MURUU WA NAMULOKO

Omwene Yoowo “Ohinrowa Omala”

1. Ekeekhai xeeni ettittimiheriwe ni sowiiraneya sa mulaponi sa apinaatamu?

KHUTA nihiku, sowiiraneya sa mulaponi sinttittimiherya ekeekhai yoowi apinaatamu khamphwanya ohakalala mwaha wa okhootta olamulelo muulupale wa Yehova ni weererya wiilamulela mmensaya. Khiivo eguvernu ya olamulelo wa apinaatamu eruuhale mireerelo wa atthu otheene. Nnaamwi atthu amusuwenle ene siensia vanceene ovikana khalai, awo khawenrye omaliha iretta aahiiso okhwa, hataa omaliha owereiwa ni okhwa wa mutthu mmosaa. Olamulelo wa apinaatamu khomalamalinhe ikhotto, ohaaxana, ecrime, ohiroromeleya, aahiiso osikhini. Iguvernu soohaaxa sinnivikaniha waahasula atthu mu ilapo sinceene. (Musuweli 8:9) Orowa vahoolo wa siensia, nrima, ni ohisuwela moota woopaka itthu, onninanariha etthaya, maasi, ni epheyo. Mwaha wa atthu anikhapelela muhakhu ohirumeelaka saana musurukhu, onnaaxankiha atthu anceene ophwanya itthu sootthuneya mookumini. Iyaakha ikonto sinceene sa olamulelo wa apinaatamu sihooniherya ekeekhai ela: “Mutthu khansuwela emalelo awe: owo khanwerya wettiha mavalo awe”.​—Yeremiya 10:23.

2. Etthu xeeni paahi enrowa omaliha mixankiho sa apinaatamu?

² Itthu iya sinrowa olokiheriwa sai? Orweela mwa Omwene wa Muluku, yoowo Yesu aawiixuttinha awe atthareli awe ovekela wira: “Omwene anyu onrwele hiyo; otthuna wanyu wireye ntoko wirimu siso vathí-va”. (Matheyo 6:9, 10) Omwene wa wirimu wa Muluku onnihimmwa mu 2 Pedru 3:13 okhala “erimu esyá”, yoowo onilamulela ‘elapo esyá’, eyo piiyo, apinaatamu a xariya. Mwaha wa Omwene wa wirimu wa Muluku okhala wootthuneya, eyo yaahimwiiriha Yesu opaka okhala mwaha muulupale mu olaleerya wawe. (Matheyo 4:17) Yesu aahooniherya opuro omwene onitthuneya aya okhalaka mookumini mwahu, otumereryaka wira: “Mpajeryeke ophavela omwene wa Muluku ni wiwelela otthuna wawe”.​—Matheyo 6:33.

3. Nthowa xeeni vary’aya vootepa otthuneya wiixutta voohimya sa Omwene wa Muluku vano?

³ Vano, ti vootepa otthuneya wiixutta voohimya sa Omwene wa Muluku, okhala wira moohipisa Omwene owo onrowa orantteliha moohimala olamulelo wa valaponi va. Daniyeli 2:44 aahihimya vahinatthi wira: “Mahiku òmwene owo [iguvernu sinilamulela vano], Muluku a wirimu onokumiherya omwene [a wirimu] ohinrowa omala, nnákhala oweriwa n’umwene mukina [apinaatamu khanrowa-tho olamulela elapo]. Omwene owo onohonona n’upwetexa omwene wothene wa mulaponi [onilamulela olelo va], numalá onrowa okhalaka wa mahiku othene”. Tthiri Omwene owo onrowa opixa wanikisa mahiku ala ookiserya, opwetexaka mukhalelo ola wotheene wootakhala wa itthu. Siiso, Omwene wa wirimu paahi tonrowa olamulelaka elapo ya vathii. Nto, nohaana oxukhurela okhala wira omumula onrowa aya oruuha Omwene owo ori vakhiviru!

