula Sai Mavekelo Ahu?

1-2. Etthu xeeni anna ni arokora akina atonko aya wiikoha?

NIIREKE mootoko wiikoha akhala wiira Yehova onnaakhula mavekelo anyu? Vakhala wiira mootoko, kaahiyo mumpacerya. Maana hata anna ni arokora anceene anniikoha siiso okathi sinaaphwanya aya mixankiho. Tthiri okathi wa mixankiho, vannivila woona moota Yehova onaakhula awe mavekelo ahu.

² Mwaha ola, nnooweha nthowa naya ninreerela ahu okupaliki wiira Yehova onnaakhula mavekelo a arumeyi awe. (1 Yoh. 5:15) Nave nnimwaakhula makoho anittharelana: Xeeni ikwaha sikina nnuupuwela ahu wiira Yehova khonaakhula mavekelo ahu? Olelo-va, Yehova onaakhula sai mavekelo ahu?

IKWAHA SIKINA YEHOVA KHONAAKHULA MAVEKELO AHU NTOKO NAAPHAVELA AHU

3. Xeeni Yehova oniphavela awe wiira ninvekeleke?

³ Biibiliya onihimya wiira Yehova, onniniphenta vanceene ni onninivaha efaita. (Hag. 2:7; 1 Yoh. 4:10) Ti nthowa naya owo onnivekela awe wiira nimwaattameleke nipakaka nivekelo. (1 Ped. 5:6, 7) Yehova onniphavela vanceene onikhaliherya wiira nilipihe waataana wahu ni yena ni wiira niwerye ovilela mixankiho sahu.

4. Ninsuwela sai wiira Yehova onnaakhula mavekelo a arumeyi awe? (Nwehe eteseenyo.)

⁴ Mbiibiliyani, sookhala soowiiraneya sinceene sinooniherya moota Yehova aakhunle awe mavekelo a arumeyi awe khalai. Nto ntakiheryo xeeni munuupuwela anyu? Woonasa wene nyuwo munnuupuwela ntakiheryo na mwene Davidi. Davidi aahikhalana awanani anceene ni ikwaha sinceene aaninvekela Yehova wiira omukhaliherye. Ekwaha emosa aahivekela oriki: “Apwiya! [Yehova] Mwiwe ovekela waka: mwaha w’orera wanyu murima nwiriyane okhuwela waka: mukakhule mwaha w’ororomeleya wanyu”. (Esal. 143:1) Yehova aahaakhula mavekelo a Davidi ni aahimukhaliherya okathi wa mixankiho. (1 Sam. 19:10, 18-20; 2 Sam. 5:17-25) Mwaha waivaavo, eyo yaahimwiiriha Davidi ohimya so: “Apwiya [Yehova] anniwattamela othene ale anavekela”. Nave hiyo nikupaliki etthu emosaru. — Esal. 145:18.

5. Niireke Yehova aanaakhula mavekelo a arumeyi awe a khalai ntoko yaaphavela aya? Nvahe ntakiheryo. (Nwehe eteseenyo.)

⁵ Ikwaha sikina, Yehova khonaakhula mavekelo ahu ntoko nimphavela ahu. Eyo ti etthu yaamwiiranenle murummwa Paulo. Owo aahinvekela Yehova wiira omala-malihe muxankiho awe yoowo waalikana ‘ni mwiiwa oheliwe mweerutthuni mwawe’. Paulo aahinvekela Yehova ikwaha tthaaru wiira okumihe muxankiho awe ole. Niireke Yehova ahaakhula mavekelo awo? Aayo, masi ohiya ntoko siisaale Paulo aaphavela awe. Maana Yehova khaamala-malinhe muxankiho ole wa Paulo. Masi aahinvaha ikuru wiira owerye ovilela ni ohihiya omurumeela Yehova moororomeleya. — 2 aKor. 12:7-10.

6. Xeeni ikwaha sikina nnuupuwela ahu wiira Yehova khonaakhula mavekelo ahu?

⁶ Ikwaha sikina, Yehova pooti waakhulaka mavekelo ahu mwa enamuna nahaalipelela ahu. Masi nikupaliki wiira enamuna Yehova onaakhula awe mavekelo ahu, enniniphwanyiha mureerelo. Yehova onoowerya “oniirela itthu soowaatta, ovikana iye sininvekela ahu ni sinuupuwela ahu”. (aEef. 3:20) Nto ti maana aya Yehova onaakhula awe mavekelo ahu okathi ni mwa enamuna nihaalipelela ahu.

