Malaikha Yaahilaleya Oyariwa wa Yesu

Mwene a oRoma Seesari Augusto, aahiruma wira aYuda otheene erowe muttetthe oyariwa aya wira yarepeliwe. Nto Yosefe ni Maria yaahirowa oBethelehemu, elapo aya. Waanaattamela okathi wira Maria okhalane mwaana.

Okathi yaaphiyale aya oBethelehemu, awo khiyaaphwanyale opuro woomaka, nto yaahirowa opuro waalya axinama. Ti memmo Maria aamuyanre awe mwanawe Yesu. Owo aahinvitikelela ni ikuwo nto khumwaatalela munikulani.

Waattamela oBethelehemu, yaahikhala amakampusi yaari vate ohiyu ole, awehawehaka inama saya. Mootutuxerya nahaakhumelela nlaikha, nto ovuwa wa Yehova wahaamwaleela. Nto awo yaahoova, masi nlaikha nle naahihimya wira: ‘Muhoove! Kooruhenleni ehapari yooreera. Olelo, ooyariwa Mesiya oBethelehemu’. Okathi ene yoowo yaahikhumelela malaikha manceene mmeekuni. Ni yaanihimya so: ‘Avuwihiwe Muluku wiirimu, ni valaponi okhale murettele’. Nuumala-vo malaikha ale yaahirowa wiirimu. Amakampusi ale yoonenle sai?

Amakampusi yaahileelana wira: ‘Naakuveke nrowe oBethelehemu’. Awo yaahirowa mowaakuveya ni yaahimphwanya Yosefe, Maria ni mwaana mwaamukhaani aataleliwe ene opuro waakhala axinama.

Atthu otheene yaiwa itthu nlaikha naahimenrye aya amakampusi ale, yaanitikinihiwa. Maria aahuupuwelela moolumo yaale aaleeliwe awe khalai ni nlaikha ni aahipweha vamurimani. Amakampusi ale yaahihokolowela opuro waari inama saya, emuxukhuruku Yehova mwaha wa itthu sotheene yoonale aya ni yaiwale aya.