Niireke Muluku Orumenle Othatuxa Wira Opake Itthu Sikumi Sikhanle?

Waakhula wa Biibiliya

Nnaari. Biibiliya onnihimya oratteene wira Muluku aapattunxe apinaatamu, inama ni miri sa khula “enamuna”.a (Maphattuwelo 1:12, 21, 25, 27; Wiisuupulula 4:11) Nave Biibiliya onihimya wira apinaatamu akhumme wa Adamu ni Eva, yaawo ari anamuyari ahu oopacerya. (Maphattuwelo 3:20; 4:1) Biibiliya khonikhaliherya muupuwelo woowi Muluku orumeelale othatuwa wira opake itthu sikumi sikhanle. Muupuwelo owo onihimmwa okhala othatuwa. Nave, onneemererya muupuwelo wa siensia woowi onnikhala ovirikana wa yoopattuxiwa ya enamuna emosaru.b

• Niireke Muluku oorumeela othatuwa?

• Niireke Biibiliya onnivarihana ni othatuwa?

• Niireke makhalelo a miri ni inama annooniherya tthiri wira siroothatuwa?

Niireke Muluku oorumeela othatuwa?

Atthu anikupali wira Muluku oorumeela othatuwa wira opattuxe itthu siri valaponi, aakhalana miyoonelo soovirikana sa moota Muluku opanke awe itthu iyo. Olavulaka sa muupuwelo owo, Enciclopédia Britânica enitthokiherya so: “Muupuwelo owo ontaphulela wira Muluku onirumeela makhalelo a ephattu wira eettihe elapo”.

Atthu anikupali wira Muluku oorumeela othatuwa wira opattuxe olumwenku annikupali-tho wira:

• Itthu sotheene sipattuxiwe sikhumme mwa soopattuxiwa sa khalai.

• Etthu epattuxiwe pooti othatuwa enakhuma etthu ekina yoovirikana ni ele yoopacerya. Eyo eniitthaniwa okhala microevolução.

• Iproseso iyo sotheene Muluku tonikhaliherya hata vakhalaka vakhaani.

Niireke Biibiliya onnivarihana ni othatuwa?

Akhala wira atthu anikupali wira itthu siroothatuwa, eyo entaphulela wira ele Biibiliya onihimya awe wira itthu siroopattuxiwa eliivuru ya Maphattuwelo khahiyo ekeekhai. Masi Yesu aahitoko wooniherya wira itthu siroopattuxiwa. (Maphattuwelo 1:26, 27; 2:18-24; Matheyo 19:4-6) Biibiliya onihimya wira ohinatthi Yesu orwa valaponi aakhala wiirimu. Nave aanimukhaliherya Muluku opattuxa “itthu sotheene” sikhanle. (Yohani 1:3) Tthiri moohaanyiherya, yowiixuttiha yoowi itthu siroothatuwa khenikhuma mBiibiliyani.

Vaavo muniweha anyu makhalelo a inama ni miri, niireke tthiri itthu siroothatuwa?

Biibiliya khonihimya wira enamuna emosa ya yoopattuxiwa pooti othatuwa enamukhuma etthu ekina. Masi-tho, Biibiliya onneemererya wira vaavo miri siniima aya ni inama sinitothola aya, pooti oturukeya mukhalelo aya. Nave eyo pooti wiiraneya moovarihana ni okathi wala opuro sinikhala aya. Nto atthu akina, anihimya wira eproseso eyo ti othaatuwa nnaamwi ehikhumelelaka yoopattuxiwa esya.