Namukuttho ahu muulupale Yesu onninisuwela

1-2. a) Xeeni Yehova aamurumme awe Yesu orwa valaponi? b) Mwaha ola, ninrowa othokorerya exeeni? (Aheeperi 5:​7-9)

IYAAKHA 2000 sivinre, Yehova aahimuruma Mwanawe onimphentexa awe orwa valaponi. Mwaha wa xeeni? Yesu aahirwa valaponi wiira owoopole atthu etampi ni okhwa ni opwetexa miteko sa Satana. (Yoh. 3:16; 1 Yoh. 3:8) Yehova aahisuwela wiira vakhala wiira Yesu aamoorwa valaponi, eyo yammukhaliherya okhala Namukuttho Muulupale ooloka, onnisuwela, onoona owereya onniphwanya ni onnoonela othunku. Yesu aahipacerya okhala Muulupale a anamukuttho, nuumala opatisiwa mwaakha 29, Nuumala Kristu Orwa.a

² Mwaha ola, nnooweha wiira okhala wiira Yesu aahirwa valaponi, eyo yoomukhaliherya okhala Namukuttho Muulupale onnisuwela. Ti vooreera osuwela moota Yesu okhalihiwe awe “oomalela” wiira ovare muteko awe. Osuwela iwo onoonikhaliherya omwaattamela Yehova, hata ikwaha sikina niriipiwaka murima mwaha wa ifaalya ni itampi sahu. — Mmusome Aheeperi 5:​7-9.

MWAANA AAPHENTIWA NI MULUKU AAHIRWA VALAPONI

3-4. Marukunuxo xeeni maalupale Yesu aapanke awe mwaha woorwa valaponi?

³ Anamunceene a hiyo, noopaka marukunuxo mookumini mwahu. Mwa ntakiheryo, noothaama opuro waanisivela, naahiya amusi ni apatthani. Opaka marukunuxo awo, pooti oxankiha. Masi khuuvo pinaatamu otonko opaka marukunuxo maalupale, ntoko Yesu. Malaikha ootheene ari wiirimu, Yesu aari nlaikha nummuru 1, para Yehova. Yesu aaniphentiwa ni Yehova nave okathi wootheene aanihakalala ovara vamosa ni Tiithi awe. (Esal. 16:11; Mir. 8:30) Hata vari siiso, Afilipi 2:​7, onihimya wiira Yesu “aahileva itthu sootheene aarina awe” wiirimu, orwa valaponi wiira okhaleke ni anatampi.

⁴ Nkahaya muupuwele iyaakha soopacerya sa okumi wa Yesu valaponi. Yesu aayariwe emusi yoohaawa. Ninnisuwela eyo, okhala wiira nuumala Yesu oyariwa, anamuyari awe yaahivaha masiya manli aahiiso ipompa piili mihoro. (Onam. 12:8; Luka 2:24) Okathi mwene ootakhala Herodi aasuwenle awe wiira Yesu ooyariwa, owo aahiphavela omwiiva. Nto emusi ya Yesu yaahitthyawela wExiitu, wiira Herodi ohimwiive. (Math. 2:​13, 15) Okumi Yesu aarina awe valaponi, waahivirikana vanceene ni okumi aarina awe wiirimu!

5. Itthu xeeni Yesu aawehale awe okathi aari awe valaponi, ni saamukhalihenrye sai okhala Namukuttho Muulupale onnisuwela? (Nwehe eteseenyu.)

⁵ Okathi Yesu aari awe valaponi, aanaaweha atthu ahaawaka. Nave Yesu aanisuwela owereya mutthu onoona awe, okathi onikhweliwa awe mutthu onimphenta awe. Woonasa wene, aahoona eyo okathi aakhweliwa awe paapa awe aihaniwa Yosefe. Okathi aalaleerya awe, Yesu aahaaweha anamakokho, atthu yaahoona, oorakala ni axipaapa, yaawo yaahaawa mwaha wookhweliwa anaaya. Nto, Yesu aaniwoonela othunku atthu awo. (Math. 9:​2, 6; 15:30; 20:34; Mar. 1:​40, 41; Luka 7:13) Ekeekhai wiira Yesu aanaaweha atthu ahaawaka, okathi ari awe wiirimu. Masi okathi aari awe valaponi ntoko pinaatamu, Yesu aaniweha oratteene moota atthu anoonela aya okathi anihaawa aya. (Yes. 53:4) Itthu saamukhumelenle Yesu okathi aari awe valaponi, saahimukhaliherya osuwela moonelo, onyoonyiheya ni owereya onaaphwanya apinaatamu. Nave, ntoko apinaatamu akina, Yesu aanikhulumuwa, aanixanka ni aaniriipiwa murima.

