Koophwanya Ovareleleya Weekeekhai Mwaha Woomuroromela Yehova

MOOTA KIMUSUWENLEKA YEHOVA NI OMUROROMELA

Kiyariwe mwaakha wa 1948 muttetthe mwaamukhaani oSuuli wa oNigeria. Mwaakha yoole Moustapha, muhima awe paapa aka ni Wahabi, muulupale aka, aapatisiwe aya ntoko Anamoona a Yehova. Kirina ene iyaakha 9 paapa aka aahikhwa. Nto kaahiriipiwa murima vanceene. Wahabi aahikileela wiira naamutthikela onweha paapa ahu ahihimuxiwa. Moolumo ale oolipiha, yaahikiiriha opacerya omusoma Biibiliya. Nto kaahipatisiwa mwaakha wa 1963. Nave axihima aka araru yaahipatisiwa nuuvira okathi vakhaani.

Mwaakha wa 1965 kaahipacerya okhala vamosa ni muulupale aka, Wilson, oLagos, nave-tho kaanihakalala vanceene okhala vamosa ni mapioneero ookilaatheya a muloko wa wIgbobi. Ohakalala waya ni oluttuweliwa waahikivara murima vanceene, nto Janeiro a 1968, kaahivekela okhala pioneero.

Munna mmosa aarumeela oBeteli, oniitthaniwa Albert Olugbebi, aahilokiherya muthukumano wa vameekha aya wa amiravo waalavula sa othowa mapioneero a vameekha aya oNorti wa oNigeria. Nlelo kinnuupuwelela etthu aahimmye awe munna Olugbebi, oriki: “Nyuwo mwa mmiravo nave munoowerya orumeela okathi anyu ni ikuru sanyu wiira munvarele muteko Yehova. Mikhora siri soohuleya!” Kittharaka ntakiheryo na wiivahererya wa profeta Yesaya, kaahimaleliha olepa epetisau. — Yes. 6:8.

Maio a 1968, kaahithanliwa okhala pioneero a vameekhaaya epooma ya oKano, oNorti wa oNigeria. Okhuma mwaakha wa 1967 mpakha 1970, okathi ole yiira ewaniwaka ekhotto muttetthe ole kaathanleliwe aka. Ekhotto ele yaahinyaanya itthu sinceene atthu akina ahinatthi otthyawa arowaka mpantta mukina wa oNigeria. Nto muulupale aka aahikileela wiira kihirowe. Masi miyo kaahimuleela so: “Kinnixukhurela vanceene okithokorerya wanyu. Akhala wiira Yehova oniphavela wiira kimurumeeleke ni yoothanleliwa ela, kinnikupali wiira yena onookikhapelela”.

KAAHIMUROROMELA YEHOVA KIRUMEELAKA MUTTETTHE OLE WAAWANIWA EKHOTTO

Makhalelo a oKano yaari ootepexa oxankiha. Nnaamwi epooma ele yaari yoowunnuwa, khiyaavireya mwaha wa ekhotto. Okathi naalaleerya ahu ikwaha sikina naanaaphwanya atthu ookhwa yoopeliwa. Nnaamwi miloko sahaareere muttetthe ole wa oKano, anna anceene yaahitthyawa. Yaahanle anamalaleerya 15, ariipiwe ene murima ni yoovaka. Anna ni arokora ale yaahihakalala vanceene okathi mapioneero oowiiraka 6 okihela muhina miyo naaphiyale ahu. Naanihakalala nuumala olipihana mukina ni mukhwaawe. Nto naahaakhaliherya anamalaleerya ale otthikela okhalana waamini woolipa ni ovahererya irelatoorio saya sa muteko woolaleerya.

