Mpantta 10
Elapo Esya Yootepa Oreera Yeeyo Enrowa Opakiwa Ni Muluku
1, 2. Etthu xeeni enrowa wiiraneya nuumala ovira ekhotto ya Harmagedoni, yeeyo enrowa omaliha olumwenku ola wootakhala?
NUUMALA Muluku omaliha olumwenku ola wootakhala mu Harmagedoni, exeeni enrowa wiiraneya? Nto onrowa opacerya okathi musya wootepa oreera. Nuumala wooniherya ororomela waya olamulelo wa Muluku, ale anrowa woopowa mu Harmagedoni, anrowa okelihiwa mu elapo esya. Tthiri onrowa okhala okathi musya wootepa ohakalaliha, vaavo apinaatamu anrowa aya ovahiwa mareeliho anikhuma wa Muluku!
2 Ahooleliwaka ni Omwene wa Muluku, ale anrowa woopowa anoopacerya opaka eparayiisu. Awo anrowa orumeelaka ikuru saya wira apakeke itthu sinikumiherya mireerelo wa atthu otheene anrowa okhalaka okathi owo. Elapo ya vathi enoopacerya okhalihiwa etthoko yooreera, ya murettele ni yoohakalaliha wa apinaatamu.
Exariya Enrowa Oranttela Otakhala
3. Woopowa xeeni wowaakuveya onrowa okhala nuumala Harmagedoni?
3 Itthu iya sotheene sinrowa wiiraneya nuumala opwetexiwa olumwenku ola wa Satana. Khasinrowa-tho okhala itiini soovirikana sowootha, maloko ookawanyeya aahiiso ikuvernu. Khasinrowa-tho okhala soohimmwa soowoka sa Satana, seiyo siniwoototha atthu; mapuro otheene anipakiwa itthu iyo anoopwetexiwa vamosa ni mukhalelo ola wa Satana. Nkahaya muupuwelele: olumwenku wotheene wootakhala wa Satana onoomalihiwa! Tthiri, onrowa okhala woopowa wuulupale!
4. Mutthokiherye mirukunuxo sa miixuttiho sinrowa wiiraneya.
4 Nto, miyuupuwelelo soohiloka sa olamulelo wa apinaatamu sinrowa oranttelihiwa ni sowiixuttiha sooloka sinkhuma wa Muluku. “Atthu anyu othene anrowa okhala awixutti aka [a Yehova]”. (Yesaya 54:13) Ni sowiixuttiha iya sooloka sinrowa ovahiwaka khuta mwaakha, “tthiri atthu othene a mulaponi anosareya osuwela w’Apwiya, ntoko vansareyaya màsi mphareya”. (Yesaya 11:9) Atthu khanrowa-tho wiixutta itthu sootakhala, masi “atthu othene anoxutta exariy’anyu”. (Yesaya 26:9) Khuta nihiku, atthu anrowa okhalanaka miyuupuwelelo ni miteko sooloka.—Miteko s’Arummwa 17:31; aFilipi 4:8.
5. Exeeni enrowa owiiraneela alipa-ootakhala, ni otakhala wotheene?
5 Tivonto, khonrowa-tho okhala wookotthana, otuphelana, orupihiwa mootupheliwa, wiiya, aahiiso ekrime ekina. Khuuvo mutthu onrowa ohaawaka mwaha wa miteko sootakhala sa akina. Eliivuru ya Miruku 10:30 enihimya wira: “Mutthu òrera murima khanikwattuliwa: mutakhali khanikhala-tho mulaponi”.
Ottikiheriwa Ekumi Yooloka
6, 7. (a) Itthu xeeni sootakhala sinrowa omalihiwa ni olamulelo wa Omwene? (b) Yesu oonihenrye sai etthu eyo, okathi aari awe valaponi?
6 Mu elapo esya, itthu sotheene sootakhala sikhumelenle mwaha wa yoottheka yoopacerya, sinoomalihiwa. Mwa ntakiheryo, olamulela wa Omwene onrowa omaliha owereiwa ni wuuluvala. Olelo va, nnaamwi murina ene ekumi yooloka vakhaani, ekeekhai ti yoowi, okathi onuuluvala anyu, maitho anyu annirweela evaasi, maino anyu annimora, munnipacerya ohiiwa saana, erutthu anyu ennirweela manyete, itthu sikina siri mwerutthuni mwanyu sinnitteettheya, wanikisa waya khiyakhwa.
