Ásia ni Oriente Médio — Mwaha ola onikhuma Anuário das Testemunhas de Jeová 2014
Okhaliheriwa wa Mulopwana Ohinoona, Ohiniiwa ni Ohinlavula
Epaaxina 59, ettima 1, mpakha epaaxina 62, ettima 1
Mwaakha wa 1999, muloko onirumeela nttaava ninlavuliwa ni matata oKobe, oJapão, waahiiwa wira aahikhala mulopwana mmosa iitthaniwa Hirofumi. Okathi munna mmosa aamananiha awe olavula ni Hirofumi, maama awe mulopwana ola aahimukhoottiherya munna ole. Munna aahitthika ikwaha sinceene ni aahimuxonttela maama awe Hirofumi wira olavulane; nto wanikisa waya, maama awe aahimuruuha Hirofumi vamukhora. Owo aahikhalana ereru ni ikharari soorakama ni soohivasiwa. Aakhala ntoko wira aavirinhe iyaakha sinceene oryeene esisiro yahaakhaliwa. Owiitho wawe khiwooniherya ohakalala. Hirofumi aahikhalana mixankiho sinceene. Ohiya paahi ohiiwa, masi-tho aahikhalana muxankiho wa ohoona. Munna ole aahitikinihiwa, nto khuvara matata a Hirofumi ni opacerya olavula orumeelaka nttaava ninlavuliwa ni matata. Masi owo khaakhunle etthu. Hirofumi aakhala mekhawe, ni khuuvo aalavula ni yena okhuma okathi yoole aaphwannye awe eretta ela ya ohoona iyaakha sowiiraka 10 saavinre, eyo piiyo, vaavo aarina awe iyaakha 31.
Nuuvira mahiku manli munna ole aahitthika. Maama awe Hirofumi aahitikinihiwa, maana uupuwela wira munna ole khaarowa otthika nuumala woona makhalelo a Hirofumi. Munna ole aahitthikela-tho oxonttela wira onwehe Hirofumi; nto maama awe aahimuruuha vamukhora. Nuuvira mweeri mmosa omuxukuryaka, masi Hirofumi ohaakhulaka etthu, maama awe aahimuleela munna ole wira khivaatthuneya-tho otthika. Nnaamwi vaari siiso, munna ole khaahiyale omuxukurya. Owo aanimuruuhela iboolo ni aanipaka khula etthu aawerya awe wira omooniherye niphento. Nuuvira myeeri miili moohikhumela etthu, nto munna ole aahipacerya wuupuwela wira khivaareerela-tho omuxukurya tthiri.
Nto munna ole aahuupuwela omuxukurya ekwaha yookiserya paahi. Masi ohinatthi orowa omuxukurya, owo aahinvekela Yehova wira omukhaliherye osuwela akhala wira aahaana ovikaniha omuxukurya Hirofumi. Okathi aaphiyale awe owannya awe Hirofumi, aahivara matata a mulopwana owo, nto orumeelaka nttaava ninlavuliwa ni matata aahimuleela wira ookhala Muluku oniitthaniwa Yehova; Muluku owo ori wiirimu, onninweha Hirofumi ni mixankiho sawe waavikana atthu otheene. Yehova onnimoonela othunku ni oniphavela omaliha mixankiho sawe. Ti maana aya omurumme awe Namoona Awe wira omuxukurye. Wanipacerya, Hirofumi khiwaakhunle etthu; masi moohipisa Hirofumi aahinvaha ntata munna ole moolipiherya, ni aahimoroxa maithori. Okuxeyaka murima, munna ole nave aahimoroxa maithori. Hirofumi aahipacerya omusoma Biibiliya.
Nuuvira iyaakha 11 omusomaka Biibiliya, Hirofumi aahipacerya orowa omuthukumanoni a muloko aattamenle awe, ohiya weetta ikilometuru sinceene wira orowe omuthukumanoni a muloko wa nttaava naalavuliwa ni matata ntoko siira awe. Masi muloko ola aattamenle awe, khuuvo mutthu aasuwela nttaava ninlavuliwa ni matata. Nto, nuuvira mwaakha mmosa nnimeya, anna ni arokora 22 yaahiixutta nttaava ninlavuliwa ni matata wira emukhaliherye Hirofumi. Mweeri wa Janero 2012, owo aahipacerya wiirela mpantta Exikola ya Orummwa wa Muluku, okhaliheriwaka ni munna mmosa aataphulela nttaava naalavuliwa ni matata. Mweeri wa Outubro mwaakha yoole, Hirofumi aahikhala namalaleerya oohibatiziwa.
Ásia ni Oriente Médio
“Soovira Iyaakha 30 Kaavyaka Eliivuru Ela!”
Epaaxina 67, ettima 2
Misionaaria mmosa onirumeela wIndonesia yoowo oniitthaniwa Agnes, aanimulaleerya muthiyana mmosa aarina iyaakha okhuma 40 mpakha 60 yoowo aari oorupala. Muthiyana owo aatumiha mathaapa a makukhu, ixuwaari, enika, ni itthu sikina sa mmatta emerkado ya muttetthe owo. Muthiyana owo aanisiveliwa osoma irevista sahu ni ovaanela voohimya sa Biibiliya okathi ahaatteliwa awe muteko. Nihiku nimosa, Agnes aahirowa omuxukurya muthiyana ola omerkado, masi khamphwannye. Iyawe aahimuleela Agnes wira muthiyana ola aaroyara niinano. Agnes aahuupuwela omuxukurya muthiyana ole. Nto aahimuroihela Eliivuru Aka ya Miyaha sa Biibiliya yootthukiwa vapapheloni nto khunvaha. Muthiyana ole aahitikinihiwa mwaha wa onweha Agnes orwiiye ene omuxukurya, ni aahitepa otikinihiwa okathi aavahiwe awe eliivuru eyo. Nto aahitaphula eliivuru ele, ni ohinakupali ele yaaweha awe. Owo aahimukoha Agnes wira: “Eliivuru ela mphwannye woowi? Soovira iyaakha 30 kaavyaka eliivuru ela! Koophavelasa mapuro otheene anitumihiwa iliivuru, nave kihaakoha atthu othene. Masi khuuvo mutthu aarina eliivuru ela, khuuvo aasuwela, nave khiivo eliivuru ekina enilikana ni ela”. Muthiyana ola, okathi aari awe mwaana, aanisiveliwa osoma eliivuru Miyaha sa Biibiliya yeeyo yaari ya atatawe. Vano ootthikela-tho osoma eliivuru ela, nave mwanawe mwaamuthiyana ompacenrye awe omuyara onnisiveliwa ni eyo. Oowanli aya aapacerya osomihiwa Biibiliya.
[Ipaaxina soohikhala etthu 5,6]