YESU AANIWOONELA OTHUNKU ATTHU

6. Malikanyiho Yesu aarumenle awe, anniixuttiha exeeni sa othunku aarina awe? (Yesaya 42:3)

⁶ Okathi aalaleerya awe, Yesu aaniwoonela othunku atthu yaahasuliwa. Mwaha wa owoonela othunku, Yesu aahimaliherya eprofesia yaalavuliwe khalai ene. Soolempwa sa Eheeperi, atthu animwaamini vanceene Yehova, anilikanyihiwa ni exarti yooreera ni miri soorakama ni soolipa. (Esal. 92:12; Yes. 61:3; Yer. 31:12) Masi atthu ahinimoona oowaakhaliherya ni anihasuliwa, anilikanyihiwa ni mutathi woowunteya ni ntthampo nintthuwa mwiixi, eyo piiyo, itthu seiyo sihinivahiwa efaita yinceene. (Mmusome Yesaya 42:3; Math. 12:20) Okhaliheriwaka ni Yehova, profeta Yesaya aahilepa malikanyiho awo, ophavelaka wooniherya ophenta ni othunku Yesu aarowa awe owooniherya atthu yahooneliwa vatthu, niire so, yahaavahiwa efaita ni atthu akina.

7-8. Yesu aamalihenrye sai eprofesia eri Yesaya?

⁷ Matheyo, yoowo olempe evanxeelyo aahihimya wiira Yesu aahimaliherya moolumo ari Yesaya, oriki: “Owo khonrowa omala-maliha mutathi woowunteya, khonrowa ottipiha ntthampo nintthuwa mwiixi.” Miiriirya Yesu aapanke awe saahaakhaliherya atthu yahaathokoreriwa saana ni yiixoona ntoko mutathi woowunteya. Nave saahaakhaliherya atthu yaale yaahaarina nlipelelo, yaawo yaixoona ntoko ntthampo nintthuwa mwiixi. Mwa ntakiheryo, nihiku nimosa Yesu aahimphwanya mulopwana aasareyale makokho. Mulopwana ole, khaarina nlipelelo na openuxiwa wiira okhaleke ni amusi ni apatthani awe. (Luka 5:​12, 13) Nave-tho, Yesu aahimphwanya mulopwana mukina ahaiwa ni ahaalavula. Nkahaya mmuupuwele mulopwana ole aawehaka atthu atheyaka ni avaanelaka, masi yena ohiweryaka wiiwa nnakhala olavula! (Mar. 7:​32, 33) Nave saahikhala itthu sikina.

⁸ Okathi Yesu aari awe valaponi, ayuda anceene yaakupali wiira atthu yaawereiwa aahiiso yaarakanle, mwaha woowi yampuniriwa mwaha wa itampi saya aahiiso itampi sa anamuyari aya. (Yoh. 9:2) Mwaha wa moonelo owo woohiloka, atthu ale yaahaawa, yaaniixoona wiira kharina efaita. Masi Yesu aahaapenuxa ni aahaakhaliherya atthu awo woona wiira Yehova aanaathokorerya. Osuwela eyo, enniiriha okupali exeeni?

9. Yoolepa ya Aheeperi 4:​15, 16, enittittimiherya sai wiira Namukuttho ahu onoowoonela othunku apinaatamu?

⁹ Mmusome Aheeperi 4:​15, 16. Nikupaliki wiira okathi wootheene, Yesu onrowa onoonelaka othunku. Xeeni ohimyaka siiso? Mutthu orina othunku, tuule onoona owereya ni ohaawa onaaphwanya atthu akina. Nuulumo na ekereku noowi “onnisuwela”, niri Aheeperi 4:​16, nintaphulela woona owereya ni ohaawa onaaphwanya atthu akina. (Munwehe Aheeperi 10:​34, opuro Paulo orumenle awe nuulumo na ekereku.) Okathi ninsoma ahu mbiibiliyani miiriirya Yesu aapanke awe wiira aakhaliherye atthu, ninnoona wiira aaniwoonela othunku vanceene atthu awo. Khahiyo wiira Yesu aamukhanyereriwa waapenuxa atthu. Masi mwaha woowi aanaaphenta vanceene atthu awo, nto aaphavela waakhaliherya. Mwa ntakiheryo, Yesu khaapirisari onvara mutthu ole wiira ompenuxe. Masi hata vari siiso, owo aahinvara! Nave, pooti wiira mwa iyaakha sinceene, ele yaari ekwaha yoopacerya mulopwana ole aakwannyiwa awe ni mutthu mukina. Omoonelaka othunku mulopwana ole ahiiwa, Yesu aahimurowana nipuro nahaavira-viriwa wiira ompenuxe. Nave-tho, nkahaya mmuupuwele muthiyana mmosa aapanke itthu soohiloka, masi orukunuxa murima awe. Owo aahirapiha inawu sa Yesu ni maithori awe. Masi nfarisi mmosa, khaasiveliwe okathi aawehale awe eyo. Nto Yesu aahimwaakiha muthiyana ole. (Math. 8:3; Mar. 7:33; Luka 7:44) Yesu khaathanya atthu yaawereiwa aahiiso yaapanke itampi suulupale. Masi, aaniwaakhela ni aanaaphenta atthu awo. Tivo nikupaliki wiira Yesu onrowa onoonela othunku.

