‘Nihojeye’
“Nihikhulumuweleké ovara miteko sorera”.—AGAL. 6:9.
MWAAROWA WAAKHULA SAI?
Soovahiwa xeeni sinnikhaliherya okhala ooluttuweliwa ni ekeekhai?
Moota xeeni ovaha efaita omukokhorela Yehova onniiriha aya orowa mmithukumanoni?
Moota xeeni soolakela sahu sinooniherya aya akhala wira nnoovilela ni ohooceya ni muteko ahu woolaleerya?
1, 2. Moota xeeni oweha mulokiheryo wa Yehova olumwenku wotheene onilipa aya nroromelo nahu?
ETTHU yoohakalaliha osuwela wira nniirela mpantta mulokiheryo wa olumwenku wotheene. Yowoonihiwa elempwe mu Ezekiyeli ekapitulu 1 ni Daniyeli ekapitulu 7, sinnooniherya saana moota Yehova oneettiha awe itthu mootikiniha mpakha wanikisa waya. Yesu onnihoolela mulokiheryo ola wa Yehova epantta ya vathi-va wira othokoreryeke saana olaleiwa wa ihapari sooreera ni okhapelela omunepani wa ale anivara muteko ola ni wunnuuherya okokhoreliwa Yehova. Ela tthiri ennilipiherya okupaleela wahu mulokiheryo wa Yehova!—Math. 24:45.
2 Niireke ninnitthara mulokiheryo ola wooreera? Niireke ohakalala wahu ni ekeekhai onoovukuwa wala onoosariheleya? Okathi onithokorerya ahu makoho ala, pooti woona wira noopacerya wooceya wala waaniheryasa oyeleela oluttuweliwa wahu. Eyo pooti wiiraneya. Eseekulu yoopacerya, murummwa Paulo ahaatumererya maKristau akhwaawe otthara ntakiheryo na Yesu yoowo ori ooluttuweliwa. Paulo aahilavula wira eyo yaarowa waakhaliherya wira ‘ehojeye, [ni] ehihiye miteko saya’. (aHéb. 12:3) Vamosa-mosa, otokosa saana yoosoma ele evinre yoonihenrye ele enaakhwaniheriwa ni mulokiheryo wa Yehova, ehaana-tho onikhaliherya saana wira nivikanihe ohakalala ni ovilela.
3. Nipakeke exeeni wira nihooceye, nto yoosoma ela ninrowa othokorerya exeeni?
3 Paulo aahooniherya wira vanitthuneya wiilipiha wira nihooceye. Owo aalavunle wira nihaana ovaraka miteko ‘sorera’. (aGal. 6:9) Tivonto hiyo, nihaana opaka etthu. Nrowe nithokorerye ipantta thanu sa muteko ahu seiyo sinrowa onikhaliherya okhala oolipa, ni otthara mulokiheryo wa Yehova. Nuumala-vo, nihaana othanla mmensihu, iponto sinitthuneya ahu waakuvela ovarela muteko hiyo wala emusi ahu.
MUROWEKE OTHUKUMANA WIRA MULIPIHANEKE NI OKOKHORELA
4. Xeeni vanihimya ahu wira othukumana, ti muteko muulupale wa okokhorela wekeekhai?
4 Othukumana moohihiyererya ti etthu enimakela olipiha muteko wa arumeyi a Yehova. Mwa ntakiheryo wiirimu malaikha annilattuliwa ni Yehova okathi woophwanelela wira athukumane. (1 Mam. 22:19; Yob 1:6; 2:1; Dan. 7:10) AnaIsarayeli a khalai yaahaana othukumana ‘wira yiweke esuweleke, yixutteke’. (Otum. 31:10-12) AYuda eseekulu yoopacerya yaahilimalela orowa osinagoga osoma Soolempwa. (Luka 4:16; Mit. 15:21) Ela enooniherya wira othukumana waaniiraneya mpakha okhumelela wa muloko wa eKristau, nave nlelo onniirela mpantta muteko ahu muulupale wa okokhorela. MaKristau ekeekhai annilipihana ‘mukina ni mukhw’awe, wira yakuviheryaneke ophenta n’uvara miteko sorera’. Tivonto, nihaana ovikaniha olipihana ‘mukina ni mukhwawe, votepa-tho vavo vanònahu wira nihiku na [Yehova] nri vakhiviru’.—aHéb. 10:24, 25.
