Okumi Muelapo Esyá Yamurrettele

Mwaweheshesha eniraneya vanikukhuni-vá, munona sayí? Murimaanhu khunavya murrettele, okhala sana ni murruweryo ononeya valé? Ayo ekekhayi. Masi, nireke olohá khuhiya-vó mupuwelelo waithirú okupalela wíra mikhalelo iya sinokhala vathi-vá?

Atthu antcene wanhiheryasa annakhulela. Ikekhayi saleló siri ikhoto, ihasara, etalá, erretta, wúluvala​—nira wi nromole kamosa-kamosa páhi. Vakhanleru siso, yokhala eshariya yanlipelelo. Móweheshesha muholo, Bibiliya onnihimya “sa irimu isyá ni elapo yavathi esyá sinlipelelahu ntokó [Muluku] amutthunkwawe natiri, ni mwaseiya munokhalamo eshariya.”​—2 Pedru 3:13; Yesaya 65:17.

“Irimu isyá” iya ni “elapo yavathi esyá”, ntoko Bibiliya sinihimyawe, khasihiyó irimu isyá sipakiwe níkaruma nnakhala elapo yavathi esyá kahiyó yephattu. Elapo yavathi ni irimu sephattu sipakiwe sokhalela-sene, ni Bibiliya onnoniherya iraka sinrowa okhalaka mahiku othene. (Esalimu 89:36, 37; 104:5) “Elapo yavathi esyá” mukhalelo washariya wátthu ani akhalé vathi-vá, ni “irimu isyá” sinrowa okhala omwene mmosa, khuhiya-vó epoma, yawirimu yokhalela, entthuna olamulelaka mukhalelo-òla wá elapo-ela yavathi yatthu. Masi, tivokhalela okupali wira “elapo yavathi esyá”, khuhiya-vó elapo emosa esyá yowarya, enoweryaneya?

Sana, muthokorerye ekekhayi yowira mikhalelo iya saanira mpantta wayotthuna yephattu ya Muluku ni elapo yavathi-ela. Owo ahiwishathi anamathelana opatcerya atthú mparayísu yelapo yá Wedeni, ni kwavahasa muteko mmosa wamutikiniho: “Muyarelane mukhalasse antcene, musareyasse valapone yavathi, ni mulamuleleke yéla.” (Maphattuwelo 1:28) Ayo, Muluku aphavenle wira akhalanasse anamwane ni omakisani waya emwarya-mwarye eparayísu-aya vathi-vá vothene. Mnamwi vaholo-vaya yaphavelansse ohimwiwelela Muluku, yilawihasaka ohipwanela okhala wamahiku otthene, natiri aMuluku khomurukununshe. Ni onipwanela otaphuliwa mwelaponi esyá!​—Yesaya 55:11.

Mwekekhayi, nhuwo mwiraka nivekelo natithihu, nvekaka wi Omwene waMuluku orwé, nhuwo munivekela wi epoma yawirimu etaphule vathi-vá mwa sonanara ni elamulele elapo eyo esyá. (Mateyo 6:9, 10) Ni nnowerya okhalano nroromelo nowí Muluku onimwakhulá nivekelo yenle, ayo Nulumo nawe ninnimutthukwa natiri: “Atthú ashariya anokhala mulaponi yavathi ni anrowa okhalaka memmo mahiku ni mahiku ohimala.”​—Esalimu 37:29.

Okumi Muelaponi Esyá ya Muluku

Omwene waMuluku onoruha mirerelo selapo yavathi, ottikiheryaká ekekhayi itthu sothene sorera Muluku saphavenlyawe wanipatcerya-wene wi mushovo awe okhalane vathi váva. Onhokha ni mupuwelelo wohitthokeya sinottharuwa okhala, wumalihani waya othene vathi-vá anrowa okhalassa apatthani ekekhayi mmosa ni mukína. Mbibiliyani, Muluku omutthukwa natiri wiraka ‘onomaliha ikhotto mpakha mmalenle elapo yavathi’. “Khenikumihiwa-tho ekatana nloko niwanaka ni nloko nikwaya, nnakhala mano khenishuttiwa-tho ekhotto.”​—Esalimu 46:9; Yesaya 2:4.