NIMUTAKIHEKE NAMUKUTTHO AHU MUULUPALE

10. Itthu xeeni nikhanle ahu oopaka, wiira naakhaliherye atthu ale ahiniiwa ni ahinoona? (Nwehe ifootu.)

¹⁰ Okhala wiira na atthareli a Yesu Kristu, hiyo ninniimananiha owooniherya atthu akina ophenta, waamorela ikharari ni owoonela othunku. (1 Ped. 2:21; 3:8) Ekeekhai wiira, khanniwerya waapenuxa atthu ahiniiwa ni ahinoona, masi nnoowerya waakhaliherya omusuwela ni omwaattamela Yehova. Mwa ntakiheryo, iliivuru sahu sinimutthokiherya Biibiliya, sinniphwanyaneya mattaava anilavuliwa ni matata anivikana 100. Vano para atthu ale ahinoona saana, iliivuru sahu sinimutthokiherya Biibiliya sookhala mattaava anivikana 60. Nave-tho, sookhala iviitiyu mattaava anivikana 100, sirina moolumo anitthokiherya etthu enooniheriwa. Ninnipaka itthu iyo sootheene, wiira naakhaliherye atthu ale ahiniiwa ni ahinoona, wiira akhale apatthani a Yehova ni a Yesu.

11. Mutthenkeso wa Yehova oniwooniherya sai othunku atthu a makhalelo ootheene ntoko Yesu iira awe? (Miteko 2:​5-7, 33) (Nwehe ifootu.)

¹¹ Mutthenkeso wa Yehova, onniimananiha vanceene wiira waakhaliherye atthu a makhalelo ootheene. Muupuweleke wiira nuumala ohihimuxiwa, Yesu aahaavaha ikuru soowaarya atthu yaathukumanne nihiku na Pentekoositi, wiira awiriyaneke ihapari sooreera ni nttaava naya. (Musome Miteko 2:​5-7, 33.) Ottharaka malakiheryo ninvahiwa ahu ni Yesu, mutthenkeso onnipaka iliivuru sinimutthokiherya Biibiliya mattaava anivikana 1 000. Mattaava makina a yaawo, anilavuliwa ni atthu vakhaani paahi. Mwa ntakiheryo, mattaava makina a wAmérica anilavuliwa ni atthu vakhaani, atthu yaawo anikhala onorti ni osuuli wAmérica. Hata vari siiso, iliivuru sinimutthokiherya Biibiliya, sinniphwanyaneya mattaava anivikana 160 wiira atthu anilavula mattaava awo, aweryeke owiriyana ihapari sooreera. Nave, iliivuru sahu sinnitaphuleliwa mattaava anivikana 20 a oRoma. Atthu ikonto sinceene anilavula mattaava awo, aapacerya omurumeela Yehova.

12. Itthu xeeni sikina mutthenkeso wa Yehova onipaka awe, wiira waakhaliherye atthu olelo-va?

¹² Ohiya paahi waakhaliherya atthu wiira yiiwe ihapari sooreera, mutthenkeso wa Yehova onnaakhaliherya atthu aniphwanyiwa ihasara sa ephattu. Vanniweryaneya eyo, okhala wiira ikonto sinceene sa anna ni arokora, anniivahererya wiira yaakhaliherye ale aphwanyiwe ihasara sa ephattu. Nave, mutthenkeso wa Yehova onnipaka Ipa sa Omwene, wiira atthu athukumaneke ni atepeke wiixutta ophenta wa Muluku.

