Etthu Mukhanle Anyu Oopaka Wiira Mmusomeke Biibiliya Khula Nihiku

Mwaha wa waatteliwa miteko, niireke mootoko okhalana muxankiho wa ohiwerya otthara eporokaraama anyu ya omusoma Biibiliya khula nihiku? (Yox. 1:8) Munoonela sai otthara malakiheryo ala anittharelana:

• Mmwaativariki alarme. Akhala wiira munoomwaativari alarme mutelefoonini mwanyu aahiiso opuro mukina, owo onoowuupuxeryani waphiya okathi woomusoma Biibiliya.

• Mumpweheke Biibiliya anyu opuro vanikhweya aya onweha. Vakhala wiira munimurumeela Biibiliya oowimpirimiriwa, mumpweheke opuro vanrowa aya vookhweelani onweha. — Otum. 11:18.

• Mwaawiriyaneke autiyu a Biibiliya ookaravariwa. Okathi munivara anyu miteko sanyu sa khula nihiku, mwaawiriyaneke autiyu a Biibiliya ookaravariwa. Murokora mmosa oniihaniwa Tara, yoowo onirumeela ntoko pioneera, ori maama ni onivara muteko ohiyu, onihimya so: “Waawiriyana autiyu a Biibiliya ookaravariwa, okathi kinivara aka miteko saka sa khula nihiku, onnikikhaliherya ohihiya omusoma Biibiliya khula nihiku”.

• Muhihiye wiimananiha. Yakhumelela etthu enrowa owiirihani ohitthara eporokaraama anyu ya omusoma Biibiliya, musomeke iversiikulu vakhaani muhinatthi orowa orupa. Omusoma Biibiliya khula nihiku hata sikhalaka iversiikulu vakhaani, sinimookhaliheryani vanceene. — 1Ped. 2:2.