5. Ninlipihana sai mmuthukumanoni?
5 Enamuna emosa enilipihana ahu mukina ni mukhwaawe, ori okomentari mmithukumanoni mwahu. Ninnipaka eyo nihimyaka waamini wahu vaavo vanaakhula ahu nikoho nilempwe, ohimya moota woovarela muteko yoolepa, ohimya moohipisa yowiiraneya emosa wala ntakiheryo nnooniherya oloka waya otthara miruku sa mBiibiliyani, aahiiso inamuna sikina. (Esal. 22:23; 40:10) Tthiri ninnikupali wira hata nipacenrye ene khalai orowaka mmuthukumanoni, nlelo ti soolipiha vaavo ninwiriyana ahu ikomentaario sa anna ni arokora, atthu aalupale ni amiravo elavulaka ni murima wotheene.
6. Mithukumano sahu sinilipiha sai makhalelo ahu oomunepani?
6 Etthu xeeni ekina yuulupale-tho enimwiiriha Muluku ahu onitumererya othukumana moohihiyererya? Mithukumano sa mmulokoni, asembeleya, ni akongresu anninikhaliherya wira nilaleeryeke ihapari moolipa murima, ni ovilela olupatthiwa ni ale ahimphavela wiiwa naalaleeryaka. (Mit. 4:23, 31) Othokorerya Soolempwa onninlipiha ni wunnuuherya waamini wahu. (Mit. 15:32; aRom. 1:11, 12) Sowiixuttiha ni olipihana nnaakhela ahu mmithukumano sa okokhorela, sinninivaha ohakalala wekeekhai ni ‘murettele okathi wovelavela’. (Esal. 94:12, 13) Ekomisau Yowiixuttiha ya Nikhuuru Noolamulela ennikhapelela otthokihiwa wa eprograma ya yoolya yomunepani wira yiixuttihiwe arumeyi a Yehova olumwenku wotheene. Tthiri ninnixukhurela malokiheryo ala anipakiwa wira nipuheke sowiixuttiha sooloka mmithukumanoni mwahu khula esumana ni khula mwaakha!
7, 8. (a) Yoolakela xeeni yoopacerya sirina aya mithukumano sahu? (b) Moota xeeni orowa omithukumanoni sinwerya aya wookhaliheryani omunepani?
7 Mithukumano iyo sihaana efaita ekina yuulupale ohiya paahi mureerelo wa khuta mutthu. Yoolakela yoopacerya ya othukumanaka ori omukokhorela Yehova. (Musome Esalimo 95:6.) Tthiri eri eparakha yuulupale onvuwiha Muluku ahu oottittimiheya. (aKol. 3:16) Yehova onniphwanela omukokhorela wahu woohicompela, nirowaka ni wiirela mpantta mithukumano sekristau. (Wis. 4:11) Tivonto vahintikhina ahu otumereriwaka ‘ohijompela orowa mmuthukumanoni, nihattharihaka ale ahinrowa-tho’.—aHéb. 10:25.
8 Niireke ninnoona mithukumano sahu sa eKristau okhala yoovaha ennikhaliherya ovilela mpakha okathi Yehova onrowa awe onyaanya mukhalelo ola wa itthu? Vakhala siiso, mithukumano sinrowa okhala eriyari ya “itthu sintepa ophwanela” seiyo sinitthuneya wiirela mpantta mweekumini mwahu. (aFil. 1:10) Ehaana okhala etthu yootepexa yaarowa oniiriha ocompela mithukumano ni okhala ni annihu okathi woomukokhorela Yehova.