NAMUKUTTHO AHU MUULUPALE ONOOWERYA WOOKHALIHERYANI

13. Mwa inamuna xeeni Yesu onnikhaliherya awe?

¹³ Okhala wiira Yesu makampusi ooreera murima, onnipaka itthu sootheene sinipirisari wiira nikhalane waataana wooloka ni Yehova. (Yoh. 10:14; Aef. 4:7) Ikwaha sikina, mixankiho pooti oniiriha wuupuwelaka wiira niri ntoko mutathi ohanle wunteya aahiiso ntthampo nintthuwa mwiixi. Hiyo pooti okhulumuwa mwaha woowereiwa vanceene, mwaha wa ifaalya sahu ni mwaha woonyoonyihana ni munna aahiiso murokora. Pooti onixankiha oweha itthu ninlipelela ahu muhoolo, nnawehexexa mixankiho sahu ni itthu sinnihaaxa olelo-va. Muhiliyale wiira Yesu onniweha itthu siniwiiraneelani ni onnisuwela itthu sinuupuwela anyu. Okhala wiira onniwoonelani othunku, Yesu oniphavela wookhaliheryani. Mwa ntakiheryo, owo pooti orumeela ikuru soowaarya wiira oovaheeni owerya okathi munitteettheya anyu. (Yoh. 16:7; Tito 3:6) Nave-tho, Yesu pooti orumeela “soovaha”, eyo piiyo, axitokweene ni anna ni arokora a mmulokoni, wiira yoolipiheni ni yookhaliheryeni. — Aef. 4:8.

14. Itthu xeeni nikhanle ahu oopaka, okathi ninkhulumuwa ahu?

¹⁴ Akhala wiira munnikhulumuwa, muupuweleke wiira Yesu ti Namukuttho ahu Muulupale. Nave muupuweleke etthu enitaphulela aya Yesu okhala Namukuttho Muulupale. Muliyale wiira Yehova oomuruma Yesu orwa valaponi, ohiya paahi para ovaha mukuttho wiira owoopole apinaatamu, masi-tho, wiira omukhaliherye Yesu owo woona mixankiho sinaaphwanya apinaatamu. Okathi ninkhulumuwa ahu mwaha wa itampi ni ifaalya sahu, Yesu ori oolikana ene wiira onikhaliherye “okathi wooreerela”. — Ahep. 4:​15, 16.

15. Exeeni yaamukhalihenrye munna mmosa otthikela mmulokoni?

¹⁵ Nave-tho, Yesu onnaakhaliherya atthu aniimananiha owaavya ale ahiyale weetta ni mutthenkeso wa Yehova. (Math. 18:​12, 13) Nwehe etthu emwiiranenle Stefano.b Nuuvira iyaakha 12 okumihiwe ene mmulokoni, owo aahirowela mithukumano. Stefano, onihimya so: “Khivaakhweyale para miyo, masi kaaniphavela omurumeela Yehova kiri ene ni anna ni arokora. Axitokweene yaathukumanne ni miyo, yaahikithokorerya saana. Ikwaha sikina, kaaniriipiwa murima okhala wiira kaahihiya omurumeela Yehova. Masi axitokweene, yaahikuupuxerya wiira Yehova ni Yesu aniphavela wiira kihooceye. Okathi kaattikiheriwaka mmulokoni, anna ni arokora, mwaaraka ni mwanaka mwaamuthiyana yaahikaakhela. Nuuvira okathi, mwaaraka aaheemererya omusoma Biibiliya. Nto miyo ni yena nimmurumeela Yehova hoothe.” Mweekeekhai, Namukuttho ahu Muulupale onnihakalala okathi onaaweha awe ale anittharuwa, yeemereryaka okhaliheriwa wiira atthikele mmulokoni.

16. Xeeni munixukhurela anyu okhalana Namukuttho Muulupale onnisuwela?

¹⁶ Okathi aari awe valaponi, Yesu aahaakhaliherya atthu anceene, okathi wooreerela. Olelo-va, nikupaliki wiira Yesu onoonikhaliherya khula okathi nimpirisari ahu. Nave, elapo esya ehanle ophiya, Yesu onrowa waakhaliherya apinaatamu ootheene oowiiwelela, wiira aataphule itthu sootheene sinaahaaxa mwaha wa etampi. Tivonto, ninnimuxukhurela vanceene Yehova, Muluku ahu, yoowo mwaha wa ophenta wawe wuulupale ni omoriwa wawe ikharari, omuthanlale Yesu wiira okhale Namukuttho ahu Muulupale onnisuwela!