Mulaleye Ihapari Okathi Wooxankiha—Mwaha ola okumihiwe Anuário das Testemunhas de Jeová de 2012
Epaaxina 72, ittima 1-2—Índia
OLALEERYA MUKHATTEYA. Elapo ya wIndia, arokora anli yaahivariwa mwaha woolaleerya, ni khuleeliwa oviriha mahiku mathanu eryeene mukhatteya. Mmosa a arokora awo, onihimya wira: “Okathi naaphiyale ahu okhatteya, maguarda yahinikoha etthu naavareliwe ahu, nto nikoho nlo naahinivaha eparakha ya olaleya ihapari sooreera. Okhala wira navarinwe nilaleeryaka, nto naahikhalana irevista ni itratato sinci. Tivonto, naahaalaleerya atthu otheene yaari mukhatteya ni naahikawa iliivuru sinceene. Naahilipihana mukina ni mukhwaawe, nahipaka nivekelo, nuumala naahisoma iliivuru naarina ahu.
“Nuuvira okathi, naahiroihiwa ekhatteya ekina yaaphwanyaneya opooma. Nto niphiyakaru, axithiyana akina yaattukeliwe yaahinikoha exeeni naavareliwe ahu. Nto eyo yaahinivaha eparakha ya waalaleerya ihapari sooreera, ni waalela wira hiyo na anamoona a Yehova. Muthiyana mmosa aahoolela ekhatteya eyo, okathi aiwale awe ele naalaleerya ahu, aahihimya so: ‘Nyuwosa mootthukweliwa mwaha woolaleerya; vano munnithipelelasa olaleerya pooti okhala mukhatteya mu!’” Vano, arokora ala aniphavela waaxukurya anamutthukiwa yaale yaasiveliwe ekeekhai.
Epaaxina 156, ettima 2 mpakha epaaxina 157, ettima 1—Noruega
ITTHU SOOHILOKA SINIHIMMWA NI ATAKHALI SINNIXINTTIWA
Eriyari ya iyaakha sa 1989 ni 1992, Anamoona a Yehova oNoruega, yahipacerya wootheriwa ni awanani aya; nto atakhali awo yaanipaka ikampaanya soohiloka arumeelaka ijornale, iliivuru, raadio, ni Televisau. Etthu yiiriha okhumelela olupatthiwa nno, waari mwaha woowi naneettela ele Biibiliya oniixuttiha awe voohimya sa moota woomuthokorerya mutthu okumihiwe mmulokoni. (1 aKor. 5:9-13; 2 Yoh. 10) Mwaha wa moolumo awo oohiloka yaalavuliwa, anna akina yaaniveehiwa okathi woolaleerya, omutekoni, oxikola, ni vatthokoni vaya. Vanaamwi arumeyi a Yesu yahaatikhina okathi yaveehiwa aya, khivaakhanle vookhweya ovilela muxankiho owo.—Math. 5:11, 12.
Munna mmosa onihimya so: “Waari okathi woovila, masi wa mpantta mukina eyo yaari etthu yooloka. Mixankiho iyo saahikiiriha wuupuwelela saana sookupali saka. Eyo yaahilipiha waamini wahu ni onikhaliherya wuupuwelela saana eyoolya ya omunepani ninvahiwa ahu ni murumeyi oororomeleya ni ankhili. Nto eyo yaahinivaha ikuru wira nivilele soweeha”.
Mutokweene mmosa a esirkwitu onuupuwela so: “Waari woohakalaliha oweha olipa murima wa anna ni arokora okathi ole. Hiyo nahoona wira etthu yooloka yaakhanle ahu opaka okathi ole, waari ovikaniha olaleerya, ohela muhina olaleerya mphironi. Mootteeliha murima, anna anceene yaahipaka eyo”.
Epaaxina 180, ettima 1—Ruanda
Phocas Hakizumwami onnuupuwela okathi owo moohakalala, oriki: “Anna a muloko wa oNyabisindu yaari muhina mwa anna oopacerya ovariwa mwaha woolaleya ihapari sooreera. Okhala wira otheene ahu naanilipelela ovariwa, nto eyo yaahiniiriha osuwela wira muttetthe ahu woolaleerya warowa okhala mukhatteya. Tivonto, naahivaanela wira nipake ekampaanya yuulupale yoolaleerya muttetthe ahu wa ‘ota’. Nto, naahilaleerya mapuro yeettiwa nakoso, ni naahikawa irevista ni iliivuru sinci. Naahinvekela Yehova wira onikhaliherye omaliha muttetthe ahu nihinatthi otthukiwa. Yehova aahinikhaliherya, okhala wira naahiwerya omaliha muttetthe wotheene nihiku 1 a Outubro, 1985. Nto nuuvira esumana emosa naahitthukiwa.
Epaaxina 110
“Owo Aalikana ni Waarya wa Nsuwa”
WILHELM UHRE
OYARIWE MWAAKHA WA 1901
OBATIZIWE MWAAKHA WA 1949
MUKWASU WA OKUMI AWE Aari namalaleerya ooluttuweliwa ni oohakalala, nnaamwi aari mutthu oorakala.
◼ MWAHA wa eretta yanwereya mmisipheni, Wilhelm aahirakala metto ni khaawerya olavula saana. Masi hata aawereiwa, nuumala wiiwa ihapari sooreera, iyaakha sa 1930, owo aahipacerya waalaleerya akhwaawe ekeekhai aaxutta awe. Owo aanirumeela ekarinyu awe yaarina mutoro wira arowe olaleerya, ni khula okathi owo aanirowa ebaia ya oSortland muttetthe wa oVesteralen, wira arumihe myaha sa mBiibiliyani sookravariwa ni okawa iliivuru. Okhala wira owo aakhala mapuro oorakamela ni aahirakala, aabatiziwe mwaakha wa 1949. Hata vari siiso, owo ari namalaleerya ooluttuweliwa. Anamunceene a atthu yeetta muxerexere wa ephareya, yaahiixutta ekeekhai, nto akina a yaawo yaahikhala Anamoona a Yehova.
Okathi uuluvanle awe, Wilhelm aahithaamela empa yaakhala aya atthu oowuuluvala oTromsø. Nto mwaha wa okhaliheriwa ni anamalaleerya akina, owo aahivikaniha olaleerya arumeelaka iwarakha. Okhala wira owo aari mutthu ooreera murima ni oohakalala, aanaalipiha akhwaawe ohela muhina atthu yaavara muteko opuro ole. Okathi aakhwiiye awe, muthiyana mmosa aari gerente, aahimmye wira: “Vaavo naarowa ahu okwaartu wawe, hiyo naanihakalala. Mwaha wa waamini wawe, owo aalikana ni waarya wa nsuwa”.