Nlipelelo Nooreera na Muhoolo

Satana ni axetwani awe khanrowa-tho waawoka apinaatamu mu okathi munceene. Yehova oomurihela vathii Satana ni axetwani awe. (Wisupulula 12:9) Muhoolo moohipisa va, Muluku onrowa-tho omphukela Satana ni axetwani awe. Murummwa Yohani, oonihiwaka ni Muluku, aahimmye wira: “Numalá, kahona nlaikha nakhuruwa wirimu, nikunxene mmatatani mihulelo sa mwepiphini mowixa n’ikwirinti yolemelexa. Nahivara enow’ele yulupalexa ya khalai, eyo p’iyo, Nwanani (onìhaniwa-tho Satana), khumutthukwa mpakha iyakha ekonto emosá. Nlaikha nlo nahimurihela Satana mowixani, nahitthuka ni muhulelo nipuro nlo n’epiphi, khuhela ekanyeryo wira ahiwotothé-tho atthu, mpakha ovira iyakha iyo ekonto emosá. Savira iyakha iyo, owo ohana otaphuliwa okathi vakhani”. (Wisupulula 20:1-3) Vattuli vaya, Diabo ni axetwani awe anrowa opwetexiwa moomalela.—Wisupulula 20:10.

Atthu ootakhala a valaponi anrowa-tho opwetexiwa.—Esalimo 37:9, 10; Luka 13:5.

Alipa-ookhwa Anookhala-tho Akumi!

Nuumala opwetexiwa Satana ni axetwani, Yehova onrowa waaruuhela apinaatamu mareeliho manceene. Muupuweleke wira alipa-ookhwa kharina okumi, khakhanle-tho. Yesu aahilikanyiha okhwa ni mutthu onrupa—orupa wuulupale ohinloha awe etthu. (Yohani 11:11-14) Yesu aahihimya eyo okhala wi aahisuwela wira wamphiya okathi vaavo yaale anirupa mookhwaani vanrowa aya ohihimuxiwa. Owo aahimmye wira “onophiya okathi onìraya atthu othene ari mmahiye, . . . ekhume mmahiye”.—Yohani 5:28, 29; mulikanyihe ni Miteko 24:15.

Awo anrowa ottikiheriwa okumi valaponi vaava. Mmapuro mwa olaleiwaka naakhwa, mihupi soohakalaliha sinrowa okhala sa ohihimuwa wa alipa-ookhwa! Moota vanrowa aya okhala voohakalaliha owaakhela oophentiwa ahu akhumaka mmahiye!