Hiyo mapioneero naahipacerya wiixutta nttaava, Hausa. Okathi naalaleerya ahu nttaava naya, atthu anceene yaaniniwiriyana. Ahooleli a itiini yaahipacerya oninyokha mwaha wa muteko ahu woolaleerya, nto naahaana okhalana ephoole. Okathi omosa miyo ni munna mukina, naahoomoliwa ni mutthu mmosa, okunxe ene mwaalo. Moohakalaliha, naahiwerya otthyawa ohiniirinhe etthu yootakhala! Nnaamwi waari okathi wooxankiha, Yehova aaninikhaliherya ‘okhala moovareleleya’ nave anamalaleerya yaanincerereya. (Esal. 4:8) Olelo-va, oKano sookhala miloko 11 nave aakhala anamalaleerya oowiiraka 500.

NAANILUPATTHIWA VANCEENE ONIGER

Muhoolo mwaya, mweeri wa Agosto a 1968, nuumala okhala oKano miyeeri vakhaani, miyo ni mapioneero a vameekhaaya manli naahithaamiheriwa oNiamey, ekapitaali ya orepuupilika ya oNiger. Nuumala ophiya, nahoona wiira oNiger, wÁfrica ositental waari muttetthe wootepaxa oviha. Ohiya ovilela oviha iwe, naahaana opacerya wiixutta nttaava na elapo ele, Efranses. Nnaamwi naarina mixankiho iye, naanimuroromela Yehova nave naahipacerya olaleerya epooma ele yaakhala anamalaleerya vakhaani. Nuuvira okathi vakhaani, atthu anceene yaakhala oNiamey, yaahipacerya weemererya yoosoma ya Biibiliya arumeelaka eliivuru Conhecimento Que Conduz à Vida Eterna. Atthu akina yaaniniphavelasa wiira yaakhele eliivuru eyo.

Nuuvira okathi, nahoona wiira anamalamulela a elapo ele khiyaaphavela Anamoona a Yehova. Junho a 1969 naahithukumana wiira nimwiire asembeleya a esirkwiitu yoowo yaarwiiye atthu 20. Naahihakalala vanceene maana naahaapatisa anamalaleerya anli. Nihiku noopacerya na asembeleya ole, mapoliisia yaahiphiya nto yahaakanyerya eprokrama ele. Awo yaahaakuxa mapioneero a vameekhaaya ni mutokweene a esirkwitu yaaroihaka okumantu. Nuumala-vo, yaahinipakela makoho ni yaahinivekela wiira nihiku naattharelana naahaana waakhula nnaamwi naasuwela wiira makhulupale ale yaamunikumiherya mixankiho. Ohiya-vo, naahilokiherya mwaha wa opatiso moottharelana naahirowa omuro moohisuweliwa wiira naapatise ale yaivaherenrye.

Nuuvira isumana vakhaani miyo ni mapioneero ale 5 a vameekhaaya, naahoomoliwa oNiger. Naarina mahiku manli paahi wiira nikhume elapo ele nirumeelaka inamuna naawerya ahu. Naahiiwelela nave naahikhuma moowaakuveya nrowaka efiliyaali ya oNigeria, weiwo naakhenle ahu malakiheryo masya.

Kaahithanleliwa orowa muttetthe wOrisunbare wa oNigeria, weiwo kaavaraka muteko woohakalaliha vamosa ni ekurupu yaanamalaleerya yakhala muttetthe ole. Masi nuumala oviriha miyeeri 6, efiliyaali yaahikivekela wiira kitthikele oNiger ekwaha ela meekhaka. Wanipacerya, kahitikinihiwa ni kaahiriipiwa murima, masi otthikela oNiger wiira kaawehe anna ni arokora yaari etthu yoohakalaliha.