OWAAVYA ATTHU A MURIMA SAANA
9. Ninsuwela sai wira muteko woolaleerya ohaana efaita yuulupale?
9 Wiirela mpantta muteko woolaleerya onninikhaliherya-tho ovikaniha okhala mmulokiheryoni mwa Yehova. Yesu aahivara muteko owo mooluttuweliwa okathi aaryaawe valaponi. (Math. 28:19, 20) Nto, okhuma okathi ole, olaleiwa Omwene ni waapaka awiixutti, teri etthu yuulupale mmulokiheryoni mwa Yehova. Sowiiraneya sa vano, sinnooniherya wira malaikha annikhaliherya muteko ola wira naaphwanyeke ale aniphavela ‘ekumi ehinimala’. (Mit. 13:48; Wis. 14:6, 7) Epantta ya valaponi ya mulokiheryo wa Yehova ennivara muteko vano ni yootthokiherya saana wira muteko ola wootepexa otthuneya okhumele saana. Niireke ninnoona okhala wootthuneya mookumini mwahu?
10. (a) Muhimye ntakiheryo na moota okhanle ahu oovikaniha ohakalala mwaha wa ekeekhai. (b) Olaleerya owenrye sai wookhaliheryani ohooceya?
10 Oluttuweliwa muteko owo, onninikhaliherya ovikaniha ohakalala wahu ni ekeekhai. Nkahaya moone masu a Mitchel yoowo ori mutokweene ni pioneero ookilaatheya okhuma khalai. Onihimya so: “Okisivela waalaleerya atthu ekeekhai. Kinuupuwela myaha isya sa erevista Owehaweha ni Despertai! nto murima aka onnihakalala woona miruku suulupale, ankhili ni olavuliwa waya moophwanelela khula mwaha. Nto ennikiiriha ophavela orowa olaleerya wira kaawehe atthu moota anrowa aya woonela irevista iye, ni ophavela owooniherya mwa enamuna eniwiiriha osiveliwa. Muteko aka woolaleerya onnirowa vahoolo. Kinnimananiha wira ehikhale etthu enaakanyerya okathi othanlale aka orowa olaleerya”. Mwa enamuna emosaru, okhala ooluttuweliwa olaleerya, onoonilipiha mahiku ala ookiserya.—Mmusome 1 aKorinto 15:58.
MULYEEKE YOOLYA YOMUNEPANI
11. Xeeni varya aya vootthuneya osomaka saana yoolya yomunepani enivahiwa ahu ni Yehova?
11 Orumeelaka masu oolempwa Yehova ootthokiha efesta yuulupale, wala yoolya yomunepani ennilipiha. Moohaaniherya munnuupuwela okathi otonko anyu osoma eliivuru, nto khiyuupuwela wira: ‘Ala ti masu yaaphavela aka! Vanikhala wira Yehova okilepenle tthiri yoomi!’ Eyo khahiyo etthu yoolikanela paahi. Orweela mwa soovaha iyo, Yehova onniniixuttiha ni onilakiherya. Yehova onihimya wira: ‘Miyo kinimovahani miruku, kinimothonyeryani ephiro yorera’. (Esal. 32:8) Niireke ninnimananiha wuupuwelela saana wira nittottele mureerelo yoolya yomunepani enaakhela ahu? Opaka eyo, onoonikhaliherya ovikaniha wiimiha mihokorokho ni osyaka otteettheya omunepani wahu mahiku ala ookiserya.—Musome Esalimo 1:1-3; 35:28; 119:97.