Elapo yavathi epurukuma wumaliheryani enrowa okhala ejardim. Bibiliya tonihimya: “Etakhua ni nipurró nowúma sinohakalala, nipurró nowataleya nihinkhaliwa ninrowa otthapa ni ohelela ithutu ntoko njano. . . . Ayo mutakwani munophutuwa mási, mirró sinvira mapurró ohikhaliwa. Etthaya yoreveya núviha enotthikela okhala yossareya nammese, etthaya yovoliwa ntthona, enokhuma anapilu-pilu amási.”​—Yesaya 35:1, 6, 7.

Anokhala mathowa othene owíra nikhale ohakalala vathi-váva mparayísu. Atthu khanvoliwa-tho etala nthowa nohikhalana eyolha. “Etthaya enene enovaha tthiri murruweryo”, Bibiliya tonihimya. (Esalimu 67:6; 72:16) Othene anokhalana sowima samuteko avanryaya, ntoko Mpattusha simutthunkwawe natiri: “Anrowa ophatteyaka mirí savinhu alheke sowimasaya . . . khamphatteya mukina arweke olhá.”​—Yesaya 65:21, 22.

Mwelaponi esyá ya Muluku, atthu khanrowa ophunhanaka nipá súlupale sowunlanheriwa sowattamana kuhiya-vó, nimishasha sohiloka, ayo Muluku omuthukwa natiri: “Anaamutekassa ipá ekhalekemo . . . khanrowa otekaká mukina khiyakhala-mo.” Bibiliya omnimutthukwa-tho natiri: “Khanrowa ovaraka muteko wasiyo.” (Yesaya 65:21-23) Vanonto atthu anokhalana muteko onruwerya ni wotteliha murima. Okumi khonrowa okhulumulaka.

Mokathiaya Omwene waMuluku onottikiherya myatanelo samurrettele sakhanle ojardim Wedeni inama inamarú, ni inama ni atthu. Bibiliya winré: “Ekekhayi, mwiitci, onokhala okathi mmosa ni mwashana apwittipwitthi ni havara mwanene onamumpathi ni mwashana apurrí, ni enhompe yamukhani, ni mwattó onampatcerya massesse, ni enama yonenevá, sothene nipurró nimosa; ni mmiravo mwamukhani tunrowa okhala mukukhula-ayassa.”​—Yesaya 11:6-9; Hoseya 2:18.

Mupuwele, vathi-vá mparayísu irretta sothene ni orakala wérrutthu nave-tho sinopenushiwa! Nulumo naMuluku nolipiherya: “Nnakhala muthu mmosa khonira: ‘Kinowereiwa.’” (Yesaya 33:24) “[Muluku] onovuta-vuta maitho maithorí othene vahikhale-tho okhwá, kivankhala-tho wúnla, nnakhala ikutthó, nnakhala owereya. Itthu sakhalayi soovira.”—Wisupulula 2l:4.

Mota Sheni Wowerya Opwanha

Murimanhu tthirí ovevuweke naanatiri aMuluku anihimya okumi mwilaponi mwawe esyá yasharya. Ni, varokhalarú wira akinaku wanhiheryasa yonelaka okhala etthu yorreerrasha okhala ekekhayi okumiheryiwa wa iparakha iya, iya khasitempe orreerrasha vooweryaneyaka ophattuwa wa Mpattushahu ophenta.​—Esalimu 145:16; Mikeya 4:4.

Ephattu-ene nariki nikhalé mahiku othene mparayísu yavathi enoorwa, sokhala sovekeliwa simpwanelela wiriwa. Yesu othonherya emosa sá seiya sulupalesha, ahimyaka munivekeloni waMuluku: “Elá entaphulela okumi ohinimala, enruha wosuwelani nhuwo, Muluku mmosa pahi aekekhayi, ni yole mwamurunmanhu, Yesu Cristu.”​—Yohane 17:3.

Sisa-sá, yakhala wira tthiri nimniphavela okhala elapo esyá ya Muluku vanthuneya opatcerya wishutta yotthuna ya Muluku ni khuyavara yeyo. Ayo, ekekhayi: “Elapo ela enovira, sisa navé neentthunaya, masi yole oniira entthuna Muluku onokhala mahiku othene”, voowi nipwanhe vohimala-thó iparrakha iya sinrowa oyíheriwa ni Mpattushahu ophenta.​—1 Yohane 2:17.

Vóhikhala wira varí nthonheryo nikina, soromoliwa sothene sa Mbibiliyani vasulu siri sá Tradução do Novo Mundo das Escrituras Sagradas​—Com Referências.