Kaahitthikela oNiamey. Nuuvira nihiku nimosa, mulopwana aamwiira nakoso aahikuupuwela wiira kaari mmosa a Anamoona a Yehova, aahipacerya okikoha voohimya sa Biibiliya. Kaahipacerya omusomiha Biibiliya, nuumala ohiya ompaha sikaro ni ohapaliwa, owo aahipatisiwa. Nuumala-vo kaahipacerya woona wiira mittetthe soovirikana sa oNiger atthu yaaniixutta ekeekhai vakhaani-vakhaani. Okathi kaaphiyaleka epooma ele yaari anamalaleerya 31; masi okathi kaakhumaka yaari 69.

“KHANINSUWELA ITTHU SINCEENE VOOHIMYA SA MUTEKO WA OMWENE OGUINÉ”

Wanikisa wa mwaakha wa 1977, kaahitthikela oNigeria wiira kiixuttihiwe. Wanikisa wa kursu ole, muhooleli a oFiliyaali Malcolm Vigo, aahikiruma osoma ekarta ya efiliyaali ya oSerra Leoa. Anna yaamuhaavya munna aarina okumi wooloka ni aari oohithela masi aawerya olavula Enkelexi ni Efranses, wiira arumeeleke ntoko mutokweene a esirkwiitu oGuiné. Munna Vigo, aahikileela wiira miyo kaixuttihiwe wiira kavareke muteko ole. Nave aahikileela wiira muteko ole ti wooxankiha. Moottharelana aakilenle so: “Muupuwele saana muhinatthi weemererya”. Moohipisa miyo kaahaakhula wiira: “Okhala wiira Yehova tokirumme, miyo kinoorowa”.

Kaahirowa oSerra Leoa ni kaahikumana ni anna a ofiliyaali. Muhooleli a ekomisau ya efiliyaali aakilenle so: “Khaninsuwela itthu sinceene voohimya sa muteko wa Omwene oGuiné”. Nnaamwi efiliyaali yaarina muritti wooweherya muteko woolaleerya elapo ya oGuiné, anna khiyaawerya olavula ni khula namalaleerya a muttetthe ole mwaha wa manyaku-nyaku anapoliitika. Nave efiliyaali yaaimananiha vanceene, masi khiyaawenrye omphwanya munna aarowa oweheryaka muteko woolaleerya elapo ele. Nto kaahivekeliwa wiira kirowe ekapitaali ya oGuiné, oConacri wiira kahaavye opuro wookhala.

Nuumala ophiya oConacri, kaahirowa wa embaixada ya oNigeria. Kaahihimya wiira kaaphavela olaleerya elapo ele ya oGuiné. Kaahileeliwa othaama moowaakuveya maana kaamutthukweliwa mukhatteya aahiiso kaamwiiviwa. Kaaleeliwe wiira “kitthikele oNigeria kalaleeryeke wuuwu”. Miyo kaahaakhula wiira “kinookhalaka muumu nkinrowa opuro mukina”. Nuumala-vo, yaahilepa ekarta oroiheliwaka miniisturu aaweherya elapo ele, anvekelaka okikhaliherya, moohakalaliha owo aahikaakhela.

Moottharelana, kaahitthikela efiliyaali ya oSerra Leoa ni kaahihimya yoothanla ya kuvernu. Anna yaahitthapa vanceene nuumala wiiwa moota Yehova aareelinhe awe mukwaha aka. Nto kaahiphwanya opuro wookhala oGuiné!

Mwaakha wa 1978 mpakha mwaakha wa 1989, kaarumeela ntoko namaranttela a mutokweene a esirkwiitu oGuiné, oSerra Leoa muttetthe wa oNigeria. Wanipacerya, kaaniviriha okathi munceene kiwereiwaka. Eyo yaaniiraneya ikwaha sinceene mwaha wookhala mapuro oophunyeya. Masi anna yaanikileela wiira kaahaana orowa ospitaali.

Okathi omosa, kaahiwereiwa vanceene mwaha wa malaaria. Masi nuumala openuwa, kaahoona wiira anna yaaninyakulihana aphavelasaka opuro yaakhanle aya ookivitha! Nnaamwi saakiphwanya mixankiho iye, nkinuupuwele ohiya yoothanleliwa aka. Nkinihiya okupali wiira ovareleleya weekeekhai ni woolipa onikumiheriwa ni Muluku yoowo oniwerya waahihimuxa atthu ookhwa.

