Omurumeela Yehova Wookiixuttiha Itthu Sinceene Kahaalipelela Aka

Anamuyari aka yaahithaama wEstônia arowaka wAlemanha, weiwo oyariwe aka okathi wa Ekhotto ya Nenli ya Olumwenku Wootheene. Nuumala-vo, yaahithaama-tho arowaka oCanadá. Hiyo naakhala waattamela epooma ya Ottawa, oCanadá. Naakhala enupa yaamukhaani yaapintariwe ni ekoore yootteela. Nave alyakhu yaarupa enupa emosa-ru yeeyo. Hiyo naari atthu oothoiwa vanceene, masi khula voosiisu naaniwurya ekafe nikhuurelaka mooce.

Nihiku nimosa, Anamoona a Yehova yaahimusomela maama aka Wiisuupulula 21:3, 4. Yoolepa eyo yaahinvara murima maama aka mpakha opacerya wunla. Nave ekeekhai ya mbiibiliyani yaahinnuwa vamurimani va apaapa ni amaama, khurowa vahoolo moowaakuveya mpakha opatisiwa.

Nnaamwi anamuyari aka yahaalavula Enkelexi, awo yaanivaha efaita yuulupale ekeekhai yaixuntte aya. Isaabadu sootheene, paapa aka aanimukuxa murokoraka Sylvia, ni miyo, nnarowa olaleerya. Owo aanipaka eyo hata aavanre muteko ohiyu wootheene ofaapirika ya ototoxa eyuuma, epooma ya oSudbury, wOntário. Nave, khula esumana emusi ahu yaanithokorerya Owehaweha ntoko yoosoma ya etthoko. Maama aka ni paapa aka takiixuttinhe omphenta Yehova. Tivonto, eyaakha ya 1956, kirine ene iyaakha 10 kaahinvahererya Yehova okumi aka. Okhala wiira anamuyari aka yaanimphenta vanceene Yehova, eyo yaahikikhaliherya ohihiya omurumeela.

Nuumaliha osoma oxikola ekalaase ya 12, kaahipacerya ohimurumeela saana Yehova. Kuupuwela wiira kakela muteko wa opioneero, nkaarowa owerya othukumanya musurukhu waarowa ophiyerya owela eviyau ni weetteetta ilapo sootheene, ntoko kuupuwela aka kinari mwaana. Tivonto, kaahipacerya ovara muteko wa elukutoore. Kaakumiherya iprokrama sa masipo. Muteko owo waanikisivela vanceene. Masi kaavara ohiyu, nto eyo yaanikiiriha ocompela mithukumano sinceene. Mwaha wa yeeyo, kaahipacerya weetta ni apatthani yahamphenta Yehova. Wanikisa waya, murima aka yoowo waaxuttihiwe ni Biibiliya, waahikikhaliherya oturuka makhalelo aka.

Miyo kaahithaamela Oshawa, muttetthe mukina wa epooma ya wOntário. Iwo kaahimusuwela Ray Norman ni murokorawe iitthaniwa Lesli, vamosa ni mapioneero makina. Awo yaahikaakhela oratteene. Oweha ohakalala waya waahikiiriha ovarerya soolukama saka. Awo yaahikitumererya okela muteko wa opioneero. Nto mweeri wa Setembro a 1966, kaahikela muteko wa opioneero. Kaahihakalala vanceene, masi nlelo nkaasuwela wiira saamwiiraneya itthu sinceene kahaalipelela aka.

YEHOVA OOVEKELANI OPAKA ETTHU, MWEEMERERYE

Nlelo keettaka oxikola, ekalaase ya 12 kaahiivahererya orumeela oBetheli ya oCanadá. Muhoolo mwaya, kiri ene pioneero, kaahilattuliwa orumeela oBetheli iyaakha xexe. Masi okathi ole kaanimphenta vanceene Lesli ni kaanoova weemererya orowa oBetheli kuupuwelaka wiira nkaarowa-tho otthikela onweha wala olavula ni yena. Nuumala opaka mavekelo manceene, kaaheemererya orowa oBetheli, ni kaahimulaxerya Lesli murima okiwereyaka.

