Anna Anli a Nikhuuru Noolamulela Athanliwe Niinaano

MUTHUKUMANO wa mwaakha, waapakiwe 5 a Outubro a 2024, yaahisommwa yoohimmwa yaarina efaita yuulupale, yaahimya so: Anna Jody Jedele ni Jacob Rumph, aathanliwa wiira yiireleke mpantta Nikhuuru Noolamulela na Anamoona a Yehova. Anna awo oowanli, aaviriha iyaakha sinceene amurumeelaka Yehova moororomeleya.

Munna Jedele, oyariwe oMissouri, wEstados Unidos, anamuyari awe yaari Anamoona a Yehova. Awo yaakhala muttetthe yaari Anamoona a Yehova vakhaani. Mwaha waivaavo, owo aahaasuwela anna ni arokora anceene yaakhuma ipantta soovirikana sa elapo ele, yaawo yaarwa okhaliherya olaleya ihapari sooreera. Nto ophenta ni wiiraana wa anna ni arokora awo, waahimukhaliherya vanceene munna Jedele. Munna Jedele opatisiwe ori ene mmiravo, 15 a Outubro a 1983. Jedele, waanimusivela vanceene olaleerya. Tivo nuumala omaliha osoma oskola sekuntaariya, aahipacerya orumeela ntoko pioneero rekular, Setembro a 1989.

Okathi aari awe mmiravo, anamuyari awe munna Jedele, yaanimukuxa yena ni murokorawe wiira yaxukurye oBeteli. Nto eyo, yaahaakhaliherya anamwane ale ophavela orowa orumeela oBeteli. Muhoolo mwaya, yaahilattuliwa oBeteli. Munna Jedele aapacenrye orumeela eBeteli ya oWallkill, Setembro a 1990. Wanipacerya, owo aathanleliwe eTepartamento ya Limpeesa ni muhoolo mwaya eTepartamento Meetiku.

Okathi ole, saahikhala miloko saalavuliwa nttaava na Espanhol, nto yaanipirisariwa anna wiira akhaliheryeke. Munna Jedele, aahiivahererya wiira akhaliheryeke muloko mmosa, nto aahipacerya wiixutta Espanhol. Moohipisa, munna Jedele aahimusuwela murokora mmosa pioneera, aarumeela esirkwiitu ele, oniihaniwa Damaris. Nuumala ekasamento aya, murokora Damaris, aahilattuliwa orumeela oBeteli ni iyawe.

Mwaakha wa 2005, awo yaahikhuma oBeteli wiira yaakhaliheryeke anamuyari aya. Okathi owo, yaahithanla wiira arumeeleke ntoko mapioneero rekular. Munna Jedele, aanikhaliherya osomiha eskola ya mapioneero, ni aanirumeela ikomisau iya: Comissão de Ligação com Hospitais ni Comissão Regional de Construção.

Mwaakha wa 2013, munna Jedele ni murokora Damaris, yaahilattuliwa otthikela oBeteli wiira yakhaliheryeke otekiwa oWarwick. Okhuma vaavo, awo aarumeela oPatterson ni oWallkill. Munna Jedele, oorumeela Etepartamento Enipaka Eteseenyu ni Oteka ya Elapo Eyo (LDC) ni Departamento de Serviços de Informações sobre Hospitais. Março a 2023, munna Jedele aahithanliwa wiira okhale namakhaliherya e eKomisau ya Muteko. Uupuwelaka soothanleliwa aavahiwa awe khalai, owo ohimmye so: “Okathi mutthu onivahiwa awo yoothanleliwa esya, pooti oxanka. Masi vaavo nimmuroromela ahu Yehova ni murima wootheene, onninikhaliherya opaka khula etthu onnivekela awe”.

Munna Rumph, oyariwe oCalifornia, wEstado Unidos. Okathi aari awe mwaana, maama awe, aahihiya olaleerya ni orowela mithukumano. Masi hata vaari siiso, owo khaahiyale omwiixuttiha munna Rumph ikeekhai sa mbiibiliyani. Nave khula mwaakha, aanimukuxa okathi aarowa awe omuxukurya piipi awe, yoowo aari Namoona a Yehova oororomeleya. Piipi awe aahimukhaliherya munna Rumph osiveliwa ikeekhai sa mbiibiliyani. Nto okathi aarina awe iyaakha 13, munna Rumph aahivekela osomihiwa Biibiliya. Munna Rumph opatisiwe nlelo ori ene mmiravo, 27 a Setembro a 1992. Moohakalaliha, maama awe aahitthikela olaleerya ni orowela mithukumano. Nave paapa awe, muhima awe ni murokorawe, yaahipatisiwa.

Okathi aari awe mmiravo, munna Rumph aahoona wiira muteko wa opioneero onnihakalaliha vanceene. Nuumala omaliha osoma oskola sekuntaariya, munna Rumph aahipacerya orumeela ntoko pioneero, Setembro a 1995. Mwaakha wa 2000, owo aahithaamela wEcuador, wiira arumeeleke mapuro oothowa anamalaleerya. Nto aahimusuwela murokora mmosa pioneera a oCanadá, yoowo oniihaniwa Inga. Nuuvira okathi, yaahithelana. Nuumala othelana, yaarumeela esitati emosa ya wEcuador, yeeyo yaari anamalaleerya vakhaani. Olelo-va, esitati ele wookhala muloko muulupale.

Nuuvira okathi, munna Rumph ni mwaarawe, yaahithanliwa okhala mapioneero espesiyaale ni muhoolo mwaya yaanivara muteko wa osirkwiitu. Mwaakha wa 2011, awo yaahilattuliwa eturma 132 ya oXileyaadi. Nuumala okaratuwari, yaahirumeela ilapo 5 soovirikana ni yaahivahiwa iparakha soovirikana, ntoko: Orumeela oBeteli, omisionaario ni muteko wa osirkwiitu. Munna Rumph, aahikhalana eparakha ya okhala prusoore a Eskola ya Anamalaleerya a Omwene.

Mwaha wa koronaviiru, munna Rumph ni murokora Inga, yaahitthikela wEstados Unidos. Awo yaahilattuliwa orumeela eBeteli ya oWallkill, weiwo munna Rumph iixuttihiwa awe eTepartamento ya Muteko. Nuuvira okathi, yaahitthikela eBeteli ya wEcuador, weiwo munna Rumph aarumeela awe Ekomisau ya Efiliyaali. Mwaakha wa 2023, yaahithaamiheriwa oWarwick. Janeiro a 2024, munna Rumph aahithanliwa wiira okhale namakhaliherya a Ekomisau ya Muteko. Uupuwelaka mapuro ootheene orumenle awe, munna Rumph, onihimya so: “Etthu eniiriha yoothanleliwa okhala ya efaita yinceene, khahiyo opuro, masi atthu, yaawo munivara anyu muteko”.

Ninnixukhurela vanceene, muteko anivara aya anna awo, nto “atthu siisa, mwaattittimiheke”. — aFil. 2:29.