12. Exeeni enrowa onikhaliherya ovaha efaita yoolya yomunepani enivahiwa ahu?
12 Ti vooloka wuupuwela muteko onivariwa wira khula okathi niwerye waakhela yoolya enivaha ekumi yooloka omunepani wahu. Ekomisau ya Olepa ya Nikhuuru Noolamulela, teniweherya muteko ola wa otokosa itthu sinilempwa, osommwa wira sooniwe saalonke, oheliwa ifootu muliivuruni mmo, ni otaphuleliwa, nuuvira-vo wimpirimiriwa, nave sikina oheliwa va Web site ahu. Ifiliyaali sinimpirimiri iliivuru sahu, sinnikuxa iliivuru iyo enakawela miloko siri vakhiviru wala ottaiwene. Xeeni onivariwa aya muteko ola wotheene? Wira atthu a Yehova elyeeke saana yoolya yomunepani. (Yes. 65:13) Nto, nikhaleleke nthiti olya yoolya ela yomunepani enaakhela ahu orweela wa mulokiheryo wa Yehova.—Esal. 119:27.
MUKHALIHERYEKE ITTHU SINIPAKIWA NI MULOKIHERYO WA YEHOVA
13, 14. Tani anikhaliherya marehereryo a Yehova wiirimu, nto hiyo ninrowa okhaliherya sai valaponi?
13 Yowooniheriwa emosa wa murummwa Yohani, owo aahimoona Yesu awenle ene ekhavalo yootteela, aapwetexaka yaale ahinimwiiwelela Yehova. (Wis. 19:11-15) Tthiri ti voolipiha osuwela wira ale aneettiha ikhavalo iyo ehooleliwaka ni Yesu, ti malaikha oororomeleya axinttale valaponi, nto yaakhela ntthuvelo naya wiirimu! (Wis. 2:26, 27) Tthiri nla ntakiheryo nuulupale na okhaliherya mareheryo a Yehova!
14 Nave-tho, muttitthi muulupale onnikhaliherya vanceene muteko ola wa maKristau oowoottihiwa yaawo nlelo ari valaponi ni anihoolela mulokiheryo olelo-va. (Mmusome Zakariya 8:23.) Khula mmosa onrowa okhaliherya sai marehereryo a Yehova? Enamuna emosa, ori owiiwelela ale anihoolela. (aHéb. 13:7, 17) Nto itheneeri iya, sinnikhaliherya mmulokoni mwahu. Niireke moota onaalavula ahu axitokweene onnivaha nttittimiho na muteko othanleliwe aya? Ninniwiixuttiha aniihu waattittimiha axitokweene awo oororomeleya ni wira okathi anixankiheya aya yaavekeleke nikhaliheryo na mBiibiliyani? Nave niireke ninnivaanela ni emusi ahu moota woovaha musurukhu ahu wira nikhaliherye muteko onivariwa olumwenku wotheene? (Mir. 3:9; 1 aKor. 16:2; 2 aKor. 8:12) Niireke ninnoona okhala eparakha wiirela mpantta olokiherya Esalau ya Omwene? Munepa wootteela wa Yehova onnikhaliherya saana opuro okhanle nttittimiho ni wuuraana. Munepa owo, onninikhaliherya ovilela mahiku ala ookiserya.—Yes. 40:29-31.
NIKHALEKE MOOVARIHANA NI MASU AHU
15. Xeeni vanitthuneya ahu owana ekhotto wira nikhaleke moovarihana ni yoolakela ya Yehova?
15 Nto, wira nivilele ni ovikaniha otthara mulokiheryo wa Yehova, nihaana ovikaniha okhalaka moovarihana ni masu anilaleya ahu wira ‘niphaveleke othanla itthu sinasivela Apwiya’. (aÉf. 5:10, 11) Mwaha wa ohimalela wahu, ni omananiha Satana onipaka awe, ni olumwenku ola wootakhala, ikwaha sinceene ninniwana ni soohapuxa soohiloka mookumini mwahu. Akina a nyuwo anna ni arokora khula nihiku munniwanana mixankiho suulupale wira nvikanihe wataana ni Yehova. Eyo enooniherya omphenta wanyu owo. Nto muhitthikele ottuli! Okhala moovarihana ni soolakela sa Yehova, onrowa onivaha ohakalala ni wooniherya wira okokhorela wahu wookhalana efaita yuulupale.—1 aKor. 9:24-27.