OBetheli kaavara muteko wookattha ikuwo olavandaria. Muhoolo mwaya ntoko sekretaario. Okathi ene yoowo, Lesli aahikela muteko wa opioneero wa vameekhaaya oGatineau, oQuebec. Okathi wootheene kaanimuupuwela ni kaaniikoha akhala wiira yoothanla yaapanke aka yaari yooloka. Masi muhoolo mwaya kaahiiwa etthu yahaalipelela aka! Murokorawe Lesli, Ray, aahilattuliwa orumeela oBetheli nnakhala ekwaartu emosa-ru! Nto kaahitthikela-tho olavula ni Lesli. Kaahimuthela nihiku nookiserya na muteko aka oBetheli, 27 a Fevereiro a 1971.

Miyo ni Lesli naahithanleliwa orumeela muloko wa nttaava na Efranses, oQuebec. Nuuvira iyaakha vakhaani, miyo kaahituthuwa vanceene okathi kaalattuliwe aka okhala mutokweene a esirkwiitu kirina ene iyaakha 28 paahi. Miyo kuupuwela wiira kaahitepa oyeva ni wiira nkaarowa owerya ovara muteko ole. Nto yoolepa ya Yeremiya 1:7, 8, yaahikilipiha vanceene. Masi Lesli aahikhalana muxankiho. Owo aahimwiira asitenti ni ekaaro! Ohiya-vo, yena khaawerya orupa saana, ti maana aya nuupuwela ahu wiira khinaarowa owerya orumeela osirkwiitu. Hata vaari siiso, Lesli aahihimya wiira: “Akhala wiira Yehova tonniruma, nto xeeni nihineererya ahu?” Hiyo naaheemererya muteko owo ni naahihakalala vanceene ovara muteko ole iyaakha 17.

Okhala wiira kaari mutokweene a esirkwiitu kaanaatteliwa miteko. Nto ikwaha sinceene nkaakhalana okathi wa otthekula ni Lesli. Yoowiiraneya emosa yaahikiixuttiha etthu ekina. Nihiku nimosa, Segunda-feira voosiisu, aahirwa mutthu omana mukhora ahu. Okathi kaaronwe aka ohula nkamphwanyale mutthu. Masi kaahiphwanya esestu yaamukhaani nto musestuni-mmo yaahikhala etuwalya, ifuruta, ekeexo, iphaawu, ekarafa ya eviinyu, ikoopho ni ekartau yoohilempwa nsina, ehimyaka so: “Mmukuxe mwaarinyu, mwatthekule”. Naari nihiku nooreera, nsuwa noopaka saana, masi miyo kaahimuleela Lesli wiira nkaarowa otthekula nuuwo mwaha woowi kaarowa olokiherya myaha sa atthu ootheene. Owo aahikupali yaahimmye aka, masi aahiriipiwa murima. Okathi vaapacenrye aka olokiherya myaha, kaahuuliwa muru. Kaahuupuwela masu ari aEefeso 5:25, 28. Vaakhala ntoko wiira Yehova taakuupuxenrye yoolepa ele wiira koone wiira kihaana omukhapelela mwaaraka. Nuumala ovekela, kaahimuhimeerya Lesli wiira: “Nrowe!” Owo aahihakalala vanceene. Naahirowa ni ekaaro opuro wooreera waattamela omuro, kaatala etuwalya vathi. Nle naari nihiku na vameekhaaya mookumini mwahu. Nuumala-vo, waahihala okathi wa olokiherya myaha saka.