4. Voohimya sa Omwene, etthu xeeni yiiranen’ye wirimu mwaakha wa 1914, ni nthowa xeeni ery’aya yootthuneya wa hiyo?

⁴ Mwaakha wa 1914, Kristu Yesu aahitikitheriwa ntoko Mwene ni aaheemereriwa wira olamuleleke eriyari ya awanani awe. (Esalimo 110:1, 2) Nave-tho, “okathi wokiserya” wa mukhalelo ola wootakhala wa itthu, opacenrye mwaakha ene yoole. (2 Timótheyo 3:1-5, 13) Okathi omosaru, sowiiraneya seiyo Daniyeli soonale awe mu sowoonihiwa sa eprofecia, sihiiraneya tthiri wirimu. “Humu Mulupale”, ori Yehova Muluku, aahinvaha Mwaana a mutthu, Yesu Kristu, ‘owerya n’uttittimihiwa n’umwene: [wira] atthu a ilapo sothene ni maloko othene ni ilavulelo sothene amurumeleke’. Ohimyaka sa yowoonihiwa eyo, Daniyeli aalempe so: “Owerya wawe khunimala, khanakhiwa: omwene awe khunipwetexiwa-tho”. (Daniyeli 7:13, 14) Ti Omwene yoola wa wirimu onihooleliwa ni Kristu Yesu, Muluku onrowa awe orumeela wira owiirihe ale aniphenta exariya ophwanya itthu sinceene sooreera seiyo Muluku saalakenle awe okathi waahenle awe mParayiisu axitiithi ahu oopacerya.

5. Itthu xeeni kamosa-kamosa voohimya sa Omwene sinitthuneya ahu osuwela, ni nthowa xeeni?

⁵ Niireke wira erii yoophavela anyu okhala namalamuleliwa oororomeleya a Omwene owo? Vakhala wira ti siiso, nyuwo munrowa ophavela osuwela saana moota siry’aya ni moota enivara aya muteko eguvernu ela ya wirimu. Nyuwo munrowa ophavela osuwela ele eguvernu ela enipaka aya olelo va, ele enrowa aya waakhwaniherya muhoolo, ni ele enivekela aya wa nyuwo. Vaavo vaniixutta anyu saana sa Omwene owo, oxukhurela wanyu wahaana wuncerereyaka. Akhala wira munimweemererya olamulelo wa Omwene, nyuwo munrowa okhala oolikanela oratteene wira mwaaleele atthu akina voohimya sa itthu sooreera seiyo Omwene wa Muluku sinrowa aya waaruuhela apinaatamu oowiiwelela.​—Esalimo 48:13, 14.

Anamalamulela a Omwene wa Muluku

6. (a) Soolepa sinimooniherya sai ole okhanle mwaneene olamulelo muulupale yoowo onithoonyeriwa ni Omwene wa oMesiya? (b) Ele eniixutta ahu voohimya sa Omwene yahaana oniirihaka ophavela opaka exeeni?

⁶ Vaavo vaniixutta ahu sa Omwene owo, etthu emosaa yoopacerya enoona ahu ti yoowi Omwene wa oMesiya ethoonyeryo ya olamulelo muulupale wa Yehova. Ti Yehova yoowo onvanhe Mwanawe “owerya n’uttittimihiwa n’umwene”. Nuumala mwaana a Muluku ovahiwa owerya wa opacerya olamulela ntoko Mwene, masuu yaakhuma wirimu moophwanelela yaahimya wira: “Vano owerya wo wettiha olumwenku ti wawawe Pwiy’ahu [Yehova Muluku] ni ti wawawe Kristu awe: owo [Yehova] onokhala mwené a mahiku othene”. (Wisupulula 11:15) Siiso khuta etthu eniweha ahu voohimya sa Omwene ola ni ele enaakhwaniherya aya, enoowerya onaattamiherya Yehova mwaneene. Ele eniixutta ahu yahaana oniiriha ophavela wiiwelela okathi wotheene olamulelo awe muulupale.