7. Xeeni ikwaha sikina ninreerela ahu oturuka itthu nninvekela ahu Yehova? Nvahe ntakiheryo.

⁷ Ikwaha sikina hiyo pooti oturukaka itthu nninvekela ahu Yehova, noona wiira khenivarihana ni ele oniphavela awe. Eyo ti etthu yaamwiiranenle munna Martin Poetzinger. Okathi vakhaani nuumala othela, munna Martin aahitthukweliwa ni khuroihiwa nipuro naavariwa muteko wookhanyereriwa wa maNazista. Nuumala ophiya opuro ole, owo aahinvekela Yehova wiira otaphuliwe wiira aakhapeleleke amwaarawe ni ovikaniha olaleerya. Masi nuuvira isumana piili, aahoona wiira nivekelo nawe nne khinaavarihana ni etthu Yehova aphavela awe. Nto aahitthikela onvekela Yehova oriki: “Xontte Yehova mukisuwelihe, etthu muniphavela anyu wiira kipakeke”. Nuumala-vo, aahipacerya owuupuwelela anna akina yaatthukweliwe opuro ole. Anceene a yaawo nave yaanixanka awuupuwelelaka axaaraya ni anaaya. Moottharelana munna Martin aahivekela oriki: “Yehova kooxukhuru vanceene okikhaliherya owuupuwela anna akina. Nto xontte mukikhaliherye wiira kiweryeke waalipiha ni waamaliha anna awo”. Owo aahiwerya waalipiha anna awo mwa iyaakha 9!

8. Nihaana wuupuwelaka exeeni okathi ninvekela ahu?

⁸ Nihiliyale wiira Yehova onoomaleliha yoolakela awe okathi othanlale awe. Yoolakela eyo enihela muhina omala-malihiwa wa mixankiho sootheene sinikumiherya ohaawa ntoko, ihasara sa ephattu, iretta ni okhwa. Yehova onoopaka itthu olakenle awe orumeelaka Omwene awe. (Dan. 2:44; Wiis. 21:3, 4) Masi nlipelelaka ophiya nihiku nno, nlelo Yehova onnimweemererya Satana olamulela olumwenku.b (Yoh. 12:31; Wiis. 12:9) Vaakhanle wiira Yehova aahimala-maliha mixankiho sootheene sinaahaaxa apinaatamu olelo-va, vaarowa okhalaka ntoko wiira ekuvernu ya Satana ti yooloka. Eyo enooniherya wiira nihaana omulipelelaka Yehova wiira omalelihe sooleiherya sawe sikina. Masi eyo khentaphulela wiira Yehova khonnikhaliherya. Nrowe niwehe inamuna sikina sa moota Yehova onnikhaliherya awe olelo-va.

YEHOVA ONAAKHULA SAI MAVEKELO AHU OLELO-VA?

9. Yehova onnikhaliherya sai okathi nimphavela ahu opaka yoothanla? Mutthokiherye yoowiiraneya eri muttimani.

⁹ Yehova onninivaha miruku. Yehova onnileiherya wiira onoonivaha miruku wiira nipakeke soothanla sooloka. Tthiri ninniphavela miruku iyo maana sinninikhaliherya opaka soothanla suulupale mookumini mwahu. Mwa ntakiheryo, miruku iyo sinoonikhaliherya okathi nimphavela ahu opaka yoothanla ya othela aahiiso okhala nihithenle wala nihitheliwe. (Yak. 1:5) Nrowe niwehe yoowiiraneya ya murokora mmosa oohitheliwa oniitthaniwa Maria.c Okathi aarumeela awe ntoko pioneera ookilaatheya aahisiveliwa ni munna mmosa. Owo onihimya so: “Wanipacerya naari apatthani paahi masi nuuvira okathi naahipacerya osivelana. Nto miyo kaanisuwela wiira nahaana opaka yoothanla. Tivonto kaaninvekela Yehova okathi munceene. Kaaphavela wiira Yehova okikhaliherye, masi kaahisuwela wiira yena khahiyo taarowa opaka yoothanlaka”. Nto Maria aahoona wiira Yehova ahaakhula mavekelo awe okathi anvanhe awe miruku. Moota xeeni? Owo aahitokosa muliivuruni mwahu ni aahiphwanya myaha saamukhalihenrye wiiwexexa itthu saamuxankiha. Nave aahiiwelela miruku sooloka aavahiwa awe ni maama awe. Itthu iya sootheene apanke awe murokora Maria, saahimukhaliherya wuupuwela saana voohimya sa mwaha ole waamuxankiha nuumala-vo, aahiwerya opaka yoothanla yooloka.

10. Moovarihana ni aFilipi 4:13, etthu xeeni Yehova onipaka awe wiira aakhaliherye arumeyi awe? Nvahe ntakiheryo. (Nwehe efootu.)