Noorumeela isirkwiitu sinceene. Nave okathi wootheene naanihakalala vanceene. Naaheetta mapuro manceene okhuma oColúmbia Britânica mpakha oTerra Nova. Nto yaaniiraneya ele yuupuwela aka kinari mwaana: Weetteetta ni osuwela mapuro makina. Miyo kaahuupuwela wiivahererya okela Exikola ya oGileadi, masi nkaaphavela okhala misionaario elapo ekina. Kuupuwela wiira mamisionaario atthu a vameekhaaya. Koona wiira nkaarowa owerya okhala misionaario. Ohiya-vo, kaanoova othanleliwa orowa wÁfrica weiwo saawaniwa ikhotto ni sahaareere ikwerere. Waanikisivela vanceene okhala oCanadá.

NLATTULO KAHAALIPELELA AKA NA OROWA WESTÔNIA NI ILAPO SA OXEREXERE WA EPHAREYA OBÁLTICO

Okhuma 1992, Anamoona a Yehova yaahitthikela-tho olaleerya ilapo seiye khalai siirela mpantta União Soviética. Nto anna yaahinikoha akhala wiira naamweemererya othaamela elapo ya wEstônia wiira nakhale mamisionaario. Hiyo khinaalipelela nikoho nna, nto naahipaka mavekelo voohimya sa mwaha owo. Naahiikoha-tho wiira: ‘Akhala wiira Yehova tonnilattula, xeeni oheereryaka?’ Hiyo naaheemererya, nto miyo khuhimya so: ‘Aayo, vaareera maana khahiyo ninrowa wÁfrika’.

Voohipisa naahipacerya wiixutta nttaava na wEstônia. Nuuvira miyeeri vakhaani naahilattuliwa orowa orumeela osirkwiitu. Nto naahaana oxukurya miloko soowiiraka 46 ni ikurupu okhuma wEstônia, oLetônia ni oLituânia, ohela muhina oKaliningrado, oRussia. Vaari vooloka wiixuttaa mattaava a ilapo iyo sootheene, ntoko Eletão, Elituano ni Erusso. Khivaakhweyale opaka eyo. Masi anna yaanihakalala oweha wiimananiha wahu ni yaaninikhaliherya. Eyaakha ya 1999, yaahitthukuliwa efiliyaali wEstônia, nto miyo kaahilattuliwa wiirela mpantta Ekomisau ya Efiliyaali, vamosa ni munna Toomas Edur, Lembit Reile, ni Tommi Kauko.

Hiyo naahaasuwela anna akina yaawo khalai yaakhanyereriwe othaamela oSibéria. Nnaamwi yaahaaxiwe vanceene ni waakhiwa imusi saya, eyo khiyaawiirinhe okhala atthu oowiikhupanyerya ni ooriipiwa murima. Awo yaanitteeliwa murima ni okhalela nthiti muteko woolaleerya. Ntakiheryo naya nooniixuttiha wiira hiyo pooti ovilela mixankiho moohakalala.

Nonvarela muteko Yehova iyaakha sinceene, ni khinaarina okathi munceene wa ophumurya. Nuuvira okathi, Lesli aahikhalana eretta eniitthaniwa fibromialgia yeeyo yaamwiiriha otteettheyaka vanceene. Nto naahipacerya wuupuwela vanceene otthikela oCanadá. Okathi ene yoowo, naahilattuliwa-tho orowa Exikola ya Anna a Ekomisau ya Efiliyaali, oPatterson, oNova York, wEstados Unidos. Hiyo naahivelavela, khinaasuwela akhala wiira nanwerya muritti owo, masi nuumala opaka mavekelo naaheemya orowa oPatterson. Nave Yehova aahireeliha yoothanla ahu. OPatterson weiwo naasuwenle ahu wiira oretta wa Lesli khivaaweryaneya olooliwa. Nuumala-vo, naahitthikela ovara miteko sahu.