7. Nthowa xeeni vary’aya vootthuneyexa wa hiyo wira Yesu Kristu ti Namalamulela Onimukhaliherya Yehova?

⁷ Nave-tho, nkahaya muthokorerye ekeekhai yoowi Yehova oomukilaathiha Yesu Kristu veehiceni ntoko Namalamulela Onimukhaliherya. Ntoko Funti a Miteko yoowo Muluku aamurumenle awe wira opakee elapo ni apinaatamu, Yesu onnisuwela saana sootthuneya sahu onivikana hiyo aneene. Ohiya vo, okhuma wanipacerya wa sowiiraneya sa apinaatamu, Yesu ohooniherya wira ‘anona orera okhala vamosá n’atthu’. (Miruku 8:30, 31; aKolosi 1:15-17) Nto, waaphenta wawe apinaatamu ti wuulupale, ti mulattu aya Yesu mwaneene vaarwiiye awe valaponi ni ovaha okumi awe ntoko yowoopola wa hiyo. (Yohani 3:16) Tthiri owo oohula ephiro wa hiyo wira nleveleliwe soottheka ni okhwa, ni okhalana eparakha ya okumi woohimala.​—Matheyo 20:28.

8. (a) Moovirikana ni omwene oneettihiwa ni apinaatamu, nthowa xeeni eguvernu ya Muluku ehinrowa aya omala? (b) Ovarihana xeeni okhanle eriyari ya “murumeyi òroromeleya ni ànkhili” ni eguvernu ya wirimu?

⁸ Omwene wa Muluku eguvernu yootikithereya, ehinimala. Omwene owo khonimala mwaha woowi Yehova mwaneene khonlipelela okhwa. (Habakuki 1:12) Moovirikana ni mamwene oopinaatamu, Yesu Kristu, yoowo Muluku onvanha awe omwene, khonlipelela-tho okhwa. (aRoma 6:9; 1 Timótheyo 6:15, 16) Kristu vamosaa ni arumeyi oororomeleya a Muluku oophiyeryaka 144.000 a “mahimo othene ni a malavulelo othene ni a ilapo sothene ni a maloko othene”, anrowa okilaathela ihice sa wirimu. Nave-tho atthu ala anrowa ovahiwa okumi ohinikhwa. (Wisupulula 5:9, 10; 14:1-4; 1 aKorinto 15:42-44, 53) Anamunceene a yaawo aarowa wirimu, nto ale nlelo ari valaponi aniira mpantta wa “murumeyi òroromeleya ni ànkhili”, yoowo olelo va, oneettiha moororomeleya soophavela sa Omwene valaponi va.​—Matheyo 24:45-47.

9, 10. (a) Itthu xeeni soopahula ni sinikumiherya okawanyeya sinrowa omalihiwa ni Omwene owo? (b) Akhala wira khanimphavela okhala awanani a Omwene wa Muluku, nsyakee wiikeliha muhina mwa sowiira xeeni?

⁹ Nto moohipisa, mu okathi othanlale awe, Yehova onrowa waarumiha anakhotto awe wira areerihe elapo. Anakhotto awo anrowa waapwetexa atthu yaale moolakelela anikhootta weemererya olamulelo awe muulupale, ni ahinttittimiha marehereryo anooniherya ophenta yaawo anipaka awe orweela mwa Yesu Kristu. (2 aTesalonika 1:6-9) Nto ninrowa okhala nihiku na Yehova, nenno ninlipeleliwa okhuma khalai wira ovuwihiwe ntoko Namalamulela a Olumwenku Wotheene. “Wehani: nihiku n’Apwiya nri vakhiviru: nihiku n’oviruwa vohikhurunuwa murima, nihiku ninrowaya ophuleya owali aya . . . alipa-òttheka anopwetexiwa”. (Yesaya 13:9) “Nihiku nlo nintthuna okhala nihiku n’oviruwa, nihiku n’ohawa ni n’oxanka, nihiku n’ehasara ni n’opwetexa, nihiku n’epiphi ni n’ewiriphi, nihiku na meku òripa ni n’etthapwe”.​—Sofoniya 1:15.

