Anamoona a Yehova Enikupali aya Exeeni?

“Vano, ninniphavela owiwani mmansinyu itthu sinupuwelanyu, mana nosuwela wira mulok’ola w’aKristu onnivanyiwa mapuro othene.” (Miteko 28:22) Makhulupale ala a muttetthe wooRoma a eseekulu yoopacerya yahivaha ntakiheryo nooloka. Yaaphavela wawiriyana axineene, ohiya owiiwa anamavaanyiha paahi yahaasuwela mwaha owo.

Moolikanasa, ikwaha sinceene olelo va Anamoona a Yehova annilavuliwa moohiloka, ni waarowa okhala wiiwoka ophavelasa osuwela ekeekhai w’anamavaanya. Vano, mootteeliwa murima nimphavela wooleelani sookupali sahu sulupale.

Biibiliya, Yesu Kristu ni Muluku

Nnikupali wira “Solempwa sotheene sivereliwe ni Muluku ni sinnivaha mureerelo”. (2 Timoteyo 3:16, Tradução do Novo Mundo, NM) Vanaamwi akina ariki wi hiyo khanihiyo makristau, ela kahiyo ekeekhai. Ninkhaliherya onamoona mmosaru wa murummwa Pedru voohimya sa Yesu Kristu: “Khavo mutthu mukina oniwerya owòpola atthu: mulaponi mothene khinivo nsina nikina nivahiwe atthu, nniwerya onòpola.”​—Miteko 4:12.

Moowi siso, okhala wira Yesu aahimmye wi orii “Mwana a Muluku” ni wi ‘Atithi yahikiruma’, Anamoona a Yehova annikupali wira Muluku mulupale onvikana Yesu. (Yohani 10:36; 6:57) Mwaneene Yesu moosuwela aahimmye wira: “Atithi t’akhanle alupale okivikana miyo.” (Yohani 14:28; 8:28) Vano, khinnikupali wira Yesu orii oolikanasa ni Ti’thi, ntoko yowiixuttiha y’Amuluku Araruu. Ohiya eyo, nnikupali wira owo opattuxiwe ni Muluku ni mwamukhaani ohoolo wa Yoowo.​—aKolosi 1:15; 1 aKorinto 11:3.

Mu nuulumo na emakhuwa, nsina na Muluku ti Yehova. Biibiliya onihimya wira: “Nyuwo, paahi murina nsina na YEHOVA, muri a Vasuluxa wa elapo yotheene.” (Esalimo 83:18, Almeida, edição revista e corrigida) Moovarihana ni yohimmwa ela, Yesu aahittittimiherya vanceene nsina na Muluku, owiixuttihaka ovekela atthareli awe: ‘Tith’ihu, muri wirimu! [“mutteelihe”, NM] nsina nanyu.’ Owo-tho aahivekela wa Muluku: “Miyo kihasuweliha nsina ninyu, vano awo ahettela molumo anyu.”​—Mateyo 6:9; Yohani 17:6.

Anamoona a Yehova annikupali wira ahaana omutakiha Yesu mu olaleerya nsina ni soolakela sa Muluku. Vano, nookuxa nsina na Anamoona a Yehova okhala wira nimmutakiha Yesu, ‘Namoona Oororomeleya’. (Wisupulula 1:5; 3:14) Moophwanelela, Yesaya 43:10 olavulaka sa atthu a Muluku onihimya wira: “‘Nyunwosa murii anamoon’aka’, onihimya siso ti Yehova, ‘aayo, arumeyi aka, yaale kathanlaly’aka’.” (NM)

Omwene wa Muluku

Yesu aahiwiixuttiha atthareli awe wi avekeleke yiiraka: “Omwene anyu orwe”, ni owo aahipaka Omwene okhala muruu mulupale wa wiixuttiha wawe. (Mateyo 6:10, NM; Luka 4:43) Anamoona a Yehova, annikupali wira Omwene orii ekuvernu yekeekhai etikitheriwe wirimu, enrowa olamulelaka elapo ya vathii, niwi Yesu Kristu orii Mwene oohooneya oothanliwa. “Olamulelo awe orii mmakhatani mwawe”, onihimya Biibiliya. “Wuncerereya wa olamulelo ola ni murettele khunrowa omala.”​—Yesaya 9:6, 7, Al.

Moowi siso, Yesu Kristu khunrowa olamulela mekhawe mu ekuvernu ya Muluku. Owo onookhalana oolamulela akhw’awe wirimu. “Nalipiheryaka wamini mohawani”, aahilepa murummwa Paulo, “nnottikhiwa omwene vamosá ni yowo”. (2 Timoteyo 2:12) Biibiliya onnooniherya nuumuru n’apinaatamu anrowa ohihimuwa arowaka wirimu wira yalamulele ni Kristu oriki arii paahi “ikonto miloko mulokó ni miloko mixexé n’atthu ikonto xexé, yopoliwe w’elapo ya vathí”.​—Wisupulula 14:1, 3.

Mweephattu, ekuvernu eri yotheene ehaana okhalana atthu oowaalamulela, ni Anamoona a Yehova annikupali wira, waahiya oolamulela akhw’awe wirimu, ikonto ikonto sene s’atthu akina anrowa waakhela okumi woohimala. Wanikisa waya, elapo ya vathii, yootatuxiwa okhala eparayiisu yooloka, enrowa okhaliwa ni anamalamuleliwa a Omwene wa Muluku, otheene anrowa wiwelelaka olamulela wa Kristu ni wa oolamulela akhw’awe. Vano, Anamoona a Yehova arii yemereryaka wira elapo ya vathii khenrowa onyaanyiwa, niwi natiri a Biibiliya onimwaakhwanela: “Anaxariya animwakhela elapo yohiyeriw’aya: anrowa okhalaka-mo mahiku othene.”​—Esalimo 37:29; 104:5.