¹⁰ Yehova onninivaha ikuru wiira nivileleke. Ntoko aamukhalihenrye awe murummwa Paulo, Yehova onoonivaha ikuru wiira niwerye ovilela mixankiho sahu. (Mmusome aFilipi 413.) Nwehe moota Yehova aamukhalihenrye awe munna oniitthaniwa Benjamin ovilela okathi aarina awe mixankiho. Ori ene mmiravo, Benjamin hoothe ni amusi awe yaakhala wÁfrica mapuro yaakhala atthu atthyanwe ekhotto elapo aya. Owo onihimya so: “Khula okathi kaaninvekela Yehova ikuru wiira okikhaliheryeke opaka itthu sinimusivela. Tthiri Yehova aahaakhula mavekelo aka mwa inamuna soovirikana. Owo aahikivaha murettele, olipa murima wiira kiweryeke olaleerya ni anikivaha iliivuru kaaphavelaka wiira kilipiheke ompatthani aka ni yena. Osoma soowiiraneya sa anna ni arokora ni osuwela moota Yehova aakhalihenrye awe ovilela, eyo yaahikikhaliherya ohihiya okhala oororomeleya wa yena”.

11-12. Yehova onaarumeela sai anna ni arokora wiira aakhule mavekelo ahu? (Nwehe efootu.)

¹¹ Yehova onnaarumeela anna ni arokora wiira anikhaliherye. Ohiyu aarowa awe wiiviwa, Yesu aahivekela vanceene. Yesu khaaphavela wiira atthu akina yuupuweleke wiira owo aahiveehiha nsina na Tiithi awe. Tivo owo aahimuxonttela Yehova wiira eyo ehiiraneye. Masi ohiya waakhula nivekelo ntoko Yesu aaphavela awe, Yehova aarumme nlaikha wiira nimulipihe. (Luka 22:42, 43) Mwa enamuna emosaru, olelo-va Yehova onninikhaliherya owiirihaka anna onilikarela aahiiso onixukurya wiira anilipihe. Tthiri, ootheene ahu nnoowerya waalipiha anna ni arokora nilavulaka “nulumo nowepesa [nooreera]” wala nipakaka etthu yaarowa waalipiha. — Mir. 12:25.

¹² Nwehe yoowiiraneya ya murokora oniitthaniwa Miriam. Esumana vakhaani nuumala iyawe okhwa, aahiriipiwa murima vanceene okhala wiira aahanle mekhawe. Nto khula okathi yena aaninla ni aaniphavela omaalihiwa. Miriam onihimya so: “Nkaawerya omulikarela mutthu, nto kaahinvekela Yehova. Okathi kinlaka ni kivekelaka, telefoni aka aahiitthana. Mutokweene mmosa taakilikarenle yoowo aari mpatthani aka”. Tthiri nikhaliheryo na mutokweene ole ni mwaarawe, naahimmaaliha Miriam. Murokora ole onnikupali wiira aari Yehova aamwiirinhe mutokweene ole omulikarela.

13. Muhimye yoowiiraneya enooniherya moota Yehova onaarumeela awe atthu ahinimurumeela wiira aakhule mavekelo ahu.

¹³ Yehova onnaarumeela atthu ahimmurumeela wiira aakhaliherye arumeyi awe. (Mir. 21:1) Ikwaha sikina, Yehova onnaakhula mavekelo ahu aarumeelaka atthu ahinimurumeela wiira anikhaliherye. Mwa ntakiheryo, Yehova aahimuruma mwene Artaserse omweemererya Nehemiya otthikela oYerusalemu wiira akhaliherye otekiwa ixiri sa epooma ele. (Neh. 2:3-6) Moolikanasa, olelo-va Yehova pooti waarumeela atthu yaale ahinimurumeela wiira anikhaliherye.

14. Yoowiiraneya ya murokora Soo Hing, yoolipinheni sai? (Nwehe efootu.)

¹⁴ Murokora mmosa oniitthaniwa Soo Hing aahoona moota Yehova aamukhaliherya awe omurumeelaka meediku awe. Mwanawe mwaamulopwana ookhalana oretta wa mmuupuweleloni. Nuumala mwaana owo ompaka asitenti, Soo Hing ni iyawe yahoona wiira yaanireerela ohiya muteko yaavara aya wiira amukhapeleke mwaana owo. Nto mwaha waivaavo awo yaahipacerya othoiwa musurukhu. Soo Hing onihimya wiira aahixanka vanceene ni khaasuwela akhala wiira anwerya ovilela mixankiho iye. Nuumala-vo, aahinvekela Yehova ni murima awe wootheene wiira omukhaliherye. Moottharelana meetiku aamukhapelela mwaana ole aahileiherya wiira amukhaliheryaka emusi ele. Nto mwaha waivaavo, murokora ole vamosa ni iyawe yaahikhaliheriwa ni kuvernu ni yaahiphwanya empa wiira akhaleke. Nto murokora owo onihimya so: “Tthiri nihoona ntata na Yehova nnikhaliheryaka. Mwekeekhai Yehova ‘onniwiiwa ale aninvekela’”. — Esal. 65:3.

