Mwaakhaliheryeke Anaskola Anyu a Biibiliya Othanla Omurumeela Yehova

1-2. a) Etthu xeeni ekhanle oowiiriha anaskola a Biibiliya woovelela othanla okhala Namoona a Yehova? b) Mwaha ola, ninrowa othokorerya exeeni?

NIIREKE mootoko woovelela okhala Namoona a Yehova? Woonasa wene, khimwaaphavela okhala Namoona a Yehova, moovaka olupatthiwa ni ale munivarana anyu muteko, apatthani anyu aahiiso amusi anyu. Aahiiso moona wiira khimwaawerya wiiwelela malamulo ootheene a Yehova. Vakhala wiira ti siiso, nyuwo munnisuwela moota anaskola akina a Biibiliya anoonela aya. Nave munnoona nthowa naya vanaavila aya, anaskola akina othanla okhala Namoona a Yehova.

² Yesu aanisuwela wiira itthu ntoko iyo sammwiiriha mutthu ohiya omurumeela Yehova. (Math. 13:​20-22) Masi Yesu khaahiyale waakhaliherya atthu yaale yoovelela omutthara. Nto Yesu aahiwooniherya awiixutti awe moota woowaakhaliherya atthu awo 1) woona itthu saakhoottiherya othanla omurumeela Yehova 2) wuncererya omphenta waya Yehova 3) omuhela Yehova nipuro noopacerya ni 4) oxintta mixankiho. Ninrowa otthara sai etthu Yesu aaleelale awe awiixutti awe, okathi ninrumela ahu eliivuru Okumi Woohimala!, wiira nimukhaliherye naskola a Biibiliya othanla okhala Namoona a Yehova?

MMUKHALIHERYEKE WOONA ITTHU SINIMUKHOOTTIHERYA OMURUMEELA YEHOVA

3. Exeeni yaakhanle oomukhoottiherya Nikodemo omutthara Yesu?

³ Nikodemo aari mukhulupale oottittimihiwa a aYuda. Masi yookhala etthu emosa yaamukhoottiherya othanla omutthara Yesu. Nuumala miyeeri 6 Yesu olaleeryaka, Nikodemo aahisuwela wiira Yesu owo aarummwale ni Muluku. (Yoh. 3:​1, 2) Masi Nikodemo aahirowa okumana ni Yesu ohooniwaka ni atthu, “okhala wira aaniwoova ayuda”. (Yoh. 7:13; 12:42) Nikodemo uupuwela wiira ampweteiwa vanceene aathanlale omutthara Yesu.a

4. Yesu aamukhalihenrye sai Nikodemo osuwela etthu Yehova anvekela awe wiira opakeke?

⁴ Nikodemo aanisuwela saana nlamulo Muluku aavahale awe aisarayeli. Hata vari siiso, Nikodemo aahaana okhaliheriwa wiira osuwele etthu Yehova anvekela awe wiira opakeke. Yesu aamukhalihenrye sai? Yesu aaheemererya oviriha okathi olavulaka ni Nikodemo, hata waari ohiyu. Yesu aahimuleela Nikodemo itthu aareerela awe opaka wiira okhale naskola awe. Itthu sene tiiya: Ottharuwa soottheka sawe, opatisiwa ni omwaamini Mwaana a Muluku. — Yoh. 3:​5, 14-21.

5. Munrowa omukhaliherya sai naskola anyu osuwela etthu enimukhoottiherya othanla omurumeela Yehova?

⁵ Hata naskola omwiiwexexaka saana Biibiliya, ti vooloka omukhaliherya osuwela etthu enimukhoottiherya omurumeela Yehova. Mwa ntakiheryo, pooti wiira muteko awe onnimwiiriha ohikhalana okathi aahiiso amusi awe annimukhoottiherya okhala Namoona a Yehova. Mmutakihaka Yesu, mwaavyeke okathi wiira mmukhaliherye naskola anyu. Nyuwo pooti omulattula owannyinyu wiira mulye hoothe ni nvaanele. Ovaanela iwo pooti omukhaliherya naskola anyu okhala ootaphuwa wiira ooleeleni itthu sinimuxankiha. Mmutumereryeke naskola anyu opaka marukunuxo anireerela, ohiya para woosivelihani nyuwo, masi wiira ooniherye wiira onnimphenta Yehova.