7 Masi itthu iye sootakhala nranve ahu wa axitiith’ihu oopacerya, sinoomala moohipisa. Munnuupuwela ele Yesu aapanke awe ori valaponi, voohimya sa ekumi? Biibiliya onitthokiherya so: “Mittitthi sulupale s’atthu sahirowa wa yowo, simuroihelaka atthu òrakala n’alipa-òhona n’alipa-òtuthunya n’alipa-òhilavula n’aretta akina anjene. Arett’awo yanàtaleliwa oholo wa Yesu: yowo anavoniha. Atthu awo yahithamala, ewonaka ale yahalavula elavulaka, alipa-òrakala evonihiwaka, ale yatuthunya yettaka orattene, ale yahona yònaka”.—Matheyo 15:30, 31.
8, 9. Mutthokiherye ohakalala onrowa okhala mu elapo esya, nuumala okhalihiwa ekumi yooloka.
8 Tthiri onookhala ohakalala wuulupale mu elapo esya, vaavo iretta sahu sotheene sinrowa aya omalihiwa! Ohaawa onikumiheriwa mwaha wa iretta, khonrowa-tho onoopopiha. “Khavo-tho onkela ohimya wira: ‘Miyo ki muretta’”. “Mahiku awo anotthukuwa maitho àlipa-òhona, anotthukuwa màru àlipa-òhiwa; alipa-òtuthunya anotupha ntoko nahe: alipa-òhilavula anokhuwela n’utteliwa murima”.—Yesaya 33:24; 35:5, 6.
9 Niireke wira khahiyo vanrowa okhala vootepa oreera, ovinya khuta nihiku nisuwelaka wira vano nookhalana ekumi yooloka? Khahiyo vanrowa okhala vootepa oreera wa ale yuuluvanle oweha wira aattikiheriwa okumi wa omiravo, ni anoowerya okhalana okumi woohittheka yoowo Adamu ni Eva yaarina aya wanipacerya? Biibiliya onnileiherya wira: “Siso irutthu saya sinotthikela okhalana ikuru s’omiravo aya: sinokhala-tho ntoko mahiku ònamwane aya”. (Yobi 33:25) Vanrowa okhala voohakalaliha waariha ookulu anikhaliherya woona saana, oriha maakina anikhaliherya wiiwa oratteene, attootto, ikarinyu s’alipa-oorakala ni mirette! Ixiripitali, matothoro, ni ale aniloola maino, itthu iyo khasinrowa-tho otthuneyaka.
10. Exeeni enrowa omukhumelela naakhwa?
10 Vano atthu anrowa okhalana ekumi yooloka ntoko eyo, khanrowa ophavelaka okhwa. Awo khanrowa okhwa, mwaha woowi apinaatamu khanrowa-tho ohapuweliwa ni ohimalela ni okhwa oranve aya. Kristu “ohana okhala mwené, mpakha Muluku wapweha awanani othene vathí va inawu sawe. Nwanani onrowa okiserya opwetexiwa, okhwá”. “Eparakha Muluku ennivahawe mahala enniphwanyiha ekumi ehinimala”.—1 aKorinto 15:25, 26; aRoma 6:23; munwehe-tho Yesaya 25:8.
11. Moota xeeni Wisupulula onilavula awe mmasu vakhaani mireerelo sinrowa okhala mu elapo esya?
11 Elavulaka mmasu vakhaani mireerelo seiyo Muluku oothokorerya onrowa awe waavaha apinaatamu mParayiisu, eliivuru yookiserya ya Biibiliya enihimya wira: “Owo [Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.—Wisupulula 21:3, 4.