YOOWIIRANEYA NAHAALIPELELA AHU YA OROWA ELAPO EKINA

Nlelo niri ene wEstônia, nihiku nimosa ohiyu, eyaakha ya 2008, miyo kaahilikareliwa ni anna a oseedi mundiale anakikoha akhala wiira naamweemererya orowa oCongo. Miyo kaahivelavela, nkaalipelela nikoho nne, vanceenexa okhala wiira kaahaana waakhula mmeeloni mwaya. Nkaamulenle Lesli maana owo khaarowa ophwanya ikhove ohiyu ole. Masi moone wiira ti miyo kahaarumpe ohiyu ole. Ohiyu wootheene kaahivekela mwaha wa woova waka othaamela wÁfrica.

Mmeeloni mwaya kaahimuleela Lesli ni naahoona wiira ti “Yehova aanilattula wiira nithaamele wÁfrica. Nto ninrowa osuwela sai akhala wiira khaninwerya aahiiso khonrowa onisivela naaheererye toko?” Nto nuumaliha iyaakha 16 nirumeelaka wEstônia, naahithaamela oKinshasa, oCongo. EBetheli ya oKinshasa yaahikhalana ejardim yooreera ni waari opuro woomaaleleya saana. Etthu yoopacerya Lesli aathomeyale awe okwaartu wahu yaari ekartau ya khalai, aarina awe okhuma okathi aakhala awe oCanadá. Masu a ekartau yiira: “Muhakalaleke opuro wootheene onikhala anyu”. Nuumala waasuwela anna, wiiriha soosoma sa Biibiliya ni woona moota muteko woomisionaario waanihakalaliha aya, ophenta wahu muteko wa Yehova waahincerereya. Muhoolo mwaya, naahivahiwa eparakha ya oxukurya iBetheli 13 sa wÁfrica. Eyo yoonikhaliherya waasuwela atthu ni makhalelo aya oovirikana. Woova waka waahilakaseya, nave naahimuxukhuru Yehova yoowo waaniroihale wÁfrica.

Okathi naaphiyale ahu oCongo, naahilawiha soolya soovirikana, waahela muhina axikokho anivava musulu kuupuwelaka wiira nkaalikanano waakhuura. Masi nuumala woona moota anna ni arokora yaasiveliwa aya ni soolya iye, hiyo nave naahilya ni naahoona wiira saari soosiva tthiri.

Hiyo naahirowa mittetthe soorakamela sa oCongo wiira naalipihe anna ni waakhaliherya mwaha wa ihasara. Mittetthe iyo, anakhotto yaanituphela ipooma ni owiiriha itthu sootakhala athiyana ni anamwane. Annihu anceene yaari atthu oothoiwa. Masi hata vari siiso, waamini waya nlipelelo na ohihimuxiwa, omphenta waya Yehova ni okhaliherya waya mutthenkeso awe, waanilipiha waamini wahu. Mweettelo aya waahiniiriha ovarerya etthu enniiriha omurumeela Yehova ni olipiha omwaamini wahu. Annihu akina aapweteiwa ipa saya ni imatta saya. Eyo yookuupuxerya wiira mireerelo pooti olakaseya moowaakuva, masi etthu yuulupale ni ya faita erina ahu, ompatthani ahu ni Yehova. Nnaamwi yaarina mixankiho sinceene, anna ale khiyaamakela wiikhupanyerya. Ovilela waya mixankiho wooniixuttiha othokorerya moolipa murima oretta ahu ni mixankiho sikina.

OKATHI VAKHAANI WÁSIA

Yaahiiraneya-tho etthu ekina nahaalipelela ahu. Naahithanleliwa orumeela oBetheli ya Hong Kong. Khinaatonko wuupuwela wiira vanihikuni naamuthaamela wÁsia! Nuumala woona nikhaliheryo na Yehova ilapo sootheene sivinre ahu, hiyo naaheemererya nlattulo nne. Eyaakha ya 2013, ninlaka, naahaalaxerya apatthani ahu naaphenta ahu ni mapuro ooreera a wÁfrica, nihisuwelaka ele yaarowa okhumelela muhoolo.