Masi, onrowa orwa sai Omwene wa Muluku? Mwaha wa wiwelela woolakela w’atthu otheene mu ekuvernu ya Muluku? Moovirikana niila, Biibiliya onnooniherya mwekeekhai wi orwa wa Omwene ontthuneya wi Muluku iikhelihe muhina mmiyaha sa elapo ya vathii: “Muluku a wirimu onokumiherya omwene ohinrowa omala . . . Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene.”​—Daniyeli 2:44.

Omwene wa Muluku onrwa silini? Orweela mwa iprofeciya sa Biibiliya sinaakhwanela olelo, Anamoona a Yehova annikupali wira onimoorwa mowaakuveya. Nnovekelani wira nvarerye iprofeciya saahimya vahinatthi wiireya itthu sa “okathi wokiserya” a mukhalelo ola woohiloka. Silempwale mMateyo 24:3-14, Luka 21:7-13, 25-31 ni 2 Timoteyo 3:1-5.

Okhala wira ‘ninnàphenta Apwiya Muluku ahu ni murim’ahu wothene n’iroho ahu yothene n’usuwela wahu wothene n’ikuru sahu sothene, ni omphenta mukhw’ihu ntoko sinìphentahu’, khinikawanyen’ye mu elapo aahiiso nloko. (Marko 12:30, 31) Nosuwelexiwa mwaha wa ophenta onooniherya ahu eriyari ya axinnihu makristau, a maloko otheene. (Yohani 13:35; 1 Yohani 3:10-12) Siso, khinniirela mpantta mmiyaha sa ipolitika sa maloko. Ninneererya okhala ntoko awiixutti oopacerya a Yesu, waale aahimenrya awe wira: “Awo khanirela mpantta wa elapo, sisale miyo kihinirelaka mpantta wa elapo.” (Yohani 17:16 NM) Nnikupali wira okhala oovalaana ni elapo ontaphulela osyaka mukhalelo woohiloka ori woolema olelo va, nihelaka muhina wootha, wiiya, onamuttompe, oraruwa, alopwana anrupihana yaworu, ovarihela muteko ephomee moohiloka, wakokhorela amuluku a ethiru ni itthu sikina soolikana niiya, sinkhoottihiwa mBiibiliyani.​—1 aKorinto 6:9-11; aEfeso 5:3-5; Miteko 15:28, 29.

Nlipelelo na Muhoolo

Anamoona a Yehova annikupali wira okumi orinaahu olelo va, kahiyo okumi yoola paahi okhanle. Nnikupali wi Yehova aahimuruma Kristu veelaponi ya vathii wira oyiiye ephomee awe ya okumi ntoko yowoopola, mmukhalelo woowi atthu awerye okhala axariya ohoolo wa Muluku ni waakhela okumi woohimala mweelapo esyaa. Ntoko sahimmya awe murummwa mukina a Yesu: “Votepa vano, nikhalihiwene anaxariya mwaha w’okhwa wa Yesu.” (aRoma 5:9; Mateyo 20:28) Anamoona a Yehova annimuxukhurela vanceene Muluku ni Mwanawe mwaha wa yowoopola eniiriha oweryaneya okhala ni okumi wa muhoolo.

Anamoona a Yehova anniroromela moomalela okumi wa muhoolo, otikitheren’ye mu ohihimuwa onrwa, mwa Omwene wa Muluku. Nnikupali, ntoko siniixuttiha Biibiliya, wira vaavo mutthu vanikhw’awe, okhala wawe ni okumi onnimala, nto “nihiku nenlo sowupuwela saya sothene sinomala”. (Esalimo 146:3, 4; Ezekiyeli 18:4; Musuweli 9:5) Aayo, okumi wa muhoolo wa alipa-ookhwa onlipa mu wupuweleliwa waya ni Muluku orweela mwa ohihimuwa.​—Yohani 5:28, 29.

Ohiya vo, Anamoona a Yehova anneemererya wira anceene ari ni akumi olelo va, anoovuluwa vaavo Omwene wa Muluku vanrowa awe opwetexa ikuvernu sa olelo ni, ntoko Nowee ni emusi awe yavulunwaaya mu Epula ya Mutaaseke, awo anootthikela okhala akumi wira aphwanye okumi woohimala veelaponi ya vathii yooreera. (Mateyo 24:36-39; 2 Pedru 3:5-7, 13) Masi, nnikupali wi ovuluwa oniweryaneya mu waakhwaniherya sooruma sa Yehova, ntoko sinimimya Biibiliya: “Makhalelo ala anomala . . . nto ole onettela otthuna wa Muluku onokhala mahiku othene.”​—1 Yohani 2:17; Esalimo 37:11; Wisupulula 7:9, 13-15; 21:1-5.

Mwekeekhai, khivanweryaneya olavula sookupali sotheene s’Anamoona a Yehova, masi ninnolattulani wira mphavelase soohimmwa sikina.

Voohikhala wira varii nthoonyeryo nikina, soromoliwa sotheene sa mBiibiliyani vasulu, siri sa Biblia - Solempwa sa Muluku, Solempwa sa eHeberi; ni Watàna wa Nanano, Solempwa sa eKriki.

[Eponto yuulupale ya epaaxina 4]

Hiyo nookuxa nsina na Anamoona a Yehova okhala wira nimmutakiha Yesu.