MWAHA WOOPACERYA | IHAPARI XEENI BIIBILIYA SIRINA AWE?

Xeeni Munitthuneya Anyu Omusuwela Biibiliya?

Biibiliya eliivuru yoosuwelexiwa molumwenkuni. Mwaha wa xeeni? Mwaha woowi owo onnihimya itthu soovareleya muteko. Owo ookhalana soohimmwa sa atthu ekeekhai ni wataana waya mukina ni mukhwaaya, nave-tho ni Muluku. Soohimmwa iyo sinniniixuttiha itthu soovareleya muteko, ni sookhweya wiiwexexa sikhanle ootaphuleliwa mattaava anivikana 100 ni wiiwexexiwa ni atthu anikhala opuro ni okathi woovirikana. Nave-tho malakiheryo a Biibiliya annivareleya muteko okathi wotheene.

Etthu yuulupalexa, okhala wira Biibiliya khahiyo paahi eliivuru enilavula sa Muluku, masi-tho eliivuru enikhuma wa Muluku. Biibiliya onnooniherya nsina na Muluku, mukhalelo awe, ni ele emwiirinhe opattuxa elapo ni apinaatamu. Nave-tho Biibiliya onnitthokiherya moota Satana onvaanyihale awe Muluku okhuma khalai, ni moota otakhala wotheene onirowa aya omala molumwenkuni. Nto omusoma Biibiliya ni muupuwelo wooloka, onoowiirihani okhalana waamini ni nlipelelo.

MBiibiliyani, sihaavo soohimmwa sihiniphwanyaneya opuro mukina. Mwa ntakiheryo, Biibiliya onnihimya itthu ntoko iya:

▪ Moota nipattuxiwe ahu ni nthowa naya vanihaawa ahu

▪ Ele Muluku opanke awe wira owoopole apinaatamu

▪ Ele Yesu opanke awe wa hiyo

▪ Ele enirowa okhumelela wa elapo ela ni apinaatamu

Xontte, musome ipaaxina sinittharelana wira moone ele Biibiliya onihimya awe.

[Elatarato epaaxina 3]

[Ekaaxa epaaxina 3]

IKEEKHAI VOOHIMYA SA BIIBILIYA

Muru wa Biibiliya: Moota Omwene wa Muluku a wiirimu onirowa aya ottikiherya exariya ni murettele valaponi

Siri muhina: Biibiliya ookhalana iliivuru 39 sa eHeeberi (ipantte vakhaani sa Aramaiko), ni 27 sa eGriki

Alipa oomulepa: Biibiliya olempwe ni atthu oowiiraka 40 mwa iyaakha soowiiraka 1.600, okhuma 1513 A.E.C. mpakha 98 E.C

Mattaava: Vano ootaphuleliwa, otheene wala mpantta aya, mattaava anivikana 2.500