MIYO NI MWAARAKA NAANIMUROROMELA YEHOVA

Mwaakha wa 1988, kaahimusuwela Dorcas, murokora aarumeela ntoko pioneera aari oowiiyeviha ni aarina waataana wooloka ni Yehova. Naahithelana nave naahipacerya ovara muteko wa esirkwiitu vamosa. Dorcas ohooniherya okhala muthiyana oophenta ni oowiiwelela. Nto naaneetta vamosa ikiloomo 25 nirowaka miloko soovirikana, nikunxeene mirupa sahu vamuru. Okathi naarowa ahu miloko sootepexa orakamela, naaninwela khula xaapa aaphwanyaneya okathi ole, aarowa onikhaliherya ophiya mapuro awo nnaamwi estaraata saari soowaatta mattophe ni soothipakaseya.

Dorcas muthiyana oolipa murima. Mwa ntakiheryo, ikwaha sinceene naanilapuwa miro soowaatta ikonya. Waahikhala mukwaha neettale ahu mahiku 5, naaniphwanya iponti sinyaanyeyale ene nto naahaana owela nikula wiira nilapuwe. Okathi Dorcas aaphavela awe okhuma munikulani, owo aahimorela mmuro. Khuuvo a hiyo aasuwela okata nave muro ole khisaareere ikonya. Moohakalaliha, amiravo akina yaahirwa ni yaahimoopola. Oowanli ahu khinaaliyala yoowiiraneya ele, masi hata vari siiso khinaahiyale yoothanleliwa ahu.

Wanipacerya wa 1992, naahitikinihiwa vanceene nuumala osuwela wiira Dorcas aahirupala. Naahaana othanla akhala wiira nanvikaniha orumeela ntoko mapioneero a vameekhaaya. Nto naahuupuwela so: “Ela yoovaha enikhuma wa Yehova!” Moottharelana naahuupuwela omukhaliherya mwanihu, Jahgift, wiivahererya wa Yehova ni opatisiwa. Nuuvira iyaakha 4, naahimuyara mwaana mukina, Eric. Aniihu oowanli anniimananiha ovara miteko sa Yehova moohakalaliha. Mwa ntakiheryo, Jahgift oorumeela opuro sinitaphuleliwa iliivuru, oConacri, nave Eric murumeyi ookhaliherya.

Nnaamwi Dorcas ahiyale orumeela ntoko pioneera a vameekha aya mwa okathi vakhaani, owo aanirumeela ntoko pioneera ookilaatheya, hata aahuwa aniihu. Kikhaliheriwaka ni Yehova, nlelo kaanivara muteko wa Muluku wa okathi wootheene. Nuumala aniihu wunnuwa, Dorcas aahitthikela orumeela ntoko pioneera a vameekha aya. Nenna-va, ninrumeela ntoko mamisionaario elapo ya oConacri.

MAPHATTUWELO A OVARELELEYA WEEKEEKHAI

Khula okathi kaanirowa opuro Yehova aaphavela awe wiira okiroihe. Ikwaha sinceene miyo ni mwaara aka naanoona wiira Yehova aaninikhapelela ni onireeliha. Omuroromela Yehova woonikhaliherya osyaka oxankiheya ni ophavelasa mihakhu. Miyo ni Dorcas nookhalana soowiiraneya sinikhalihenrye woona wiira ovareleleya weekeekhai onikhuma wa “Muluku ahu onnoopola”, Yehova. (1 Wah. 16:35, NWT.) Kinnikupali wiira okumi wa atthu ootheene animuroromela yena, “onoosukiwa ni Yehova, mmurupani mwa okumi”. — 1 Sam. 25:29.