MUWIIXUTTIHE ANIINYU
Yesu Kristu—Nimuupuweleke Sai?
Mweeri wa Dezembro, atthu anceene anniweha ifootu wala ilatarato sa Yesu oryeene ntoko mwaana. Owo onooniheriwa oryeene munikulani, wala ekaaxa yuulupale epwehiwe malaxi wira inama silye. Masi niireke nihaana omuupuwelelaka Yesu ntoko mwaana mwaamukhaani?—a Nrowe nilavule vakhaani sa enamuna yooloka ya omuupuwela Yesu. Hiyo nnoowerya wiixutta etthu akhala wira nnimuupuwelela sa ele yaawiiranenle amakampusi okathi yaari aya mmatta waattamela oBethelehemu ohiyu.
Mootutuxerya, nlaikha nimosa ninnaakhumelela amakampusi, naahimeeryaka so: “Olelo, . . . moyareliwa Mòpoli, okhanle Kristu Pwiya”. Nave nlaikha nlo ninnaaleela amakampusi awo wira anomphwanya Yesu “akhuneliwene n’ikuwo, àtaleliwene munikulani”. Okathi ene yoowo, malaikha manceene, annikhumelela ni ‘khiyamuttottopela Muluku’.
Nyuwo mwarowa woonela sai aakhanle wira muhiiwa malaikha amuttottopelaka Muluku?— Amakampusi annihakalala! Awo anihimya so: “Naso nrowé oBethelehemu, nawehe itthu sikhumelenle”. Okathi yaaphiyale aya, yaahimphwanya “Maria ni Yosefe ni mwana àtaleliwene munikulani”.
Moohipisa, atthu akina anniphiya oBethelehemu weiwo oryaawe Maria ni Yosefe. Okathi amakampusi ale anaahimeerya aya etthu yaakhumelenle, awo annihakalala. Niireke nyuwo munnihakalala mwaha woosuwela itthu iya sooreera?— Otheene ahu nnimphenta Muluku ninnihakalala. Vano, nrowe niwehe nthowa naya oyariwa wa Yesu waahakalalinhe aya atthu anceene. Nitthikele ottuli mpakha okathi Maria iira awe ohitheliwe.
Nihiku nimosa, nlaikha nniitthaniwa Gabriyeli ninnimuxukurya Maria. Nlaikha nlo ninnimuleiherya Maria wira onoomuyara mwaana yoowo ‘onrowa okhala mulupale, onimwihaniwa Mwana a Muluku Mulupalexa. Owo onirowa olamulela ntoko mwene: nave omwene awe khummala-tho’.
Maria onniphavela osuwela moota etthu eyo enrowa aya wiiraneya, maana owo khotonko omusuwela mulopwana. Nto nlaikha Gabriyeli ninnimuhimeerya wira: ‘Owerya wa Muluku Mulupalexa onimokhuruwelani n’iruku. Tivó Mwana onrowanyu omuyara onokhala òwarya, onimwihaniwa Mwana a Muluku’. Muluku aahithaamiha okumi wa Mwanawe wiirimu nto khorihela mmirimani mwa Maria, nto Yesu khuyariwa ntoko mwaana. Eyo yaari etthu yootikiniha vanceene!
Niireke nyuwo mootoko woona ifootu wala ilatarato siniwooniherya alopwana wala ‘asuweli araru’ amuxukuryaka Yesu oyariwe ene niinano oryeene ni amakampusi?— Okathi wa Natali itthu ntoko iyo sinimakela opakiwa ilapo sinceene. Masi awo khanipaka etthu yooloka. Veekeekhai, ‘asuweli awo araru’ yaari anamaxitta nto yaapaka etthu Muluku onikhoottiha awe. Nkahaya niwehe ele yiiraneyale nuumala awosa ophiya. Biibiliya oniira so: “Asuweli yahikela mpani mmwe, khumòna Mwana ni Maria, ame awe”. Nto, okathi yaaphiyale aya ‘asuweli awo’, Yesu khahiyo aari mwaana aayariwe niinano, masi owo aari mwanamwane owunnuwela yoowo aakhala ni Yosefe vamosa ni Maria vatthokoni!
Anamaxitta ale yaaphiyale sai opuro waari Yesu?— Awo yaahooliwe ni etthu yakhala ntoko “etheneri” aroihiwaka woopaceryani wa Mwene Herodi oYerusalemu, ohiya oBethelehemu. Biibiliya onihimya wira Herodi aaphavela omwiiva Yesu. Nkahaya muupuwelele: Ti pani aapanke etthu ele yaalikanasa ni etheneeri wira yaahoole anamaxitta ale wa mwene Herodi?— Khahiyo aari Muluku eekeekhai, Yehova; masi aari munyokhani awe, Satana Diabo!
Olelo-va, Satana onniwiiriha atthu wuupuwelaka wira Yesu ori ntoko mwaana oyariwe niinano. Masi nlaikha Gabriyeli naahimuleela Maria wira Yesu onrowa olamulelaka ntoko mwene ni “omwene awe khummala-tho”. Vano, Yesu onnilamulela ntoko Mwene wiirimu, nto moohipisa onimwaapwetexa awanani otheene a Muluku. Eyo ti etthu ekhale ahu owuupuwelelaka voohimya sa Yesu, ni waaleela akina mwaha ola.
Musome Mbiibiliyani Mwanyu
Wisupulula 19:19-21; 1 Yohani 2:17
[Enoota]
a Akhala wira munisoma muryeene ni mwaana, trasu oniwuupuxeryani wira muhaana weemela, nto khiyanvekela mwaana owo wira ohimye etthu enisuwela awe.
[Elatarato epaaxina 14]
[Elatarato epaaxina 15]