6. Munrowa omukhaliherya sai naskola anyu ophwanya ikuru wiira othanle okhala Namoona a Yehova? (1 aKorinto 16:13)

⁶ Vakhala wiira naskola a Biibiliya onnikupali wiira Yehova onoomukhaliherya wiiwelela malakiheryo awe ari mbiibiliyani, eyo enonvaha ikuru wiira eetteleke itthu oniixutta awe. (Mmusome 1 aKorinto 16:13.) Muteko anyu woowaaxuttiha atthu Biibiliya onoolikana ni muteko wa purusoore. Muupuwelaka okathi mwaasoma anyu, purusoore xeeni oosivelihani vanceene? Woonasa wene, aari purusoore yoole moopixa murima ookhalihenryeni woona wiira munoowerya opaka etthu yaapirisari anyu. Moolikanasa, mutthu oniwiixuttiha atthu saana Biibiliya, khahiyo paahi onaalela itthu Muluku oniphavela awe, masi-tho, onnaakupaliha wiira Yehova onimwaakhaliherya opaka marukunuxo anireerela mookumini mwaya. Nyuwo munrowa owerya sai opaka eyo?

MMUKHALIHERYEKE WUNCERERYA OMPHENTA WAWE YEHOVA

7. Yesu aakhalihenrye sai atthu yanwiriyana wuncererya omphenta waya Yehova?

⁷ Yesu aanisuwela wiira okathi mutthu onimphenta awe Muluku, eyo ennimwiiriha weettela itthu oniixutta awe. Ikwaha sinceene, Yesu aanaaleela awiixutti awe itthu saarowa waakhaliherya wuncererya omphenta waya Tiithi aya a wiirimu. Mwa ntakiheryo, Yesu aahimulikanyiha Yehova ni paapa onisuwela waavaha itthu sooreera anaawe. (Math. 7:​9-11) Pooti wiira atthu akina yanwiriyana Yesu, khiyaatonko okhalana paapa oophenta. Muupuwele moota atthu yoonenle aya nuumala Yesu ovaha ntakiheryo na paapa oophenta, yoowo aamwaakhenle mwanawe nuumala opaka itthu soohiloka. Yesu aahaakhaliherya atthu ale woona wiira Yehova onnaaphenta vanceene ni oniphavela waakhaliherya. — Luka 15:​20-24.

8. Munrowa omukhaliherya sai naskola anyu a Biibiliya wuncererya omphenta wawe Yehova?

⁸ Nyuwo nave munoowerya waakhaliherya ale munaasomiha anyu Biibiliya, wuncererya omphenta waya Yehova, muttittimiheryaka mikhalelo sa Muluku okathi munimusomiha anyu. Khula mwaha munimusomiha anyu, mmukhaliheryeke naskola anyu oweha ovarihana okhanle itthu oniixutta awe ni ophenta wa Yehova. Okathi munilavula anyu etthu yaamwiirihale Yehova onvaha Mwanawe, mmooniheryeke wiira hata Yehova aaphentaka apinaatamu ootheene, masi-tho onnimphenta yena. (aRom. 5:8; 1Yoh. 4:10) Okathi naskola anyu a Biibiliya oniiwexexa awe moota Yehova onimphenta awe, eyo enoomukhaliherya wuncererya omphenta wawe Yehova. — aKal. 2:20.

9. Exeeni yaamukhalihenrye Michael opaka marukunuxo mweekumini mwawe?

⁹ Nwehe ntakiheryo na munna Michael, yoowo onikhala wIndonesia. Owo aahuuwale ni Anamoona a Yehova, masi khaapatisiwe. Nuumala ophiyeriha iyaakha 18, owo aahithaamela elapo ekina wiira avareke muteko ntoko mutorista a ekamiyawu. Nuuvira okathi, owo aahithela wIndonesia masi khaahiyale ovara muteko elapo ekina. Nto eyo yaahimwiiriha okhala ottaiwene ni mwaarawe ni mwanawe mwaamuthiyana. Okathi yoowo, mwaarawe ni mwanawe mwaamuthiyana, yaahipacerya omusoma Biibiliya ni weettela itthu yiixuta aya. Nuumala maama awe okhwa, Michael aahitthikela owaani wiira aakhapeleleke apapawe ni aaheemererya omusoma Biibiliya. Okathi yaathokorerya aya eliivuru Okumi Woohimala!, mpantta oni: “Mwiixutte Itthu Sikina”, yoosoma 27, waahinvara murima Michael. Okathi uupuwelela awe moota Yehova oonale awe owereya onweha Mwanawe ohaawaka, Michael aahimoroxa maithori. Michael aahincererya oxukhurela wawe yoowoopola, ni aahipaka marukunuxo anireerela mookumini mwawe ni aahipatisiwa.

