YOOSOMA 08
Nyuwo Munoowerya Okhala Mpatthani a Yehova
Niireke vanniweryaneya okhala mpatthani a mutthu muhinimusuwela anyu? Nnaari! Etthu emosaru enniiraneya ni Yehova. Owo oniphavela wira mukhale mpatthani awe. Nave oniphavela wira mmusuwele oratteene, niire so, musuwele mikhalelo sawe. Nave oniphavela wira musuwele enamuna onipaka awe itthu ni nlipelelo nooloka onaavaha awe apinaatamu. Yehova oniphavela wira musuwele itthu iyo ni mukhale mpatthani awe. Niireke vanniweryaneya okhala mpatthani a Muluku? (Mmusome Yakobo 2:23.) Etthu xeeni munireerela anyu opaka wira mukhale mpatthani a Muluku? Biibiliya onnaakhula makoho awo. Nave onnooniherya wira okhala mpatthani a Yehova etthu yootepa otthuneya ovikana itthu sotheene.
1. Nlattulo xeeni Yehova onoovahaaweni?
“Mmwaattameleke Muluku, vano owo onoowaattamelani”. (Yakobo 4:8) Moolumo ala anitaphulela exeeni? Moolumo ala, anitaphulela wira Yehova onnoolattulani wira mukhale mpatthani awe. Atthu akina anuupuwela so: ‘Kinrowa okhala sai mpatthani a Muluku kihitonko onweha?’ Masi musuweleke wira Biibiliya onnihimya itthu sinceene sinnikhaliherya omusuwela Muluku ni omwaattamela. Nto vaavo nimmusoma ahu Biibiliya ompatthani ahu ni Muluku onnilipa hata nihitonko omoona.
2. Exeeni emmwiiriha Yehova okhala mpatthani ootepexa oloka?
Yehova onnoophentani vanceene. Owo onnaavikana atthu otheene. Owo oniphavela wira nyuwo muhakalaleke ni oniphavela wookhaliheryani okathi wotheene munikhalana anyu mixankiho. Nto nyuwo pooti ‘onvahererya Muluku mixankiho sanyu sotheene, maana owo onnookhapelelani’. (1 Pedru 5:7) Okhala wira nyuwo mwa mpatthani awe, okathi wotheene Yehova onrowa wookhaliheryani, woomaalihani ni woowiriyanani.—Musome Esalimo 94:18, 19.
3. Wira nikhale apatthani awe, Yehova oniphavela wira nipakeke exeeni?
Yehova onnaaphenta atthu otheene, masi ‘onnipatthana n’atthu òloka’. (Miruku 3:32) Nto Yehova oniphavela wira apatthani awe yiimananiheke opaka itthu onoona awe okhala sooloka ni okhootta opaka itthu onoona awe okhala soohiloka. Atthu akina anuupuwela so: ‘Miyo nkinrowa owerya opaka itthu sotheene Muluku onikivekela awe’. Masi muhiliyale wira Yehova toophenta. Nto Yehova onniweemererya okhala apatthani awe atthu otheene animphenta ni murima aya wotheene ni aniimananiha opaka itthu sinimusivela.—Esalimo 147:11; Miteko 10:34, 35.
MWIIXUTTE ITTHU SIKINA
Nwehe itthu mukhanle anyu oopaka wira mukhale mpatthani a Yehova. Nto munimoona wira Yehova mpatthani ootepexa oloka olumwenku wotheene.
4. Abrahamu aari mpatthani a Yehova
Ele Biibiliya onihimya awe sa Abrahamu (yoowo-tho iihaniwa Abramu) enninikhaliherya woona ele enitaphulela aya okhala mpatthani a Muluku. Musome yowiiraneya ya Abrahamu Maphattuwelo 12:1-4. Nuumala-vo mwaakhule makoho anittharelana:
Etthu xeeni Yehova anvekenle awe Abrahamu?
Yehova aamuleihenrye exeeni Abrahamu?
Etthu xeeni Abrahamu aapanke awe?
5. Etthu Yehova oniphavela awe wira apatthani awe apakeke
Okhala wene, sookhala itthu nimphavela ahu wira apatthani ahu apakeke.
Itthu xeeni muniphavela anyu wiireliwa ni apatthani anyu?
Mmusome 1 Yohani 5:3, nuumala-vo mwaakhule nikoho ninttharelana:
Yehova oniphavela wira apatthani awe apakeke exeeni?
Wira nimwiiwelele Yehova, nihaana opaka marukunuxo a mweettelo ahu ni omutthu ahu. Mmusome Yesaya 48:17, 18, nuumala-vo mwaakhule nikoho ninttharelana:
Xeeni Yehova onaavekela awe apatthani awe opaka marukunuxo?
Mpatthani eekeekhai onintumererya opaka itthu sinrowa onikhapelela ni oniphwanyiha mireerelo. Eyo ti etthu Yehova onipaka awe
6. Itthu Yehova onaapakela awe apatthani awe
Yehova onnaakhaliherya apatthani awe ovilela ni oxintta mixankiho. Nwehe EVIIDIYU, nuumala-vo mwaakhule nikoho ninttharelana.
Muthiyana munwenhe anyu nviidiyuni aaniwanana moonelo ni muupuwelo woohiloka. Masi Yehova aamukhalihenrye sai?
Mmusome Yesaya 41:10, 13, nuumala-vo mwaakhule makoho anittharelana:
Yehova aaleihenrye exeeni apatthani awe?
Munoona wira Yehova mpatthani ooloka? Mwaha wa xeeni?
Apatthani eekeekhai anninikhaliherya khula okathi. Nave Yehova onimookhaliheryani
7. Wira nikhale apatthani a Yehova nihaana olavula ni yena ni owiriyana ele onihimya awe
Vaavo apatthani anivaanela aya, ompatthani aya onnilipa vanceene. Musome Esalimo 86:6, 11, nuumala-vo mwaakhule makoho anittharelana:
Ninlavula sai ni Yehova?
Yehova onlavula sai ni hiyo?
Okathi ninvekela ahu, hiyo ninlavula ni Yehova. Nto Yehova onnilavula ni hiyo okathi nimmusoma ahu Biibiliya
ATTHU AKINA ANIHIMYA WIRA: “Khivaniweryaneya okhala mpatthani a Muluku”.
Soolepa xeeni sa mBiibiliyani mwaarowa anyu orumeela wira mooniherye wira vanniweryaneya okhala mpatthani a Yehova?
IPONTO SUULUPALE
Yehova oniphavela wira nyuwo mukhale mpatthani awe ni onimookhaliheryani omwaattamela.
Wuuluula
Yehova onaakhaliherya sai apatthani awe?
Xeeni Yehova oniphavela awe wira apatthani awe apakeke marukunuxo mookumini mwaya?
Niireke munuupuwela wira khivaniweryaneya okhala mpatthani a Yehova? Etthu xeeni eniwiirihani wuupuwela siiso?
NWEHE ITTHU SIKINA
Okhala mpatthani a Muluku onrowa wookhaliheryani sai opaka marukunuxo mookumini mwanyu?
“Yehova, Muluku Munireerela Anyu Omusuwela” (Owehaweha, 15 a Feverero, 2003)
Nwehe etthu enrowa wookhaliheryani okhala mpatthani a Muluku.
“Kinrowa Okhala Sai Mpatthani a Muluku?” (Amiravo Annikoha—Waakhuliwa wa Makoho, Evolume 2, muru 35)
Nwehe moota okhala mpatthani a Yehova wooponle aya okumi wa muthiyana mmosa.
Entrevista enittharelana nwiriyane ni nwehe moota amiravo akina animoonela aya Yehova.