Yoosoma 1

Muluku Onnolattulani Wi Mukhale Mpatthani Awe

Muluku omphavela wi nyuwo mukhale mpatthani awe. Mootoko wuupuwela wi mwanwerya okhala mpatthani a Mutthu mmosaa mulupalexa a Olumwenku? Abrahamu, yaakhanle khalai, yaahihimmwa okhala mpatthani a Muluku. (Yakobo 2:23) Akina aromolasiwe mBiibiliyani navee yahikhalana ompatthani ni Muluku ni yahireelihiwa vanceene. Olelo va, atthu a mapuro otheene a elapo ya vathii annikhala apatthani a Muluku. Nyuwo nave-tho munoowerya okhala mpatthani a Muluku.

Okhala mpatthani a Muluku ti vooreerexa ovikana okhala mpatthani apinaatamu. Muluku khoniwuulihiha muru apatthani awe oororomeleya. (Esalimo 18:25) Okhala mpatthani a Muluku ti vooreera ovikana okhalana mihakhu. Vaavo thaaciri vankw’awe, musurukhu’awe onihala ni atthu akina. Masi arina ompatthani ni Muluku aakhalana muhakhu ohinrowa okuxiwa ni mutthu mukina.—Matheyo 6:19.

Atthu akina naaniherya animoohiihani nyuwo wiixutta sikina sa Muluku. Hataa axipatthani akina ni amus’inyu naaniherya animokhoottiheryani. (Matheyo 10:36, 37) Vaavo akina vanonyoholayani aahiiso owoopopihani, mwiikoheke: ‘Kiniphavela wahakalaliha aani, apinaatamu aahiiso Muluku?’ Mupuwele ela: Mwaakhoottiheriwe olya, mwamweemererya? Nnaari! Vantthuneya olya wi mukhale akumi. Masi Muluku onoowerya wookhalihani akumi mwa mahiku otheene! Vanonto, muheemererye wira mutthu mukina ookhoottiheryeni wiixutta moota muniir’anyu mukhale mpatthani a Muluku.—Yohani 17:3.