¹⁰ Itiini sotheene soowoka, ni iguvernu sotheene sa apinaatamu vamosaa ni anakhotto aya, yaawo aneettihiwa ni namalamulela ootakhala ohinooneya a elapo ela, anrowa opwetexiwa. Otheene yaale anivarihana ni elapo ela, attharaka mweettelo wa nrima, ohiroromeleya, mweettelo wa okumi woothanyeya anrowa opwetexiwa. Satana ni axetwani awe khanrowa waahapuxaka atthu mwaha woowi anrowa oriheliwa munlittini nowiixa mpakha ovira iyaakha ekonto emosaa. Vano Omwene wa Muluku onrowa weettiheryaka moomalela miyaha sotheene sa valaponi. Moota sinrowa aya waaruuhela omumula otheene yaale aniphenta exariya!​—Wisupulula 18:21, 24; 19:11-16, 19-21; 20:1, 2.

Soophavela sa Omwene ni Moota Sinaakhwaniheriwa Aya

11. (a) Moota xeeni Omwene wa oMesiya sinrowa awe waakhwaniherya yoolakela ya Yehova voohimya sa elapo? (b) Nto olamulela wa Omwene owo onrowa otaphulela exeeni wa atthu anrowa okhalaka valaponi?

¹¹ Omwene wa oMesiya onrowa waakhwaniherya moomalela yoolakela yoopacerya ya Muluku wa elapo. (Maphattuwelo 1:28; 2:8, 9, 15) Mpakha olelo va, apinaatamu ahooceela okhaliherya yoolakela eyo. Masi, “olumwenku ontthuna orwa”, onrowa olamuleliwaka ni Mwaana a mutthu, ori Yesu Kristu. Otheene yaale anrowa woopowa vaavo Yehova vanrowa awe ophukela mukhalelo ola wa khalai, mowiiraana awo anrowa ovaraka muteko ahooleliwaka ni Mwene okhanle Kristu. Moohakalala anrowa ovaraka muteko attharaka ohoolela wawe, siiso nto elapo yotheene enrowa okhala eparayiisu. (aHéberi 2:5-9) Apinaatamu otheene anrowa ohakalalaka ni muteko wa matata aya ni mireerelo soomalela sinikhuma mwaha wa waatta soolya valaponi.​—Esalimo 72:1, 7, 8, 16-19; Yesaya 65:21, 22.

12. Ale anrowa olamuleliwaka ni Omwene owo, anrowa ophwanya sai muupuwelo ni erutthu yooloka?

¹² Adamu ni Eva yaapattuxiwe oohittheka, ni yaari yoolakela ya Muluku wira elapo esareye ni anaaya, ni wira otheene akhaleke ni muupuwelo ni erutthu yooloka. Yoolakela eyo enrowa wiiraneya vaavo Omwene wa Muluku vanrowa aya olamulelaka. Ela enivekela omala-malihiwa sookhumelela sotheene sa yoottheka, nto moophavela waakhwaniherya yoolakela eyo, Kristu onnirumeela ohiya paahi ntoko Mwene masi-tho ntoko Namukuttho Muulupale. Moopixa murima, Yesu onrowa waakhaliherya ale oowiiwelela onrowa awe waalamulelaka wira attottele mureerelo wa esisapo ya mukuttho awe wa omutthu yoowo onittipiha soottheka.

13. Okathi Omwene vanrowa aya olamulelaka, mireerelo xeeni sooloka sa werutthuni seiyo apinaatamu sinrowa aya ophwanya?

¹³ Okathi Omwene vanrowa aya olamulelaka, ale anrowa okhalaka valaponi, anrowa ophwanya mireerelo sooloka sa werutthuni. “Mahiku awo anotthukuwa maitho àlipa-òhona, anotthukuwa màru àlipa-òhiwa; alipa-òtuthunya anotupha ntoko nahe: alipa-òhilavula anokhuwela n’utteliwa murima”. (Yesaya 35:5, 6) Erutthu yoorweela manyete mwaha wa wuuluvala aahiiso owereiwa enrowa okhala yoolokexa ovikana ya mwaana, ni otteettheya wa erutthu ohimmala onrowa orantteliwa ni ekumi yoolipa. “Siso irutthu saya sinotthikela okhalana ikuru s’omiravo aya: sinokhala-tho ntoko mahiku ònamwane aya”. (Yobi 33:25) Onoophiya okathi vaavo vahinrowa aya okhala mutthu onrowa ohimyaka wira: “Miyo ki muretta”. Nthowa xeeni? Nthowa noowi apinaatamu animoova Muluku anrowa otaphuliwa opottha wa yoottheka ni sookhumelela saya soohaaxa. (Yesaya 33:24; Luka 13:11-13) Aayo, Muluku “onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.​—Wisupulula 21:4.