MMUKHALIHERYEKE OMUHELA YEHOVA NIPURO NOOPACERYA

10. Yesu aakhalihenrye sai awiixutti awe omuhela Yehova nipuro noopacerya? (Luka 5:​5-11) (Nwehe eteseenyu.)

¹⁰ Atthu akina Yesu aalaleerya awe yaahisuwela wiira Yesu aari Mesiya. Hata vari siiso, awo yaanipirisari okhaliheriwa osuwela wiira omurumeela Yehova waahela muhina okhalela nthiti olaleya ihapari sooreera. Okathi Yesu aamulattunle awe Pedru ni Andreya wiira omutthareke voohihiyererya, awo yiira ari ene awiixutti awe. (Math. 4:​18, 19) Awo yaaniimananiha vanceene muteko aya wootottha ihopa, woonasa wene, yaavara vamosa ni Yohani ni Yakobo. (Mar. 1:​16-20) Pedru ni Andreya, “yaahihiya matthavi aya” anamutthara Yesu. Masi okathi yaapanke aya yoothanla ela, pooti wiira yaahipaka mareheryo wiira yaavaheke yoolya amusi aya ni itthu saathowa. Exeeni yaawiirihale ohela nipuro noopacerya muteko woolaleerya, ohiya ophwanya musurukhu? Yesu aahipaka miiriirya, seiyo saawiirihale woona wiira Yehova aamwaakhapelela. Nto eyo yaahaavaha ikuru osuwela wiira Yehova aamwaakhaliheryaka okathi wootheene, vakhala wiira yammuhela nipuro noopacerya. — Mmusome Luka 5:​5-11.

11. Ninrowa olipiha sai waamini wa naskola ahu a Biibiliya?

¹¹ Hiyo khaninwerya opaka miiriirya ntoko Yesu aapaka awe. Masi nnoowerya waaleela atthu akina soowiiraneya sa moota Yehova onaakhaliherya awe, atthu yaale animuhela nipuro noopacerya mookumini mwaya. Mwa ntakiheryo, niireke munnuupuwela moota Yehova ookhalihenryaaweni, okathi mwaapacenrye anyu orowela mithukumano? Woonasa wene, mwaahilavula ni patarau anyu mmutthokiheryaka wiira, nihiku na mithukumano khimwaarowa ovaraka iwoora ovikana iye munivekeliwa anyu. Mmutthokiheryeke naskola anyu, moota eyo elipihale aya waamini wanyu ni moota Yehova ookhalihenryaaweni omuhela nipuro noopacerya.

12. a) Xeeni vari aya vooloka waalattula anna ni arokora naarowaka omusomiha Biibiliya? b) Munrowa orumeela sai iviidiyu wiira mmwiixuttihe mwa enamuna yooloka? Nvahe ntakiheryo.

¹² Naskola anyu onoottottela mureerelo owiriyana soowiiraneya sa anna ni arokora apanke marukuxo wiira amuheleke Yehova nipuro noopacerya. Okathi munrowa anyu omusomiha naskola anyu a Biibiliya, mwaalattuleke anna ni arokora a makhalelo oovirikana. Mwaavekeleke wiira atthokiherye moota yiixuntte aya ekeekhai ni itthu apanke aya wiira aheleke nipuro noopacerya muteko wa Yehova mookumini mwaya. Ohiya-vo, mphavelaseke okathi wiira nwehe iviidiyu ni naskola anyu sa eliivuru Okumi Woohimala!, siri mpantta oni: “Mwiixutte Itthu Sikina” aahiiso “Nwehe Itthu Sikina”. Mwa ntakiheryo, okathi munithokorerya anyu yoosoma 37 ni oweha eviidiyu eni: Yehova Onrowa Onivaha Itthu Sinnithowa, mmukhaliheryeke naskola anyu oweha wiira, Yehova onoomukhliherya vakhala wiira onoomuhela nipuro noopacerya mookumini mwawe.

MMUKHALIHERYEKE OXINTTA MIXANKIHO

13. Yesu aakhalihenrye sai awiixutti awe wiira ahihiye olaleerya okathi yaalupatthiwa aya?

¹³ Ikwaha sinceene, Yesu aanaaleela awiixutti awe wiira yaamulupatthiwaka ni amusi aya. (Math. 5:11; 10:​22, 36) Ohalaka omala muteko woolaleerya wa Yesu valaponi, owo aahaaleela awiixutti awe wiira yaamwiiviwa. (Math. 24:9; Yoh. 15:20; 16:2) Yesu aahaaleela awiixutti awe wiira yaahaana wiikasoopa okathi anilaleerya aya. Mwa ntakiheryo, owo aahaaleela wiira ahinyakulihaneke ni atthu yaalupattha ni wiira akhalaneke ephoole ni itthu yaapaka aya ni yaalavula aya, wiira ahihiye olaleerya.