Otthika w’Alipa-ookhwa
12. Moota xeeni Yesu oonihenrye awe owerya wawe wa ohihimuxa aavahiwe awe ni Muluku?
12 Yesu aahipaka itthu sikina, ohiya paahi waavoniha aretta ni alipa-oorakala. Nave-tho owo aahaahihimuxa atthu mmahiye. Tivonto, owo ahooniherya owerya wa ohihimuxa Muluku anvanhe awe. Niireke wira munnuupuwela okathi yoole Yesu aaphin’ye awe vatthokoni va mulopwana mmosa aakhweliwe mwanawe mwaamuthiyana? Yesu aahimuhimeerya mwaamuthiyana ole aakhwiiye oriki: “Mwanamwane, kiniwirelani ti mi: nvenyé!” Exeeni yiiranen’ye? “Mwarusi uwo ahivenya nananoru, khupajerya wetta”. Nuumala oweha etthu eyo, atthu yaari vaavale “yahituthuwa, khutikinihiwa vanjene”. Awo khiyaawerya wiipithiha ohakalala waya!—Marko 5:41-43a; munwehe-tho Luka 7:11-16; Yohani 11:1-45.
13. Atthu xeeni anrowa ohihimuxiwa?
13 Mu elapo esya, “ale òrera murima n’ale òtakhala murima, anohihimuwa mokhwani”. (Miteko s’Arummwa 24:15) Okathi owo, Yesu onrowa ovarihela muteko owerya ovahiwe awe ni Muluku wira aahihimuxe atthu, okhala wira owo oohimya oriki: “Miyo ki ohihimuwa n’ikumi. Ole onikamini, hatá anakhwaru, onokhala-tho mukumi”. (Yohani 11:25) Nave-tho oohimya oriki: “Onophiya okathi onìraya atthu othene ari mmahiye [mmuupuweleloni mwa Muluku], yiwe nsu na Mwana a Mutthu [Yesu], ekhume mmahiye”.—Yohani 5:28, 29.
14. Okhala wira khonrowa-tho okhala okhwa, itthu xeeni sihinrowa-tho okhala?
14 Vanookhala ohakalala wuulupale elapo yotheene, vaavo ikrupu sinceene sa atthu yaakhwiiye anrowa aya ohihimuxiwa wira yakhaleke vamosa ni ale anaaphenta aya! Khasinrowa-tho okhala soohimmwa sa naakhwa mujornaaleni, seiyo sinaariipiha murima amusi akhweliwe. Ohiya vo, sinrowa okhala soohimmwa sa atthu asya ahihimuxiwe wira yaatteeliheke murima amusi aya ale yaaphenta. Khivanrowa-tho okhala ovithana, mapuro ansukiwa ettuurwa ya mirutthu soopahiwa, mapuro anipahiwa anaakhwa, aahiiso mahiye!
Elapo ya Murettele Wekeekhai
15. Moota xeeni eprofesia ya Mikeya enrowa aya waakhwaniheriwa moomalela?
15 Onookhala murettele wekeekhai mmikhalelo sotheene sa okumi. Ikhotto, ale anikumiherya ikhotto, ni opakiwa ikapwitthi, itthu iyo sotheene sinoomala. Mwaha wa xeeni? Mwaha woowi ilapo, maloko ni makhuli ookawanyeya, sinoomala. Tivonto, mmukhalelo woomalela, “nloko nimosa khininvenya-tho otuphela nloko nikina: amiravo khanrowa-tho wixuttihiwa owana ekhotto”.—Mikeya 4:3.
16. Etthu xeeni Muluku onrowa awe opaka wira ekhotto ehitthikele?
16 Ela pooti okhala etthu yootikiniha mwaha woowi soohimmwa sa apinaatamu soosareya ikhotto. Itthu iyo siniiraneya mwaha woowi apinaatamu anilamuleliwa n’atthu ni axetwani. Mu elapo esya, yeeyo enrowa olamuleliwaka ni Omwene wa Muluku, etthu enrowa ohimmwaka tiila: “Murwé, mone miteko sovuwa s’Apwiya . . . Awo àmaliha ekhotto mulaponi mothene: ahintakasa miyura ni mavaka èkhotto, àhonona ni moro iyuma sothene s’ekhotto”.—Esalimo 46:9, 10.
17, 18. Mu elapo esya, wataana xeeni onrowa okhala eriyari ya atthu ni inama?