16, 17. (a) Napaka etampi yuulupale niireke exeeni? (b) Ninrowa ottottela sai mureerelo yowiiraneya ya Anne?
16 Nto niireke exeeni akhala wira noopaka etampi yuulupale? Nvekele nikhaliheryo moohipisa. Wiipithiha yoottheka, onrowa otepiha mixankiho sanyu. Muupuweleke wira, Davidi aalavunle wira okathi ahaahimmye awe soottheka sawe, ‘makhuva awe yanittèttheya, upulelaka nukhuwela mahiku othene’. (Esal. 32:3) Tthiri, okhuwa soottheka wala itampi onniwerya ohonona muupuwelo ni omunepani; masi ‘ole onihimya, attharuwaka, onnimoreliwa ikharari’.—Mir. 28:13.
17 Nkahaya moone ntakiheryo na Annea. Okathi Anne aarina awe iyaakha okhuma 10 mpakha 19, owo aari ntoko pioneero. Masi, aahipacerya okhalana mweettelo woohiloka. Mweettelo owo waahimpahula. Owo onihimya so: “Yowuupuxerya ya murima aka yaanikivaha mulattu. Okathi wotheene kaakhala ooriipiwa murima”. Exeeni owo aapanke awe? Owo oolavula wira nihiku nimosa omuthukumanoni, aahithokoreriwa saana Yakobo 5:14, 15. Anne aahoona wira aatthuneya okhaliheriwa, nto aahirowa waavekela axitokweene nikhaliheryo. Uupuwelaka etthu yiiranen’ye, owo onihimya so: “Soolepa iye, tthiri suupuxeriwe ni Yehova wira siweryeke onipenuxa. Murette khonikhweya olya, masi owo onnipenuxa. Kahiiwelela miruku sa soolepa iye, nto saahikikhaliherya”. Vano soovira iyaakha sinceene, nto Anne oophwanya ikuru sa oluttuweliwa omurumeela Yehova ni okhalana yowuupuxerya ya murima yooloka.
18. Nto yoolakela ahu ekhale opaka exeeni?
18 Tthiri eparakha yuulupale mahiku ala ookiserya wiirela mpantta mulokiheryo wooloka wa Yehova! Nto, niilipihe ovaha efaita itthu somunepani moohihiyererya. Ohiya-vo, nivareke muteko vamosa ntoko emusi, nihicompelaka mithukumano wira nimukokhoreleke Yehova mmulokoni, owaavya saana atthu aniphavela wiiwa masu awe mmuttettheni mwahu, ni ovaha efaita soolya somunepani sinivahiwa ahu. Nave, naakhaliheryeke ale anihoolela, ni okhala moovarihana ni ihapari sinilaleya ahu. Niira siiso, khahiyo paahi ninrowa ovikaniha okhala mmulokiheryoni mwa Yehova, masi-tho khaninrowa wooceya ovara miteko sooreera!
[Enoota]
a Nsina nooturukiwa.
[Elatarato epaaxina 27]
[Elatarato epaaxina 29]
[Ekaaxa epaaxina 29]
MULOKIHERYO WA YEHOVA EPANTTA YA VALAPONI ONIHELA MUHINA:
1. Nikhuuru Noolamulela
2. Ikomisau sa Ifiliyali
3. Axitokweene oweetteetta
4. Axitokwene a mmulokoni
5. Miloko
6. Khula namalaleerya
[Elatarato]
[Elegenda epaaxina 31]
Mowiilipiha, mwaakhaliheryeke akina ovaha efaita wira awo-tho yiirele mpantta mulokiheryo muulupale wa Yehova