14. Okhala apinaatamu oomalela onihela muhina exeeni?

¹⁴ Masi okhala oomalela onnihela muhina itthu sikina ohiya paahi okhalana erutthu ni muupuwelo wooloka. Ela enihela muhina wooniherya oratteene mikhalelo sa Yehova, mwaha woowi ‘Muluku onupale ilikanyihaka’. (Maphattuwelo 1:26) Wira niphwanye omalela iwo, vanrowa otthuneya wiixuttihiwa vanceene. Mu elapo esyaa, ‘enrowa okhala exariya’. Siiso, ntoko Yesaya saahimmye awe vahinatthi, ‘atthu othene anoxutta exariya’. (2 Pedru 3:13; Yesaya 26:9) Exariya ela ennikumiherya murettele, eriyari ya atthu a maloko otheene, eriyari ya apatthani, eriyari ya emusi, ni etthu yootepa otthuneya, okhalana murettele ni Muluku. (Esalimo 85:11-14; Yesaya 32:17) Otheene yaale aniixutta exariya anrowa ovikanihaka wiixuttihiwa ele Muluku eniphavela awe wa awo. Vaavo omphenta waya Yehova vaninnuwa aya vamurimani vaya, awo anrowa ottharaka iphiro sawe mmikhalelo sotheene sa ikumi saya. Awo anoowerya omutakiha Yesu wira: ‘Mahiku othene miyo kinnìra itthu sinimusivela Tithi aka’. (Yohani 8:29) Moota okumi onrowa aya okhala woohakalaliha vaavo apinaatamu otheene vanrowa aya opakaka eyo!

Sowiira Seiyo Sinooneya Olelo va

15. Murumeelaka makoho ari ettima ela, muttittimiherye itthu saakhwaniheriwe ni Omwene ni mooniherye ele enitthuneya ahu opakaka vano.

¹⁵ Sowiira suulupale sa Omwene wa Muluku ni sa ale anilamuleliwa sinnooneya. Makoho ni soolepa sinttharelana sinrowa owuupuxeryani itthu sikina siiranen’ye, ni itthu sikina seiyo ale anilamuleliwa ni Omwene siniwerya aya ni sinitthuneya aya wiiraka vano.

Wanipacerya Omwene owo opanke exeeni, nto yookhumelela aya tiivi? (Wisupulula 12:7-10, 12)

Othukumanyiwa wa atthu a ekrupu xeeni onipakiwa okhuma vaavale Kristu vaavahiwa awe Omwene? (Wisupulula 14:1-3)

Moovarihana ni Matheyo 25:31-33, muteko xeeni Yesu aahimmye awe vahinatthi wira aarowa ovara nuumala opacerya maxakha maalupale?

Ahinatthi opacerya maxakha maalupale, muteko xeeni onivariwa olelo va? Nto tanii anivara muteko owo? (Esalimo 110:3; Matheyo 24:14; Wisupulula 14:6, 7)

Nthowa xeeni anamavaanyiha a ipoliitika ni a itiini ahinwery’aya omaaliha muteko woolaleerya? (Zakariya 4:6; Miteko s’Arummwa 5:38, 39)

Mirukunuxo xeeni sipanka aya ale aniiwelela olamulelo wa Omwene? (Yesaya 2:4; 1 aKorinto 6:9-11)

Omwene wa Iyaakha Ekonto Emosaa

16. (a) Kristu onrowa olamulela iyaakha kavii? (b) Itthu xeeni sooreera sinrowa wiiraneya okathi wa iyaakha ekonto emosaa ni nuuvira iyaakha iyo?

