Mikhayeli Nlaikha Nuulupale Tanii?

NLAIKHA nniihaniwa Mikhayeli khinniromoliwa ikwaha sinceene mBiibiliyani. Masi, vaavo vaniromoliwa aya nnivaraanyihiwa ni muteko onivara aya. Eliivuru ya Daniyeli ennimuhimya Mikhayeli owanaka ni nlaikha nootakhala; epaphelo ya Yuda, ennooniherya wira owo onivaanyihana ni Satana; ni eliivuru ya Wisupulula enihimya wira Mikhayeli oniwana ni enowa ni malaikh’aya. Mwaha woowi onnaakiha olamulelo wa Yehova ni owana ni awanani a Muluku, Mikhayeli onikhala moovarihana ni yootaphulela ya nsina nawe: “Tanii Onilikana ni Muluku?” Masi Mikhayeli tanii?

Ikwaha sikina, atthu annikhalana masina manli. Mwa ntakiheryo, muhavinre Yakobe onnisuweliwa-tho ni nsina noowi Isarayeli, ni murummwa Pedru onnisuweliwa-tho ni nsina noowi Simoni. (Maphattuwelo 49:1, 2; Matheyo 10:2) Moolikanasa, Biibiliya onooniherya wira Mikhayeli nrii nsina nikina na Yesu Kristu, nsina nawe ohinatthi orwa valaponi ni nuumala otthikela wirimu. Nrowee nthokorerye mathowa ari mBiibiliya aniiriha ohimya siiso.

Nlaikha Nuulupale. Nuulumo nri mBiibiliyani noowi Mikhayeli, “nlaikha nulupale”, nintaphulela muhooleli a malaikha. (Yuda 9) Nwehee wira Mikhayeli oniihaniwa ni nsina noowi nlaikha nuulupale. Ela enooniherya wira nsina noowi Mikhayeli ni nsina noowi nlaikha nuulupale nnihimya nlaikha nimosaa paahi. Mwekeekhai, olavulaka sa nsina nno, Biibiliya onihimya wira “nlaikha nulupale” ohiya ‘malaikha maalupale’, eyo enooniherya wira nnihimmwa nlaikha nimosaa paahi. Ti maana aya, Yesu onivaraanyihiwa awe ni muteko wa nlaikha nuulupale. Voohimya sa Pwiya Yesu Kristu, yoowo ohihimuxiwe, 1 aTesalonika 4:16 onihimya wira: “Enimwiwanyeya ethonyeryo evahiwe ni nsu na nlaikha nulupale”. Mwekeekhai, nsuu na Yesu nnihimmwa okhala na nlaikha nuulupale. Tivonto, yoolepa ela enooniherya wira Yesu mwaneene tokhanle nlaikha nuulupale aahiiso Mikhayeli.

Muhooleli Aanakhotto. Biibiliya onihimya wira: “Nlaikha Mikhayeli ni makhw’aya nahiwana n’inow’eyo: vano enowa yakhaliheriwa ni malaikh’aya”. (Wisupulula 12:7) Tivonto, Mikhayeli ti Muhooleli a malaikha oororomeleya yaawo anirumeeliwa mukhottoni. Nave-tho eliivuru ya Wisupulula enimuhimya Yesu okhala Muhooleli a malaikha oororomeleya yaawo anirumeeliwa mukhottoni. (Wisupulula 19:14-16) Ni murummwa Paulo onnihimya sa “Pwiya Yesu” ni “malaikh’awe òwerya”. (2 aTesalonika 1:7; Matheyo 16:27; 24:31; 1 Pedru 3:22) Siiso, vaavo Biibiliya vanilavula awe sa Mikhayeli onnimuhimya ori ni “malaikh’awe”, ni mapuro makina vanirumeela awe nsina na Yesu onnimuhimya-tho ori ni “malaikh’awe”. (Matheyo 13:41) Okhala wira Nuulumo na Muluku khinnihimya wira sookhala ikrupu piili sa anakhotto a malaikha oororomeleya wirimu, ekrupu emosaa ehooleliwaka ni Mikhayeli ni ekina ehooleliwaka ni Yesu, moohaaniherya ela enooniherya wira Mikhayeli ti Yesu Kristu mmuteko awe wirimu.a

[Footnote]