Yoosoma 13

Maxintta Ni Okhwiri Ti Sootakhala

Satana oniphavela wira nyuwo mpakeke maxintta. Anceene annivaha isatakha wa amuhavinre aya aahiiso minepa sootakhala wira yiixaakihe ni yoonanara. Anipaka eyo yoovaka owerya wa minepa sootakhala. Annaawara anela aahiiso ikhulula sa maxintta. Anniwurya “mirette” aahiiso annoottiha erutthu aya okhala wira anuupuwela okhalana owerya wa maxintta. Akina aniixaathi mpaani aahiiso anivitha vathii yupuwelaka wira sinowaakiha. Akina anivarihela muteko “mirette” sa maxintta okhala wira anikupali wi seiya sinowiiriha okhumela saana mu nakoso, mu isame sa oxikola aahiiso mu wurya.

Naakiho nri ti fataari moomukhootta Satana okhalana Yehova ntoko mpatthani anyu. Yehova Muluku ni malaikha awe arii ooweryexa onvikana Satana ni minepa sootakhala. (Yakobo 2:19; Wisupulula 12:9) Yehova oniphavela wooniherya owerya wawe owaakihaka apatthani awe—ale ari oororomeleyexa.—2 Wahala 16:9.

Nuulumo na Muluku nnihimya wira: ‘Muhipakeke maxintta.’ Yehova onnikhoottiha maxintta ni okhwiri, okhala wira soovara iya sinoowerya wakeliha atthu mu owerya wa Satana, Diabo.—Onamukuttho 19:26.