Niireke Ihapari Iya Sinikhuma Tthiri wa Muluku?

1. Ti pani ori Mwaneene Biibiliya?

Ihapari sooreera soowi atthu anrowa okhalaka valaponi moohimala siri mBiibiliyani. (Esalimo 37:29) Biibiliya ookhalana iliivuru ikhaani sowiiraka 66. Muluku aarumale atthu 40 oororomeleya, wira amulepe Biibiliya. Iliivuru thanu soopacerya silempwale ni Moise iyaakha 3.500 sivinre. Nto eliivuru yookiserya, elempwale ni murummwa Yohani iyaakha 1.900 sivinre. Nto atthu awo yaalepa muupuwelelo awani? Muluku aanaatthokiherya alipa oomulepa Biibiliya orumeelaka munepa awe wootteela. (2 Samuweli 23:2) Atthu awo yaalepa miyupuwelo sa Muluku, ohiya miyupuwelo saya. Tivonto, Yehova tori Mwaneene Biibiliya.​—Mmusome 2 Timótheyo 3:16; 2 Pedru 1:20, 21.

Nwehe eviidiyu Ti Pani Ori Mwaneene Biibiliya?

2. Ninrowa okupali sai wira Biibiliya teekeekhai?

Ninnisuwela wira Biibiliya ta Muluku, mwaha woohimyaka vahinatthi, itthu kamosa-kamosa sa muhoolo. Pinaatamu khoniwerya opaka eyo. (Yoxuwa 23:14) Muluku Oowerya Sotheene paahi, toniwerya waahimeerya apinaatamu, itthu sa muhoolo.​—Mmusome Yesaya 42:9; 46:10.

Eyo enooniherya wira Biibiliya tthiri ta Muluku ni toovirikana ni iliivuru sikina. Nto aakhala aBiibiliya ibilyau sene mmattaava anivikana imiya sinceene. Okhuma khalai, Biibiliya khonivaanyiha sowiixuttiha sekeekhai sa siensia. Ohiya vo atthu ale 40 amulempe Biibiliya, khanivaanyihana.a Biibiliya onnooniherya-tho ophenta wuulupalexa wa Muluku, ni ookhalana ikuru sa orukunuxa mweettelo wa atthu wira okhale saana. Itthu iyo sekeekhai sowiiriha atthu anceene okupali wira Biibiliya tthiri Nuulumo na Muluku.​—Mmusome 1 aTesalonika 2:13.

Nwehe eviidiyu Ninrowa Okupali Sai Wira Biibiliya Teekeekhai?

3. Biibiliya onihimya exeeni?

Biibiliya onittittimiherya ihapari sooreera soowi: Muluku ookhalana yoolakela yooreera wa apinaatamu. Biibiliya onnihimya moota apinaatamu oopacerya yayelenle aya eparayiisu, ni moota elapo enirowa aya ottikiheriwa okhala eparayiisu.​—Mmusome Wisupulula 21:4, 5.

Mbiibiliyani aakhala-tho malamulo maalupale, miruku sooloka ni sooruma. Onnooniherya-tho moota Muluku siweettihale awe apinaatamu, nto itthu iyo sotheene sinnooniherya mikhalelo sooreera sa Muluku. Tthiri Biibiliya onimookhaliheryani omusuwela saana Muluku. Onnihimya-tho moota wookhala mpatthani a Muluku.​—Musome Esalimo 19:8, 12; Yakobo 2:23; 4:8.

4. Munrowa omwiiwexexa sai Biibiliya?

Ebroxura ela enimookhaliheryani omwiiwexexa Biibiliya, murumeelaka mananna Yesu aarumenle awe. Owo aaniromola ikwaha sinceene soolepa sa Biibiliya, aatthokiheryaka atthu “wira esuwelexe Solempwa”.​—Mmusome Luka 24:27, 45.

Khiivo yootepa oreera ovikana ihapari sooreera sinikhuma wa Muluku. Nnaamwi atthu akina ahicalelaka, akina ahiphavelaka wiiwa, nyuwo muhihiye omusoma Biibiliya. Okumi anyu woohimala wa muhoolo, onilipa ni omusuwela wanyu saana Muluku.​—Mmusome Yohani 17:3.