WAAMINI ONNINIKHALIHERYA WOONA NI WEEMERERYA MOOTA YEHOVA ONAAKHULA AWE MAVEKELO AHU

15. Exeeni yaamukhalihenrye murokora Yoko, woona wiira Yehova anaakhula mavekelo awe?

¹⁵ Ikwaha sikina Yehova khonaakhula mavekelo ahu moowakuveya. Masi Yehova onaakhula mavekelo ahu mwa enamuna ninreerela ahu wiira nihihiye oororomeleya wa yena. Nto khula okathi, nvaheke ephoole wiira moone moota Yehova onaakhula awe mavekelo anyu. Murokora mmosa oniitthaniwa Yoko uupuwela wiira Yehova khaakhula mavekelo awe. Nto owo aahipacerya olepa itthu sootheene anvekenle awe Yehova. Nuuvira okathi, owo aahitthikela oweha itthu aalempe awe ni aahoona wiira itthu sinceene aavekenle awe Yehova aahaakhula. Nave ahoona wiira hata itthu seiye aavekenle awe khalai yena oliyala Yehova aahaakhula. Ti maana aya ootheene ahu ninreerela ahu wiivahaka okathi wiira nivarerye moota Yehova onaakhula awe mavekelo ahu. — Esal. 66:19, 20.

16. Inamuna xeeni nnooniherya ahu wiira nookhalana waamini? (aHeeberi 11:6.)

¹⁶ Ninnooniherya wiira nookhalana waamini okathi nninvekela ahu Yehova. Nave ninnooniherya wiira nookhalana waamini okathi nneemererya ahu moota Yehova onaakhula awe mavekelo ahu moohicikha moota xeeni. (Mmusome aHeeberi 11:6.) Nwehe ntakiheryo na munna Mike ni mwaarawe oniitthaniwa Chrissy. Awo yaahikhalana yoolukama ya orumeela obetheli. Mike ni mwaarawe anihimya so: “Mwa iyaakha sinceene naahimaleliha olepa epetisau wiira naarumeeleke wiira naarumeeleke obetheli ni naaninvekela Yehova vanceene voohimya sa mwaha owo, masi khinaatonko olattuliwa”. Mike ni Chrissy khula okathi yaanikupali wiira Yehova aanisuwela opuro yaareerela aya okhaliherya. Masi awo khiyaahiiye opaka ele yaawerya aya, orumeela ntoko mapioneero ookilaatheya, mapuro oothowa anamalaleerya ni okhaliherya muteko wooteka. Olelo-va, Mike onirumeela ntoko mutokweene esirkwitu vamosa ni mwaarawe. Mike onnincererya oriki: “Ekeekhai wiira Yehova khaakhunle mavekelo ahu mwa enamuna naaphavela ahu. Masi khula okathi owo ahaakhula mwa enamuna oona awe oreerela ovikana ele nuupuwela ahu”.

17-18. Moovarihana ni Esalimo 86:6, 7, etthu xeeni ekhanle ahu okupaliki?

¹⁷ Musome Esalimo 86:6, 7. Nasalimo Davidi, aanikupali wiira Yehova aaniwiriyana ni anaakhula mavekelo awe. Ntoko nasalimo Davidi ni nyuwo mukupaliki wiira Yehova onniwiriyana ni onnaakhula mavekelo anyu. Soowiiraneya nithokorenrye ahu mwaha ola sinnooniherya tthiri wiira Yehova onoonivaha miruku ni ikuru nimprisari ahu wiira nivilele mixankiho. Owo pooti waarumeela anna ni arokora wala ale ahinimurumeela yena wiira anikhaliherye.

¹⁸ Ekeekhai wiira Yehova kaahiyo khula okathi onrowa waakhulaka mavekelo ahu mwa enamuna nimphavela ahu. Ekeekhai ti yoowi Yehova onimwaakhulaka mavekelo ahu khula okathi. Nave owo onoonivahaka khula etthu nimprisari ahu okathi onoona awe oreerela. Nto muhihiye ovekela mukupaliki wiira Yehova onimookhapelelani niinano-va ni muhoolo elapo esya okathi orowa awe ‘waavahaka yoolya atthu ootheene’. — Esal. 145:16.