EParayiisu mu Elapo ya Vathii

Atthu a makhuli oovirikana elyaaka hoothe oParayiisu

Yehova onrowa omalamaliha sootakhala sotheene sikumiheriwe ni Satana. Yehova ompaka Yesu okhala Mwene a elapo yotheene. Okathi wa olamulelo awe, elapo ya vathii enrowa opakiwa okhala eparayiisu.—Daniyeli 7:13, 14; Luka 23:43, NM

Yehova ooleiherya itthu iya:

SOOLYA SINCEENE: “Etthaya ehìmiha mihokorokho sowatta: Apwiya Muluku ahu ànireriha”. “Mmatta mothene muruwerye solya sinjene: mattumuxa esareye ipyó”.—Esalimo 67:7; 72:16.
EKHOTTO KHENROWA-THO OKHALA: “Murwé, mone miteko sovuwa s’Apwiya: mone sotikiniha sìralyaya vathí-va. Awo àmaliha ekhotto mulaponi mothene”.—Esalimo 46:9, 10.
ATAKHALI KHANROWA OKHALA: “Vekekhai, atthu òtakhala anrowa opweteya . . . Atakhali anorimela nananoru: nyuwo munimwaphavela, muhaphwanyé”.—Esalimo 37:9, 10.
IRETTA, ORIIPIWA MURIMA, AAHIISO OKHWA KHISINKHALA-THO: “Mahiku awo anotthukuwa maitho àlipa-òhona, anotthukuwa màru àlipa-òhiwa; alipa-òtuthunya anotupha ntoko nahe: alipa-òhilavula anokhuwela n’utteliwa murima”.—Yesaya 35:5, 6.

“Muluku onrowa okhalaka ‘vamosá ni yawo’. Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.—Wisupulula 21:3, 4.

Moovirikana ni Satana ni axetwani, Yehova khonkhala-khala oothaka. Etthu eri yotheene Yehova enileiherya awe enniiraneya tthiri. (Luka 1:36, 37) Yehova onnoophentani nto oniphavela wira mukhaleke mParayiisu yoowo onrowa awe ompaka. Nto mulavule ni Anamoona a Yehova wira mwiixutte sinceene sa ikeekhai sooreera siri mu Nuulumo na Muluku. Mwavarihela muteko ekeekhai eyo mookumini mwanyu, nyuwo munrowa otaphuwa mu opottha wa itthu sowoothiwa, woova ethiru, ni ohisuwela. Mu ovira wa okathi, munrowa-tho otaphuliwa mu opottha wa yoottheka ni okhwa. Ntoko siisaale Yesu saahimmya awe, “munosuwela ekekhai, vano ekekhai yeyo enimokhalihani òtaphuwa”.—Yohani 8:32.