Khivaakhweyale othaamela oHong Kong, okhala wiira yaari esitate yuulupale ni yoowaatta atthu a makhalelo oovirikana. Nave-tho khivaakhweyale wiixutta eChines. Masi moophenta, anna yaahinikhaliherya ni eyoolya yaari yoosiva saana. Muteko woolaleerya waanirowa vahoolo moowaakuveya, masi iperesu sa waalukari ipa saari soowalamela. Nto, mwa miruku, Nikhuuru Noolamulela naahoona okhala vooreerela otumiha ipa ni mapuwa manceene a efiliyaali. Moottharelana, eyaakha ya 2015, naahithaamela oCoreia ya osuuli, weiwo ninrumeela ahu mpakha olelo-va. Nno nave-tho, nookhalana muxankiho a wiixutta nttaava nikina. Masi hata nihilavulaka saana eCoreano, anna annintumererya ahimyaka wiira ninnirowa vahoolo khula nihiku.

ITTHU NIIXUNTTE AHU

Khivanikhweya okhalana apatthani asya. Masi nihoona wiira waalattula atthu akina orwa vatthokoni vahu, woonikhaliherya vanceene okhalana apatthani asya. Hiyo nihoona wiira nnaamwi ari ene a makhalelo oovirikana, annihu ilapo sootheene anoolikana. Nave-tho, nihoona wiira Yehova oonivaha eparakha ya waaphenta apatthani anceene ni oovirikana okathi omosa-ru. — 2 aKor. 6:11.

Ninnoona efaita ya waaphenta atthu nimutakihaka Yehova ni wiimananiha woona itthu sinooniherya wiira Yehova onniniphenta ni okathi wootheene onninivaha malakiheryo. Okathi wootheene naakhulumuwa ahu ni ohoverya akhala wiira anna yaaniniphenta, naanisoma ikarta sa apatthani ahu. Opaka eyo waaninlipiha vanceene. Nave okathi munceene, apatthani ahu yaaninikhaliherya woona moota Yehova aakhula awe mavekelo ahu. Eyo yaahilipiha waamini wahu ni onlipiherya wiira Yehova onniniphenta vanceene.

Nuuvira okathi, miyo ni Lesli nihiixutta wiira ti vootthuneya wiisukerya okathi hata naatteliwe ene miteko. Nave-tho, nihiixutta ohitepa oxanka mwaha wa ohiwerya opaka etthu, otepexa wene okathi oniimananiha ahu wiixutta nttaava nikina. Khula ohiyu, ninnuupuwela etthu yooreera Yehova enipakenle awe ni ninnimuxukhurela.

Ohimya ekeekhai, nkaatonko wuupuwela okhala misionaario wala othaamela elapo ekina. Kinnihakalala okhalana eparakha ya woona wiira itthu sootheene sinniweryaneya mwa ikuru sa Yehova. Okathi wootheene kinnuupuwela moolumo a profeta Yeremiya, yoowo aahimmye so: “Pwiya! Nyuwo mokittettekha”. (Yer. 20:7) Yehova ookiirela itthu sahaalipelela aka ni ookireeliha vanceene. Ohiya-vo, Yehova ohiiriha wiiraneya ele yanlela aka kinari mmiravo ya owela eviyau. Nave, hiyo noosuwela ilapo sinceene ovikana iye suupuwela aka kinari mwaana. Nooxukurya iBetheli sa ilapo thanu. Nave-tho, kinnimuxukhuru Lesli mwaha wa okikhaliherya okathi wootheene omaleliherya miteko saka mmutthenkesoni mwa Yehova.

Okathi wootheene ninniimananiha wuupuwela wiira itthu sootheene siwenrye ahu opaka, mwaha woowi ninnimphenta Yehova. Mareeliho nrina ahu olelo-va, ethoonyeryo paahi ya mareeliho a ekumi yoohimala okathi Yehova onrowa awe ‘otthukula matata awe’ ni omaleliha soophavela sa soopattuxiwa sootheene sikumi. — Esal. 145:16.