17 Atthu ni inama anookhalaka ni murettele, ntoko saary’aya wEedeni. (Maphattuwelo 1:28; 2:19) Muluku onihimya so: “Mahiku awo, kinimwatàna n’inama sowali n’axinuni a wirimu n’inowa sotakhala [ni] . . . Kinimwavaha atthu aka omumula ni murettele”.—Hoseya 2:20.
18 Murettele owo onrowa wunnuwa mpakha vaavi? “Vano mwiji onokhalaka vamosá n’ipwittipwitthi: havara onimummathiki vamosá ni mwapuri. Mwanyompe ni mwakharamu animolyaka malaxi vamosá: mwanamwane onrowa wettihaka n’ulyiha inama iyo”. Inama khasinrowa-tho woopopihanaka aahiiso owoopopihaka atthu. Hata “kharamu onrowa olyaka malaxi ntoko enyompe”!—Yesaya 11:6-9; 65:25.
Elapo Enrowa Okhalihiwa EParayiisu
19. Elapo enrowa okhalihiwa exeeni?
19 Elapo yotheene enrowa okhalihiwa eparayiisu wa apinaatamu otheene. Ti nthowa naya Yesu aawerya awe omuhimeerya mulopwana ole aamwaaminni oriki: “Munrowa okhala ni miyo mParayiisu”. Biibiliya onihimya wira: “Etakhwa n’itthaya yowuma etthapeke: othako otteliweke murima, ophuwaka ithutu. . . . Màsi anophattuwa mothakoni eriyari: miró sinophattuwa nipuro nowuma”.—Luka 23:43, NM; Yesaya 35:1, 6.
20. Nthowa xeeni etala ehinrowa aya-tho waahaaxa apinaatamu?
20 Okathi Omwene wa Muluku onrowa aya olamulelaka elapo, etala khenrowa waahaaxaka atthu. “Mmatta mothene muruwerye solya sinjene: mattumuxa esareye ipyó”. “Miri sa mmatta sinimwima mihokorokho saya, imatta sinovaha solya saya. Atthu a nloko naka anokhala ni murettele mulaponi mwaya”.—Esalimo 72:16; Ezekiyeli 34:27.
21. Exeeni enrowa wiiraneya voohimya sa atthu ahirina ipa, mittetthe sinikhala atthu oohaawa, ni mittetthe soosareya ekrime?
21 Khonrowa-tho okhala osikhini, atthu ahirina ipa, mittetthe sinikhala atthu oohaawa, aahiiso mittetthe soosareya ekrime. “Atthu awo anrowa oteka ipa saya, ekhaleke memmo: anrowa ophatteya miri s’evidera, elyeke mihokorokho saya: khanrowa oteka ipa saya, vano akina ekhaleke-mo: khanrowa ophatteya miri saya, vano akina elyeke mihokorokho sene”. “Khula mutthu onokhala ni murettele vamuttutthini wa mimanka sawe, mukhitte mwa mikhaju sawe: khavo onrowa wavelaveliha”.—Yesaya 65:21, 22; Mikeya 4:4.
22. Biibiliya onitthokiherya sai mareeliho a olamulelo wa Muluku?
22 MParayiisu, apinaatamu anooreelihiwa ni itthu iya sihimmwale, ni sikina. Esalimo 145:16 ennimuhimya Muluku eriki: “Munnitthukula matat’anyu, munnavaha yolya atthu othene anaphentanyu”. Ti mulattu aya nihintikhina ahu eprofesia ya Biibiliya yaahimyaka wira: “Vano atthu òmàla anoreriwa vathí-va: anokhala-mu ni murettele womalela. . . . Anaxariya animwakhela elapo yohiyeriw’aya: anrowa okhalaka-mo mahiku othene”.—Esalimo 37:11, 29.
Itthu sa Khalai Sinoovira
23. Moota xeeni Omwene wa Muluku onrowa aya omaliha ohaawa wotheene oniiranenle?
23 Olamulelo wa Omwene wa Muluku onoomaliha itthu sootakhala sotheene siwiiranenle apinaatamu mu iyaakha ikonto thanu namosa sivinre. Ohakalala onrowa okhala okathi owo, onoovikana ohaawa wotheene waakhumelenle apinaatamu khalai. Atthu khanrowa oxankiheyaka ni miyuupuwelelo sooriipiha murima sa ohaawa owiiranenle khalai. Vakhaani-vakhaani, miyuupuwelelo ni miteko sooloka sinrowa aya okhalana khuta nihiku, sinoottipiha miyuupuwelelo soowereya.
