Exeeni Biibiliya Onihimya Awe sa Wootta Makiyaaxe, Owara Ipuruseera ni Ipirinku?
Ele Biibiliya onihimya awe
Nnaamwi Biibiliya ohilavulaka vanceene voohimya sa mwaha ola, owo khonikhoottiha woota makiyaaxe, owara ipuruseera ni ipirinku. Ohiya paahi owehexexaka mukhalelo ahu wa ota, Biibiliya onnitumererya ovaha ephoole oreera “weiwo ohinooneya, ohinintta, onooniheriwa ni murima woomaala ni woowiiyeviha”. — 1 Pedru 3:3, 4.
Owara ipuruseera, ipirinku ni itthu sikina khasinikhoottihiwa
Athiyana oowaamini aniromoliwa mBiibiliyani yaawo yaaiphwaneliha. Rebeka aarowa otheliwa ni Isaakhi, mwaana a Abrahamu. Owo aahakhela ni taata awe ekharawa emosa ya eweero, ipuruseera sa eweero ni itthu sikina sa efaita yinceene. (Maphattuwelo 24:22, 30, 53) Nave-tho Esteeri ohinatthi othanliwa para okhala pwiyamwene a opersia owo aahakhela “itthu sinimureeriha mutthu”. (Esteeri 2:7, 9, 12) Woonasa wene itthu iyo saamureeriha mutthu sahela muhiina “itthu soottiwa saareeriha erutthu”, aahiiso “inamuna soovirikana as makiyaaxe”. — Nova Versão Internacional de; Easy-to-Read Version
Biibiliya onnilikanyiha itthu sooloka ni itthu sootepexa okhalana efaita. Mwa ntakiheryo, miruku sooloka sinnilikanihiwa ni “ipirinku sa eweero [...] para mutthu oniwiriyana”. (Miruku 25:12) Mwa enamuna emosa-ru, Muluku aaniilikanyiha ni mulopwana oninvaha mwarawe ipuruseera, ekoolari emosa ni ipirinku. Nlikanyiho nna nooniherya wiira Muluku anikhapelela nloko na aisarayeli. Biibiliya onihimya wiira itthu iyo saareeriha erutthu saanaahiya atthu ale ‘ootepa oreera’. — Ezekiyeli 16:11-13.
Itthu Sowoothiwa voohimya as makiyaaxe ni itthu siniireeriha erutthu
Itthu Sowoothiwa: 1 Pedru 3:3, Biibiliya onnikhottiha “otthava ikharari, owara ipulseera sa eweero”.
Ekeekhai: Yoolepa ela emphavela ohimmya wiira oreera wa muhina wookhalana efaita ovikana oreera wa ota aahiiso wiiphwaneliha. (1 Pedru 3:3-6) Iversiikulu sikina sa mbiibiliyani sinnooniherya eyo. — 1 Samuweli 16:7; Miruku 11:22; 31:30; 1 Timootheyo 2:9, 10.
Itthu Sowoothiwa: Etampi wootta makiyaaxe, okhala wiira Biibiliya onihimya wiira pwiyamwene ootakhala Yezabeli “aahipintari maitho awe”. — 2 Mamwene 9:30.
Ekeekhai: Yezabeli aahivara itthu sinceene sa okhwiri ni wiiva. Owo aahiphukeliwa mwaha wa otakhala wawe ohiya mwaha wa wiiphwaneliha wawe. — 2 Mamwene 9:7, 22, 36, 37.