Olevelela

“KIRI ENE MWAANA, APAAPA NI AMAAMA YAAMAKELA ORUWANANA NI OPWAPWELANA”. Masu awo alavuliwe ni Patricia. Owo onnivikaniha oriki: “Nto nkinaxuttihiwe olevelela. Hata nuumala wunnuwa, kaaniviriha mahiku manceene kuupuwelaka etthu yoohiloka kiireliwe aka. Eyo yaanikiiriha ohiphwanya ikhove”. Tthiri, owali ni waakuva onanariwa khoniphwanyiha ohakalala ni onnixankiha okumi. Tivonto asomi anihimya aya wira atthu ahinlevelela . . .

• Anneemya wira onanariwa ohonone opatthani; nto eyo ennaaphwanyiha omeekha.

• Waakuva oveeheya, oxanka wala oriipiwa murima.

• Anuupuwela paahi soovonya siireliwe aya, nto khanihakalala.

• Anoona wira khanitthariha soophavela sa muupuwelo aya.

• Annitepa oriipiwa murima, ni annoopihasa okhalana iretta ntoko tensau alta, eretta ya murima, artrite ni eretta ya muru.a

OLEVELELA ONITAPHULELANI? Olevelela onitaphulela ohuupuwela etthu yoohiloka yiireliwe ahu, ohiya onanariwa ni ohittikiherya yoonanara. Eyo khentaphulela osiveliwa etthu yoohiloka, aahiiso, wuupuwela wira etthu eyo khahiyo yuulupale, nnakhala woothererya wira khiivo etthu ekhumelenle. Masi olevelela, yoothanla mutthu onuupuwela awe oratteene, maana onnisuwela wira waaphenta akina, ti wootepa otthuneya. Eyo ennimwiiriha ophavela murettele ni wataana ni akina.

Ole onilevelela onnooniherya ankhili, maana onnisuwela wira otheene ahu na atthu oohimalela. Nto ninnittheka ni moolumo wala soovara sahu. (aRoma 3:23) Tivonto Biibiliya onihimya awe so: “Nvilelaneke, mulevelelaneke imara sothene muntthekelananyu”.​—aKolosi 3:13.

Olevelela onivarihana ni ophenta maana ori ntoko ‘nlutte nimmaleliha’ wiiraana. (aKolosi 3:14, Biblya Exirima) Tthiri, moovarihana ni esaite ya Mayo Clinic, olevelela . . .

• Onnikumiherya wataana wooloka, maana eyo ennimwiiriha mutthu ommorela ikharari mukhwaawe, onwiriyana, ni omoonela othunku.

• Onnimwiiriha mutthu okhalana muupuwelo wooloka ni wataana saana ni Muluku.

• Onnivukula oxankiheya, okhulumuwa, ni owali.

• Onnimwiiriha mutthu ohiriipiwa murima vanceene.

MWIILEVELELEKE. Erevista enilavula sa olevelela (Disability & Rehabilitation), enihimya so: “Wiilevelela, etthu yootepa ovila”, masi, “onnikhaliherya ekumi”. Exeeni enrowa wookhaliheryani wiilevelela?

• Muhilipeleleke wira munrowa opakaka itthu sooloka khula okathi. Masi ntoko atthu akina, nyuwo khammalenle.​—Musuweli 7:20

• Mwiixutteke etthu ni soovonya sanyu. Eyo enimookhaliheryani ohitthikela-tho opaka etampi eyo.

• Mwiipixeryeke murima. Soovonya wala soolema sikina khasimmala moowaakuveya.​—aÉfeso 4:23, 24

• Mukhalaneke apatthani ooloka, ooreera murima, oolipiha ni oororomeleya.—Miruku 13:20

• Mwamutthekela mutthu, mweemereryeke yoovonya anyu ni mwaakuveleke oveka musammaha. Okhala a murettele ni atthu akina, onimookhaliheryani omaaleleya.​—Matheyo 5:23, 24

MIRUKU SA BIIBILIYA SINNIKHALIHERYA TTHIRI!

Nuumala opacerya omusoma Biibiliya, Patricia oromoliwe wanipacerya, aahiixutta olevelela. Owo oni: “Vano nkirina-tho muxankiho ole wa onanariwa waahonona okumi aka. Nkinihaawa ni nkinipaka itthu sinaahaaxa akina. Biibiliya oniixuttiha wira Muluku onniniphenta ni oniphavela mureerelo ahu”.

Mulopwana mmosa oniitthaniwa Ron ohimmye so: “Nkaawerya weettiherya miyuupuwelo ni sowiira sa atthu akina. Masi kaaniwerya weettiherya miyuupuwelo ni sowiira saka. Wira kikhalane murettele, kaahaana ohiya onanariwa. Khivaniweryaneya okhala a murettele ni oonanariwa okathi omosaru. Masi vano kookhalana yowuupuxerya ya murima yooloka”.