Yesu “Aahiixutta Wiiwelela”

Okathi wootheene, Yesu aanimwiiwelela Yehova. (Yoh. 8:29) Nto, xeeni Biibiliya onihimya awe wiira: “[Yesu] aahiixutta wiiwelela mwaha wa itthu aahaawale awe”? — aHep. 5:8.

Okathi Yesu aari awe valaponi, saahimphwanya mixankiho, seiyo ahaarina awe wiirimu. Mwa ntakiheryo, nnaamwi anamuyari awe yaamwiiwelela Yehova, awo yaayariwe arina ene etampi. (Luka 2:51) Owo aanihaaxiwa ni ahooleli a etiini ootakhala ni anamalamulela, yaawo yahaaphavela otthara exariya. (Math. 26:59; Mar. 15:15) Hata vaari siiso, Yesu “aahiiyeviha ni aahiiwelela mpakha okhwa”, eyo piiyo, okhwa mwa enamuna yoowereya. — aFil. 2:8.

Itthu iyo sootheene, saahimwiixuttiha Yesu enamuna esya ya wiiwelela. Nto, owo Mwene ni Muulupale a Anamukuttho oniwerya onoonela othunku. (aHep. 4:15; 5:9) Nuumala wiixutta wiiwelela mwaha wa itthu aahaawale awe, nlelo Yesu ookhalana efaita ni onnirumeeliwa ni Yehova. Etthu emosa-ru pooti wiiraneya ni hiyo. Akhala wiira khaninrowa ohiya wiiwelela hata itthu sixankihaka, nnookhalana efaita para Yehova ni nnooweryaka ovara oratteene khula muteko ninvahiwa ahu. — Yak. 1:4.