24, 25. (a) Etthu xeeni Yesaya ohimmy’awe vahinatthi, yeeyo enrowa wiiraneya? (b) Ninsuwela sai wira miyuupuwelelo sa ohaawa ovirinhe ahu khalai sinoomala?
24 Muluku oothokorerya onihimya wira: “Miyo kinrowa opattuxa irimu isyá [ekuvernu esya ya wiirimu enrowa waalamulelaka apinaatamu] n’ilapo esyá [apinaatamu a xariya]: itthu sa khalai khasinupuweliwa-tho, itthu sivinre sinoliyaliwa khuluwi. Ohiya vo, miyo kinrowa opattuxa otthapa n’upuha wohimala”. “Vano ilapo sothene siri somàleleya, sikhalaka ni murettele: atthu othene annòpa elulu, etteliwaka murima”.—Yesaya 14:7; 65:17, 18.
25 Nto, orweela mwa Omwene awe, Muluku onrowa omaliha moomalela mukhalelo wootakhala yoowo ovirinhe okathi munceene okhalaka. Owo onimooniherya onithokorerya wawe mu okathi woohimala, onivahaka mareeliho yaawo anrowa ovikana ohaawa nivirinhe ahu khalai. Mixankiho nivirinhe ahu khalai sinrowa okhala itthu sihiniwereiha murima wuupuwelela, akhala wira nnoophavelaka wuupuwelela.
26. Nthowa xeeni Muluku onrowa awe oliverya ohaawa wotheene ovirinhe ahu khalai?
26 Ti siiso Muluku onrowa awe oliverya ohaawa, waaniheryasa ovirinhe ahu mu elapo ela. Owo onnisuwela wira hiyo khahiyo nroolakela wira niyariweke oohimalela, masi nravihiwe ni axitiith’ihu oopacerya. Hiyo khahiyo nilakenle wira niyariwe elapo ela ya Satana, masi Adamu ni Eva yaakhanle oororomeleya, hiyo naarowa oyariwa mparayiisu. Tivonto, omoriwaka ikharari vanceene, Muluku onrowa oliverya vanceene itthu sootakhala niphwanyihiwe ahu.
27. Iprofesia xeeni sinrowa waakhwanihereya moomalela mu elapo esya?
27 Mu elapo esya, apinaatamu anookhalana otaphuwa ohimmwale mu aRoma 8:21, 22, oni: “Okhala wira seiyo-tho [soopattuxiwa] sinrowa wòpoliwa mwakhalihiwaya ipottha, mwapwetexiwaya, wira sikaweliwe otaphuwa n’uvuwa w’àna a Muluku. Nosuwela tthiri wira sopattuxiwa sothene nlelo sinnìpulela, sinnihawa ntoko muthiyana ayaraka”. Okathi owo, atthu anooweha waakhwanihereya moomalela wa nivekelo nni: “Omwene anyu onrwele hiyo; otthuna wanyu wireye ntoko wirimu siso vathí-va”. (Matheyo 6:10) Mikhalelo sootepa oreera seiyo sinrowa okhala mParayiisu valaponi, sinrowa othoonyeryaka mikhalelo siri wiirimu.
[Ilatarato siri epaaxina 23]
Mu elapo esya, alipa oowuuluvala anookhalana erutthu ya omiravo
[Elatarato eri epaaxina 24]
Iretta sotheene ni ohiiwerya-werya wotheene sinoomala mu elapo esya
[Elatarato eri epaaxina 25]
Mu elapo esya, alipa-ookhwa anoohihimuxiwa
[Elatarato eri epaaxina 26]
‘Awo khanrowa-tho wixutta owana ekhotto’
[Ilatarato siri epaaxina 27]
Atthu ni inama, anrowa okhalaka hoothe ni murettele woomalela mParayiisu
[Elatarato eri epaaxina 27]
‘Muluku onotthukula matat’awe [wira] avahe yolya atthu othene’
[Elatarato eri epaaxina 28]
Omwene wa Muluku onooliverya vanceene ohaawa wotheene ovilenle ahu