14. Ninrowa omukhaliherya sai naskola ahu a Biibiliya wiilokiherya mwaha wa olupatthiwa? (2 Timootheyo 3:12)

¹⁴ Nimutakihaka Yesu, nihaana waaleela anaskola ahu wiira ale anivarana aya muteko, apatthani aya ni amusi aya, pooti ohimya aahiiso opaka etthu, mwaha woowi naskola owo onimusoma Biibiliya. (Mmusome 2 Timootheyo 3:12.) Ale anivarana aya muteko pooti waatheya, mwaha woowi anneettela ele aniixutta aya mbiibiliyani. Amusi aya aahiiso atthu akina, pooti ohaaphavela mwaha wa itthu aniixutta aya mbiibiliyani. Ti vooloka ohaapiserya waaleela anaskola ahu wiira anrowa olupatthiwaka. Niira siiso, naskola ahu khonrowa otikhina okathi onrowa awe olupatthiwaka. Nave owo onimoona etthu yoohimya aahiiso yoopaka, okathi onrowa awe olupatthiwa.

15. Exeeni enrowa omukhaliherya naskola ahu a Biibiliya oxintta olupatthiwa ni amusi?

¹⁵ Vakhala wiira naskola anyu onnilupatthiwa ni amusi awe, mmukhaliheryeke wuupuwela nthowa naya amusi akina ahinisiveliwa aya ni yena mwaha woomusoma Biibiliya ni Anamoona a Yehova. Woonasa wene, amusi awe pooti wuupuwelaka wiira Anamoona a Yehova aniixuttiha itthu soowoothiwa ni tootakhala murima. Hata amusi akina a Yesu, yuupuwela wiira Yesu owo aaroovahuwa. (Mar. 3:21; Yoh. 7:5) Mmukhaliheryeke naskola anyu okhala oopixa murima ni waareerela murima atthu, waahela muhina amusi awe.

16. Ninrowa omukhaliherya sai waaleela atthu akina mooreerela murima itthu sinikupali awe?

¹⁶ Hata amusi yooniheryaka osiveliwa ekeekhai, naskola khonipirisari waathokiherya itthu sootheene ekwaha emosa-ru paahi. Akhala wiira onimwiira siiso, eyo pooti waakhulumula amusi awo ni owiiriha ohiphavela-tho ekwaha ekina olavula ni yena voohimya sa sookupali sawe. Tivonto, mmutumereryeke naskola anyu olavula itthu vakhaani paahi. Apaka eyo, onoowiiriha amusi awe ophavela olavula ni yena ekwaha ekina. (aKol. 4:6) Aahiiso pooti waavekela amusi awe wiira awehe esaite jw.org. Opaka eyo, enimwaakhaliherya ophavela wiixutta itthu sikina voohimya sa Anamoona a Yehova, moovarihana ni makhalelo aya.

17. Munrowa omukhaliherya sai waakhula makoho voohimya sa Anamoona a Yehova? (Nwehe efootu.)

¹⁷ Nyuwo pooti orumeela mpantta ori esaite jw.org oni: “Makoho Animakela Okohiwa Voohimya sa Anamoona a Yehova”, yaawo anikohiwa ni amusi ni anamuteko akhwaawe. (2Tim. 2:​24, 25) Wanikisa wa khula yoosoma, muuluule mpantta oni: “Atthu Akina Anihimya Wiira”, ori eliivuru Okumi Woohimala! Mmuthokiheryeke naskola anyu wiira insayariki moota woowaakhula makoho orumeelaka moolumo awe. Muhoovelele onvaha malakiheryo anrowa omukhaliherya waakhula mwa enamuna yooloka. Itthu iya sootheene, sinoomukhaliherya naskola anyu waakiherya waamini wawe, ohoovelelaka.