¹⁶ Nuumala otthukweliwa Satana ni axetwani awe, Yesu Kristu ni anamalamulela akhw’awe 144.000, anrowa olamulelaka ntoko mamwene ni anamukuttho okathi wa iyaakha ekonto emosaa. (Wisupulula 20:6) Okathi owo, apinaatamu anrowa ophwanya omalela, okhala wira yoottheka ni okhwa okumiheriwe ni Adamu onrowa omala-malihiwa. Nuuvira Olamulelo wa Iyaakha Ekonto Emosaa, aakhwanihenrye ene oratteene muteko othanleliwa awe ovara ntoko Mwene yoowo ori Namukuttho a oMesiya, Yesu ‘ononvahererya omwene’ Tiithi awe, nto “Muluku onomaliherya oruma sothene”. (1 aKorinto 15:24-28) Mpakha vo, Satana onrowa otaphuliwa okathi vakhaani wira oweehererye apinaatamu oowoopowa okhaliherya waya olamulelo wa olumwenku wotheene wa Yehova. Wamala okathi wa weehererya iwo wookiserya, Yehova onrowa ompwetexa Satana ni anamavirikanya animukhaliherya. (Wisupulula 20:7-10) Otheene yaale anikhaliherya olamulelo muulupale wa Yehova, eyo piiyo, ehakhi awe ya olamulela, anrowa wooniherya oratteene ororomeleya waya. Nuumala vo, apinaatamu anrowa okhalana wataana wekeekhai ni Yehova, akhalaka ooweemereriwa n’uwo ntoko an’awe aaxilopwana ni aaxithiyana, oophwanelelihiwa ni Muluku wira akhaleke moohimala.​—aRoma 8:21.

17. (a) Wanikisa wa iyaakha ekonto emosaa, exeeni enrowa wiiraneya voohimya sa Omwene? (b) Mmukhalelo xeeni ery’aya ekeekhai wira Omwene owo khonkhala-khala ‘oweriwaka n’umwene mukina’?

¹⁷ Ti maana aya, muteko wa Yesu ni wa ale 144.000 voohimya sa elapo ya vathii onrowa ovirikana. Nto muhoolo anrowa ovaraka exeeni? Biibiliya khonihimya etthu. Masi akhala wira moororomeleya nnookhaliherya olamulelo muulupale wa Yehova, hiyo ninrowa okhala akumi wanikisa wa Olamulelo wa Iyaakha Ekonto Emosaa wira nisuwele ele Yehova yaalakenle awe wa awo ni wa olumwenku awe wootikiniha. Masi, olamulelo wa Kristu wa iyaakha ekonto emosaa “khunimala”, ni Omwene awe “khunipwetexiwa-tho”. (Daniyeli 7:14) Moota xeeni? Nthowa noopacerya, okhala wira olamulelo awe khonrowa okuxiwa ni atthu akina yaawo arina soophavela sikina, mwaha woowi Yehova tonrowa Olamulelaka. Nthowa na nenli, Omwene owo khonkhala-khala ‘oweriwaka n’umwene mukina’, okhala wira itthu sinrowa aya waakhwaniherya sinrowa okhalaka moohimala. (Daniyeli 2:44) Nto Mwene yoowo ori Namukuttho a oMesiya vamosaa ni mamwene yaawo ari anamukuttho akhw’awe anrowa ottittimihiwa moohimala mwaha wa muteko aya woororomeleya ohoolo wa Yehova.

Makoho Oowuuluula

• Nthowa xeeni Omwene wa Muluku ory’aya yoolipelela emosaa paahi enrowa ophuka mixankiho sa apinaatamu? Mwene a Omwene wa Muluku opacenrye silini olamulela?

• Etthu xeeni mwa vameekh’aya enikuxa murima anyu voohimya sa Omwene wa Muluku ni ele enrowa aya waakhwaniherya?

• Itthu xeeni saakhwaniheriwe ni Omwene owo siniwerya ahu oweha, nto hiyo ninkhaliherya sai?

[Elatarato eri epaaxina 92, 93]

Momweneni wa Muluku, atthu otheene anrowa wiixutta exariya