18. Munrowa omukhaliherya sai naskola anyu okhala namalaleerya oohipatisiwa? (Matheyo 10:27)

¹⁸ Yesu aahaatumererya awiixutti awe waalaleerya ihapari sooreera atthu ootheene. (Mmusome Matheyo 10:27.) Okathi naskola onipacerya awe olaleerya ni muloko, owo onimoona wiira Yehova onnimukhaliherya, nto eyo enoomwiiriha wuncererya omuroromela wawe. Munrowa omukhaliherya sai naskola a Biibiliya ophavela olaleerya ni muloko? Okathi onilaleiwa aya mmulokoni wiira enookhala ekampaanya ya muteko woolaleerya, mmukhaliherye naskola anyu wiira owehe etthu onireerela awe opaka wiira okhale namalaleerya. Mmutthokiherye wiira atthu akina annoona okhweya opaceriha olaleerya okathi wa ekampaanya. Etthu ekina onireerela awe opaka, ori wiilepiha eskola wiira opakeke mipantta sa anaskola muthukumano wa eriyari ya esumana. Akhala wiira onoopaka eyo, enoomukhaliherya otthokiherya sookupali sawe.

MMUROROMELEKE NASKOLA ANYU

19. Yesu oonihenrye sai wiira aanaaroromela awiixutti awe? Ankhi hiyo ninrowa omutakiha sai?

¹⁹ Ohinatthi Yesu orowa wiirimu, owo aahaaleela awiixutti awe wiira nihiku nno yaamurowa okhala-tho hoothe. Awiixutti khiyaiwexenxe wiira Yesu aahimya yaawo wiira yaamurowa wiirimu. Hata vari siiso, Yesu aaweha ororomeleya waya, ohiya itthu yahiiwexexa aya. (Yoh. 14:​1-5, 8) Yesu aanisuwela wiira awiixutti awe yaapirisari okathi wiira yiiwexexe itthu sikina. Mwa ntakiheryo, awo yaapirisari okathi wiira yiiwexexe nlipelelo na orowa wiirimu. (Yoh. 16:12) Nimutakihaka Yesu, nihaana waaroromela anaskola ahu wiira anoopaka itthu sinimusivela Yehova.

20. Murokora Chifundo oonihenrye sai wiira aanimuroromela naskola awe a Biibiliya?

²⁰ Hiyo ninnikupali wiira anaskola ahu anniphavela opaka itthu sooloka. Nwehe ntakiheryo na murokora Chifundo, yoowo onikhala oMalawi. Owo aahipacerya omusomiha Biibiliya mwali eetta ekerexa Katoolika, yoowo aihaniwa Alinafe, orumeelaka eliivuru Okumi Woohimala! Nuumala omaliha yoosoma 14, Chifundo aahimukoha naskola awe moota oonela awe, orumeela ilatarato okathi woomukokhorela Muluku. Ohisiveliwe, Alinafe aakhunle so: “Yoothanla ya mutthu mwaneene!” Nuumala waakhula siiso, murokora Chifundo aahipacerya wiikoha vakhala wiira Alinafe khaarowa ohiya omusoma Biibiliya. Masi moopixa murima, Chifundo khaahiyale omusomiha Alinafe uupuwelaka wiira muhoolo aamwiiwexexa eponto ene. Nuumala ovira miyeeri vakhaani, Chifundo aahimukoha Alinafe nikoho nri yoosoma 34, nni: ‘Itthu mwiixuntte anyu mBiibiliyani ni mwiixuntte anyu sa Muluku eekeekhai, Yehova, sookhalihenryeni sai mpakha-va?’ Chifundo onnitthokiherya moota Alinafe aakhule awe. Chifundo aahimmye so: “Owo aahilavula iponto sooreera. Nto, iponto iyo saahela muhina wiira Anamoona a Yehova, khanipaka itthu Biibiliya onikhoottiha awe”. Moohipisa, Alinafe aahihiya orumeela ilatarato ni aahipatisiwa.

21. Ninrowa omukhaliherya sai naskola ahu othanla omurumeela Yehova?

²¹ Nnaamwi Yehova ‘iirihaka wunnuwa’, hiyo nookhalana muteko woowaakhaliherya anaskola ahu a Biibiliya orowa vahoolo. (1aKor. 3:7) Hiyo khahiyo ninwiixuttiha paahi itthu Muluku oniphavela awe wiira apakeke. Masi-tho, ninnaakhaliherya anaskola ahu, olipiha omphenta waya Yehova. Nave ninnaakhaliherya wooniherya ophenta waya amuhelaka Yehova nipuro noopacerya. Nave ninniwiixuttiha omuroromela Yehova okathi wa mixankiho. Okathi ninkupali ahu wiira anaskola ahu anoowerya omusiveliha Yehova, nnimwaakhaliherya olipiha yoothanla aya ya omurumeela Yehova.